?Wafa sɛ yɛ fɔundi trán asiɛ wunmuan’n su-ɔ?

Ndɛ nga Biblu’n kan’n

Nán klɔ sran mun yɛ bé yó maan fɔundi trán asiɛ’n su-ɔ. Ɲanmiɛn Sielɛ’n mɔ Zezi ti i famiɛn’n, yɛ ɔ́ wá yó i sɔ liɛ’n niɔn. Nian ninnge ɲɛnmɛn nga awa sɔ’n wá yó be’n.

1. Ɲanmiɛn wá yó maan “alɛ kunlɛ’n wie asiɛ wunmuan’n su.” Ɔ maan nda ng’ɔ tɛli i kɛ ɔ́ yó maan ‘asiɛ’n su wa’n, be nga i klun jɔ be wun’n, be wun jɔ́ be’n,’ ɔ́ kpɛ́n su.—Jue Mun 46:9; Liki 2:14

2. Ɲanmiɛn Sielɛ’n wo ɲanmiɛn su lɔ, yɛ ɔ́ wá síe asiɛ wunmuan’n. (Daniɛli 7:14) Andɛ’n, sran wie’m be klo be nvle’n dan tratra su. Yɛ i sɔ’n kpɛ alɛ kaka ba. Sanngɛ kɛ Ɲanmiɛn Sielɛ’n wá síe asiɛ’n, sran’m be kwlaa bé yó nvle kunngba i nunfuɛ. Ɔ maan fɔundi trán asiɛ wunmuan’n su.

3. Zezi m’ɔ ti Ɲanmiɛn Sielɛ’n i Famiɛn’n, be flɛ i ekun kɛ “Fɔundi Wlengbi.” Ɔ́ yó maan “fɔundi’n su wieman le.”—Ezai 9:6, 7.

4. Be nga be klo alɛ dilɛ’n, be su tranman Ɲanmiɛn i mɛn sɔ’n nun wie. Afin Ɲanmiɛn “kpɔ sran kwlaa ng’ɔ klo nzaje sa mun’n.”—Jue Mun 11:5; Ɲanndra Mun 2:22.

5. Ɲanmiɛn kle i sufuɛ mun wafa nga be kwla tran fɔun’n. I sɔ mɔ Ɲanmiɛn kle be’n ti’n, Biblu’n se kɛ: “Bé wá fá be tokofi mun bé yó tokpo, yɛ bé fá be cua mun bé yó wlɔsɔ. Nvle kun su manman tokofi su nvle uflɛ wun, yɛ be su suanman alɛ kunlɛ kun.”—Ezai 2:3, 4.

Dɔ nga su bɔbɔ’n, Zoova i Lalofuɛ miliɔn kaka mɔ be o mɛn wunmuan’n nun’n be nin be wiengu’m be tran fɔun. (Matie 5:9) Kannzɛ e aniɛn’m be ti fanunfanun naan e fin nvle 230 tra su nun’n, sanngɛ e kplinman su kɛ é fá tui é kó kún e wiengu.