“Maan ɔ Sielɛ’n i blɛ’n ju”

Zoova seli kɛ: ‘Sran’m be su sunman kun, be su wunman ɲrɛnnɛn kun, be su tɔman tukpacɛ kun, be su wuman kun. Ń núnnún be ɲinmuɛn’n kwlaa. Be wla su kpɛnman laa ninnge tɛtɛ’m be su kun.’

Zoova fali Adan nin Ɛvu sieli be Edɛnin fie’n nun. Ɔ kunndɛli kɛ be di fɔundi nin aklunjɔɛ. Ɔ fata kɛ be su be Si m’ɔ o ɲanmiɛn su lɔ’n, yɛ ɔ fata kɛ be wu ba naan be trɛ asiɛ’n su. Adan nin Ɛvu be ɲin w’a yiman Zoova. Sanngɛ Zoova w’a kaciman like ng’ɔ seli kɛ ɔ́ yó’n. Kɛ nga ɔ kan kleli Abraamun’n sa’n, i Sielɛ’n wá yó maan asiɛ’n su wafuɛ mun bé liɛ yó ye.

Ɔ cɛ kan’n, Satan nin i mmusu mun, ɔ nin klunwifuɛ’m be su tranman lɛ kun. Be kwlaa nga bé ká nguan nun’n bé sú Zoova. E su tɔman tukpacɛ, yɛ e su wuman. Cɛn kwlaa kɛ é jáso’n, e ti juejue, yɛ e di aklunjɔɛ. Asiɛ’n káci lika klanman. Sran’m be kwlaa bé ɲán aliɛ kpa bé dí, yɛ bé trán sua kpa nun. Sran’m bé yó be wiengu ye, be su kleman be wiengu ɲrɛnnɛn, yɛ be su yoman be wiengu like yaya. Blo nnɛn’m be su sroman e, yɛ e kusu e su sroman be.

Kɛ Zoova wá cɛ́n sran mun’n, é wá dí aklunjɔɛ dan. É wá sɔ́ lalafuɛ sran nga bé cɛ́n be’n be nun. Be nun wie yɛle Abɛli nin Nowe nin Abraamun nin Sara nin Moizi nin Riti nin Ɛstɛɛ, ɔ nin Davidi. E nin sran sɔ mun e bo yó kun, é yó maan asiɛ’n káci lika klanman. Blɛ sɔ’n nun’n, é ɲán junman kpa é dí.

Zoova kunndɛ kɛ a tran mɛn sɔ’n nun wie. Nanwlɛ, blɛ sɔ’n nun’n á wá sí Zoova kpa liɛ su. Ɔ maan mian ɔ ɲin cɛn kwlakwla naan a nin Zoova amun afiɛn mantan kpa titi.