Sa mɔ i bo’n gúa kpa’n

“Kɛ mɛn’n ɔ́ kɔ́ i bue nuan’n, lika’n ɔ́ yó kekle.”​—2 TIMOTE 3:1.

?AMUN a ti sa kekle nga be o yɛ’n be su ndɛ le? ?Annzɛ wie’m b’a ju amun bɔbɔ amun su le?

● Tukpacɛ tɛ kun m’ɔ kun sran sunman’n.

● Awe’n ti’n, sran kpanngban kpa be wu.

● Asiɛ’n i kejelɛ’n kun sran akpiakpi ko ju wie, yɛ be nun sunman be sua’m be bubu.

Ndɛ nga bé bá lɛ’n be nun’n, é wá wún ɲrɛnnɛn sa kɛ ngalɛ mun sa ekun. Asa ekun’n, é wá wún i kɛ Biblu’n dun mmua kannin kɛ, “kɛ mɛn’n ɔ́ kɔ́ i bue nuan’n” yɛ ɲrɛnnɛn sa sɔ’m bé jú ɔ.a

Nán kɛ be waan maan e si kɛ mɛn’n w’a yo kekle i ti yɛ be klɛli ndɛ nga mun ɔn. Atrɛkpa’n, e bɔbɔ e wun ɲrɛnnɛn sa sɔ mun weinwein. Sanngɛ be siesieli ndɛ sɔ mun naan be gua e awlɛn su nzue. Ndɛ sɔ’m bé wá klé kɛ Ɲanmiɛn nuan ndɛ nsiɛn nga bé wá bó be su’n, be su kpɛnlɛ’n ɔ kle kɛ mɛn nga y’a ju i ‘bue nuan’ yɛ’n, ɔ ka kaan’n ɔ́ wíe. Ndɛ wie mɔ sran wie’m be kan mɔ be kle be bumɛn i kɛ e o mɛn’n i bue nuan’n, ndɛ nga be lɔngɔlɔngɔ su yɛ’n bé wá yíyí nun. Yɛ bé klé ekun kɛ e kwla lafi su kɛ e ɲrun lɔ’n yó kpa.

[Ja ngua lɛ ndɛ’n]

Ɲanmiɛn nuan ndɛ 1. Asiɛ’n kejelɛ’n

“Asiɛ’n wá kéje dan kpa.”—LIK 21:11.

● Winni le afuɛ kun nin sin. Kɛ asiɛ’n kejeli Aiti lɔ’n, be sua’n bu guali i si nin i nin yɛ i bɔbɔ be su. Be nga be yo maan sran’m be fite televiziɔn nun’n, be nun kun tili i fɛfɛlɛ’n sua’n i bo lɔ. Ɔ maan be kwla cuɛnnin i fiteli. Kɛ lika’n kejeli sɔ’n, ba’n fin nun fiteli, sanngɛ i si nin i nin be wuli.

?NGUE YƐ SA’M BE KLE Ɔ? Afuɛ 2010 nun Zanvie anglo’n nun’n, kɛ asiɛ’n kejeli dan kpa Aiti lɔ’n, sran 300.000 tra su be wuli. Kpɛkun sran lele 1.300.000 be sua’m be ka lɛ bubuli. Kannzɛ bɔbɔ asiɛ’n kejeli dan kpa Aiti lɔ’n, sanngɛ nán lɔ kunngba yɛ asiɛ’n kejeli ɔ. Kɛ ɔ fɛ i afuɛ 2009 nun Avrili anglo’n nun lele afuɛ 2010 nun Avrili anglo’n nun’n, asiɛ wunmuan’n su’n, asiɛ’n kejeli dandan kpɛ ko ju 18.

?NDƐ BENIN YƐ SRAN’M BE TƐ I KAN ƆN? Asiɛ’n kejeman kpɛ sunman traman laa’n. Kɛ mɔ siɛn’n e le mannzin mun naan y’a wun asiɛ ng’ɔ keje’n, i ti yɛ andɛ’n e wun kɛ ɔ keje kpɛ sunman tra laa ɔ.

