?Wafa sɛ yɛ Zoova i Lalofuɛ’m be bu be wun yralɛ’n niɔn?
Aja’n nin be wun yralɛ’n i su ndɛ nga Biblu’n kan’n, i su yɛ e di-ɔ. Aja’n fin Ɲanmiɛn. Ɔ kunndɛ kɛ, kɛ yasua kun nin bla kun be ko ja’n be tran likawlɛ titi, nán maan be titi nun. Like kunngba nga ti yɛ be kwla yra’n yɛle kɛ bian’n w’a kunndɛ bla i yi bo annzɛ bla’n w’a kunndɛ bian i wun bo.—Matie 19:5, 6, 9.
?Zoova i Lalofuɛ’m be uka be nga be aja’n su saki’n?
Ɛɛn. Wafa nga e yo i sɔ’n sɔnnin, i wie yɛ:
E fluwa mun nin e video mun. Ɔ ju wie’n e kan aja’n i su ndɛ e fluwa nin video nga e yi be’n be nun. Ndɛ sɔ’m be uka be nga be le bla annzɛ bian’n naan be aja’n w’a yo fɛ. Ɔ uka be nga be aja’n su wa saci mlɔnmlɔn’n be wie. Ndɛ sɔ’m be wie yɛle “Tenir son engagement envers son conjoint,” nin “Comment pardonner,” ɔ nin “Comment rétablir la confiance entre conjoints.”
E aɲia mun. E aɲia kanngan nin e aɲia dandan’m be bo’n, e kan Biblu’n nun ndɛ nga be kwla uka be nga be le bla nin bian’n be ndɛ.
Asɔnun kpɛnngbɛn mun. Asɔnun kpɛnngbɛn’m be uka yasua mun nin be yi mun. Be fa be ɲin sie i Biblu’n nun ndɛ mma wie’m be su. Be nun kun yɛle Efɛzifuɛ Mun 5:22-25.
?Sɛ Zoova i Lalofuɛ kun waan ɔ́ yrɛ́ i yi’n annzɛ i wun’n asɔnun kpɛnngbɛn’m be jrɛn i sin?
Cɛcɛ. Kannzɛ ndɛ o yasua kun nin i yi be afiɛn naan be se asɔnun kpɛnngbɛn’m be kɛ be wa uka be’n, nán asɔnun kpɛnngbɛn mun yɛ ɔ fata kɛ be kle be ajalɛ ng’ɔ fata kɛ be fa’n niɔn. (Galasifuɛ Mun 6:5) Sanngɛ sɛ yasua kun yrɛ i yi’n annzɛ bla kun yrɛ i wun’n, kusu nn Biblu’n mɛnmɛn i atin kɛ ɔ yo sɔ’n, ɔ leman atin jaman sran uflɛ.—Matie 19:9.
?Sɛ yasua kun jaso i yi bo annzɛ bla kun jaso i wun bo’n wafa sɛ yɛ Zoova i Lalofuɛ’m be bu i sɔ liɛ’n niɔn?
Biblu’n wla be nga b’a ja’n be fanngan kɛ, kannzɛ bɔbɔ ndɛ o be aja nun’n sanngɛ maan be tran likawlɛ titi. (1 Korɛntifuɛ Mun 7:10-16) Sɛ be srɛ Ɲanmiɛn tankaan kpa naan be nian Biblu’n nun mmla’m be su be nanti’n yɛ sɛ be klo be wiengu kpa’n, bé kwlá síesíe be afiɛn ndɛ mun.—1 Korɛntifuɛ Mun 13:4-8; Galasifuɛ Mun 5:22.
Sanngɛ sa kekle nga e su wa bobo be su yɛ’n be nun’n, be nga b’a ja’n be nun kun kwla fa ajalɛ kɛ ɔ́ jáso i wiengu kun’n i bo:
Yasua’n annzɛ bla’n i ɲinfu, ɔ niɛnmɛn i awlobo’n i lika.—1 Timote 5:8.
Yasua’n annzɛ bla’n yo i wiengu’n i like yaya.—Jue Mun 11:5.
Yasua’n annzɛ bla’n tɛnndɛn i wiengu kun’n i ɲrun tɛtɛ kpa Zoova sulɛ nun. Ɔ kwla yo kɛ yasua’n miɛn i yi’n annzɛ bla’n miɛn i wun’n kɛ nán maan ɔ nian Zoova i mmla wie’m be su nanti. I lɛ nun’n, sran nga be miɛn i sɔ’n kwla fa ajalɛ kɛ ɔ́ jáso i wiengu kun’n i bo. Sɛ ɔ yo sɔ’n, ɔ́ klé kɛ ‘i ɲin yi Ɲanmiɛn tra klɔ sran.’—Sa Nga Be Yoli’n 5:29.