Ezekiɛli

26 Afuɛ blu-nin-kun su’n, anglo’n i cɛn ba klikli’n su’n, Zoova kannin ndɛ kleli min. Ɔ seli min kɛ: 2 “Sran wa, Tir kannin Zerizalɛmun i wun ndɛ seli kɛ:+ ‘Ɛn-ɛɛn! Anuan mɔ nvlenvle’m be sin nun’n, w’a bubu!+ Siɛn mɔ klɔ’n w’a saci’n, ninnge’m be kwlaa bé wá sín min wa, yɛ ń má káci aɲanbeunfuɛ.’ 3 I sɔ’n ti’n, ndɛ nga Miɛn Zoova m’ɔ Sie Like Kwlakwla’n kan’n yɛ: ‘Ee Tir, e nin wɔ e le i. Ń má yó maan nvle kpanngban bé wá jáso ɔ wun, kɛ nga jenvie’n jaso kendengleiin’n sa. 4 Bé wá búbú Tir i talɛ mun, yɛ bé búbú i sua flein mun.+ Kpɛkun ń kpú asiɛ’n su, ń yó maan ɔ́ káci yɔbuɛ treketreke kun m’ɔ ti mlanmlan-ɔn. 5 Ɔ́ káci jenvie’n i afiɛn lɔ lika kun mɔ be wlɛ lala’m be lɔ-ɔ.’+

“‘Afin min bɔbɔ yɛ n kannin sɔ-ɔ, yɛ nvlenvle’m bé wá fɛ́n i bo ninnge mun.’ Ndɛ nga Miɛn Zoova m’ɔ Sie Like Kwlakwla’n kan’n yɛ ɔ o lɛ-ɔ. 6 ‘Bé fá tokofi bé kún klɔ* nga be mɛntɛn i’n be nunfuɛ mun, yɛ sran’m bé wá sí jrɛiin kɛ n ti Zoova.’

7 “Afin ndɛ nga Miɛn Zoova m’ɔ Sie Like Kwlakwla’n kan’n yɛ: ‘Ń má yó maan famiɛn Nebikadnezaa* m’ɔ ti Babilɔnin famiɛn’n ɔ́ fín nglo lɔ lika’n nun ɔ́ wá tɔ́ Tir su.+ Ɔ ti famiɛn’m be famiɛn,+ ɔ le nnɛn kpanngɔ mun,+ nin alɛ kunlɛ kakaklolo mun,+ nin nnɛn kpanngɔ su fufuɛ mun, ɔ nin sonja* kpanngban. 8 Ɔ́ wá fá tokofi núnnún klɔ nga be mantan wɔ’n, yɛ ɔ́ wá kplán talɛ kun, nin alɛ kunlɛ like flein kun ɔ wun, yɛ ɔ́ wá mán ɲrɛn dan kun su ɔ wun. 9 Ɔ́ wá fɛ́ i waka nɔnninnɔnnin nga be fa bubu talɛ mun’n ɔ́ fá búbú ɔ talɛ mun, yɛ ɔ́ fɛ́ i kpɛliɛ mun* ɔ́ búbú ɔ sua fleinflein mun. 10 I nnɛn kpanngɔ’m be sɔnlɛ mɔ bé sɔ́n dan’n ti’n, bé wá fá ndutre bé káta ɔ su. Kɛ ɔ́ wá wlú ɔ anuan’m be nun’n, nnɛn kpanngɔ su fufuɛ mun, nin kakaklolo’m be ja’m be tɛlɛ’n ɔ́ wá yó maan ɔ talɛ’m bé kéje. Ɔ́ yó kɛ sran kpanngban mɔ be wlu klɔ kun mɔ i wun talɛ mun b’a bubu’n i nun kpuu’n sa. 11 I nnɛn kpanngɔ’m be ja bui’m bé tíatía ɔ akpɔ’m be kwlaa be su.+ Ɔ́ fá tokofi kún ɔ nvle’n nunfuɛ mun, yɛ ɔ sua ja mlomlo’m bé bú tɔ́ asiɛ wun. 12 Bé wá fá ɔ ninnge mun, bé fɛ́n ɔ aata dilɛ ninnge mun.+ Bé búbú ɔ talɛ mun, nin ɔ sua kpakpa mun. I sin’n bé wá fá ɔ yɔbuɛ mun, nin ninnge nga a fali waka yoli be’n, ɔ nin ɔ fa’n, bé tó be gúa nzue’n nun.’

13 “‘Ń má yó maan a su toman ɔ jue’m be kun, yɛ be su timan ɔ jru’m be tɛlɛ’n kun.+ 14 Ń má yó maan á káci yɔbuɛ treketreke kun m’ɔ ti mlanmlan’n, yɛ á káci lika kun mɔ be wlɛ lala’m be lɔ-ɔ,+ be su kplanman ɔ uflɛ kun, afin min bɔbɔ Zoova yɛ n kan sɔ-ɔ. Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ.

15 “Ndɛ nga Miɛn Zoova m’ɔ Sie Like Kwlakwla’n ɔ kan kle Tir’n yɛ: ‘?Kɛ bé wá tí ɔ tɔlɛ’n i ngan’n, mɔ ɔ sran nga be su wu’n* bé fɛ́fɛ́’n, mɔ bé kún sran mun ɔ lɔ’n, lika mɔ nzue bo sin yia be’n be su kejeman?+ 16 Jenvie nuan lɔ sran dandan’m* be kwlaa, bé fín be famiɛn bia’n su bé jrá, bé yí be tralɛ tɛnndɛn mun, ɔ nin be tralɛ mɔ be yili nun desɛn’n, kpɛkun bé úsu sa tututu. Bé trán asiɛ wun, be su yaciman usulɛ, yɛ be nuan m’ɔ́ bó be wun dan’n ti’n, bé nían ɔ siin.+ 17 Ɔ ti’n, bé wá yí ngwlɛ,*+ bé sé kɛ:

Kɛ a su tranman lɛ kun’n, lika nga jenvie’n bo sin yia be’n be nunfuɛ’m be akunndan sánngan.”’+

19 “Afin ndɛ nga Miɛn Zoova m’ɔ Sie Like Kwlakwla’n kan’n yɛ: ‘Kɛ ń má sáci wɔ’n, mɔ á wá káci kɛ klɔ mɔ sran fi tranman su sa’n, kɛ ń má fá nzue m’ɔ sonji kpuu ń káta ɔ su kplu’n, mɔ nzue m’ɔ le wunmiɛn kpa’n ɔ́ káta ɔ su’n,+ 20 ń má fá wɔ nin be nga be nin wɔ su kɔ kunman’n nun’n, ń fá amun ń kɔ́ nvlefuɛ nga laa be o lɛ’n be wun lɔ. Ń má yó maan a nin be mɔ be su jra kunman’n nun’n bé kó jrá lika m’ɔ o ngua kpa’n i nun,+ kɛ nga be fa nunnunnin lika nga laa’n be o lɛ’n sa. I liɛ’n, be su tranman ɔ lɔ kun. I sin’n, ń má yó maan be nga be o nguan nun’n be mɛn’n ɲán ɲrun.

21 “‘Ń má yó maan srɛ dan kpa ká lɛ kún wɔ, yɛ a su tranman lɛ kun.+ Bé wá kúnndɛ wɔ, sanngɛ be su wunman wɔ. Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ.”