LIKE SUANLƐ 59
Gbanflɛn kanngan nnan be ɲin yili Zoova
Kɛ Nebikadnezaa fali Zidafuɛ mun ɔli Babilɔnin’n, ɔ fa be mɛnnin i awlo lɔ sran dan kun mɔ be flɛ i Aspenazi’n naan ɔ nian be su. Nebikadnezaa seli Aspenazi kɛ ɔ kpa gbanflɛn kanngan nga tukpacɛ nunman be wun’n nin be nga be si ngwlɛlɛ kpa’n, naan be kle be like afuɛ nsan. I liɛ’n, bé káci sran dan Babilɔnin famiɛn’n i awlo lɔ. Gbanflɛn kanngan sɔ mun bé wá súan Babilɔninfuɛ’m be aniɛn mɔ yɛle Akadi’n i kanlɛ nin i kannganlɛ ɔ nin i klɛlɛ. Asa ekun’n, ɔ fata kɛ be di aliɛ nga famiɛn’n nin i awlofuɛ’m be di’n wie. Gbanflɛn sɔ mun be nun wie yɛle Daniɛli nin Anania nin Misaɛli ɔ nin yɛ Azaria. Aspenazi tɔnnin be dunman uflɛ. Daniɛli liɛ’n yɛle Bɛltesazaa, Anania liɛ’n yɛle Sadraki, Misaɛli liɛ’n yɛle Mesaki, yɛ Azaria liɛ’n yɛle Abɛdnego. ?Like nga Babilɔninfuɛ’m be kleli be’n ti’n, be yacili Zoova sulɛ?
Gbanflɛn nnan sɔ’m be fuali kpa kɛ bé sú Zoova titi. I sɔ’n ti’n, b’a kunndɛman kɛ bé dí famiɛn’n i aliɛ’n wie. Afin be si kɛ like nga famiɛn’n di’n, be nun wie mun be o lɛ’n, Zoova i Mmla’n se kɛ nán Izraɛlifuɛ’m be di. Be seli Aspenazi kɛ: ‘Yaci, nán man e famiɛn’n i aliɛ’n wie.’ Sanngɛ Aspenazi seli be kɛ: ‘Sɛ amun a diman famiɛn’n i aliɛ’n wie naan ɔ wun kɛ amun a yo koklo’n, ɔ́ kún min!’
Akunndan kun bali Daniɛli i ti nun. Ɔ seli be sunianfuɛ’n kɛ: ‘Yaci, man e aliɛ nga nnɛn nunman nun’n, ɔ nin nzue ngunmin cɛn ba blu. I sin’n nian e, yɛ nian e wiengu nga be di famiɛn’n i aliɛ’n.’ Be sunianfuɛ’n kplinnin su.
Kɛ cɛn ba blu sinnin’n, Daniɛli nin i janvuɛ nsan mun be ɲrun’n yoli mlanmlan trali gbanflɛn kun nga mun. Zoova i klun jɔli be wun, afin be ɲin yili i. I kpa bɔbɔ’n, ɔ mannin Daniɛli i ngwlɛlɛ naan w’a kwla tu laliɛ’m be bo.
Kɛ be wieli gbanflɛn’m be like kle’n, Aspenazi fa be ɔli Nebikadnezaa i wun lɔ. Kɛ famiɛn’n nin be ijɔli’n, ɔ wunnin kɛ Daniɛli nin Anania nin Misaɛli, yɛ Azaria be si ngwlɛlɛ tra gbanflɛn onga mun. I sɔ’n ti’n, ɔ fali be kɛ be di junman i awlo lɔ. Ɔ maan ndɛ cinnjin wie mun be su’n, ɔ́ úsa be ngwlɛlɛ afɛ. Zoova yoli maan be sili ngwlɛlɛ trali famiɛn’n i sa sifuɛ mun, ɔ nin i atrɛ yifuɛ’m be kwlaa.
Kannzɛ bɔbɔ Daniɛli nin Anania nin Misaɛli ɔ nin Azaria be o nvle uflɛ nun’n, be wla w’a fiman su le kɛ be ti Zoova i sufuɛ. ?Ɔ kusu’n, sɛ ɔ si nin ɔ nin be nunman ɔ wun lɛ’n, á yó kɛ gbanflɛn nnan sɔ mun sa?
“Nán man sran wie atin naan ɔ yo ɔ finfin gbanflɛn mɔ a ti’n ti. Sanngɛ ɔ ijɔlɛ’n nun-o, ɔ ayeliɛ’n nun-o, klolɛ’n i nglo yilɛ nun-o, Ɲanmiɛn sulafilɛ’n nun-o, ɔ nin sa tɛ mɔ a yoman’n nun-o, kle be nga be tu be klun be su Ɲanmiɛn’n be ajalɛ kpa.”—1 Timote 4:12.