?Kɛ nvlenvle’m be nunfuɛ’m be yia mɔ be kan ngowa’n i sɔ’n kwla yo maan sran’m be bo yo kun sakpa?—?I su ndɛ benin yɛ Biblu’n kan-ɔn?

Afuɛ 2024 nga nun’n, sran mɔ be fin nvle 206 nun’n b’a yia be su kan ngowa. Yɛ sran ko ju miliaa nnun be nian ninnge nga be yo be’n. Be flɛ bian kun kɛ Toma Baki. Ɔ ti ngowa kanlɛ dan sɔ’n i su nianfuɛ. Ɔ seli kɛ: “Ninnge nga é wá yó be blɛ sɔ’n nun’n ti’n, asiɛ’n sufuɛ’m be bo yó kun. Maan e yia sa nga ti yɛ be kpɛli ngowa kanlɛ dan sɔ’n i ba’n i nuan. Yɛle kɛ kannzɛ sran’m be ti fanunfanun’n, sanngɛ be kwla tran aniaan tranlɛ.”

?Ngowa kanlɛ sɔ’n kwla yo maan sran’m be bo yo kun? ?Sran’m be bo kwla yo kun sakpa?

?Ngowa kanlɛ sɔ’n kwla yo maan sran’m be bo yo kun?

Afuɛ nga nun ngowa kanlɛ dan sɔ’n ti’n, sran’m be kannin sa wie’m be ndɛ. Sa sɔ’m be ti’n, sran’m be bo timan kun. Sa sɔ’m be nun wie yɛle sran wie mɔ be bu be kpa tra wie mun, nin politiki ndɛ mun, nin Ɲanmiɛn sulɛ wafa wie’m be nunfuɛ mɔ be buman be sran’n, ɔ nin sa uflɛ wie mun ekun.

Sran’m be nian ninnge nga be yo be ngowa kanlɛ dan kɛ ngalɛ’n sa be bo be fa yiyi be ɲin su. Sanngɛ sa nga sran’m be yo be blɛ sɔ’n nun’n, ɔ kle kɛ sran’m be bo timan kun kaan sa.

Biblu’n kannin sran’m be ayeliɛ’n i ndɛ. Ɔ kle kɛ be ayeliɛ sɔ’n ti yɛ be bo kwlá yoman kun-ɔn. (2 Timote 3:1-5) Sɛ a klo kɛ á sí ndɛ sɔ’n nun kpa ekun’n, kanngan ndɛ nga nun: “?Biblu’n dun mmua kannin andɛ sran’m be ayeliɛ’n i ndɛ?”

Sran’m bé bó yó kun sakpa

Biblu’n kle e kɛ cɛn wie lele’n, klɔ sran’m be kwlaa bé bó yó kun. E kwla lafi ndɛ sɔ’n su. Ɔ se kɛ “Ɲanmiɛn Sielɛ’n” mɔ yɛle i awa m’ɔ o ɲanmiɛn su lɔ’n, yɛ ɔ́ wá yó maan i sɔ liɛ’n yó ye-ɔ.—Liki 4:43; Matie 6:10

Zezi Klisi m’ɔ ti Ɲanmiɛn Sielɛ’n i su Famiɛn’n wá yó maan sran’m be kwlaa bé dí fɔundi. Ɲanmiɛn Ndɛ’n waan:

• “Sran kpa’m bé bó nɲrɛ kɛ waka sa, yɛ fɔundi’n yó dan.”—Jue Mun 72:7.

• “Ɔ́ dé yalɛfuɛ m’ɔ kpan kunndɛ ukalɛ’n. . . Ɔ́ dé be be nga be kle be yalɛ’n nin nzaje sa yofuɛ’m be sa nun.”—Jue Mun 72:12, 14.

Like nga Zezi kleli sran mun ti’n, sran kpanngban mɔ be fin nvle 239 nun’n be bo w’a yo kun. Yɛle Zoova i Lalofuɛ mun. Biblu’n nun like mɔ Klisifuɛ sɔ’m be suannin’n ti’n, be nin be wiengu’m be tran klanman. Fluwa Sasafuɛ Tranwlɛ’n kun kɛnnin i sɔ liɛ’n i ndɛ. Ɔ suan “E kwla wla sran kpɔlɛ’n i ase.”