?Ngue ndɛ yɛ Biblu’n kɛn i sran like manlɛ’n su-ɔ?
Ndɛ nga Biblu’n kan’n
Biblu’n wla e fanngan kɛ e man like klun ufue su. Kɛ e man sran like sɔ’n e bɔbɔ e klun jɔ, yɛ sran nga e mɛn i like’n i klun jɔ wie. (Ɲanndra Mun 11:25; Liki 6:38) Zezi seli kɛ: “Sɛ a cɛ sran like’n, ɔ klun jɔ kpa tra kɛ be cɛ wɔ like’n.”—Sa Nga Be Yoli’n 20:35.
?Sran like manlɛ wafa benin yɛ ɔ ti kpa-ɔ?
Kɛ e man sran like klun ufue su’n yɛ Ɲanmiɛn i klun jɔ-ɔ. Biblu’n se kɛ: “Like nga sran kun buli i akunndan kɛ ɔ́ fá mán’n, maan ɔ fa man. Nán maan ɔ yo i klunngbɔ su annzɛ mianlɛ su. Afin Ɲanmiɛn klo sran ng’ɔ man like aklunjɔɛ su’n.”—2 Korɛntifuɛ Mun 9:7.
“Ɲanmiɛn sulɛ m’ɔ ti kpa’n” i nunfuɛ mun be tu be klun be man sran like. (Zaki 1:27) Sran ng’ɔ ti be nga be sa w’a mian’n be wun ɲanman nun’n sɛ é kwlá sé’n ɔ nin Ɲanmiɛn be di junman likawlɛ. Ɲanmiɛn ɲrun’n ɔ ti kɛ sran sɔ’n i kalɛ o i su sa. (Ɲanndra Mun 19:17) Biblu’n se kɛ Ɲanmiɛn bɔbɔ ɔ́ yí mɛ́n i.—Liki 14:12-14.
?Sran like manlɛ wafa benin yɛ ɔ timan su-ɔ?
Like nga ti yɛ e man like’n ɔ ti cinnjin. I wie yɛle kɛ e kwla man like naan...
é fá e wun é klé.—Matie 6:2.
sran’m b’a cɛ e like wie.—Liki 14:12-14.
Sɛ e si kɛ like nga e fa man sran’n ɔ su fa yoman like kpa naan e fa mɛn i’n. I wie yɛle kɛ sɛ e man sran kun sika kɛ ɔ ko to mma sika su’n, annzɛ ɔ ko to drɔgi’n, annzɛ sɛ e si kɛ nzan nɔnlɛ’n kle i yalɛ naan e mɛn i sika kɛ ɔ ko to nzan’n ɔ timan kpa. (1 Korɛntifuɛ Mun 6:9, 10; 2 Korɛntifuɛ Mun 7:1) I wafa kunngba’n sɛ sran kun le sika niɛn i wun lika naan ɔ yoman sɔ’n, nán e yɛ é kó mɛ́n i sika-ɔ.—2 Tesalonikifuɛ Mun 3:10.
Sɛ like nga e man’n ti’n e kwlá nianman e awlofuɛ’m be lika’n. Biblu’n se kɛ ɔ fata kɛ awlobo kpɛn’m be nian be awlobo’n i lika. (1 Timote 5:8) I sɔ’n kle kɛ ɔ fataman kɛ sran uflɛ’m be ukalɛ ti’n i ɲin kpa i awlobofuɛ’m be su. Zezi seli kɛ be nga be nianman be si nin be nin mɔ b’a yo kpɛnngbɛn’n be lika’n, mɔ be se kɛ like nga be le i’n ‘ɔ ti Ɲanmiɛn liɛ mlɔnmlɔn’n’ be ayeliɛ’n timan kpa.—Marki 7:9-13.