?I SƆ NDƐ’N TI SU? An bu sa nga i akunndan: Biblu’n boman mɛn’n i awieliɛ blɛ nga nun asiɛ’n i kejelɛ’n nuan. Sanngɛ ɔ se e kɛ ‘asiɛ’n wá kéje dan kpa,’ naan “lika wie’m be nun” yɛ ɔ́ yó sɔ ɔ. Ɔ maan i sɔ liɛ’m bé yó blɛ cinnjin nga e o nun yɛ’n i nzɔliɛ kun.—Mark 13:8; Lik 21:11.

?AMUN BU I SƐ? ?E wun kɛ asiɛ’n keje dandan kpa kɛ nga Biblu’n fa kannin’n sa?

Asiɛ m’ɔ keje’n, i ngunmin kleman kɛ e o mɛn’n i awieliɛ blɛ’n nun. Ɔ ti Ɲanmiɛn nuan ijɔfuɛ’m be ndɛ nga be kannin’n mɔ be su kpɛn su’n be nun kun. Maan e fa e ɲin e sie be ndɛ sɔ’n i nɲɔn su’n, i su.

[Ndɛ kwle, bue 4]

“E [nga e suan asiɛ’n i kejelɛ’n i su like’n,] flɛ be kɛ asiɛ’n m’ɔ keje dan kpa’n. Sran’m uflɛ’m be flɛ be kɛ ɲrɛnnɛn sa.”​—KEN HUDNUT, U.S. GEOLOGICAL SURVEY.

[Foto cifuɛ mun, bue 4]

© William Daniels/​Panos Pictures

Ɲanmiɛn nuan ndɛ 2. Awe

“Awe wá kpɛ́n.”—MARK 13:8.

● Bian kun ɔli Nizɛr nvle’n i klɔ nga be flɛ i Kuarataji’n su lɔ. Ɔ lafi su kɛ ɔ́ ɲán aliɛ lɔ. Bian’n i osufuɛ nin i sinma’m be kusu be fin nvle’n i mmuammua lɔ b’a ba. Afin awe’n w’a kpɛn lɔ. Sanngɛ bian’n i ngunmin la kɛtɛ kun su lɔ. ?Ngue ti yɛ ɔ o i ngunmin ɔn? Klɔ kpɛn’n mɔ be flɛ i Sidi’n i waan kɛ m’ɔ “ɲanman aliɛ naan w’a fa mɛn i awlobofuɛ mun m’ɔ kwlá nianman be sa ngbɛn kun’n, i ti yɛ ɔ o i ngunmin ɔn.”

?NGUE YƐ SA’M BE KLE Ɔ? Asiɛ wunmuan’n su’n, sɛ be fa sran 7 be nun koe 2 be ɲanman aliɛ kpa sa be dimɛn i cɛn ba kun nun. Sran ble mɛn’n i wia atɔliɛ lɔ liɛ’n be kanman. Yɛle kɛ sɛ be fa be lɔ sran 3, be nun 1 ɲanman aliɛ kpa sa blɛ kpanngban nun. Kɛ ɔ ko yo naan y’a wun i wlɛ’n maan e fa awlobo kun i su sunnzun ase. Siɛ nin niɛn’n nin be wa nɔnman’n yɛ be o lɛ ɔ. ?Sɛ aliɛ nga be ɲɛn i’n kwla ju be nun nɲɔn cɛ’n, wan yɛ ɔ́ lá awe ɔ? ?Siɛ’n yɛ, annzɛ niɛn’n yɛ, annzɛ kusu ba’n niɔn? I sɔ ajalɛ’n yɛ cɛn kwlakwla, ɔ fata kɛ awlobo’m be fa ɔ.

?NDƐ BENIN YƐ SRAN’M BE TƐ I KAN ƆN? Aliɛ nga be ɲɛn i asiɛ’n su’n, ɔ ju sran’m be ngba lele tratra su. Like ng’ɔ fata kɛ be yo’n, yɛle kɛ be cɛcɛ aliɛ sɔ’n i kpa.

?I SƆ NDƐ’N TI SU? Ɔ ti su kɛ fie difuɛ’m be fie’m be su’n, be kwla ɲan aliɛ yɛ be kwla fa aliɛ sɔ’n be kɔ mmuammua kpa tra laa’n. I ng’ɔ ti mɔ be yo’n yɛle kɛ aliɛ’n i cɛcɛlɛ’n nun’n, maan awa’m be yo naan sran’m be kwlaa be ɲan aliɛ be di. Sanngɛ kannzɛ be miannin be ɲin kɛ bé yó sɔ’n, b’a kwlá yoman.

