Be nga be wun yo be kɛ be ngunmin yɛ be o sa’n b’a sɔn—?Ngue yɛ a kwla yo naan ɔ wun w’a yoman ɔ sɔ wie-ɔ?

• Fluwa kun seli kɛ: ‘Sran kaklaakla nga be o Etazinin lɔ’n, be nun kpanngban kpa be wun yo be kɛ be ngunmin yɛ be o sa. Be nga be le afuɛ blu-nin-mɔcuɛ (18) m’ɔ fa ju afuɛ ablaɔn-nin-nnun’n (25), yɛ be wun yo be sɔ kpa’n niɔn.’—Our Epidemic of Loneliness and Isolation: The U.S. Surgeon General’s Advisory on the Healing Effects of Social Connection and Community, 2023.

• “Anuannzɛ ng’ɔ nian sran’m be aunkpinndiɛ’n su’n (Organisation Mondiale de la Santé) seli kɛ w’a kpa sran wie mun naan be fa be ɲin sie be nga ɔ yo be kɛ be ngunmin yɛ be o sa’n, m’ɔ ti kɛ tukpacɛ yɛ ɔ o be su sa’n be su ndɛndɛ kpa. Ɔ fata kɛ sran sɔ’m be wla sran’m be fanngan kɛ be fa be wun mantan sran. Asa ekun’n, wafa nga be kwla uka nvlenvle’m be kwlaa be nunfuɛ nga be wun yo be sɔ’n be kpa’n ɔ fata kɛ be bu i akunndan.I sɔ yolɛ nun’n nán maan be yaci nvle nga sika ndɛ ti kekle’n nun’n be lɛ.—Organisation Mondiale de la Santé, 15 Novembre 2023.

Biblu’n man e afɔtuɛ kpakpa wie mɔ be kwla uka e naan e nin e wiengu mun y’a tran klanman’n. Afɔtuɛ sɔ’m be su falɛ’n kwla uka sran kun naan w’a yomɛn i kɛ i ngunmin yɛ ɔ o sa.

Biblu ndɛ wie mɔ be kwla uka wɔ’n

Ninnge nga ɔ ngunmin yɛ a yo be mɔ be ti a faman ɔ wun mantanman sran’n, nán yo be dan. Be nun wie mun yɛle rezo sosio’m be su kɔlɛ. Sanngɛ fa ɔ wun wla ninnge wie mɔ be ti’n, a kwla fa ɔ wun mantan sran’n be nun. I liɛ’n, a kwla tra sran kpa’m be janvuɛ.

• Afɔtuɛ nga Biblu’n man’n: “Janvuɛ kpa’n, ɔ kle kɛ ɔ klo sran blɛ kwlaa nun, yɛ kɛ lika’n jran ɔ su’n, ɔ kaci ɔ niaan.”—Ɲanndra Mun 17:17.

Uka ɔ wiengu mun. Sran ng’ɔ ukɛ i wiengu’n, ɔ nin i be afiɛn mantan kpa kpɛkun i bɔbɔ i klun jɔ kpa.

• Afɔtuɛ nga Biblu’n man’n: “Sɛ a cɛ sran like’n, ɔ klun jɔ kpa tra kɛ be cɛ wɔ like’n.”—Sa Nga Be Yoli’n 20:35.

Kɔ e ɛntɛnɛti lika’n nun lɔ. Afɔtuɛ kpakpa wie mɔ be fin Biblu’n nun mɔ be kwla uka wɔ naan w’a tra sran kpa’m be janvuɛ’n, be o lɔ.