Gbanflɛn kun i sa w’a mian, afin w’a siesiemɛn i blɛ’n kpa. Yɛle kɛ kwlaa naan w’a nian fluwa nun’n ɔ dun mmua toli balɔn, yɛ ɔ niannin televiziɔn.

GBANFLƐN NIN TALUA’M BE KOSAN MUN

?Wafa sɛ yɛ n kwla siesie min blɛ’n niɔn?

?Ngue ti yɛ ɔ fata kɛ a siesie ɔ blɛ’n niɔn?

Blɛ’n ti kɛ sika sa. Sɛ a saci i’n, blɛ ng’ɔ sa wá míɛn i wun’n, ɔ́ yó kekle mán wɔ. Sanngɛ sɛ a siesie ɔ blɛ’n, á kwlá yó ɔ klunklo ninnge wie mun. Kpɛkun á dí aklunjuɛ!

Biblu’n se kɛ: “Like nga fuɛnfuɛ’n i anwlɛn o su’n, ɔ nyɛn-mɛn i le. Sran ng’ɔ ti juejue’n i liɛ’n, ɔ yo i like liɛ’n lele ɔ nyan su like.”—Nyanndra Mun 13:4.

Afɔtuɛ nga a kwla nanti su’n: Sɛ a siesie ɔ wun’n, á kwlá ɲán blɛ yó ninnge kpanngban.
Sɛ a siesie ɔ blɛ’n, kɛ á ɲín kɔ́’n ɔ́ wá yó ɔ ye kpa. I kpa bɔbɔ’n, ɔ́ úka ɔ naan ɔ junman’n w’a saciman ɔ sa nun. ?Sɛ a ti susute dan kun su kpɛn’n naan cɛn kwlaa ɔ junman difuɛ kun baman dɔ su’n, ɔ́ yó ɔ fɛ?

Biblu’n se kɛ: “Sran ng’ɔ ti nanwlɛfuɛ like kaan nun’n, ɔ ti nanwlɛfuɛ like dan nun. Yɛ sran ng’ɔ timan nanwlɛfuɛ like kaan nun’n, ɔ timan nanwlɛfuɛ like dan nun.”—Liki 16:10.

Afɔtuɛ nga a kwla nanti su’n: Wafa nga a siesie ɔ blɛ’n, ɔ yi sran wafa nga a ti’n i nglo.

Sanngɛ nanwlɛ, blɛ i siesielɛ’n timan pɔpɔ. Maan e fa e ɲin e sie i sa nga be kwla tanndan e ɲrun’n be su.

Sa #1: Ɔ janvuɛ mun.

Be flɛ talua kun kɛ Sɛntia. Ɔ seli kɛ: “Sɛ min janvuɛ’m be se min kɛ e nin be e fite e wɔ lika wie’n, kpɛ sunman’n kannzɛ bɔbɔ n le’a blɛ’n, sanngɛ n kplin su. Afin n se min wun kɛ sɛ n sa min sin awlo’n ń kwlá dí min junman’n, ndɛndɛ. Sanngɛ ɔ yoman sɔ titi.”

Sa #2: Be ɲin su yiyilɛ ninnge mun.

Be flɛ talua kun kɛ Ivi. Ɔ seli kɛ: “Televiziɔn nianlɛ’n fa blɛ kaka. Afin flimun’m be fɛ’n ti’n, a kwlá faman ɔ ɲin siemɛn i like uflɛ su.”

Be flɛ talua kun kɛ Mari. Ɔ seli kɛ: “N fa dɔ kaka n kan min tablɛti nun ngowa. Ɔ maan kɛ wunmiɛn nunman min bateri nun kun’n, ɔ yo min ya kpa.”

Sa #3: Kɛ e su ninnge’m be yolɛ’n i siɛn’n.

Be flɛ talua kun kɛ Bɛti. Ɔ seli kɛ: “N su suklu lɔ junman nga be man e’n nin ninnge uflɛ wie mun, be yolɛ’n be siɛn. Ninnge nga be timan cinnjin’n yɛ n yo be-ɔ. Kusu nn, n nin a wieman min junman’n i di. Nanwlɛ, i sɔ’n timan kpa.”

Gbanflɛn kun di aklunjuɛ afin ɔ siesieli i blɛ’n i kpa. Yɛle kɛ ɔ dun mmua suan like, i sin ɔ di suklu lɔ junman nga be fa mɛnnin i’n, kpɛkun ɔ le blɛ to balɔn. — Sɛ a siesie ɔ wun’n, á kwlá ɲán blɛ yó ninnge **kpanngban.**

Like nga a kwla yo’n

Ninnge ng’ɔ fata kɛ a yo’n, klɛ be sie. Lemɔcuɛ kwlaa’n, awlo lɔ junman nin nga be fa man wɔ suklu lɔ kɛ a di’n, ɔ nin blɛ nga á fá yó be’n, klɛ be sie.