?AMUN BU I SƐ? ?Ndɛ ng’ɔ o Mark 13:8 nun’n su kpɛn su? ?Andɛ’n, kannzɛ siansi’n w’a ɔ i ɲrun kpa’n, sanngɛ awe’n te kun sran mun asiɛ wunmuan’n su?

Sa uflɛ m’ɔ ti mɛn’n i awieliɛ’n i nzɔliɛ wie’n, kpɛ sunman’n, asiɛ m’ɔ keje’n ɔ nin awe’n be bo i ɲrun atin.

[Ndɛ kwle, bue 5]

“Ba kanngan nga afɔkɔ nun tukpacɛ annzɛ nzonjiɛ annzɛ tukpacɛ uflɛ kun be’n, sɛ ɔ ti kɛ be ɲan aliɛ kpa be di sa’n, nn be nun wie’m be su wuman.”​—ANN M. VENEMAN, LAA’N Ɔ TI ANUANNZƐ NGA BE FLƐ I THE UN CHILDREN’S FUND I SU KPƐN’N KUN.

[Foto cifuɛ, bue 5]

© Paul Lowe/​Panos Pictures

Ɲanmiɛn nuan ndɛ 3. Tukpacɛ

“Tukpacɛ b’ɔ sa ndɛndɛ’n ɔ́ wá sɔ́n.”—LIK 21:11.

● Bɔnzali tran sran ble mɛn nun wa nvle kun mɔ alɛ’n wo lɔ kpa’n i nun. Ɔ di dɔɔtrɔ junman awa sa nun. Be nga be kunndɛ ninnge kɛ sika ɔkwlɛ sa asiɛ’n bo lɔ mɔ tukpacɛ nga be flɛ i Marburg su kun be’n, ɔ miɛn i ɲin yo be are.a Ɔ srɛli awa sa nun sran nga be o klɔ dandan’m be su’n kɛ be ukɛ i. Sanngɛ ngbɛn ɔn. Kɛ ɔ dili anglo nnan’n yɛ be bɛli i ukalɛ ɔ. Sanngɛ kɛ ɔ́ yó sɔ’n nn Bɔnzali w’a wu lalaa. Be nga i waan ɔ́ dé be’n, be tukpacɛ’n sɛli i.

?NGUE YƐ SA’M BE KLE Ɔ? Be afɔkɔ’n nun tukpacɛ mun, ɔ nin nzonjiɛ’n, ɔ nin Sida’n, ɔ nin tanngɔ ufue’n yɛ jɛkuajo’n, be o tukpacɛ nga be kun sran mun kpa’n be nun wie. Koko nga nun’n, tukpacɛ wafa nnun sɔ’m be kunnin sran ko ju 10.700.000. Ɔ ti kɛ afuɛ nuan kun nun sa’n, segɔndu nsan kwlaa ng’ɔ sin’n, sran kun wu sa.

?NDƐ BENIN YƐ SRAN’M BE TƐ I KAN ƆN? Asiɛ’n su’n, sran’m be te sɔn be te kɔ. I ti’n, tukpacɛ’n kusu’n, ɔ sɔn kɔ wie. Sran nga be kwla tɔ tukpacɛ’n be sɔnnin tra laa’n.

?I SƆ NDƐ’N TI SU? Mɛn wunmuan’n nun sran’m b’a sɔn tɛtɛ kpa. Sanngɛ tukpacɛ’n be silɛ’n ɔ nin be are yolɛ’n kusu w’a sɔn wie. Ɔ maan ɔ nin i fata kɛ tukpacɛ’n kan ase. ?Nɛ́n i ɔ? Sanngɛ tukpacɛ’n te kle sran’m be yalɛ te kɔ.

?AMUN BU I SƐ? ?Tukpacɛ mɔ be sa ndɛndɛ’n be o sran’m be su kɛ nga Biblu’n fa kannin’n sa?

