Sran’m be su wlu Ɲanmiɛn Sielɛ Sua kun nun. Kɛ ɔ́ yó sɔ’n nn gbanflɛn kun su nian be.

GBANFLƐN NIN TALUA’M BE KOSAN MUN

?Ngue ti yɛ ɔ fata kɛ e yia Ɲanmiɛn Sielɛ Sua’m be nun-ɔn?

Lemɔcuɛ kun nun’n, Zoova i Lalofuɛ’m be yo aɲia kpɛ nɲɔn be asɔnun sua mɔ be flɛ be Ɲanmiɛn Sielɛ Sua’n be nun. ?Ngue yɛ be yo i lɔ-ɔ? ?Wafa sɛ yɛ lɔ kɔlɛ’n kwla yo ɔ ye-ɔ?

?Ngue yɛ be yo i Ɲanmiɛn Sielɛ Sua’n nun lɔ-ɔ?

Ɲanmiɛn Sielɛ Sua’m be nun’n, be suan Biblu’n nun like yɛ be kle sran mun wafa nga be kwla nanti Ɲanmiɛn mmla’m be su’n. Aɲia’m be bo tranlɛ’n kwla uka ɔ naan:

w’a si Ɲanmiɛn i su ndɛ nanwlɛ’n.
w’a wun sa nga be ju e su’n be wlɛ.
ɔ nzuɛn’n w’a yo kpa.
a nin sran kpa’m b’a tra janvuɛ.

?A si kɛ be flɛ lika nga Zoova i Lalofuɛ’m be yo be aɲia mun’n kɛ Ɲanmiɛn Sielɛ Sua? Afin blɛ sunman nun’n, lɔ yɛ be koko Ɲanmiɛn i Famiɛn diwlɛ’n i su yalɛ-ɔ.—Matie 6:9, 10; 24:14; Liki 4:43.

?Ngue ti yɛ ɔ fata kɛ a tran aɲia’m be be bo wie-ɔ?

Ndɛ nga á tíe i lɔ’n ɔ́ wá úka-ɔ. Ndɛ nga be kɛn i Zoova i Lalofuɛ’m be aɲia’m be bo’n, i kwlaa taka Biblu’n su. Biblu’n nun ndɛ’n ti’n, a kwla si “ngwlɛlɛ.” (Nyanndra Mun 4:5) Afin Biblu’n kwla uka ɔ naan w’a fa ajalɛ kpa. Asa ekun’n, ɔ kwla uka ɔ naan w’a wun kosan cinnjin wie’m be su tɛlɛ. Kosan sɔ’m be nun wie yɛ:

Lemɔcuɛ kwlaa nun’n, ndɛ nga be yiyi nun be aɲia’m be bo’n, be nun wie mun yɛ:

?Ngue ti yɛ Biblu’n yɛ ɔ fata kɛ ɔ kle e atin’n niɔn?
?Ngue yɛ ɔ kwla uka e ɲrɛnnɛn blɛ’n nun ɔn?
Ɲanmiɛn Sielɛ’n su yo like kpa man e kɛ é sé yɛ’n

Be flɛ talua kun kɛ Brɛnda. Ɔ seli kɛ: “Cɛn kun’n, min wiengu suklu ba kun trannin e aɲia kun bo. Ɔ trannin min wun lɛ. E niannin aɲia fluwa’m be nun likawlɛ. Kɛ aɲia’n wieli’n, ɔ seli min kɛ wafa nga sran’m be tɛli kosan’m be su’n, ɔ yoli i ɲɛnmɛn dan. Ɔ kan guali su kɛ be asɔnun lɔ’n, be leman fluwa naan b’a suan nun like kɛ e sa.”

?A si kɛ Zoova i Lalofuɛ’m be aɲia’m be bo lɔ’n, be tuaman sika yɛ kusu be faman gbogbo annzɛ like uflɛ sinman kɛ be yi cɛlɛ?

Aɲia’m be bo tranlɛ’n wlá ɔ fanngan. Biblu’n waan ninnge nga ti yɛ ɔ fata kɛ Klisifuɛ’m be yia’n i kun yɛle kɛ ‘be wla be wiengu fanngan.’ (Ebre Mun 10:24, 25) Mɛn tɛ yɛ nun’n, sran’m be bu be ngunmin be wun akunndan. Ɔ maan kɛ e nin sran mɔ Ɲanmiɛn i ninnge liɛ mun nin sran uflɛ’m be liɛ’m be lo be’n e yia’n, e ɲan fanngan.

