Zezi w’a kaci Mesi

Kɛ Zan kán Ɲanmiɛn ndɛ’n, ɔ seli kɛ: ‘Sran kun mɔ i dan tra min’n, ɔ su ba.’ I nun mɔ Zezi ɲannin afuɛ ablasan’n (30), ɔ fɛ i Galile lɛ ɔli Zurdɛn Nzue’n i nuan lɔ, lika nga Zan yo sran mun be batɛmun lɔ’n. Zezi waan Zan yo i batɛmun. Sanngɛ Zan seli kɛ: ‘Nán min yɛ ɔ fata kɛ n yo wɔ batɛmun-ɔn. Wɔ yɛ ɔ fata kɛ a yo min batɛmun-ɔn.’ Zezi seli Zan kɛ: ‘Zoova kunndɛ kɛ a yo min batɛmun.’ Yɛ be jrali Zurdɛn Nzue’n nun-ɔn. Zan fali Zezi mlɔnnin nzue’n nun.

Kɛ Zezi fin nzue’n i bo fiteli’n, ɔ srɛli Ɲanmiɛn. Kɛ ɔ yoli sɔ cɛ’n, ɲanmiɛn su lɔ’n tikeli, kpɛkun Ɲanmiɛn i wawɛ’n jrɛli i su kɛ auble sa. Kɛ ɔ yoli sɔ’n, Zoova kannin ndɛ kun ɲanmiɛn su lɔ. Ɔ seli kɛ: “A ti min Wa. A ti min awlɛn su ba. Min klun jɔ ɔ wun.”

Kɛ Ɲanmiɛn i wawɛ’n jrali Zezi su’n, yɛ ɔ kacili Mesi-ɔ. Junman nga Ɲanmiɛn sunmɛnnin i kɛ ɔ wa di i asiɛ’n su wa’n, ɔ su wa di i siɛn’n.

Kɛ be yoli Zezi i batɛmun cɛ’n, ɔ ɔli aawlɛ flɛnnɛn’n nun lɔ. Ɔ dili cɛn ba ablanan (40) lɔ. Kɛ ɔ sɛli i sin’n, ɔ ko wunnin Zan i wun. Kɛ Zan wunnin Zezi’n, ɔ seli kɛ: “Ɲanmiɛn i Bua Ba m’ɔ́ wá yí sa tɛ ng’ɔ o mɛn’n nun’n yɛ ɔ o yɛ.” Zan kannin ndɛ sɔ’n naan sran mun be wun i wlɛ kɛ Zezi yɛ ɔ ti Mesi’n niɔn. ?I nun mɔ Zezi ɔli aawlɛ flɛnnɛn’n nun lɔ’n, a si sa ng’ɔ juli i su’n? É wá kán sa sɔ’n i ndɛ.