Asiɛ’n m’ɔ keje’n, nin awe’n yɛ tukpacɛ’n be nunkun sran akpinngbin kpanngban. Sanngɛ sran akpinngbin kpanngban be liɛ’n, be wiengu klɔ sran mun yɛ be kle be ɲrɛnnɛn ɔn. Wie liɛ’n be ng’ɔ fata kɛ be sasa sran mun’n, be li yɛ be kle sran sɔ’m be yalɛ ɔ. Maan e nian sa nga Biblu’n waan ɔ́ wá jú’n.

[Ja ngua lɛ ndɛ’n]

[Ndɛ kwle, bue 6]

“Sɛ asɔmɔli annzɛ like wie di sran kun’n, ɔ yo ɲrɛnnɛn. I kunngba’n, kɛ tukpacɛ tɛ wie didi sran kun i klun lɔ’n, mɔ e wun kɛ i sɔ’n tukpacɛ’n w’a tru lika kwlaa’n, ɔ yo ɲrɛnnɛn wie.”​—MICHAEL OSTERHOLM, Ɔ TI DƆƆTRƆ BIAN.

[Foto cifuɛ, bue 6]

© William Daniels/​Panos Pictures

Ɲanmiɛn nuan ndɛ 4. Be kloman be awlobofuɛ mun

“Sran’m [...] be su klo-man sran.”—2 TIMOTE 3:1-3.

● Angle’m be lɔ lika nga be flɛ i North Wales lɔ’n, Klisi di junman anuannzɛ wie m’ɔ uka be nga be kle be ɲrɛnnɛn awlo lɔ’n i nun. Klisi waan: “N wla kpɛn bla kun su. Be boli bla sɔ’n i tɛtɛ kpa, ɔ maan kɛ ɔ bali wa’n, m’an wunmɛn i wlɛ. Bla wie’m be liɛ’n, be akunndan’n m’ɔ sanngan tɛ kpa’n ti’n, be kwlá manman be ti’n su be nianman sran ɲrun.”

?NGUE YƐ SA’M BE KLE Ɔ? Sran ble mɛn’n nun wa’n, nvle kun nun’n, sɛ be bubu bla’m be nun akpasua nsan’n, be kunndɛli be nun akpasua 1 i ba kaan nun. Nvle kunngba’n nun’n, be usausali yasua’m be sa. Sɛ be bubu yasua nga be usali be sa sɔ’m be nun akpasua nsan’n, akpasua wunmuan kun tra su nunfuɛ’m, be waan sɛ be bo be yi mun’n ɔ timan tɛ. Sanngɛ kusu nán bla’m be ngunmin yɛ be kle be ɲrɛnnɛn awlo lɔ ɔ. Kanada lɔ’n, sɛ be fa yasua 10, be nun ko ju 3 be liɛ’n, be yi’m be yo be like yaya titi, annzɛ be kle be ɲrɛnnɛn wafa uflɛ wie.

?NDƐ BENIN YƐ SRAN’M BE TƐ I KAN ƆN? Nán andɛ sa yɛ sran’m be boli be wiengu ɲrɛnnɛn klelɛ awlo lɔ ɔ. Andɛ’n, sran’m be su kɛn i ndɛ dan trá laa’n ti ɔ.

?I SƆ NDƐ’N TI SU? Afuɛ nga be sinnin yɛ’n be nun’n, sran nga be si awlobofuɛ’m be wiengu kpokokpoko yolɛ’n i su ndɛ tra laa’n, be sɔnnin kpa. ?Sanngɛ i sɔ’n yoli maan awlobofuɛ’m be wiengu kpokokpoko yolɛ’n kannin ase? Cɛcɛ, w’a yoman sɔ. Dɔ nga su li yɛ sran’m be kloman sran kun mlɔnmlɔn’n niɔn.

?AMUN BU I SƐ? ?Ndɛ ng’ɔ o 2 Timote 3:1-3 nun’n su kpɛn su? ?Sran kpanngban be te klo be awlobofuɛ mun kɛ ng’ɔ fata kɛ be fa klo be’n sa?

Ɲanmiɛn nuan ijɔfuɛ’m be ndɛ nga be kannin’n i nnun su ng’ɔ su kpɛn su e ɲin bo lɛ’n, ɔ kan asiɛ m’ɔ ti e tranwlɛ’n. Maan e nian ndɛ nga Biblu’n kɛn i sɔ’n su’n.