Be flɛ talua kun kɛ Eliza. Ɔ seli kɛ: “Cɛn wie’n ninnge wie’m be ti’n n wunman min fɛ. Sanngɛ kɛ n kɔ aɲia’n bo’n, be nga be o lɔ’n be yo maan min wun kpaja min. Kɛn sa min sin awlo’n, n le wunmiɛn yɛ min klun ti jɔwa dan.”

?A si kɛ mɛn wunmuan’n nun’n, Zoova i Lalofuɛ’m be asɔnun’m be ju be liɛ 120.000 yɛ be aɲia sua’m be ti 60.000 tra su? Kɛ mɔ be nga be tran aɲia’m be bo’n be nuan uka su’n ti’n, afuɛ nuan kwlaa nun’n, be kplan Ɲanmiɛn Sielɛ Sua kɔe 1.500.a

Ndɛ nga ɔ wiengu’m be kan’n

Talua kun m’ɔ suan Jesika’n seli kɛ: “I nun mɔ n wo kolɛzi’n, n yiali min wiengu suklu ba kun aɲia’n bo. Kɛ ɔ wunnin wafa nga ba kanngan mun nin kpɛnngbɛn mun be suan like likawlɛ’n, ɔ yoli i ɲɛnmɛn dan. Koko nun wa’n, sran nga n di junman i sa nun’n, ɔ trannin e aɲia kun bo. Kɛ ɔ wunnin kɛ e kanngan Biblu’n nun tikatika’n, i sɔ’n boli i nuan dan. Kɛ n wunnin kɛ aɲia’n yoli i fɛ’n, i sɔ’n ukali min maan aɲia’m be bo tranlɛ’n wa yoli min fɛ kpa ekun!”

Gbanflɛn kun m’ɔ suan Timote’n seli kɛ: “N wunnin i wlɛ kɛ aɲia’m be bo tranlɛ’n uka min naan m’an buman sa nga be o min su’n be akunndan ngboko. Afin lɔ’n, be kle e like ng’ɔ fata kɛ e yo naan y’a di aklunjuɛ’n ɔ nin like nga é yó naan y’a yo sran kpa y’a tra laa’n. Asa’n, be kle e ninnge uflɛ wie mun ekun. Kɛ e wie aɲia’m be yo mɔ ń sá min sin awlo’n, min klun ti jɔwa yɛ min wla gua ase.”

Gbanflɛn kun m’ɔ suan Zakɔbu’n seli kɛ: “N yiali bian kun aɲia kun bo. Kɛ aɲia’n wieli’n, ɔ seli min kɛ sa nga ti yɛ ɔ bali aɲia’n bo’n yɛle kɛ i waan ɔ́ nían sɛ like nga e lafi su’n ɔ ti nanwlɛ-o. Sanngɛ ɔ wa wunnin i wlɛ kɛ like nga i bɔbɔ lafi su’n yɛ ɔ timan nanwlɛ-ɔ. Kɛ ɔ wunnin wafa nga Zoova i Lalofuɛ’m be yi sran klolɛ’n i nglo’n, ɔ boli i nuan dan. Asa’n, ɔ seli ekun kɛ kannzɛ bɔbɔ ɔ siman Zoova i Lalofuɛ mun laa’n, sanngɛ e sɔli i nun kpa kɛ sran mɔ e si i laa’n sa.”

Talua kun m’ɔ suan Madisɔnun’n seli kɛ: “Blɛ wie nun’n, n se min wun kɛ, kɛ aɲia’n wie cɛ’n n su kɔ. Sanngɛ kɛ é yó aɲia’n, n bumɛn i sɔ akunndan kun. Ɔ maan kɛ aɲia’n ko wie’n, n wla fi awlo kɔlɛ’n su. Yɛ e nin aniaan mun e koko yalɛ. Sɛ ɔ ti kɛ n tranman aɲia’m be bo’n nn andɛ’n n leman janvuɛ kpa.”

a Sɛ ɔ waan á sí ɔ akpasua liɛ’n su lɔ aɲia lika’n, tin Zoova i Lalofuɛ’m be asɔnun aɲia mun” su i sin’n tin “Kunndɛ aɲia yowlɛ ng’ɔ o ɔ tranwlɛ’n wun lɛ’n” su.