Ezekiɛli
24 Afuɛ ngwlan su’n, i anglo blu’n su’n, anglo’n i cɛn ba blu su’n, Zoova kannin ndɛ kleli min ekun. Ɔ seli min kɛ: 2 “Sran wa, klɛ cɛn nga* sie, klɛ andɛ cɛn liɛ’n sie. Andɛ yɛ Babilɔnin famiɛn’n fali alɛ wlali Zerizalɛmun klɔ’n i sin-ɔn.+ 3 Bu awlo mɔ i nunfuɛ’m be ɲin su ti kekle’n be wun ɲanndra kun, kan be ndɛ se kɛ:
“‘Ndɛ nga Miɛn Zoova m’ɔ Sie Like Kwlakwla’n kan’n yɛ:
“Taka like tɔnlɛ sɛ’n* sin’n su, tɛkɛ i sin’n su naan gua nun nzue.+
4 Fa nnɛn mɔ be kpɛkpɛli nun’n gua nun,+ fɛ i lika kpakpa mun,
fɛ i sɔwa’n nin i walɛ’n. Fa owie kpakpa mun gua nun naan ɔ yi.
5 Fa bua’m be nun kpafuɛ mun,+ yɛ fa yie wlɛwlɛ i sɛ’n i bo naan ɔ sin
yia nun.
Tɔn nnɛn mɔ be kpɛkpɛli nun’n, yɛ tɔn owie nga be o sɛ’n nun’n.”’
6 “I sɔ’n ti’n, ndɛ nga Miɛn Zoova m’ɔ Sie Like Kwlakwla’n kan’n yɛ:
‘Klɔ m’ɔ gua sran mmoja ase’n i yako!+ Ɔ ti kɛ sɛ mɔ annganblalɛ w’a di i mɔ b’a tumɛn i annganblalɛ’n sa.
Maan be yiyi i nun nnɛn mun kunngunngun,+ yɛ nán be tu be wun fɔtɔ.
7 Afin mmoja ng’ɔ guɛli i ase’n ɔ wo i nun,+ ɔ
fa guɛli i yɔbuɛ treketreke’n su.
W’a guɛmɛn i asiɛ wun naan w’a fa ndutre w’a kata su.+
8 Kɛ ɔ ko yo naan m’an fa ya naan m’an kwla tu min klunngbɔ’n ti’n,
n fali sran’m be mmoja ng’ɔ guɛli i ase’n n fa guɛli i yɔbuɛ treketreke m’ɔ ti mlanmlan’n su.
I liɛ’n, be su kwlá
kataman su.’+
9 “I sɔ’n ti’n, ndɛ nga Miɛn Zoova m’ɔ Sie Like Kwlakwla’n kan’n yɛ:
‘Klɔ m’ɔ gua sran mmoja ase’n i yako!+
Ń má tíantían waka kpanngban nuan naan ɔ yo nglonglo kpa.
10 Maan be tiantian yie’m be nuan naan be wla nun sin,
maan be tɔn nnɛn’n i kpa, maan be utu i bo nzue’n, yɛ maan be yaci owie’m be lɛ naan be yra kɔlikɔli.
11 Maan be fa aaba sɛ mɔ like fi nunman nun’n be tɛkɛ i sɛnmlɛn’n su naan ɔ lo.
I liɛ’n aaba’n ló, yɛ ɔ́ bló.
I nun fiɛn’n kló,+ yɛ i annganblalɛ’n yrá.
12 Ɔ ti be wun yalɛ klelɛ ngbɛn, yɛ i kwlaa’n ti afɛ,
afin annganblalɛ dan sɔ’n su tuman.+
Amun to sɛ mɔ w’a di annganblalɛ’n be yi i sin nun!’
