Ezai

21 Be kan ndɛ nga be wɔ jenvie nuan aawlɛ flɛnnɛn’n:*+

Ɔ ba kɛ aunmuan dan m’ɔ tu ngua lɔ lika’n nun’n sa,

ɔ fin aawlɛ flɛnnɛn’n nun lɔ, ɔ fin mɛn kun m’ɔ yo sro’n i nun lɔ.+

 2 N wunnin sa sroesroe kun aolia nun:

Sran bo waka kpɛfuɛ’n ɔ su kpɛ i wiengu’m be bo waka,

yɛ like sacifuɛ’n ɔ su saci like.

Ee Elamun, jaso! Ee Medi,+ kɔ ko tɔ klɔ’n su!

Ń má yó maan fɛfɛlɛ nga i dunman nun ti’n sran’m be fɛfɛ’n, i kwlaa ɔ́ wíe.+

 3 I sɔ’n ti yɛ min wla w’a bo min wun dan’n niɔn.*+

N usu kɛ

bla mɔ w’a koto awuliɛ’n sa.

Min akunndan mɔ w’a sanngan dan’n ti’n, n kwlá tieman ndɛ.

Min wla mɔ w’a bo min wun dan’n ti’n, n kwlá wunman like.

 4 N leman awlɛn kun, srɛ dan m’ɔ kun min’n ti’n n usu.

Sɛnzɛ’n i tɔlɛ mɔ min ɲin wo i sin dan’n, siɛn’n ɔ yo maan n usu.

 5 An siesie tabli’n, yɛ an siesie bia mun!

Amun di like, yɛ amun nɔn nzan!+

Sran dandan mun, amun jaso, amun gua ɲrɛn’n i

su ngo!

 6 Afin ndɛ nga Zoova kan kleli min’n yɛ:

“Kɔ ko sie klɔ sasafuɛ kun, yɛ maan ɔ kan like ng’ɔ wun i’n i ndɛ.”

 7 Kpɛkun ɔ wunnin alɛ kunlɛ kakaklolo kun mɔ nnɛn kpanngɔ wie mun be cuɛn’n,

ɔ nin alɛ kunlɛ kakaklolo kun mɔ aflunmun mun be cuɛn’n,

ɔ nin alɛ kunlɛ kakaklolo kun mɔ ɲɔnngɔnmin mun be cuɛn’n.

Ɔ niannin be kpa, ɔ boli i ɲin ase niannin be kpa.

 8 I sin’n, ɔ kpannin kɛ asɔmɔli sa, ɔ seli kɛ:

“Ee Zoova, wia nun’n n jran sasafuɛ tranwlɛ’n su titi,

kpɛkun kɔnguɛ kwlaa’n n jran min gladi dilɛ lika’n nun.+

 9 Amun nian like ng’ɔ su ba’n:

Yasua wie’m be o alɛ kunlɛ kakaklolo kun mɔ nnɛn kpanngɔ wie mun be cuɛn’n i nun!”+

I sin’n, ɔ kpannin kekle seli kɛ:

“W’a tɔ! Babilɔnin w’a tɔ!+

I amuin nga be sɛli be’n, be kwlaa b’a bubu b’a gua!”+

10 Ee, min nvle’n nunfuɛ mun, amun mɔ be boli amun kɛ be fa bo ble’n sa’n,

amun mɔ amun ti min like bowlɛ nun like mma’n,*+

n kannin ndɛ nga Zoova m’ɔ ti sonja’m be su kpɛn’n, m’ɔ ti Izraɛli Ɲanmiɛn’n kan kleli min’n n kleli amun.

11 Be kan ndɛ nga be wɔ Duma:*

Sran kun kpan flɛ min Seii+ lɔ, i waan:

“?Gladi difuɛ, kɔnguɛ’n i nun ndɛ’n ti sɛ?

?Gladi difuɛ, kɔnguɛ’n i nun ndɛ’n ti sɛ?”

12 Gladi difuɛ’n seli kɛ:

“Lika su wa cɛn, yɛ aliɛ su wa san.

Sɛ amun waan amún úsa sa’n, amun usa.

Amun bla ekun!”

13 Be kan ndɛ nga be wɔ lika kpɛtɛkplɛɛ’n:

Dedanfuɛ mun,+ amun mɔ amun wlanwlan lika’m be nun be di aata’n,

bo’n nun lɔ, lika kpɛtɛkplɛɛ’n nun lɔ yɛ amún lá kɔnguɛ-ɔ.

14 Tema+ lɔfuɛ mun,

maan amun fa nzue ko kpa sran mɔ nzuewe kun i’n i atin,

maan amun ko man sran m’ɔ su wanndi’n i kpanwun.

15 Afin be wanndili tokofi’n i ɲrun, be wanndili tokofi mɔ b’a yi i bua’n nun’n i ɲrun,

be wanndili ta mɔ b’a cuɛn nun’n i ɲrun, be wanndili alɛ m’ɔ yo sro’n i ɲrun.