[Ndɛ kwle, bue 7]

“Sa tɛtɛ nga be kɛnmɛn i ndɛ kpa’n i kun yɛle awlobofuɛ’n be wiengu ɲrɛnnɛn klelɛ’n. Sɛ é kwlá sé’n, saan bé bó bla kun lele kpɛ 35 naan w’a kan kle polisie mun.”​—BLA KUN M’Ɔ TI ANUANNZƐ NGA E KƐNNIN I NDƐ’N, I NUAN IJƆFUƐ’N.

Ɲanmiɛn nuan ndɛ 5. Asiɛ’n i sacilɛ

“[Nyanmiɛn] núnnún be nga be saci asiɛ’n.”—SA NGLO YILƐ 11:18.

● Bian kun suan Pirri, ɔ kan mme yo i atɛ Nizeria lɔ klɔ nga be flɛ i Kpor su. Kɛ kannin nzue kpanngban kpa guali nzue nga be flɛ Nizɛr nun’n, i aata’n sacili. I waan: “Ɔ kunnin e jue mun, ɔ sacili e wunnɛn kplo’n, kpɛkun ɔ sacili e nzue ba mun. N kwlá ɲanman n sa ti like kun.”

?NGUE YƐ SA’M BE KLE Ɔ? Sa sifuɛ wie’m be waan afuɛ nuan kwlaa nun’n, mɛn wunmuan’n nun’n, wla tɔnun akpinngbin 6 nin sin be gua jenvie’n nun. I sɔ wla liɛ’n i bue ti potomo m’ɔ di afuɛ ya kpanngban naan w’a kplɔ’n. Klɔ sran’m be faman ninnge tɛtɛ’m be saciman asiɛ’n ngunmin, sanngɛ be fɛn i su ninnge kpakpa’n kwlaa wie. Asiɛ’n i su ninnge’m be fɛnlɛ’n i su like nga be suannin’n, ɔ kle kɛ asiɛ’n i su like nga klɔ sran’m be fɛ i afuɛ nuan kun nun sa’n, ɔ fata kɛ ɔ di afuɛ kun anglo nnun naan asiɛ’n w’a yo ninnge sɔ’m be uflɛ ekun. Ɔstrali lɔ zronali kun waan “sɛ sran’m be sɔn kɔ be ɲrun titi naan b’a yaciman asiɛ’n su ninnge’m be finfin yolɛ’n, kɛ bé sé kɛ afuɛ 2035 w’a ju’n, ɔ fata kɛ e ɲan asiɛ nɲɔn naan y’a kwla tran nguan nun.”—Sydney Morning Herald.

?NDƐ BENIN YƐ SRAN’M BE TƐ I KAN ƆN? Klɔ sran’m be si ngwlɛlɛ yɛ be kwla ɲan sa’m be trawlɛ. E kwla yo naan asiɛ’n w’a saciman mlɔnmlɔn.

?I SƆ NDƐ’N TI SU? Sran wie mɔ be tu be klun be di junman kpa’n, be boli lika’n i wafa ng’ɔ su yo’n i jɔ, naan sran’m be si nun. Sanngɛ sran’m be te saci asiɛ’n i tɛtɛ kpa be te kɔ.

?AMUN BU I SƐ? ?Ɔ fata kɛ Ɲanmiɛn fa ajalɛ kɛ ng’ɔ fa kannin’n sa, naan asiɛ’n w’a saciman mlɔnmlɔn?

Ɲanmiɛn nuan ijɔfuɛ’m be ndɛ nnun nga y’a wun be lɛ’n be nun wie mun ekun yɛle sa kpa mɔ bé jú mɛn’n i awieliɛ blɛ nun’n, mɔ Biblu’n kan be ndɛ wie’n. Ɲanmiɛn nuan ijɔfuɛ’m be ndɛ nsiɛn su’n nun’n, maan e fa e ɲin e sie i sa kpa sɔ’m be nun kun su.

[Ndɛ kwle, bue 8]

“Ɔ yo min kɛ min lika kan nga n le i laa’n ɔ ti kɛ mɛn klanman wie sa. Sanngɛ siɛn’n, wla tɛtɛ ng’ɔ kwla kun sran’n yɛ ɔ o nun ɔn.”​—AFUƐ 2010 NUN KANNIN NZUE M’Ɔ GUALI AMLƐNKƐN’M BE JENVIE’N NUN’N YƐ ERIN TAMBER KƐN I NDƐ Ɔ.

