Be klɛli ndɛ wie mun talɛ’n i wun

Kɛ ɔ́ kɔ́ i ɲrun’n, Bɛlsazaa wa yoli Babilɔnin famiɛn. Cɛn kun kɔnguɛ’n, ɔ yiali i nvle’n nun sran dandan akpi (1.000) kɛ be ko di cɛn. Kpɛkun sika ɔkwlɛ klowa nga Nebikadnezaa ko fali be Zoova i sua’n nun lɔ bali’n, ɔ seli i sufuɛ mun kɛ be ko fa be bla. Bɛlsazaa nin be ng’ɔ yiali be’n be nɔnnin klowa sɔ mun be nun, kpɛkun be sɔli be amuin mun. Bé nían-ɔn, sran kun sa yɛ w’a fite yɛ. Ɔ klɛli ndɛ wie mun talɛ’n i wun.

Bɛlsazaa i akunndan’n sanngannin. Ɔ flɛli i wunnzue yifuɛ mun, kpɛkun ɔ seli be kɛ: ‘Sran kwlaa ng’ɔ tu ndɛ nga bo’n, ɔ́ yó be nga be le kwlalɛ Babilɔnin nvle’n nun’n be nsan su.’ Wunnzue yifuɛ’m be miannin be ɲin naan bé tú ndɛ sɔ’n i bo, sanngɛ b’a kwlá tumɛn i bo. Famiɛn’n i nin’n bali naan w’a se be kɛ: ‘Bian kun o wa’n, be flɛ i Daniɛli. I yɛ ɔ tu Nebikadnezaa i ndɛ mun be bo kle i-ɔ. Ɔ kwla tu ndɛ nga’m be bo kle wɔ.’

Be ko fali Daniɛli bali. Bɛlsazaa seli i kɛ: ‘Sɛ a kanngan ndɛ nga nun naan a tu i bo’n, ń mán wɔ sika ɔkwlɛ kɔmin ɲanman, yɛ á wá yó be nga be le kwlalɛ Babilɔnin nvle’n nun’n be nsan su.’ Daniɛli seli i kɛ: ‘N su faman like fi ɔ sa nun, sanngɛ ń má tú ndɛ’n i bo ń klé wɔ. Ɔ si Nebikadnezaa tuli i wun, yɛ Zoova guɛli i ɲin ase. A si sa sɔ’n kwlaa nun, sanngɛ sika ɔkwlɛ klowa nga be ko fɛli i Ɲanmiɛn i sua’n nun lɔ’n, i nun yɛ a nɔn nzan-ɔn. I lɛ’n nun’n, ɔ ɲin w’a yiman Zoova. I sɔ’n ti yɛ Ɲanmiɛn klɛli ndɛ nga-ɔ: Mene, Mene, Tekɛli, yɛ Paasinin. Ndɛ sɔ’n kle kɛ Medifuɛ mun nin Pɛɛsifuɛ’m bé wá fá Babilɔnin klɔ’n. Kpɛkun a su yoman famiɛn kun.’

Sran fi kwlá bumɛn i kɛ be kwla fa Babilɔnin klɔ’n. Afin klɔ’n i wun talɛ’n timan aɔwi, yɛ nzue dan kun sin klɔ’n nun. Kɔnguɛ kunngba sɔ’n nun’n, Medifuɛ mun nin Pɛɛsifuɛ mun be bali klɔ’n i falɛ. Pɛrsi famiɛn mɔ be flɛ i Sirisi’n, ɔ yoli maan nzue’n kannin ase. Ɔ maan i sonja’m be ɔli lele be juli klɔ’n i anuan’n i wun lɔ. Kɛ bé jú lɔ’n, klɔ’n i anuan’m be la su. Be wluli klɔ’n nun, be fali klɔ’n, kpɛkun be kunnin famiɛn’n. Sirisi yɛ ɔ wa sieli Babilɔnin klɔ’n niɔn.

Kɛ Sirisi fali klɔ’n, w’a diman afuɛ kun bɔbɔ, kpɛkun cɛn kun ɔ seli kɛ: ‘Zoova seli min kɛ n kplɛn i sua ng’ɔ o Zerizalɛmun lɔ’n i uflɛ. Be kwlaa nga be ti i liɛ mɔ be klo kɛ bé dí junman sɔ’n wie’n, be kwla kɔ.’ Ɔ maan kɛ nga Zoova fa kannin’n sa’n, kɛ be sacili Zerizalɛmun klɔ’n m’ɔ dili afuɛ ableso’n (70), Zifu kpanngban be sali be sin. Sika ɔkwlɛ nin sika klowa nin kpongbo nga Nebikadnezaa fali be Ɲanmiɛn i sua’n nun lɔ’n, Sirisi fali be kwlaa sɛli i sin Zerizalɛmun ekun. Zoova sinnin Sirisi i lika ukɛli i nvle’n nunfuɛ mun. ?Nɛ́n i-ɔ?