Anin srɛli Ɲanmiɛn kɛ ɔ mɛn i ba kun

Be flɛ Izraɛli bian kun kɛ Ɛlkana. Ɔ le bla nɲɔn. Be flɛ kun Anin, yɛ be flɛ kun kɛ Penina. Anin yɛ Ɛlkana klo i kpa-ɔ. Penina yo Anin i finfin cɛn kwlaa, afin Anin leman ba. Sanngɛ Penina liɛ’n, ɔ le ba kaka. Afuɛ kwlaa nun’n, Ɛlkana nin i awlofuɛ’m be kɔ Silo be ko yi tɛ be man Ɲanmiɛn i tannin sua’n nun lɔ. Cɛn kun liɛ’n kɛ be ɔli’n, Ɛlkana wunnin kɛ Anin i wla w’a bo i wun dan. Ɔ seli i kɛ: ‘Anin, nán sun. N bɔbɔ n wo lɛ. N klo wɔ.’

Kɛ ɔ cɛli kan’n, Anin i ngunmin ɔli Ɲanmiɛn srɛlɛ. Kɛ ɔ́ srɛ́ Zoova’n, nn ɔ́ sún. Ɔ seli kɛ: ‘Zoova, sɛ a man min ba yasua kun’n, ń fɛ́ i ń fá mán wɔ. Ɔ́ káci ɔ liɛ mlɔnmlɔn.’

Kɛ Anin ɔ́ srɛ́ Ɲanmiɛn’n, Eli m’ɔ ti Ɲanmiɛn ɲrun jranfuɛ dan’n ɔ wunnin i. Ɔ buli i kɛ w’a nɔn nzan w’a bo. Anin seli i kɛ: ‘Baba, m’an nɔnman nzan. Afɛ o min su yɛ n su kan kle Zoova-ɔ.’ Eli wunnin kɛ ndɛ ng’ɔ kan kleli Anin’n timan kpa. I sɔ’n ti’n, ɔ seli Anin kɛ: ‘Maan Ɲanmiɛn man wɔ like nga a srɛ i’n.’ Anin i wla guali ase yɛ ɔ ɔli-ɔ. Kɛ ɔ yoli sɔ’n w’a diman afuɛ kun, Anin wuli ba yasua kun. Ɔ flɛli i kɛ Samiɛli. Nanwlɛ, Anin klun jɔli dan!

Anin i wla w’a fiman ndɛ ng’ɔ kan kleli Zoova’n su. Kɛ ɔ kpɛli Samiɛli i ɲɔnflɛn cɛ’n, ɔ fɛ i ɔli Ɲanmiɛn i tannin sua’n nun lɔ naan ɔ ko su i. Ɔ seli Eli kɛ: ‘Ba nga n srɛli i Ɲanmiɛn sa nun’n yɛ. N waan ń fɛ́ i ń fá mɛ́n i naan ɔ yo i liɛ mlɔnmlɔn.’ Afuɛ nuan kwlakwla’n, Ɛlkana nin Anin be ko nian Samiɛli osu. Kpɛkun be mɛn i tralɛ uflɛ kun. Zoova mannin Anin ba yasua nsan nin ba bla nɲɔn ekun.