[Kuku, bue 8]

?Ɲanmiɛn yɛ maan sa sɔ’m be ju ɔ?

?Kɛ mɔ Biblu’n dun mmua kannin sa tɛtɛ nga e wun be andɛ’n be ndɛ’n ti’n, nn Ɲanmiɛn yɛ maan sa sɔ’m be ju ɔ? ?Ɲanmiɛn ti yɛ maan e wun ɲrɛnnɛn ɔn? Amun kwla wun kosan sɔ’m be su tɛlɛ ng’ɔ nin i fata’n fluwa ?Ngue like yɛ Biblu’n kle i sakpasakpa ɔ? i ndɛ tre 11 nun. Zoova i Lalofuɛ mun yɛ be yili ɔ.

[Foto cifuɛ, bue 8]

U.S. Coast Guard photo

Ɲanmiɛn nuan ndɛ 6. Mɛn’n nun jasin fɛ’n i bolɛ

“Bé wá kán Nyanmiɛn sielɛ’n i jasin fɛ nga mɛn wunmuan’n nun.”—MATIE 24:14.

● Vaiatea tran jenvie nga be flɛ i Pasifiki’n i lika mmua kun m’ɔ suan Tuamotu’n i nun lɔ. Lika lele 80 mɔ nzue’n bo sin yia be’n yɛ be o lɔ lika’n nun ɔn. Lika nga be sanndi nun’n, i dan’n tra Côte d’Ivoire nvle’n kpɛ ko ju nsan. Sanngɛ sran ko ju 16.000 cɛ yɛ be tran be nun ɔn. Ɔ nin i sɔ ngba’n, Zoova i Lalofuɛ’m be ko niannin Vaiatea nin i lika’n nun lɔfuɛ’m be osu. ?Ngue ti ɔ? Afin kannzɛ sran’m be tranwlɛ ti sɛ ti sɛ’n, be kunndɛ kɛ bé bó Ɲanmiɛn Sielɛ’n i jasin fɛ’n bé klé be kwlakwla.

?NGUE YƐ SA’M BE KLE Ɔ? Ɲanmiɛn Sielɛ’n i jasin fɛ’n su ju asiɛ’n i longolongo’n kwlaa nun. Afuɛ 2010 nun ngunmin’n, Zoova i Lalofuɛ’m be fali dɔ akpi ngbinngbin 1 dɔ akpinngbin ya 6 be boli jasin fɛ’n nvlenvle 236 nun. Ɔ ti kɛ nn cɛn ba kwlaa nun’n, Zoova i Lalofuɛ’m be tinuntinun be fa miniti 30 be bo jasin fɛ’n sa. Afuɛ blu nga be sinnin lɛ’n nun’n, be yili Biblu’n i akua akpi ngbinngbin 20 tra su be fa mannin sran mun.

?NDƐ BENIN YƐ SRAN’M BE TƐ I KAN ƆN? Be sɔ jasin fɛ ng’ɔ o Biblu’n nun i bolɛ’n i afuɛ akpiakpi kpanngban yɛ.

?I SƆ NDƐ’N TI SU? Ɔ ti su kɛ sran kpanngban be kannin Biblu’n nun ndɛ wie mun kleli sran mun. Sanngɛ be nun sunman b’a yoman sɔ b’a cɛman, yɛ b’a boman jasin’n b’a ɔman mmua. Sanngɛ Zoova i Lalofuɛ’m be liɛ’n be siesieli be jasin fɛ’n i bolɛ’n cɛcɛcɛ, yɛ be bo i asiɛ wunmuan’n su. Ɔ maan sran akpinngbin kpanngban be ti be ndɛ’n. Kannzɛ bɔbɔ mɛn’n nun anuannzɛ nga be le kwlalɛ kpa’n be nun wie’m be kleli be ɲrɛnnɛn sɛ’n, sanngɛ b’a yaciman jasin fɛ’n i bolɛ le.a (Mark 13:13) Asa ekun’n, kɛ Zoova i Lalofuɛ’m be bo jasin fɛ’n be tuaman be kalɛ. Be klunklo su be fa be blɛ’n nin be fluwa mun be man sran mun, dein fiteman nun. Sran’m be klunklo like nga be fa man be’n yɛ be fa di be junman’n niɔn.

