Ezekiɛli

41 I sin’n, ɔ fa min ɔli Sua Ba m’ɔ ti Ɲanmiɛn liɛ Klonglo’n nun lɔ,* ɔ sunnzunnin anuan’n i ja mlomlo mun, i bue kun i tɛtrɛ nun’n ti kude nsiɛn, yɛ i bue uflɛ i tɛtrɛ nun’n ti kude nsiɛn. 2 Anuan’n i tɛtrɛ nun’n ti kude blu, anuan’n i wun lɛ talɛ’n i bue kun ti kude nnun, yɛ i bue uflɛ ti kude nnun. Ɔ sunnzunnin sua ba’n, i tɛnndɛn nun’n ti kude ablanan (40), yɛ i tɛtrɛ nun’n ti kude ablaɔn (20).

3 I sin’n, ɔ wluli lɔ,* kpɛkun ɔ sunnzunnin anuan’n i ja mlomlo’n, i kpikplikpi nun’n ti kude nɲɔn, anuan’n i tɛtrɛ nun’n ti kude nsiɛn. Yɛ anuan’n i wun lɛ talɛ mun* be ti kude nso. 4 I sin’n, ɔ sunnzunnin sua ba ng’ɔ o Sua Ba m’ɔ ti Ɲanmiɛn liɛ Klonglo’n i ɲrun lɛ’n, i tɛnndɛn nun’n ti kude ablaɔn (20), yɛ i tɛtrɛ nun’n ti kude ablaɔn (20).+ Kpɛkun ɔ seli min kɛ: “Sua Ba ngunmin Kun m’ɔ ti Ɲanmiɛn liɛ Klonglo’n+ yɛ ɔ o lɛ-ɔ.”

5 I sin’n, ɔ sunnzunnin Ɲanmiɛn sua’n i talɛ’n, i kpikplikpi nun’n ti kude nsiɛn. Sua ba nga be o Ɲanmiɛn sua’n i wun’n be tɛtrɛ nun’n ti kude nnan.+ 6 Ɲanmiɛn sua’n i wun sua ba’m be ti etazi nsan, sua ba kun o i wiengu kun ti su nglo, yɛ etazi kun su sua ba’m be ti ablasan (30). Sua ba’m be bo suanlɛ ninnge’m be o Ɲanmiɛn sua’n i talɛ’n i wun tɛɛn, kɛ ɔ ko yo naan sua ba’m be bo suanlɛ ninnge mun b’a wluman Ɲanmiɛn sua’n i talɛ’n nun’n ti.+ 7 Sinwlɛ kun m’ɔ blibli’n* i kun o Ɲanmiɛn sua’n i bue kun su, yɛ i kun o i bue uflɛ su. Sinwlɛ sɔ’n, kɛ ɔ́ fú kɔ́ nglo lɔ sua ba’m be su’n,+ nn ɔ́ trɛ́ kɔ́. Kɛ be fɛ i etazi’n i ngua mɔ be sin afiɛn lɛ mɔ bé fú kɔ́ nglo lɔ’n, nn asikalie’n ɔ́ trɛ́ kɔ́.

8 N wunnin kɛ be yoli Ɲanmiɛn sua’n i bo wun’n i nglonglo sin yiali nun, yɛ Ɲanmiɛn sua’n i wun sua ba’m be bo ase nga be wlali’n i cɔnjɔ su’n ti ndɛma wunmuan kun mɔ i tɛnndɛn nun’n ti kude nsiɛn’n. 9 Ɲanmiɛn sua’n i wun sua ba’m be talɛ ng’ɔ o gua su wa’n i tɛtrɛ nun’n ti kude nnun. Lika kun o Ɲanmiɛn sua’n i wun sua ba’m be wun lɛ, b’a kataman su.* Ɔ o Ɲanmiɛn sua’n nun wie.

10 Lika ng’ɔ o Ɲanmiɛn sua’n nin like diwlɛ mun*+ be afiɛn’n nun’n, i tɛtrɛ nun’n ti kude ablaɔn (20), ɔ o Ɲanmiɛn sua’n i bue nɲɔn’m be su. 11 Ɲanmiɛn sua’n i wun sua ba mun, ɔ nin lika nga b’a kataman su m’ɔ o nglo lɔ lika’n nun’n be afiɛn’n nun’n, sinwlɛ kun o lɛ, kpɛkun sinwlɛ uflɛ o ngua lɔ lika’n nun. Lika nga b’a kataman su m’ɔ bo sin yia Ɲanmiɛn sua’n i tɛtrɛ nun’n ti kude nnun.

12 Sua ng’ɔ o wia atɔliɛ lɔ lika’n nun’n, mɔ i ɲin kpɛ lika nga b’a kataman su’n i su lɔ’n, i tɛtrɛ nun’n ti kude ableso (70), yɛ i tɛnndɛn nun’n ti kude ablangwlan (90). Sua sɔ’n i talɛ’n i kpikplikpi nun’n ti kude nnun.

