Zezi kannin Ɲanmiɛn ndɛ’n Galile mɛn’n i bue uflɛ su

Kɛ Zezi nin i sɔnnzɔnfuɛ nnan mun be juli Kapɛɛnaɔmun lɔ’n, be dili Ɲanmiɛn junman’n lele, ɔ maan b’a kwlá loman wunmiɛn. Kɛ lika’n sannin’n, lɔfuɛ’m be fali be sran mɔ be ti tukpacifuɛ’n be bali naan Zezi yo be juejue. Ɔ maan Zezi w’a kwlá ɲɛnmɛn i ti naan i ngunmin w’a srɛ i Si.

I sɔ’n ti’n, kɛ aliɛ cɛnnin’n, Zezi jasoli nglɛmun ndɛ kpa, ɔ ɔli lika diin kun nun ko srɛli i Si Ɲanmiɛn. Kɛ ɔ́ yó sɔ’n, nn lika’n te lu. Sanngɛ w’a kwlá cɛman lika sɔ’n nun lɔ. Afin kɛ “Simɔn nin be nga be nin i o lɛ’n,” be sieli i nzɔliɛ kɛ Zezi nunman lɛ’n, be ɔli i kunndɛlɛ. Kɛ mɔ Piɛli yɛ ɔ sikeli Zezi’n, atrɛkpa i yɛ ɔ dunnin be nga be ɔli Zezi kunndɛlɛ’n be ɲrun mmua-ɔ.​—Marki 1:36; Liki 4:38.

Kɛ be wunnin Zezi’n, Piɛli seli kɛ: “E kwlaa e su kunndɛ wɔ.” (Marki 1:37) Abonuan sa nga Zezi yoli be’n, ɔ yoli Kapɛɛnaɔmunfuɛ’m be fɛ dan. I sɔ’n ti’n, be kunndɛli kɛ Zezi ka be klɔ’n su lɛ. Ɔ maan “be waan be kplinman su kɛ ɔ yaci be lɛ wɔ.” (Liki 4:42) Sanngɛ nán abonuan sa’m be yolɛ ngunmin ti yɛ Zezi bali asiɛ’n su wa-ɔ. Asa ekun’n, nán Kapɛɛnaɔmun klɔ’n ngunmin su yɛ ɔ fata kɛ ɔ di Ɲanmiɛn junman’n niɔn.

Zezi seli i sɔnnzɔnfuɛ mun kɛ: “Amun e wɔ lika uflɛ. E wɔ klɔ nga be o koko wa’n be su, naan n ko bo jasin lɔ wie. Afin i sɔ’n ti yɛ n bali-ɔ.” Yɛ ɔ seli Kapɛɛnaɔmunfuɛ’m be kusu kɛ: “Ɔ fata kɛ n wɔ klɔ uflɛ su naan n ko bo Ɲanmiɛn i Famiɛn dilɛ’n i jasin fɛ’n. Afin i sɔ’n ti yɛ be sunmannin min-ɔn.”​—Marki 1:38; Liki 4:43.

Like nga ti yɛ Zezi bali asiɛ’n su wa’n, i cinnjin kpa kun yɛle Ɲanmiɛn i Famiɛn dilɛ’n i ndɛ kanlɛ’n. Famiɛn dilɛ sɔ’n wá yó maan Ɲanmiɛn dunman’n yó sanwun. Asa ekun’n, ɔ́ wá yó maan sran’m be su sa’n kwlaa ɔ́ wíe. Sanngɛ nán ngbɛn kusu ti yɛ Zezi yoli abonuan sa mun-ɔn. Afin sa sɔ’m be kle kɛ Ɲanmiɛn yɛ ɔ sunmɛnnin i-ɔ. I kunngba’n yɛle Moizi liɛ’n. Abonuan sa nga Moizi yoli be’n, be kle kɛ Ɲanmiɛn yɛ ɔ sunmɛnnin i-ɔ.​—Ezipt Lɔ Tulɛ 4:1-9, 30, 31.

Zezi nin i sɔnnzɔnfuɛ nnan mun be jasoli Kapɛɛnaɔmun klɔ’n su lɔ, be ɔli Ɲanmiɛn i ndɛ kanlɛ klɔ uflɛ wie’m be su. I sɔnnzɔnfuɛ nnan sɔ mun yɛle Piɛli nin i niaan bian Andre nin Zan nin i niaan bian Zaki. Kɛ Zezi seli be kɛ be bla naan be nin i di Ɲanmiɛn junman’n titi’n, i lemɔcuɛ kun yɛ.

Ɲanmiɛn junman nga Zezi nin i sɔnnzɔnfuɛ’m be dili i Galile mɛn’n nun lɔ’n, i bo’n guali klanman. Afin Zezi i su ndɛ’n truli lika kwlaa. Yɛle kɛ “i ndɛ nga be kan’n, ɔ truli Siri mɛn wunmuan’n nun.” Asa ekun’n, ɔ tru juli klɔ dandan blu mɔ be flɛ be kɛ Dekapɔlu i su. Kpɛkun ɔ tru juli Zurdɛn nzue ba’n i sin lɔ lika’m be nun wie. (Matie 4:24, 25) Ɔ maan sran kpanngban kpa mɔ be fin lika kwlaa sɔ’m be nun’n, ɔ nin Zide mɛn’n nun’n, be suli Zezi nin i sɔnnzɔnfuɛ’m be su. Be nun kpanngban be fali be tukpacifuɛ mun be bali kɛ Zezi yo be juejue. Zezi kusu w’a guaman be ɲin ase. Yɛle kɛ ɔ yoli tukpacifuɛ’m be juejue, yɛ ɔ fuannin mmusu nga be o sran’m be nun’n.