Zoziasi klo Ɲanmiɛn Mmla’n

Kɛ Zoziasi yó Zida famiɛn’n, nn ɔ le afuɛ mɔcuɛ. Blɛ sɔ’n nun’n, nvlefuɛ’m be yi atrɛ, kpɛkun be sɔ amuin. Kɛ Zoziasi ɲannin afuɛ blu-nin-nsiɛn’n (16) ɔ kunndɛli kɛ ɔ́ sí wafa ng’ɔ kwla su Zoova kpa’n. Kɛ ɔ ɲannin afuɛ ablaɔn’n (20) ɔ bubuli amuin mun, ɔ nin be sɔwlɛ’m be kwlaa i nvle’n nun. Asa ekun’n, kɛ ɔ ɲannin afuɛ ablaɔn-nin-nsiɛn’n (26) ɔ yoli maan be siesieli Zoova i sua’n i ye.

Ɲanmiɛn ɲrun jranfuɛ Ilkia wunnin Zoova i Mmla fluwa’n Ɲanmiɛn i sua’n nun lɔ. Atrɛkpa’n, fluwa nga Moizi bɔbɔ klɛli’n niɔn. Safan m’ɔ ti Famiɛn Zoziasi i fluwa klɛfuɛ’n fali Mmla fluwa’n bali, kpɛkun ɔ kanngannin nun Zoziasi i ɲrun lɛ. Kɛ Zoziasi tili fluwa’n i nun ndɛ’n, ɔ wunnin i wlɛ kɛ nvlefuɛ’m be yacili mmla’n i su nantilɛ w’a di afuɛ kpanngban. Famiɛn Zoziasi seli Ilkia kɛ: ‘Zoova w’a fa e wun ya dan kpa. Kɔ ko usɛ i like ng’ɔ fata kɛ e yo’n.’ Zoova seli i nuan ijɔfuɛ bla Ilda kɛ: ‘Zidafuɛ’m be suman min kun. Ń má tú be fɔ. Sanngɛ n su tuman be fɔ famiɛn Zoziasi blɛ su. Afin ɔ kɛnnin i wun ase dan.’

Kɛ Famiɛn Zoziasi tili ndɛ sɔ’n, ɔ ɔli Ɲanmiɛn i sua’n nun lɔ. Kpɛkun ɔ yiali Zidafuɛ mun. Ɔ kanngannin Ɲanmiɛn i Mmla fluwa’n nun kleli be kwlaa. Zoziasi nin nvlefuɛ’m be seli kɛ bé nánti Zoova i mmla’m be su.

Zidafuɛ mun be yacili Delɛ Cɛn’n i dilɛ w’a di afuɛ kpanngban. Sanngɛ kɛ Zoziasi kanngannin Mmla fluwa’n nun m’ɔ wunnin kɛ ɔ fata kɛ be di Delɛ Cɛn’n afuɛ kwlakwla’n, ɔ seli nvlefuɛ’m be kɛ: ‘Ɔ fata kɛ e di Delɛ Cɛn e man Zoova.’ Zoziasi yili tɛ kpanngban mannin Zoova, kpɛkun ɔ kpali jue tofuɛ wie mun naan be to jue Ɲanmiɛn i sua’n nun lɔ. Nvlefuɛ mun be dili Delɛ Cɛn’n, ɔ nin Kpanwun mɔ Levii Nunman nun’n i ti Cɛn’n wie. Be dili cɛn sɔ mun cɛn ba nso. Kɛ ɔ fɛ i Samiɛli blɛ su lele’n, be nin-a diman Delɛ Cɛn kɛ ngalɛ’n sa le. Nanwlɛ, Zoziasi kleli kɛ ɔ klo Zoova i Mmla’n sakpa. ?A klo Zoova i su like suanlɛ?