13 Ɔ sunnzunnin Ɲanmiɛn sua’n, i tɛnndɛn nun’n ti kude ya kun (100). Lika nga b’a kataman su’n, ɔ nin sua’n* nin i talɛ mun be kusu be tɛnndɛn nun’n ti kude ya kun (100) wie. 14 Ɲanmiɛn sua’n i lika ng’ɔ ti fleiin kpa’n mɔ i ɲin kpɛ wia afiliɛ lɔ’n i tɛtrɛ nun’n, ɔ nin lika nga b’a kataman su’n ɔ ti kude ya kun (100).

15 Ɔ sunnzunnin sua nga i ɲin kpɛ lika nga b’a kataman su’n i su lɔ’n, m’ɔ o siɛn lɔ’n, ɔ nin i sinwlɛ nga be o i bue nɲɔn’m be su’n, ɔ ti kude ya kun (100).

Ɔ sunnzunnin Sua Ba m’ɔ ti Ɲanmiɛn liɛ Klonglo’n wie, ɔ nin Sua Ba Ngunmin Kun m’ɔ ti Ɲanmiɛn liɛ Klonglo’n,+ ɔ nin Ɲanmiɛn sua’n i lika ng’ɔ ti fleiin kpa’n mɔ i ɲin kpɛ awlo klun’n su’n. 16 Asa ekun’n, ɔ sunnzunnin anuan’n i ɲrun lɛ’n, ɔ nin fenɛtri mɔ kɛ bé wlú talɛ’n nun kɔ́’n nn bé yó kaan’n,+ ɔ nin sinwlɛ nga be o lika nsan sɔ’m be nun’n. Anuan’n i ɲrun lɛ’n, waka paplaapla+ wie’m be o lɛ, be fɛ i ngua lele be to fenɛtri’m be lɔ, yɛ fenɛtri’m be su ti katawa. 17 Ɔ sunnzunnin anuan’n i ti su nglo lɔ’n, ɔ nin Ɲanmiɛn sua’n i klun nin i sin’n, ɔ nin talɛ wunmuan ng’ɔ bo sin yiɛ i’n. 18 Seribɛn wie mɔ be sɛli be’n,+ ɔ nin nglesia waka desɛn mun+ be o talɛ’n su, nglesia waka’m be tinuntinun be o seribɛn nɲɔn be afiɛn. Yɛ seribɛn’m be ɲrun’n ti nɲɔnnɲɔn. 19 Klɔ sran ɲrun’n i ɲin kpɛ nglesia waka ng’ɔ o bue kun su’n i su lɔ, yɛ asɔmɔli* ɲrun’n i ɲin kpɛ nglesia waka ng’ɔ o bue uflɛ su’n i su lɔ.+ Kɛ be sɛli be kɛ ngalɛ’n sa Ɲanmiɛn sua’n nun-ɔn. 20 Seribɛn mɔ be sɛli be’n, ɔ nin nglesia waka desɛn mun be o Ɲanmiɛn sua’n i talɛ’n su, ɔ fɛ i ja ngua lele fa ju anuan’n i ti su nglo lɔ.

21 Ɲanmiɛn sua’n i anuan’n i kadri mun* be bue’m be ngba be sɛ.+ Lika m’ɔ ti Ɲanmiɛn liɛ klonglo’n* i ɲrun lɛ’n, like kun o lɛ, ɔ ti kɛ 22 tɛ yiwlɛ kun mɔ be fali waka be yoli’n+ sa, i nglonglo su’n ti kude nsan, yɛ i tɛnndɛn nun’n ti kude nɲɔn. Be yoli i cɔnjɔ mun, be fali waka yɛ be yoli i bo’n* nin i bue’m be kwlaa-ɔ. Kpɛkun ɔ seli min kɛ: “Tabli ng’ɔ o Zoova ɲrun’n yɛ ɔ o lɛ-ɔ.”+

23 Sua Ba m’ɔ ti Ɲanmiɛn liɛ Klonglo’n, ɔ nin lika m’ɔ ti Ɲanmiɛn liɛ klonglo’n be anuan’m be ti nɲɔnnɲɔn.+ 24 Sinwlɛ’m be anuan’m be ti nɲɔnnɲɔn, sinwlɛ kun nun’n anuan’m be ti nɲɔn. 25 Seribɛn mɔ be sɛli be’n, ɔ nin nglesia waka mun be desɛn o Ɲanmiɛn sua’n i anuan’m be su, be nin talɛ’m be su desɛn liɛ mun be ti kun.+ Asa ekun’n, be fali waka be yoli like gbagblagba kun Ɲanmiɛn sua’n i lika ng’ɔ ti fleiin kpa’n i ɲrun lika’n i ti su nglo lɔ. 26 Fenɛtri wie mɔ kɛ bé wlú talɛ’n nun kɔ́’n nn bé yó kaan’n,+ ɔ nin nglesia waka desɛn mun be o Ɲanmiɛn sua’n i lika ng’ɔ ti fleiin kpa’n i bue nɲɔn’m be su. Asa ekun’n, wie o Ɲanmiɛn sua’n i wun sua ba mun, ɔ nin i ti su nglo lɔ like gbagblagba’n be wun.