Asiɛ’n su saci—?I su ndɛ benin yɛ Biblu’n kan-ɔn?

Be flɛ bian kun kɛ Antonio Guterɛsi. Ɔ ti nvlenvle’m be anuannzɛ nga be flɛ i kɛ ONU i su kpɛn. Kɛ ɔ niannin fluwa nga awa wie’m be klɛli m’ɔ fiteli afuɛ 2022, Avrili i le 4 su’n nun’n, ɔ seli kɛ: “E ayeliɛ’n ti’n, ɔ cɛ kan’n asiɛ’n sáci. Nzue’n dí klɔ dandan mun. Lika’n ló dan. Aunmuan dandan’m bé fíta. Sran’m be su ɲanman nzue naan b’a nɔn. Ijre nin nnɛn wafawafa kpanngban bé núnnún. I kwlaa sɔ’n timan laliɛ nun ndɛ annzɛ ndɛ blɔlɛ. Siansifuɛ’m be waan sɛ awa’m b’a kaciman be sa’n, kɛ lika’n wá yó kɛ ngalɛ’n sa.”

Kpɛkun afuɛ 2022, Zuɛn i le 15 su’n, zronali kun seli kɛ: “Siansifuɛ’m be waan afuɛ nga bé bá lɛ’n be nun’n, [Etazinin lɔ] bo kɔe 423 bé sáci lika’n m’ɔ su lo dan’n ti. Afin kɛ lika’n lo kan’n, bo sɔ’m be cɛman naan b’a yra. Sa sroesroe nga bé jú’n be ti kɛ sa nga Biblu’n kan be ndɛ’n sa. Yɛle kɛ sin nin nzue bé dí lika’n, laglasi dandan’m bé kló, jenvie’m bé yí dan, yɛ lika ló klakla kpa.”—“Flooding Chaos in Yellowstone, a Sign of Crises to Come,” The New York Times.

?Sran’m bé kwlá síesíe asiɛ’n su ninnge’m be ye ekun? ?Sɛ ɔ ti sɔ’n, wan yɛ ɔ́ wá yó i sɔ liɛ’n niɔn? Nian ndɛ nga Biblu’n kan’n.

Biblu’n seli kɛ sran’m bé sáci asiɛ’n

Biblu’n se kɛ Ɲanmiɛn wá “núnnún be nga be saci asiɛ’n.” (Sa Nglo Yilɛ 11:18) Biblu’n nun ndɛ mma sɔ’n kle e like nsan:

1. 1. Sran’m bé sáci asiɛ’n i dan.

2. 2. Asiɛ’n i sacilɛ sɔ’n ɔ́ wíe.

3. 3. Ɲanmiɛn yɛ ɔ́ wá síesíe asiɛ’n su ninnge’m be ye-ɔ, nán klɔ sran mun-ɔn.

E ɲrun lɔ’n asiɛ’n yó kpa

Biblu’n se kɛ “asiɛ’n ká lɛ tititi.” (Akunndanfuɛ’n 1:4) Sran’m bé trán su titi.

• “Asiɛ’n yó sran kpa’m be liɛ, yɛ bé trán su tititi.”—Jue Mun 37:29.

Asiɛ’n su ninnge’m bé yó kpa ekun.

• “Aawlɛ flɛnnɛn’n nin asiɛ kee’n bé bó sró, yɛ lika kpɛtɛkplɛɛ’n i klun wá jɔ́, ɔ́ wá bó nɲrɛ kɛ safran’n sa.”—Ezai 35:1.