Be trali Zezi

Zezi nin i akoto’m be sinnin Sedrɔn Kongo’n nun be ɔli Olivie Oka’n su lɔ. Kɛ ɔ́ yó sɔ’n, nn lika w’a san, yɛ anglo’n ta kpa. Kɛ be juli lika nga be flɛ i Zɛtsemane’n, Zezi seli be kɛ: ‘An minndɛ min wa, nán amun lafi.’ Zezi ɔli i ɲrun lɔ kan, kpɛkun ɔ kotoli. I wla boli i wun dan. Ɔ srɛli Ɲanmiɛn seli kɛ: “Maan ɔ yo kɛ nga a klo’n sa.” Zoova sunmannin anzi kun kɛ ɔ wa wla Zezi fanngan. Kɛ Zezi sɛli i sin i akoto’m be wun lɔ’n, ɔ wunnin kɛ be su lafi. Ɔ seli be kɛ: ‘Amun jaso! Ɔ fataman kɛ amun lafi dɔ nga su. Blɛ m’ɔ fata kɛ be fa min man min kpɔfuɛ mun’n w’a ju.’

Kɛ ɔ yoli sɔ’n, w’a cɛman yɛ Zida bali-ɔ. Sran kpanngban kpa be su i su. Tokofi nin waka o be sa nun. Zida si kɛ Zezi o lika sɔ’n nun lɔ, afin be kɔ lɔ titi. Ɔ seli sonja mun kɛ, sɛ be ju lɔ’n ɔ́ fá Zezi klé be. Ɔ maan ɔ ɔli Zezi wun lɔ trele naan w’a se kɛ: ‘Like Klefuɛ, anun-o!’ Kpɛkun ɔ fɛli i nuan’n wɔli Zezi i fuka’n su. Sanngɛ Zezi seli i kɛ: ‘?Zida, a fa ɔ nuan’n wɔ min fuka’n su yɛ a fa min man sran mun-ɔn?’

Zezi wunngeli be wun lɔ, yɛ ɔ seli be kɛ: “?Wan yɛ amun su kunndɛ i-ɔ?” Be tɛli su kɛ: “Zezi m’ɔ fin Nazarɛti’n.” Zezi seli be kɛ: “Min-ɔn.” Be wunngeli siɛn, kpɛkun be finnin ase. Yɛ ɔ usali be ekun kɛ: “?Wan yɛ amun su kunndɛ i-ɔ?” Be tɛli i su kɛ: “Zezi m’ɔ fin Nazarɛti’n.” Zezi seli be kɛ: ‘N seli amun kɛ min-ɔn. Sɛ min ti yɛ amun bali’n, amun yaci min sɔnnzɔnfuɛ’m be nun maan be wɔ.’

Piɛli wunnin kɛ be su wa tra Zezi. I sɔ’n ti’n, ɔ cuɛnnin tokofi kun, ɔ fa kpɛli Ɲanmiɛn ɲrun jranfuɛ dan’n i junman difuɛ mɔ be flɛ i Malkisi’n i su’n. Zezi kannin bian’n i su’n, kpɛkun ɔ yoli i juejue. I sin’n, Zezi seli Piɛli kɛ: “Fa ɔ tokofi’n sie i osu’n nun. Afin be kwlaa nga be tra tokofi nun’n, tokofi yɛ bé fá kún be-ɔ.” Sonja’m be trali Zezi, be cili i sa mun. Yɛ i akoto’m be wanndili-ɔ. Be fali Zezi ɔli Anin m’ɔ ti Ɲanmiɛn ɲrun jranfuɛ’m be su kpɛn’n i wun lɔ. Anin usɛli i kosan wie mun, kpɛkun ɔ fɛ i ɔli Kaifu m’ɔ ti Ɲanmiɛn ɲrun jranfuɛ dan’n i awlo lɔ. ?Ngue yɛ akoto’m be yoli-ɔ?