Zezi yoli Ɲanmiɛn i sua’n i sanwun

Afuɛ 30 nun Avrili anglo’n nun’n, Zezi ɔli Zerizalɛmun. Kɛ ɔ́ yó sɔ’n, nn sran kpanngban b’a ba Delɛ Cɛn’n i dilɛ Zerizalɛmun lɛ. Kɛ bé dí cɛn sɔ’n, be yi tɛ Ɲanmiɛn i sua’n nun lɔ. Kɛ sran wie’m bé kɔ́’n, be fa nnɛn. Sanngɛ wie mun be liɛ’n, Zerizalɛmun lɔ yɛ be to be nnɛn mun-ɔn.

Kɛ Zezi wluli Ɲanmiɛn i sua’n nun lɔ’n, ɔ wunnin kɛ sran’m be su yo nnɛn atɛ lɔ. Zoova i sua’n yɛ w’a kaci be sika kunndɛwlɛ-ɔ. ?Ngue yɛ Zezi yoli-ɔ? Ɔ fali ɲanman wɔli ngble kun. Kpɛkun ɔ fa fuannin bua nin nannin mun Ɲanmiɛn i sua’n nun. Ɔ suli sika kacifuɛ’m be tabli mun be bo guali, ɔ utuli be sika mma mun. Ɔ seli auble atɛ yofuɛ mun kɛ: ‘Amun fa ninnge nga mun fite lɔ! Nán amun fa min Si i sua’n kaci aata diwlɛ!’

Like nga Zezi yoli’n, ɔ boli be nga be o Ɲanmiɛn i sua’n nun lɔ’n be nuan. I sɔnnzɔnfuɛ’m be wla kpɛnnin Mesi’n i su ndɛ nga Ɲanmiɛn nuan ijɔfuɛ kun kannin’n su. Ɔ seli kɛ: ‘Ń má kló Zoova i sua’n i kpa.’

Kɛ ɔ cɛli kan’n, afuɛ 33 nun’n, Zezi yoli Ɲanmiɛn i sua’n i sanwun ekun. Ɔ kunndɛman kɛ be yo i Si i sua’n i finfin.