13 “‘Ɔ ɲannzuɛn sa’m be ti yɛ a yoli fiɛn-ɔn.+ Min waan ń yó ɔ sanwun, sanngɛ be tu ɔ wun fiɛn’n niɔn, ɔ yoman ye. Sɛ ɔ wun ya nin-a wieman min klun’n, a su kwlá yoman sanwun.+ 14 Min bɔbɔ Zoova yɛ n kan sɔ-ɔ. Sa sɔ’n wá jú. N su sisiman min bo naan m’an yo sa sɔ’n, min wla su boman min wun, yɛ n su kokomɛn i sin.+ Bé nían atin nga amun fa’n su, ɔ nin amun ayeliɛ’n su bé dí amun jɔlɛ.’ Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ.”
15 Zoova kannin ndɛ kleli min ekun. Ɔ seli min kɛ: 16 “Sran wa, ń má dé ɔ sran mɔ a klo i kpa’n ɔ sa nun kpɛ kunngba.+ Nán tran sɛ nun,* nán sun, yɛ nán ɔ ɲinmuɛn’n gua. 17 Fɛfɛ ɔ klun lɔ, nán yo ninnge nga kɛ be o sɛ nun’n be yo’n.+ Fa tannin tanmue cici ɔ ti,+ yɛ wla ɔ ngbabua’n.+ Nán kata ɔ nuan wun ndrɛ’n* su,+ yɛ nán di kpanwun nga be fa blɛ wɔ’n.”*+
18 N kannin ndɛ’n n kleli nvlefuɛ mun nglɛmun, kpɛkun nnɔsua’n, min yi’n wuli. Ɔ maan kɛ lika cɛnnin’n, n niannin like nga be seli min kɛ n yo’n su sɛsɛsɛ n yoli. 19 Nvlefuɛ’m be seli min kɛ: “Tu like nga a su yo i lɛ’n i bo kle e. ?E liɛ ng’ɔ o nun’n yɛle benin?” 20 N tɛli be su kɛ: “Zoova kannin ndɛ kleli min, ɔ seli min kɛ: 21 ‘Se Izraɛli nvle’n nunfuɛ’m be kɛ: “Ndɛ nga Miɛn Zoova m’ɔ Sie Like Kwlakwla’n ɔ kan’n yɛ: ‘Ń má yó min sua mɔ amun fa di amun nuan dan’n, mɔ amun klo i kpa’n, m’ɔ ti amun awlɛn su like’n i finfin.+ Bé wá fá tokofi bé kún amun mma yasua nin amun mma bla nga amun yacili be amun sin lɔ’n.+ 22 Ɔ fata kɛ amun nian like nga n yo’n su be yo wie. Amun su kataman amun nuan wun ndrɛ’n su, yɛ amun su diman kpanwun nga be fa blɛ amun’n.+ 23 Amun tannin tanmue’m bé ká amun ti, yɛ amun ngbabua’m bé ká amun ja. Amun su tranman sɛ nun, amun su sunman. Sanngɛ amun fɔnlɛ’m be ti’n, amún yó koklo,+ amun nin amun wiengu mun amún kplín. 24 Ezekiɛli w’a kaci amun nzɔliɛ like.+ Like ng’ɔ yoli’n, amún wá nían su yó i sɛsɛsɛ. Kɛ sa sɔ’n wá jú’n, amún wá sí jrɛiin kɛ min yɛ n ti Miɛn Zoova m’ɔ Sie Like Kwlakwla’n niɔn.’”’”
25 “Sanngɛ wɔ, sran wa, cɛn nga ń má dé min fiawlɛ lika m’ɔ ti be like klanman m’ɔ man be aklunjɔɛ’n, mɔ be klo i’n, m’ɔ ti be awlɛn su like’n be sa nun’n, kɛ ń má dé be mma yasua nin be mma bla mun be sa nun wie’n,+ 26 sran kun m’ɔ́ fín nun fíte’n yɛ ɔ́ wá kán klé wɔ-ɔ.+ 27 Cɛn sɔ’n nun’n, á wá tíke ɔ nuan’n su, yɛ á kán ndɛ klé sran ng’ɔ́ fín nun fíte’n, a su yoman bobo kun.+ Á wá káci be nzɔliɛ like, kpɛkun bé wá sí jrɛiin kɛ n ti Zoova.”