Biblu’n se kɛ: “Amun wun ninnge nga be ti cinnjin kpa’n be wlɛ.”—Filipufuɛ Mun 1:10.
Kɛ a le blɛ’n, ninnge nga a yo’n klɛ be sie. Ninnge sɔ’m be wie yɛle ɛntɛnɛti su kɔlɛ’n nin televiziɔn nianlɛ’n. Kpɛkun lemɔcuɛ kwlaa nun’n, dɔ nga a di i ninnge sɔ’m be yolɛ’n nun’n, klɛ be sie.

Biblu’n se kɛ: ‘Amun nanti ngwlɛlɛ su. An fa amun blɛ’n yo ninnge nga be ti cinnjin’n.’—Kolɔsufuɛ Mun 4:5.
Bu akunndan naan fa ajalɛ. Ninnge nga a klɛli be sieli’n, bu be su akunndan nian. ?Blɛ nga a sieli i kɛ á fá yó ninnge cinnjin mun’n, ɔ ti kaan? ?Annzɛ ɔ fata kɛ a kpɛ nga be timan cinnjin’n be blɛ liɛ’n su?

Afɔtuɛ nga kwla uka-ɔ: Ninnge ng’ɔ fata kɛ a yo be cɛn ba kun nun’n, klɛ be sie. Kpɛkun kɛ a ko wie like kun yo’n, jɛ i bo.

Biblu’n se kɛ: “Sran ng’ɔ́ yó like-ɔ ɔ sunnzun i klun nan ɔ’a yo’n, ɔ́ dí alaje.”—Nyanndra Mun 21:5.
Nanti ajalɛ nga a fali’n su. Sɛ ɔ janvuɛ’m be yia wɔ naan ninnge cinnjin wie’m be yolɛ’n ti’n w’a ɔman’n, ɔ ti su. Sɛ a yo sɔ’n á ɲán blɛ kpanngban yó like uflɛ, kpɛkun á dí aklunjuɛ.

Biblu’n se kɛ: “Amun di junman kekle. Nán amun yo fuɛnfuɛ.”—Rɔmunfuɛ Mun 12:11.
Mian ɔ ɲin naan i sin’n w’a di aklunjuɛ. Be flɛ talua kun kɛ Tara. Ɔ seli kɛ: “Ɔ ju wie’n, ninnge ng’ɔ fata kɛ n yo’n, n yo be nun nɲɔn. Kpɛkun n se min wun kɛ nga liɛ’n ń má kó nían televiziɔn miniti 15 cɛ naan sɛ ɔ yo’n m’an guɛ i bo. Sanngɛ kɛ ń fá wún nun-ɔn, m’an di dɔ nɲɔn!”

Like ng’ɔ fata kɛ a yo’n yɛle kɛ sɛ a sieli blɛ kun kɛ á fá yó like kun’n, dun mmua wie i yo kwlaa naan w’a yiyi ɔ ɲin su. Sɛ a yo sɔ’n á dí aklunjuɛ kpa.

Biblu’n se kɛ: “Like ng’ɔ ti kpa man sran’n, yɛlɛ aliɛ dilɛ nin nzan nɔnlɛ, ɔ nin junman bɔ be di’n i nuan like nyanlɛ.”—Akunndanfuɛ’n 2:24.

Ndɛ ng’ɔ wiengu’m be kan’n.

Be flɛ talua kun kɛ Cɛyɛnin. Ɔ seli kɛ: “Kɛ ɔ ko yo naan m’an fa min ɲin m’an sie i like ng’ɔ fata kɛ n yo’n i su kpa’n, n klɛ n sie. Asa ekun’n, n sie blɛ kan n fa lo wunmiɛn. I sɔ’n uka min naan m’an wun like trele ng’ɔ fata kɛ n fa min ɲin n sie su kpa’n i wlɛ.”

Be flɛ gbanflɛn kun kɛ Samiɛli. Ɔ seli kɛ: “Kɛ sran’m be se min kɛ n yo like kun’n, sɛ n kwlá yoman’n n di i nanwlɛ n kle be. Nanwlɛ, i sɔ yolɛ’n timan pɔpɔ, sanngɛ kɛ n kan sa trele nga ti yɛ n kwlá yoman like sɔ’n, be faman ya.”

Be flɛ talua kun kɛ Bluklinin. Ɔ seli kɛ: “Laa’n, ninnge ng’ɔ fata kɛ n yo’n, be sɔnnin kpa. I sɔ’n ti’n n lafiman, yɛ n kpinngbinman min wun. Sanngɛ cɛn nga n yo sɔ’n, kɛ lika’n cɛn’n min wun kpaja min kpa. N ma wunnin i wlɛ kɛ ɔ fata kɛ n nian min wun lika.”