Like fi kwlá jranman be

Bian kun m’ɔ kwlá nantiman’n, ɔ tran Ɲanmiɛn i sua’n i anuan’n i ɲrun lɛ, ɔ srɛsrɛ like. Cɛn kun nnɔsua’n, ɔ wunnin Piɛli nin Zan, be su wlu Ɲanmiɛn i sua’n nun lɔ. Ɔ seli be kɛ: ‘Amun yaci, amun man min like kan.’ Piɛli seli i kɛ: ‘Like nga n waan ń fá mán wɔ’n, i kpa tra sika. Zezi dunman nun’n, jaso nanti!’ Piɛli ukɛli i naan w’a jaso, kpɛkun ɔ nantili. Sa sɔ’n boli sran’m be nuan. Ɔ maan sran kpanngban be kacili Zezi i sɔnnzɔnfuɛ.

Sanngɛ Ɲanmiɛn ɲrun jranfuɛ mun nin Sadisefuɛ’m be fali ya. Be trali akoto’m be ɔli jɔlɛ difuɛ’m be ja su. Jɔlɛ difuɛ’m be usali be kɛ: ‘?Wan dunman nun yɛ amun yoli bian nga i juejue-ɔ?’ Piɛli tɛli su kɛ: ‘Zezi mɔ amun kunnin i’n i dunman nun-ɔn.’ Be kpannin akoto’m be su. Be seli be kɛ: ‘Amun yaci Zezi i ndɛ kanlɛ!’ Sanngɛ akoto’m be tɛli be su kɛ: ‘Ɔ fata kɛ e kɛn i ndɛ. E su yacimɛn i sɔ yolɛ.’

Kɛ be yacili Piɛli nin Zan be nun cɛ’n, be ɔli Zezi i sɔnnzɔnfuɛ onga’m be wun lɔ, be ko kannin sa sɔ’n i ndɛ kleli be. Be srɛli Zoova likawlɛ. Be seli i kɛ: ‘Yaci, uka e naan e ɲan wunmiɛn e di ɔ junman’n titi.’ Zoova fɛli i wawɛ’n mannin be. Ɔ maan be boli jasin fɛ’n titi, yɛ be yoli sran’m be juejue. Kɛ ɔ yoli sɔ’n, sran kpanngban be wa kacili Zezi i sɔnnzɔnfuɛ. Sadisefuɛ’m be fa be ɲin cili akoto mun. I sɔ’n ti’n be trali be, kpɛkun be wlali be bisua. Sanngɛ kɔnguɛ’n, Zoova sunmɛnnin i anzi kun. Ɔ wa tikeli bisua’n i anuan mun, kpɛkun ɔ seli akoto’m be kɛ: ‘Amun wɔ Ɲanmiɛn i sua’n nun lɔ naan amun ko kle sran’m be like.’

Kɛ lika cɛnnin’n, sran’m be ko seli Zifu’m be Jɔlɛ difuɛ dandan’m be kɛ: ‘Bisua’n i anuan’m be nun ti towa, sanngɛ sran nga amun trali be’n be nunman lɔ kun. Be o Ɲanmiɛn i sua’n nun lɔ, be su kle sran’m be like.’ Be ko trali akoto mun ekun, be fa be ɔli Zifu’m be Jɔlɛ difuɛ dandan’m be ja su. Ɲanmiɛn ɲrun jranfuɛ dan’n seli akoto’m be kɛ: ‘?Y’a seman amun kɛ nán amun kan Zezi i ndɛ kun?’ Piɛli tɛli i su kɛ: “Ɲanmiɛn m’ɔ ti e siefuɛ’n yɛ ɔ fata kɛ e ɲin yi i-ɔ, nán klɔ sran mun-ɔn.”

Zifu’m be kpɛnngbɛn’m be fali ya kpa. I sɔ’n ti’n, be waan bé kún akoto mun. Sanngɛ Farizifuɛ kun mɔ be flɛ i Gamaliɛli’n, ɔ jasoli. Kpɛkun ɔ seli be kɛ: ‘Amun nian amun wun kpa! Atrɛkpa’n, Ɲanmiɛn o be sin. ?Amun kunndɛ kɛ amun nin Ɲanmiɛn bé kún?’ Be fali bian’n i ndɛ’n su. Sanngɛ be boli akoto mun nin ngble. Be seli be ekun kɛ be yaci jasin’n i bolɛ, kpɛkun be yacili be nun. Akoto’m b’a yaciman jasin bolɛ. Be kannin Ɲanmiɛn ndɛ’n juejue su titi Ɲanmiɛn i sua’n nun, ɔ nin awloawlo’m be nun.