?Alɛ su wa tɔ nvlenvle nga be o asiɛ wunmuan’n nun’n be afiɛn?—?I su ndɛ benin yɛ Biblu’n kan-ɔn?

Afuɛ ablasan (30) nga be sinnin lɛ’n be nun’n, sran kpanngban be buli i kɛ mɛn siefuɛ’m be ti be wun aniɛn, naan i kpa bɔbɔ’n be afiɛn su mantan kpa tra laa’n. Sanngɛ sa nga be juli koko nun wa’n, be kle kɛ ɔ timan sɔ.

• Zronali kun seli kɛ: “Sran kpanngban be klun titi be. Be se be wun kɛ ɔ cɛman naan alɛ nga w’a tɔ Gaza lɔ’n, w’a ju nvle nga be mantan be lɛ’n be nun wie. Afin Izraɛli nin Ɛzibola be su kun alɛ Liban nvle’n i awɛ’n su lɛ.”—Reuters, afuɛ 2024 Zanvie i le 6 su’n.

• Zronali kun seli kɛ: “Sran wie mɔ Iran nvle’n i siefuɛ’m be o be sin’n, be su fa alɛ wla lika fanunfanun nunfuɛ’m be sin. Asa’n, Iran awa’n kali lɛ boli bɔnbu nikleɛɛ’n i yolɛ bo ekun. Ng’ɔ o su ekun’n yɛle kɛ siɛn’n, Risi awa’n nin Sinua awa’n be nin Iran awa’n be bo w’a yo kun. I sɔ’n ti’n, srɛ kun abloki lɔ nvle onga mun nin Amlɛnkɛn’m be mɛn’n i nglo lɔ lika’n be nunfuɛ’m be kpa.”—The New York Times, afuɛ 2024, Zanvie i le 7 su’n.

• Nvlenvle’m be anuannzɛ nga be flɛ i ONU seli kɛ: “Alɛ ng’ɔ o Risi nin Ikrɛnin be afiɛn’n ti’n, Risi te saci Ikrɛnin nvle’n i tɛtɛ kpa.”—UN News, afuɛ 2024, Zanvie i le 11 su’n.

• Zronali kun seli kɛ: “Sinua’m be su ɲan be wun kpa, yɛ be alɛ ninnge’m be su sɔn kpa. Asa’n, Taiwaninfuɛ mun be su yi i nglo kɛ be klo be nvle’n i kpa tra laa’n. Asa ekun’n, Sinua mɛn’n i siefuɛ mun nin Etazinin mɛn’n i siefuɛ mun be timan be wun aniɛn. I sɔ’n kwla yo maan alɛ tɔ be afiɛn.”—The Japan Times, afuɛ 2024, Zanvie i le 9 su’n.

?Biblu’n kannin lika’n i tɛ mɔ w’a yo’n, i ndɛ? ?Alɛ su wa tɔ nvlenvle nga be o mɛn wunmuan’n nun’n be afiɛn?

Biblu’n boli sa nga be ju andɛ’n be jɔ

Biblu’n w’a kanman alɛ ng’ɔ o nvle wie’m be afiɛn andɛ’n, be nun kun i ndɛ trele sa. Sanngɛ ɔ seli kɛ e blɛ liɛ’n nun’n, alɛ tɔ́ nvlenvle’m be afiɛn, naan i sɔ’n ti’n ‘fɔundi’n tú asiɛ’n su.’—Sa Nglo Yilɛ 6:4.

Daniɛli fluwa’n seli kɛ “blɛ’n i awieliɛ lɔ’n,” nvle wie mɔ be le kwlalɛ kpa’n “bé súsú be wiengu bo.” Yɛle kɛ bé kplí naan b’a kwla sie mɛn wunmuan’n. I sɔ yolɛ nun’n, bé klé sran’m be kɛ be lɛ alɛ ninnge kaka. Asa ekun’n, bé fá “ninnge kpakpa” kpanngban yɛle kɛ sika kpanngban bé wlɛ́ i sɔ’n nun.—Daniɛli 11:40, 42, 43.

Ɔ cɛ kan’n, alɛ kun wá tɔ́

Biblu’n kle kɛ kwlaa naan lika’n w’a yo kpa’n, lika’n wá yó tɛ kpa. Afin Zezi seli kɛ: “Ɲrɛnnɛn’n yó dan. Kɛ ɔ fɛ i mɛn’n i bo bolɛ’n nun lele andɛ’n, i wunsu nin-a juman le.” (Matie 24:21) ‘Ɲrɛnnɛn dan’ sɔ’n i agualiɛ’n yɛle Aamagedɔn alɛ’n. Be flɛ alɛ sɔ’n ekun kɛ “Ɲanmiɛn m’ɔ Kwla Like Kwlaa Yo’n i cɛn dan’n nun” alɛ.—Sa Nglo Yilɛ 16:14, 16.

Aamagedɔn alɛ sɔ’n nun’n, be su nunnunman sran mun sekeseke. Sanngɛ alɛ sɔ’n ti’n, bé ɲán be ti. Alɛ sɔ’n ti’n, Ɲanmiɛn wá núnnún klɔ sran’m be awa mun sekeseke. Afin awa sɔ’m be ti’n, sran kpanngban be wuli alɛ’m be nun. Kɛ Aamagedɔn alɛ’n ko wie’n, lika’n tɔ́ fɔuun. Sɛ a kunndɛ kɛ á sí i su ndɛ wie mun ekun’n, kanngan ndɛ nga’m be nun:

• “?Ngue yɛle Aamagedɔn alɛ’n?”

• “Aamagedɔn alɛ’n ti ndɛ fɛ!”