Bisua sunianfuɛ kun tili ndɛ nanwlɛ’n

Talua kun ti kanga Filipu lɔ. Mmusu kun o i su, yɛ ɔ yi wunnzue. I sɔ’n ti’n, sran ng’ɔ di junman be sa nun’n, be ɲan sika kpanngban kpa. Kɛ Pɔlu nin Silasi be juli Filipu lɔ’n, talua sɔ’n suli be su cɛli kpa. Mmusu’n yo maan ɔ kpan se kɛ: ‘Bian nga’m be ti Ɲanmiɛn m’ɔ o Like Kwlaa Ti Su’n i sran mun.’ Kɛ ɔ yoli sɔ lele’n, Pɔlu seli mmusu’n kɛ: ‘Zezi dunman nun, jaso i su!’ Yɛ mmusu’n jasoli talua’n su-ɔ.

Kɛ talua’n i min’m be wunnin kɛ be su ɲanman sika kun’n, be fali ya dan kpa. Be fali Pɔlu nin Silasi be ɔli jɔlɛ difuɛ’m be ja su. Be seli jɔlɛ difuɛ’m be kɛ: ‘Bian nga’m be fɔn mmla’n, kpɛkun be yo maan klɔ’n nun sanngan.’ Jɔlɛ difuɛ’m be seli kɛ maan be bo Pɔlu nin Silasi, naan be wla be bisua. Bisua sunianfuɛ’n fa be ɔli bisua’n i klun mmuammua kpa lɔ. Lɔ’n ti tuun kpa, kpɛkun ɔ fali be sa nin be ja mun wlali waka toklo kun nun.

Bisua lɔ’n, Pɔlu nin Silasi be toli jue manmannin Zoova. Bisuafuɛ onga’m be tili. Kɔnguɛ afiɛn’n, asiɛ’n kejeli dan kpa. Bisua wunmuan’n kejeli. I anuan’m be tiketikeli. Jrɔkɔ nin ninnge uflɛ nga be fa cili bisuafuɛ mun’n, be flo guali. Bisua sunianfuɛ’n wanndi wluli bisua’n i klun mmua lɔ, kpɛkun ɔ wunnin kɛ anuan’m be ti tikewa. Ɔ buli i kɛ bisuafuɛ’m be kwlaa b’a wanndi. I sɔ’n ti’n, ɔ fali tokofi kun naan ɔ́ fá kún i wun.

Yɛ Pɔlu seli i kɛ: ‘Nán yo ɔ wun like! E kwlaa e o wa!’ Bisua sunianfuɛ’n ɔli ndɛndɛ ko kotoli Pɔlu nin Silasi be bo. Kpɛkun ɔ usali be kɛ: “?Ngue yɛ ɔ fata kɛ n yo naan m’an fite nun-ɔn?” Be seli i kɛ: ‘Ɔ fata kɛ a nin ɔ awlofuɛ mun amun lafi Zezi su.’ I sin’n, Pɔlu nin Silasi be kannin Zoova i ndɛ’n be kleli bisua sunianfuɛ’n nin i awlofuɛ mun. Kpɛkun be yoli be kwlaa be batɛmun.