Zoova kannin ndɛ kleli Samiɛli

Eli m’ɔ ti Ɲanmiɛn ɲrun jranfuɛ dan’n, ɔ le ba nɲɔn. Be ti Ɲanmiɛn ɲrun jranfuɛ. Be flɛ kun Ɔfnin, yɛ be flɛ kun Fineasi. Be diman Zoova i mmla’n su. Yɛ be bu be wiengu’m be lufle. Kɛ Izraɛlifuɛ’m be fa nnɛn be yi tɛ be man Zoova’n, Ɔfnin nin Fineasi be fɛ i lika kpakpa mun. Eli si sa nga i mma’m be yo’n, sanngɛ w’a yoman like fi. ?Zoova ɔ́ trán lɛ sa nían be?

Ɔfnin nin Fineasi be ti kaklaka tra Samiɛli. Sanngɛ Samiɛli w’a nianman be ayeliɛ’n su. Zoova i klun jɔli Samiɛli wun. Cɛn kun kɔnguɛ mɔ Samiɛli láfi’n, sran kun flɛli i. Ɔ jasoli. Ɔ wanndi ɔli Eli i wun lɔ, kpɛkun ɔ seli i kɛ: ‘M’an ba!’ Eli seli i kɛ: ‘M’an flɛman wɔ. Kɔ ko la.’ Samiɛli ko lali. I sin’n, sran’n flɛli i ekun. Kɛ ɔ yoli sɔ kpɛ nsan’n, Eli wunnin i wlɛ kɛ Zoova yɛ ɔ su flɛ ba’n niɔn. Ɔ seli Samiɛli kɛ sɛ sran’n flɛ i ekun’n maan ɔ se kɛ: ‘Zoova, kan ndɛ’n. Ɔ sufuɛ’n i su o ɔ nuan bo.’

Samiɛli ko lali ekun. Kpɛkun, ɔ tili i kɛ: ‘Samiɛli, Samiɛli!’ Yɛ Samiɛli tɛli su kɛ: ‘Kan ndɛ’n, ɔ sufuɛ’n i su o ɔ nuan bo.’ Zoova seli i kɛ: ‘Se Eli kɛ ń má tú i bɔbɔ nin i awlofuɛ’m be fɔ. Ɔ si kɛ i mma’m be yo sa tɛtɛ min tannin sua’n nun, sanngɛ ɔ yoman like fi.’ Kɛ aliɛ cɛnnin’n, Samiɛli tikeli Ɲanmiɛn i tannin sua’n i anuan mun kɛ titi’n sa. Ndɛ nga Zoova kannin’n, kɛ ɔ yo naan ɔ kan kle Ɲanmiɛn ɲrun jranfuɛ dan’n, ɔ timan pɔpɔ i sa nun. Srɛ kunnin i. Sanngɛ Eli flɛli i, kpɛkun ɔ usɛli i kɛ: ‘?Min wa, ndɛ benin yɛ Zoova kan kleli wɔ-ɔ? Kɛn i kwlaa kle min.’ Samiɛli kannin ndɛ’n i kwlaa kleli Eli.

Kɛ Samiɛli ɲín kɔ́’n, i wun yoli Zoova fɛ titi. Izraɛli nvle’n kwlaa nun’n, sran mun be wunnin i wlɛ weiin kɛ Zoova fali Samiɛli kɛ ɔ yo i ɲrun jranfuɛ nin jɔlɛ difuɛ.