LIKE SUANLƐ 8
Abraamun nin Sara be ɲin yili Ɲanmiɛn
Be flɛ klɔ kun kɛ Iri. Ɔ nin Babɛli klɔ’n be afiɛn’n timan nun dan. Lɔfuɛ’m be suman Zoova. Be sɔ amuin. Sanngɛ sran kun o klɔ sɔ’n su lɔ’n, ɔ su Zoova. Be flɛ i kɛ Abraamun.
Zoova seli Abraamun kɛ: ‘Jaso ɔ mɛn’n nun, jaso ɔ osufuɛ’m be afiɛn naan kɔ mɛn nga ń má klé wɔ’n nun.’ Zoova kan guali su kɛ: ‘Ń má yó naan ɔ mma mun be yo nvle dan kun. Ɔ dunman nun ti’n, ń má yó sran’m be ye.’
Abraamun siman lika nga Zoova seli i kɛ ɔ wɔ’n. Sanngɛ ɔ lafili Zoova su. I sɔ’n ti’n, Abraamun nin i yi Sara, ɔ nin i si Tera, yɛ i niaan wa Lɔtu be fali be ninnge mun, kpɛkun be ɔli.
Kɛ Abraamun nin i awlofuɛ’m bé jú mɛn nga Zoova seli be kɛ be wɔ lɔ’n nun’n, nn ɔ le afuɛ ableso-nin-nnun (75). Be flɛ lika sɔ’n kɛ Kanaan. Lɔ’n, Zoova seli Abraamun kɛ: ‘Ń fá mɛn nga ń mán ɔ mma mun.’ Blɛ sɔ nun’n Abraamun nin Sara b’a yo oke, sanngɛ be leman ba. ?Ngue yɛ Zoova wá yó naan ndɛ ng’ɔ kannin’n w’a kpɛn su-ɔ?
“Ɲanmiɛn su mɔ Abraamun lafili’n ti’n, [...] ɔ ɔli lika mɔ Ɲanmiɛn waan ɔ́ fá mɛ́n i’n nun. I ɲin m’ɔ yi Ɲanmiɛn’n ti yɛ ɔ yoli sɔ-ɔ. Kannzɛ ɔ siman lika ng’ɔ su kɔ’n, sanngɛ ɔ ɔli.”—Ebre Mun 11:8.