Zoova trɛli i awlɛn Zonasi wun

Asirifuɛ’m be klɔ nga be flɛ i kɛ Ninivu’n i sufuɛ’m be klun yo wi. Zoova sunmɛnnin i nuan ijɔfuɛ Zonasi naan ɔ ko se be kɛ be kaci be nzuɛn’n. Sanngɛ Zonasi wanndi ɔli lika uflɛ. Ɔ ko fuli mmeli kun nun, kpɛkun ɔ fali Taasisi atin’n.

Kɛ be o jenvie’n su mɔ bé kɔ́’n, aunmuan’n fitali kekle kpa yɛ nzue tɔli dan kpa. I sɔ’n ti’n, srɛ kunnin mmeli kanfuɛ mun kpa. Be kpan flɛli be amuin mun. Yɛ be seli kɛ: ‘?Ngue ti yɛ sa nga ju e su-ɔ?’ Zonasi seli be kɛ: ‘Min ti-ɔ. Zoova sunmannin min, sanngɛ n su wanndi i ɲrun. Amun fa min yi jenvie’n nun. I liɛ’n aunmuan’n jrán.’ Mmeli kanfuɛ mun be kunndɛman kɛ bé fá Zonasi bé yí i jenvie’n nun. Sanngɛ ɔ jrannin be wun kɛ be fɛ i be yi nun. Kɛ be fɛli i be yili i jenvie’n nun’n yɛ aunmuan’n jrannin-ɔn.

Zonasi buli i kɛ ɔ́ wá wú. Kɛ ɔ́ mlɔ́n nzue’n i bo lɔ kpa’n, ɔ srɛli Zoova. Zoova yoli maan jue dan kpa kun wa mɛnnin i. Sanngɛ w’a wuman. Kɛ Zonasi o jue’n i klun lɔ’n, ɔ seli Ɲanmiɛn kɛ: ‘Ń má yó ɔ klun sa’n titi.’ Zonasi kali jue’n i klun lɔ lele cɛn ba nsan. I sin’n, jue’n wa fili i yili i asiɛ kee’n su.

Zoova deli Zonasi. ?I sɔ’n ti’n, é sé kɛ w’a ɲɛn i ti naan ɔ su kɔman Ninivu kun? Cɛcɛ. Zoova seli i ekun kɛ ɔ wɔ Ninivu. Zonasi ɔli, ɔ ko seli be kɛ: ‘Ɔ ka cɛn ba ablanan (40) bé wá núnnún Ninivu klɔ’n!’ Ninivufuɛ’m be tieli ndɛ nga Zonasi kannin’n, kpɛkun be kacili be nzuɛn’n. Ninivu famiɛn’n seli i nvle’n nunfuɛ’m be kɛ: ‘Maan e srɛ Ɲanmiɛn, yɛ e kaci e nzuɛn’n. Atrɛkpa’n, ɔ su nunnunman e.’ Kɛ Zoova wunnin kɛ Ninivufuɛ’m be kacili be nzuɛn’n, w’a nunnunman be kun.

Kɛ Zoova w’a nunnunman Ninivufuɛ mun’n, ɔ yoli Zonasi i ya kpa. Zoova sili Zonasi i aunnvɔɛ yɛ ɔ trɛli i awlɛn i wun. Sanngɛ Zonasi liɛ’n, w’a siman Ninivufuɛ’m be aunnvɔɛ. Ɔ ɔli ko trannin klɔ’n i sin lɔ waka kun i fɔnvɔ’n i bo, kpɛkun ɔ ijɔli i konviabo. I sin’n waka’n wuli kee, kpɛkun Zonasi fali ya. Zoova seli i kɛ: ‘?Waka’n i ndɛ ti wɔ cinnjin tra Ninivufuɛ mun? N sili Ninivufuɛ mun be aunnvɔɛ ti yɛ m’an nunnunman be-ɔ.’ Like nga Zoova kunndɛ kɛ Zonasi wun i wlɛ’n, yɛle kɛ Ninivufuɛ’m be ti kpa tra waka mun.