Zezi i sɔnnzɔnfuɛ klikli mun

Zezi dili cɛn ba ablanan (40) aawlɛ flɛnnɛn’n nun lɔ. Sanngɛ kwlaa naan w’a sɛ i sin Galile’n, ɔ ɔli Zan m’ɔ yoli i batɛmun’n i wun lɔ. Kɛ Zezi bá mmua lɔ mɔ Zan wunnin i’n, Zan seli be nga be o lɛ’n be kɛ: “An nian! Ɲanmiɛn i Bua ba m’ɔ́ wá yí sa tɛ ng’ɔ o mɛn’n nun’n yɛ ɔ o yɛ! Sran nga n kɛnnin i ndɛ’n yɛ ɔ o yɛ. N seli kɛ: ‘Sran ng’ɔ su ba min sin’n, siɛn’n i dan tra min. Afin kwlaa naan b’a wu min’n, ɔ o lɛ.’” (Zan 1:29, 30) Zan i kpɛn tra Zezi kan. Sanngɛ ɔ si kɛ kwlaa naan b’a wu i bɔbɔ Zan’n, Zezi ti aolia nun sran naan ɔ dun mmua trannin ɲanmiɛn su lɔ.

I nun nga Zezi kɔ́ Zan sin naan Zan yo i batɛmun’n, sɛ Zezi yɛ ɔ ti Mesi’n nin-o annzɛ sɛ nɛ́n i-o, ɔ yo kɛ Zan bɔbɔ w’a wunmɛn i wlɛ kpa sa. Afin ɔ seli kɛ: “N simɛn i laa, sanngɛ n bali kɛ ń yó sran’m be batɛmun nzue nun naan Izraɛlifuɛ’m be kwlaa be wun i wlɛ.”​—Zan 1:31.

Kɛ Zan yó Zezi i batɛmun’n, ɔ kannin sa nga be juli’n be ndɛ. Ɔ seli kɛ: “N wunnin kɛ Ɲanmiɛn wawɛ’n fin ɲanmiɛn su lɔ jrɛli i su kɛ auble sa. Yɛ ɔ kɛli i su. N bɔbɔ n simɛn i laa. Sanngɛ Sran ng’ɔ sunmannin min kɛ n yo sran’m be batɛmun nzue nun’n, ɔ seli min kɛ: ‘Sran nga a wun kɛ Ɲanmiɛn wawɛ’n jrɛ i su, m’ɔ kɛ i su’n, yɛle sran ng’ɔ fa Ɲanmiɛn wawɛ’n yo sran’m be batɛmun’n.’ N wunnin i, yɛ n dili i ti lalo n seli kɛ i yɛ ɔ ti Ɲanmiɛn i Wa’n niɔn.”​—Zan 1:32-34.

Kɛ aliɛ cɛnnin’n, Zezi ɔli Zan Batɛmun yofuɛ’n wun lɔ ekun. Kɛ ɔ́ yó sɔ’n, nn Zan nin i sɔnnzɔnfuɛ nɲɔn be o lɛ. Yɛ Zan seli kɛ: “An nian, Ɲanmiɛn i Bua ba’n yɛ ɔ o yɛ!” (Zan 1:36) Kɛ Zan i sɔnnzɔnfuɛ nɲɔn’m be tili i sɔ’n, be suli Zezi su. Be nun kun suan Andre, yɛ kun’n suan Zan wie. Atrɛkpa’n, i yɛ ɔ kannin ndɛ nga e su bo su yɛ’n niɔn. Ɔ yo kɛ Zan sɔ’n nin Zezi be ti ngawangawa sa, afin Zan i nin’n yɛle Salome. Kɔlɛ’n, Salome kusu ti Mari i niaan bla. Yɛ Salome i wun’n suan Zebede.

Zezi kpɛli i ɲin, yɛ ɔ wunnin kɛ Andre nin Zan be su su i su. Ɔ usali be kɛ: “?Ngue yɛ amun su kunndɛ-ɔ?”

