Nzue m’ɔ tɔ di lika’n—?I su ndɛ benin yɛ Biblu’n kan-ɔn?

MƐN wunmuan nun’n, lika wie’m be nun’n, nzue’n tɔ di lika’n, yɛ ɔ saci ninnge kpanngban. I su ndɛ wie mun yɛ:

• Afuɛ 2023, Utu i le nɲɔn su’n, fluwa kun seli kɛ: “Koko nun wa’n, nzue’n tɔli dan kpa Sinua’m be klɔ dan’n su lɔ. Nzue’n tɔli dan kɛ ngalɛ’n sa i afuɛ 140 yɛ. Kɛ ɔ fɛ i Fue cɛn lele fá jú Mlan cɛn’n, nzue ng’ɔ tɔli’n, ɔ juli milimɛtri 744,8.—AP News.

• Afuɛ 2023, Utu i le nsan su’n, fluwa kun seli kɛ: “Mlan cɛn nin Wue cɛn’n, seke nga be tɔnnin i dunman kɛ Kanun’n ti’n, nzue’n tɔli dan kpa Zapɔn i ngua lɔ lika’n nun. Yɛ aunmuan’n fitali kekle kpa kusu. Ɔ maan sɛ w’a kunman sran kaka’n, yɛle sran nɲɔn. . . Seke kunngba’n ti’n, nzue’n wá tɔ́ Taiwuanin i afiɛn lɔ lika m’ɔ ti okaoka lika’n nun lɔ. Nzue ng’ɔ́ tɔ́’n, ɔ́ jú milimɛtri 600.”—Deutsche Welle.

• Afuɛ 2023, Zuie i le 24 su’n, fluwa kun seli kɛ: “Nuvɛli Ekɔsu lɔ’n, Fue nin Mɔnnɛn cɛn’n nzue’n tɔli dan kpa. Ɔ maan ɔ dili lika’n. Kanada lɔ lika sɔ m’ɔ o jenvie nga be flɛ i Atlantiki i nuan lɔ’n, nzue’n tɔli dan kɛ ngalɛ’n sa i afuɛ 50 yɛ.”—BBC News.

?Sa sɔ’m be su ndɛ benin yɛ Biblu’n kan-ɔn?

Be ti ‘mɛn’n i awieliɛ blɛ’n’ i nzɔliɛ kun

Biblu’n flɛ blɛ nga e o nun yɛ’n kɛ “mɛn’n i awieliɛ blɛ.” (2 Timote 3:1) Zezi seli kɛ blɛ nga e o nun yɛ’n nun’n, é wá wún “ninnge sroesroe mun.” (Liki 21:11) Lika’n mɔ lo dan tratra su nin i wunsu sa uflɛ wie mun ekun be ti yɛ sa kɛ ngalɛ sa’m be ju-ɔ. Siɛn’n, sa sɔ’m be fu sran’m be nun tra laa’n, be ju kpɛ sunman, kpɛkun be ti kekle kpa.

E kwla lafi su kɛ lika’n yó kpa

Biblu’n se kɛ sɛ e wun sa sroesroe kpanngban andɛ’n, ɔ fata kɛ e lafi su kɛ lika’n su wa yo kpa. Afin Zezi seli kɛ: “Kɛ amun kusu amun ko wun ninnge sɔ mun’n, maan amun si kɛ Ɲanmiɛn Sielɛ’n w’a mantan koko.”—Liki 21:31; Matie 24:3.

Sa nga e wun be andɛ’n be kle kɛ ɔ ka kan’n, Ɲanmiɛn Sielɛ’n wá síesíe asiɛ’n su wa ninnge’m be ye. I wie yɛle kɛ ɔ́ wá yó maan nzue ng’ɔ tɔ’n su diman lika’n kun.—Zɔbu 36:27, 28; Jue Mun 107:29.

Sɛ a kunndɛ kɛ á sí wafa nga Ɲanmiɛn Sielɛ’n wá síesíe ninnge’m be ye’n, kanngan ndɛ nga be flɛ i kɛ “Qui sauvera la terre?” i nun.