Koronavirisi’n w’a kun sran miliɔn 6: ?Biblu’n kɛn i sɔ’n ndɛ?

Nvlenvle’m be anuannzɛ m’ɔ nian sran’m be juejue yolɛ’n su’n (Organisation Mondiale de la Santé), ɔ seli kɛ lele mɔ afuɛ 2022, Mɛ i le 23 fá jú’n, nn koronavirisi’n w’a kun sran miliɔn 6 tra su. Sanngɛ kusu’n, Mɛ i le 5 su’n anuannzɛ kunngba’n seli kɛ be nga koronavirisi’n w’a kun be’n be tra ngalɛ’n lelele. Ɔ seli ekun kɛ, kɛ ɔ fɛ i afuɛ 2020 nun lele m’ɔ́ fá jú 2021 nun’n, “be kwlaa nga koronavirisi’n kunnin be’n be ju sran kɔe miliɔn 15.” ?Biblu’n kannin awlabɔɛ sa kɛ ngalɛ sa’n be ndɛ?

Biblu’n kannin tukpacɛ mɔ be sa ndɛndɛ’n be ndɛ

• Zezi seli kɛ “mɛn’n i awieliɛ blɛ nun’n,” ‘tukpacɛ mɔ be sa ndɛndɛ’n’ bé wá trú lika’n nun.—Liki 21:11; 2 Timote 3:1.

Ndɛ nga Zezi kannin’n su kpɛn su andɛ. Sɛ ɔ waan á sí nun kpa ekun’n, kanngan ndɛ nga nun Quel est le signe des « derniers jours », ou « temps de la fin » ?

Biblu’n fɔnvɔ e

• “Ɲanmiɛn m’ɔ fɔnvɔ sran sa kwlaa nun’n […] ɔ fɔnvɔ e sa kwlaa nga be tɔ e su’n be nun.”—2 Korɛntifuɛ Mun 1:3, 4.

Be nga be awlɛn su sran wie wuli’n be ɲannin fɔnvɔlɛ Biblu’n nun. Sɛ ɔ waan á sí nun kpa ekun’n, kanngan ndɛ nga’m be nun “Ɔ wla kwla gua ase: Like nga a kwla yo i dɔ nga su’n” ɔ nin “Like ng’ɔ kwla uka ɔ kpa’n.”

Biblu’n kan like ng’ɔ kwla nunnun sa sɔ mun mlɔnmlɔn’n i ndɛ

• ‘Maan ɔ Sielɛ’n i blɛ’n ju. Maan ɔ klun sa’n kpɛn su asiɛ’n su wa kɛ ɲanmiɛn su lɔ’n sa.’—Matie 6:10.

Ɔ ka kan’n, ‘Ɲanmiɛn Sielɛ’n’ wá yó maan ‘sran fi su seman kɛ: “N kpinndinman’’ kun. (Marki 1:14, 15; Ezai 33:24) Nian video ng’ɔ suan ?Ngue yɛ be flɛ i Ɲanmiɛn Sielɛ’n niɔn? naan w’a si ɲanmiɛn su lɔ awa sɔ’n ɔ nin like ng’ɔ́ wá yó’n.

É wlá ɔ fanngan kɛ a suan Biblu’n nun like. I liɛ’n, a nin ɔ awlofuɛ mun amún ɲán afɔtuɛ kpakpa ng’ɔ man be’n ɔ nin ninnge kpakpa ng’ɔ kan be ndɛ’n be su ye.