Zan kannin Mesi’n i balɛ’n i ndɛ

Kɛ Zakari nin Elizabɛti be wa Zan ɲinnin’n, ɔ kacili Ɲanmiɛn nuan ijɔfuɛ. Zoova fɛli i kɛ ɔ se sran mun kɛ Mesi’n su wa ba. Zan w’a kleman sran’m be like Ɲanmiɛn sulɛ sua’m be nun, annzɛ klɔ’m be su. Sanngɛ aawlɛ flɛnnɛn’n nun lɔ yɛ ɔ kannin Ɲanmiɛn ndɛ’n niɔn. Sran’m be fin Zerizalɛmun ɔ nin Zide mɛn’n i lika kwlaa nun be ba Zan sin. Ɔ se be kɛ sɛ be waan Ɲanmiɛn i klun jɔ be wun’n, maan be yaci sa tɛtɛ’m be yolɛ. Kɛ be tie Zan i ndɛ’n be nun kpanngban be kaci be ayeliɛ’n, yɛ Zan yo be batɛmun Zurdɛn Nzue’n nun.

Zan wla ɲɔnngɔnmɛn ndrɛ tralɛ, yɛ like ng’ɔ di’n yɛle lalo nin blo awɛma nzue. W’a kunndɛman ninnge kpanngban. Sran’m be kunndɛli kpa kɛ bé sí Zan. Farizifuɛ mun nin Sadisefuɛ mun bɔbɔ mɔ be ti wun tufuɛ’n be bɛli i wun wunlɛ wie. Zan seli be kɛ: ‘Maan amun kaci amun ayeliɛ’n. Nán an se kɛ amun si yɛle Abraamun ti’n amun ti Ɲanmiɛn liɛ.’

Sran kpanngban be wa usali Zan kɛ: ‘?Ngue yɛ ɔ fata kɛ e yo naan Ɲanmiɛn i klun w’a jɔ e wun-ɔn?’ Zan seli Zifu’m be kɛ: ‘Sran ng’ɔ le tralɛ nɲɔn’n, maan ɔ fa kun man sran ng’ɔ leman wie’n.’ ?A si sa nga ti yɛ ɔ kannin sɔ’n? I waan ɔ́ klé kɛ sran ng’ɔ klo kɛ Ɲanmiɛn i klun jɔ i wun’n, ɔ fata kɛ ɔ klo sran.

Zan seli lapo defuɛ’m be kɛ: ‘An di nanwlɛ, yɛ nán amun wua.’ Ɔ seli sonja mun kɛ: ‘Nán amun di ndrunmun, yɛ nán amun bua ato.’

Ɲanmiɛn ɲrun jranfuɛ mun nin Levifuɛ mun be wa usali Zan kɛ: ‘?Wan yɛle wɔ? Sran’m be kwlaa be kunndɛ kɛ bé sí nun.’ Zan seli kɛ: ‘Min yɛ n kpan aawlɛ flɛnnɛn’n nun’n niɔn. N se sran mun kɛ be bla Zoova sin. Ndɛ sɔ’n yɛ Ɲanmiɛn nuan ijɔfuɛ Ezai kannin-ɔn.’

Ndɛ nga Zan kan’n ɔ yo sran’m be fɛ. Be nun sunman be usali be wun sɛ i yɛ ɔ ti Mesi’n nin-o. Sanngɛ ɔ seli be kɛ: ‘Sran kun m’ɔ le kwlalɛ tra min’n ɔ́ wá bá. Min nin i ngbabua mun be ɲanman’n i ɲannjilɛ fataman bɔbɔ. Min liɛ’n, nzue yɛ n fa yo amun batɛmun-ɔn. Sanngɛ i liɛ’n, ɔ́ fá Ɲanmiɛn wawɛ’n yɛ ɔ́ fá yó amun batɛmun-ɔn.’