?Kɛ Zoova i Lalofuɛ nɲɔn be san nun’n, be di mmla wie’m be su?

Zoova i Lalofuɛ’m be lafi su kɛ mmla nin afɔtuɛ nga be o Biblu’n nun’n, be kwla uka e naan ajalɛ nga é fá’n b’a jɔ Ɲanmiɛn klun naan e bɔbɔ y’a ɲan su ye wie. (Ezai 48:17, 18) Nán e yɛ e kpɛli mmla sɔ mun-ɔn. Sanngɛ e di be su. Nian wafa nga mmla sɔ’m be nun wie’m be kwla uka sran nɲɔn mɔ b’a san nun’n.a

• Kɛ yasua kun nin bla kun be ko ja’n, nn b’a ja. (Matie 19:6) Ka naan Zoova i Lalofuɛ nɲɔn b’a ja’n, be dun mmua san nun naan bé nían be wiengu nzuɛn’n. Ɔ maan i sɔ blɛ liɛ’n ti cinnjin kpa be ɲrun.

• Saan sran nɲɔn mɔ b’a yo kaklaka’n, yɛ be kwla se kɛ bé sán nun naan bé já-ɔ. I sɔfuɛ’m be “timan bakan kun.” Ɔ maan nán kɛ be konvi sɔ bla annzɛ bian ngunmin ti yɛ be ja-ɔ.—1 Korɛntifuɛ Mun 7:36.

• Be nga Ɲanmiɛn Ndɛ’n man be atin kɛ be kwla ja bla annzɛ bian’n, be yɛ be kwla san nun-ɔn. Sran wie’m b’a yra be yi annzɛ be wun mun awa’n i ɲrun. Sanngɛ Ɲanmiɛn ɲrun’n, be leman atin be yraman. Afin i mmla’n nun’n, saan sran nga i wun’n w’a kunndɛ bla i bo annzɛ i yi’n w’a kunndɛ bian i bo’n, yɛ ɔ kwla se kɛ be yra-ɔ.—Matie 19:9.

• Biblu’n waan ɔ fata kɛ Klisifuɛ’m be ja sran ng’ɔ ti Ɲanmiɛn i sufuɛ’n. (1 Korɛntifuɛ Mun 7:39) Ɲanmiɛn i sufuɛ nga be kɛn i ndɛ’n, nɛ́n i yɛle sran ng’ɔ si kɛ Zoova i Lalofuɛ’m be ndɛ’n ti nanwlɛ sa ngbɛn’n. Sanngɛ ɔ fata kɛ i sɔfuɛ’n yo sran mɔ be yoli i batɛmun m’ɔ ti Zoova i Lalofuɛ-ɔ. (2 Korɛntifuɛ Mun 6:14) Laa nun’n, Ɲanmiɛn seli i sufuɛ’m be titi kɛ be ja sran ng’ɔ lafi Ɲanmiɛn su kɛ be sa’n. (Bo Bolɛ 24:3; Malasi 2:11) Andɛ bɔbɔ’n, fluwa sifuɛ wie’m be wunnin kɛ sɛ be yo i sɔ’n, ɔ ti kpa.b

• Ɔ fata kɛ ba’m be ɲin yi be si nin be nin mun. (Ɲanndra Mun 1:8; Kolɔsufuɛ Mun 3:20) Sɛ ba nga be te o be si nin be nin be bo wun’n, be kunndɛ kɛ be nin sran kun bé sán nun’n, ɔ fata kɛ be di i su mmla nga be si nin be nin be kpɛli’n be su. I wie yɛle afuɛ nga ba’n kwla bo i sɔ yolɛ bo’n ɔ nin ninnge nga ɔ nin sran sɔ’n be kwla yo be blɛ sɔ’n nun’n be su mmla’n.

• Sɛ Zoova i Lalofuɛ nɲɔn be waan bé sán nun’n, be nian Biblu’n nun mmla’m be su naan b’a fa be tiaun ajalɛ. Afin Biblu’n se kɛ: “Sran kun bɔbɔ yɛ ɔ́ súɛ i trɔ’n niɔn.” (Galasifuɛ Mun 6:5) Asa’n sɛ be waan be nin sran kun bé sán nun’n, be usa Zoova i Lalofuɛ nga be ɲin w’a ti Ɲanmiɛn sulɛ’n nun’n be ngwlɛlɛ afɛ wie.—Ɲanndra Mun 1:5.

• Andɛ’n, kɛ yasua kun nin bla kun be san nun’n, ninnge nga be yo’n be ti sa tɛ dan Ɲanmiɛn ɲrun. I wie yɛle kɛ Biblu’n se kɛ ɔ fataman kɛ i sɔ blɛ liɛ’n nun’n be la. Sanngɛ nɛ́n i ngba-ɔ. Ɔ fataman kɛ be yo sa sukusuku mun. I wie yɛle kɛ nán be fa be sa be kpakpa be yasua lika annzɛ be bla lika i wun. Nán be fa be yasua lika be wla be nuan nun annzɛ be fa wla be wuntuan’n nun. Asa’n, nán be tafitafi be bla lika’n nun. (1 Korɛntifuɛ Mun 6:9-11) Ka naan yasua kun nin bla kun b’a ja’n, ɔ fataman kɛ be yo ninnge wie mɔ be ti’n be konvi sɔ́ bian annzɛ bla. Kannzɛ be yoli sɔ naan b’a laman bɔbɔ’n, sanngɛ i sɔ’n ti ‘sa kain’ Ɲanmiɛn ɲrun, yɛ ɔ kpɔ i sɔ liɛ’n kpa. (Galasifuɛ Mun 5:19-21) Asa ekun’n, ɔ fataman kɛ be kan yasua nin bla nna’n i ndɛ. Afin i sɔ’n ti “be nvialiɛ nun lika’m be su aɔwi dilɛ.” Yɛ Biblu’n bu i sɔ yolɛ’n i fɔ.—Kolɔsufuɛ Mun 3:8.

• Klɔ sran’n i awlɛn’n ti tɛ kpa. (Zeremin 17:9) Ɔ kwla yo maan sran kun yo ninnge wie mɔ i bɔbɔ si kɛ be timan kpa-ɔ. Kɛ Zoova i Lalofuɛ nɲɔn be san nun’n, kɛ ɔ ko yo naan be awlɛn’n w’a lakaman be’n ti’n, ɔ fataman kɛ be ngunmin be wɔ lika nga be kwla yo sa tɛ’n be nun. Ɔ fata kɛ sran wie mun annzɛ sran kunngba bɔbɔ ko sunman be titi. (Ɲanndra Mun 28:26) Sɛ Klisifuɛ kun waan ɔ́ já bla annzɛ bian’n, ɔ fata kɛ ɔ niɛn i wun su ɛntɛnɛti su lika nga sran’m be kɔ lɔ be ko kunndɛ sran naan be nin i bé sán nun’n be lika. Afin sɛ ɔ nin sran kun m’ɔ simɛn i kpa’n be san nun’n, i bo’n gúa tɛ mɛ́n i.—Jue Mun 26:4.