?AMUN BU I SƐ? ?Be su bo ‘Nyanmiɛn sielɛ’n i jasin fɛ’n’ asiɛ wunmuan’n su? ?Ɲanmiɛn nuan ndɛ sɔ’n i su kpɛnlɛ’n kwla kle kɛ like kpa o e ɲrun koko lɛ?

[Ja ngua lɛ ndɛ’n]

[Ndɛ kwle, bue 9]

“Sɛ Zoova nin a tanninman jasin fɛ’n i bolɛ’n i wun atin’n, é tú e klun é bó. É yó like kwlaa nga e kwla yo’n naan y’a bo y’a kle sran mun.”​—ANNUAIRE DES TÉMOINS DE JÉHOVAH — 2010.

Lika’n yó kpa e ɲrun lɔ!

“Ɔ ka kaan sa, be su wun-man klunwifuɛ’n kun. [...] Yalɛfuɛ mun [wun ase kanfuɛ mun] yɛ mɛn’n ɔ́ wá yó be liɛ-ɔ. Bé wún jɔ́ be kpa fɔuun!”—JUE MUN 37:10, 11.

?AMUN kunndɛ kɛ Ɲanmiɛn nuan ijɔfuɛ’m be ndɛ nga be kɛnnin i lɛ’n kpɛn su? Ɔ ti su kɛ amun kunndɛ sɔ. Ninnge kpanngban be kle jrɛiin kɛ ɔ cɛ kaan sa’n ɔ́ kpɛ́n su.

Ɲanmiɛn nuan ijɔfuɛ’m be ndɛ nga be kannin’n mɔ be kle weiin kɛ e o mɛn’n “i bue nuan’n,” ndɛ nga be sinnin lɛ’n, be boli be su. (2 Timote 3:1-5) Ɲanmiɛn fɛli i ndɛ’n wlali Biblu’n i klɛfuɛ’m be nuan naan be dun mmua be bo sa sɔ’m be su. Ɔ yoli sɔ naan ɔ́ fá cící e wla. (Rɔmfuɛ Mun 15:4) Ɲanmiɛn nuan ijɔfuɛ’m be ndɛ sɔ’m be su kpɛnlɛ’n kle kɛ lika’n mɔ w’a yo sukusuku andɛ yɛ’n, ɔ su wa wie.

?Kɛ mɛn’n i awieliɛ blɛ’n ko sin’n, ngue yɛ ɔ́ bɛ́ i sin ɔn? Ɲanmiɛn Sielɛ’n ɔ́ síe klɔ sran’m be kwlaa. (Matie 6:9, 10) Wafa nga blɛ sɔ’n nun’n asiɛ’n wá yó’n, maan e nian kɛ Biblu’n kɛn i ndɛ’n:

● Awe’n su kunman sran kun. “Maan ble’n ɔ su lele ɔ bu mɛn’n nun. Maan kpɔlɛ’m be su’n, be wun kɛ aunngban’n ɔ keje ble ja kpanngban.”—Jue Mun 72:16.

● Be su wunman tukpacɛ’n i osu kun. “[Sran] wie fi su se-man kɛ: ‘N kpinndinman.’”—Ezai 33:24.

● Asiɛ’n bó mɔnnɛn. “Maan aawlɛ flɛnnɛn’n nin asiɛ’n b’ɔ yo-man like ye’n, be klun jɔ. Maan aawlɛ flɛnnɛn’n i wun kpɛjɛ i, maan i nun ijre’m be bo nyrɛ.”—Ezai 35:1.

Ɲanmiɛn nuan ijɔfuɛ’m be ndɛ ng’ɔ cɛ kaan sa bé kpɛ́n su mɔ be wla e fanngan’n, be nun kaan sa yɛ be o lɛ ɔ. ?Ngue ti yɛ amun seman Zoova i Lalofuɛ mun naan be kleman amun like nga ti yɛ be lafi su kɛ ɔ cɛ kaan sa’n, lika’n yó kpa e ɲrun lɔ’n niɔn?