Be tɛli i su kɛ: “?Rabi, nin yɛ a tran-ɔn?”

Zezi seli be kɛ: “An bla be wa nian.”​—Zan 1:37-39.

Kɛ ɔ́ yó sɔ’n, nn nnɔsua wia’n nun dɔ nnan su’n w’a wie ju. Andre nin Zan be kali Zezi i wun lɛ lele aliɛ’n sannin be. Kɛ Andre wunnin Zezi’n, i fɛ m’ɔ yoli i’n ti’n, ɔ ko wunnin i niaan bian Simɔn mɔ be flɛ i ekun kɛ Piɛli’n, i wun. Ɔ seli i kɛ: “E wunnin Mesi’n.” (Zan 1:41) Andre fali Piɛli ko kleli Zezi. I sin’n, Zan kusu ko toli i niaan bian Zaki, kpɛkun ɔ fɛli ko kleli i wie. Sanngɛ kɛ Zan klɛ́ i fluwa’n, w’a boman sa sɔ’n su.

Kɛ aliɛ cɛnnin’n, Zezi ko toli Filipu m’ɔ fin Bɛtsaida’n. Andre nin Piɛli be fin lɔ wie. Klɔ sɔ’n wo Galile Jenvie’n i nglo lɔ lika’n nun lɔ. Zezi seli Filipu kɛ: “Kaci min sɔnnzɔnfuɛ.”​—Zan 1:43.

Filipu kusu ko toli Natanaɛli, kpɛkun ɔ seli i kɛ: “E wunnin sran nga be kɛnnin i ndɛ Mmla fluwa nga Moizi klɛli’n ɔ nin Ɲanmiɛn nuan ijɔfuɛ’m be fluwa’m be nun’n. Yɛle Zezi m’ɔ ti Zozɛfu i wa m’ɔ fin Nazarɛti’n.” Sanngɛ Natanaɛli w’a fɛmɛn i ndɛ’n su. Ɔ seli Filipu kɛ: “?Nazarɛti klɔ ng’ɔ o lɛ’n, like kpa kun sa kwla fin lɔ fite?”

Filipu tɛli i su kɛ: “Bla wa nian.” Kɛ Natanaɛli bá mɔ Zezi wunnin i’n, Zezi seli kɛ: “An nian, Izraɛlifuɛ kpa kun yɛ, ɔ timan gblɛfuɛ kaan sa.”

Natanaɛli usali Zezi kɛ: “?Nin yɛ a si min-ɔn?”

Zezi tɛli i su kɛ: “Kwlaa naan Filipu w’a flɛ wɔ’n, i nun nga a o figie waka’n i bo lɔ’n, n wunnin wɔ.”

Ndɛ nga Zezi kannin’n boli Natanaɛli i nuan. I sɔ’n ti’n, ɔ seli Zezi kɛ: “Rabi, wɔ yɛ a ti Ɲanmiɛn i Wa’n niɔn. Wɔ yɛ a ti Izraɛli Famiɛn’n niɔn.”

Zezi usɛli i kɛ: “?Kɛ mɔ n seli wɔ kɛ n wunnin wɔ figie waka’n i bo lɔ’n, i ti yɛ a lafi min su-ɔ?” Ɔ kan guali su kɛ: “Ninnge nga á wá wún be’n, be dan trá ngalɛ mun.” Kpɛkun Zezi seli kɛ: “Nanwlɛ, ń kán klé amun kpa kɛ amún wá wún kɛ ɲanmiɛn su lɔ’n w’a tike, yɛ Ɲanmiɛn i anzi’m be fu be jra Sran wa’n i wun lɛ.”​—Zan 1:45-51.

Kɛ ɔ yoli sɔ’n, w’a cɛman yɛ Zezi nin i sɔnnzɔnfuɛ uflɛuflɛ sɔ’m be jasoli Zurdɛn kongo’n nun be ɔli Galile-ɔ.