Be fali Pɔlu ɔli Rɔmun

I kpɛ nsan su nga Pɔlu ɔli jasin fɛ’n i bolɛ’n, Zerizalɛmun lɔ yɛ ɔ guɛli i bo-ɔ. Kɛ ɔ juli lɔ’n, be trɛli i, kpɛkun be wlɛli i bisua. Kɔnguɛ’n, Zezi kannin ndɛ kleli i aolia nun. Ɔ seli i kɛ: ‘Á wá kɔ́ Rɔmun á kó bó jasin fɛ’n lɔ.’ Be fali Pɔlu Zerizalɛmun lɛ be ɔli Sezare. Ɔ dili bisua afuɛ nɲɔn lɔ. Kɛ be fɛ i ɔli Fɛstisi m’ɔ ti siefuɛ’n i ja su’n, Pɔlu seli kɛ: ‘Maan be fa min wɔ Sezaa ja su Rɔmun lɔ.’ Yɛ Fɛstisi seli i kɛ: “Ɔ waan á fá ɔ ndɛ’n kɔ́ Sezaa ja su. Ɔ maan á wá kɔ́ Sezaa ja su.” Be fali Pɔlu mmeli kun nun be ɔli Rɔmun. Liki nin Aristaki mɔ be ti i niaan Klisifuɛ’n, be ɔli wie.

Kɛ bé kɔ́’n, aunmuan fitali kekle kpa jenvie’n su. Kɛ ɔ́ yó sɔ’n nn nzue’n tɔ́. Ɔ dili cɛn kpanngban. Be kwlaa be buli i kɛ be su wa wu. Sanngɛ Pɔlu seli be kɛ: ‘Nja mun, laliɛ nun’n anzi kun seli min kɛ: “Pɔlu, nán srɛ kun wɔ. Á wá jú Rɔmun lɔ, yɛ amun kwlaa nga amun o mmeli’n nun’n, amún fíte nun.” Nán srɛ kun amun! E su wuman.’

Nzue’n tɔli lele cɛn ba blu-nin-nnan (14). I sin’n, be wunnin klɔ kun mmua lɔ. Be flɛ klɔ sɔ’n kɛ Malti. Jenvie’n sin yiɛ i. Mmeli’n ko sili jenvie’n i bo aunɲan’n su, kpɛkun i nun bubuli. Like fi w’a yoman sran ya nɲɔn sran ableso-nin-nsiɛn (276) nga be o mmeli’n nun’n. Be wie’m be wuɛli nzue’n, wie’m be fuli mmeli’n i buebue’m be su naan b’a kwla ju asiɛ ba’n su lɔ. Maltifuɛ’m be niannin be lika, kpɛkun be trɔli sin mannin be naan be fa yo be wun nglɛnglɛ.

Kɛ anglo nsan sinnin’n, sonja’m be fali Pɔlu mmeli uflɛ nun naan b’a fɛ i b’a wɔ Rɔmun. Kɛ be juli lɔ’n, aniaan’m be bɛli i wun wunlɛ. Kɛ Pɔlu wunnin be’n, ɔ lali Zoova i ase, kpɛkun ɔ ɲannin wunmiɛn. Kannzɛ Pɔlu ti bisuafuɛ’n, sanngɛ ɔ tran sua kun mɔ i bɔbɔ tuɛ i kalɛ’n nun, yɛ sonja kun niɛn i su. Ɔ dili afuɛ nɲɔn sua sɔ’n nun. Kɛ sran’m be bɛ i wun wunlɛ’n, ɔ kan Zezi nin Ɲanmiɛn Sielɛ’n be ndɛ kle be. Pɔlu klɛli fluwa ko mannin asɔnun nga be o Azi Minɛɛ nin Zide lɔ’n. Nanwlɛ, Zoova fali Pɔlu yoli maan jasin fɛ’n truli nvlenvle’m be nun.