?Ɲanmiɛn kaci aniɛn?
Ndɛ nga Biblu’n kan’n
Ɛɛn, Ɲanmiɛn kaci aniɛn. Sɛ ɔ wun kɛ sran’m b’a kaci be ayeliɛ’n i kusu ɔ kaci aniɛn. I wie yɛle kɛ laa’n, ɔ seli i nuan ijɔfuɛ kun kɛ ɔ kan ndɛ yɛ’n kle Izraɛlifuɛ mun. Ɔ seli kɛ: “Atrɛkpa’n, bé síe be su bé tíe, kpɛkun be kwlaa bé wlá be nzuɛn tɛtɛ’m be ase. Ɔ maan ɲrɛnnɛn nga be ayeliɛ tɛtɛ’m be ti’n n seli kɛ ń fá yí be su’n, n su fa yiman be su kun.”—Zeremin 26:3.
Biblu sunman nun’n, wafa nga be kacili ndɛ mma sɔ’n ɔ ti kɛ ɲrɛnnɛn nga Ɲanmiɛn waan ɔ́ fá yí Izraɛlifuɛ’m be su’n, ɔ yoli i nsisɔ sa. Ɔ ti kɛ nn Ɲanmiɛn fɔnnin naan ɔ su kaci i sa sa. Sanngɛ Ebre nun’n, kɛ be se kɛ be kaci aniɛn’n i bo’n yɛle kɛ “be kaci ajalɛ.” Fluwa sifuɛ kun seli kɛ: “Kɛ sran kun kaci i ayeliɛ’n, Ɲanmiɛn kusu kaci sran sɔ’n i wun ajalɛ ng’ɔ fali’n.”
I yo, nán kɛ mɔ Ɲanmiɛn kwla kaci aniɛn ti yɛ ɔ́ káci aniɛn sa kwlaa nun-ɔn. I wie yɛle kɛ sa wie mɔ Biblu’n kan be ndɛ’n be nun’n, Ɲanmiɛn w’a kaciman aniɛn.
Balaki waan ɔ́ bó Izraɛlifuɛ’m be sannzan sanngɛ Ɲanmiɛn w’a kplinman su. Ɔ kpɛtɛli i lele sanngɛ Ɲanmiɛn w’a kaciman aniɛn.—Kalɛ 23:18-20.
Kɛ Famiɛn Saili yoli sa tɛtɛ mun mɔ Ɲanmiɛn seli i kɛ ɔ su yoman famiɛn kun’n, w’a kaciman aniɛn kun.—1 Samiɛli 15:28, 29.
Ɲanmiɛn tali nda kɛ i Wa’n yó i ɲrun jranfuɛ tititi. W’a dun mmua w’a kan, ɔ su kaciman aniɛn kun.—Jue Mun 110:4.
?Biblu’n w’a seman kɛ Ɲanmiɛn kaciman?
Ɛɛn, Biblu’n kannin sɔ. Ɲanmiɛn seli kɛ: “N ti Zoova. N kaciman.” (Malasi 3:6) Asa’n, Biblu’n se kɛ Ɲanmiɛn kaciman “kɛ fɔnvɔ m’ɔ kaman lika kunngba nun’n sa.” (Zaki 1:17) Sanngɛ ndɛ sɔ’n ɔ nin ndɛ nga Biblu’n kan m’ɔ se kɛ Ɲanmiɛn kaci aniɛn’n be sansanman be wun. Kɛ be se kɛ Ɲanmiɛn kaciman’n i bo’n yɛle kɛ i nzuɛn’n nin i mmla m’ɔ taka klolɛ’n nin sa nuan su sɛsɛ yolɛ’n be su’n be kaciman. (Mmla’n 32:4; 1 Zan 4:8) Sanngɛ ndɛ ng’ɔ kan kle sran mun’n, i liɛ’n ɔ kwla kaci. I wie yɛle kɛ blɛ wie nun’n kɛ Davidi kɔ́ alɛ kunlɛ’n, Zoova seli i kɛ ɔ yo like kun. Sanngɛ i kpɛ nɲɔn su ng’ɔ́ kɔ́’n, ɔ seli i kɛ ɔ yo like uflɛ. Sanngɛ alɛ nɲɔn sɔ’m be nun’n, ɔ kwlɛli i kpɔfuɛ mun.—2 Samiɛli 5:18-25.
?Yilɛ mɔ Ɲanmiɛn yili klɔ sran mun’n, ɔ yo i nsisɔ?
Cɛcɛ. Sanngɛ ng’ɔ yo i nsisɔ’n yɛle kɛ sran kaka be bumɛn i akunndan yɛ be kaci be sin si i. Nowe blɛ su’n, ka naan Nzue Dan’n w’a tɔ’n sran’m be ayeliɛ’n ti tɛ dan. I ti’n, Biblu’n seli kɛ: “Yilɛ mɔ Zoova yili klɔ sran asiɛ’n su’n, ɔ yoli i nsisɔ, yɛ ɔ yoli i ya dan.” (Bo Bolɛ 6:6) Ndɛ mma nga nun’n, kɛ be se kɛ “ɔ yoli i nsisɔ’n,” Ebre nun’n i bo’n yɛle kɛ “ɔ kacili aniɛn.” Kɛ mɔ blɛ sɔ’n nun’n sran’m be dan lika be klun yo wi’n i ti yɛ Ɲanmiɛn kacili be wun akunndan ng’ɔ bu’n niɔn. (Bo Bolɛ 6:5, 11) Kannzɛ bɔbɔ sran’m b’a kaciman be ayeliɛ tɛtɛ’n, sanngɛ klɔ sran’m be wunmuan’n be wun akunndan ng’ɔ bu’n w’a kaciman. Afin kɛ Nzue Dan’n tɔli’n, ɔ yoli maan klɔ sran’m be osu’n w’a nunnunman. Yɛle kɛ ɔ deli Nowe nin i awlobofuɛ mun.—Bo Bolɛ 8:21; 2 Piɛli 2:5, 9.