?Wafa sɛ yɛ Zoova kleli kɛ mɛn klanman’n i su nda ng’ɔ tali’n kpɛ́n su-ɔ?

1. ?Ndɛ benin yɛ Ɲanmiɛn nuan ijɔfuɛ Ezai kan kleli Izraɛlifuɛ mun-ɔn?

ƝANMIƐN nuan ijɔfuɛ Ezai seli kɛ Zoova ti ‘Ɲanmiɛn kun m’ɔ ti nanwlɛfuɛ-ɔ.’ Glɛki nun ndɛ mma nga be kacili i Wawle nun kɛ “nanwlɛfuɛ’n” i bo’n yɛle kɛ “maan ɔ yo sɔ.” (Eza. 65:16) Kɛ Biblu’n kán Zoova nin Zezi be ndɛ m’ɔ se kɛ “maan ɔ yo sɔ’n,” i sɔ’n kle kɛ ndɛ nga be kan’n ti nanwlɛ. Ɔ maan ndɛ nga Ezai waan ɔ́ kán klé Izraɛlifuɛ mun’n yɛle kɛ: Sɛ Zoova se kɛ sa kun jú’n, saan ɔ́ jú sakpasakpa. I kpa bɔbɔ’n, Zoova yia nda kwlaa ng’ɔ ta be’n be nuan titi.

2. (1) ?Ngue ti yɛ e kwla lafi sa nga bé wá jú e ɲrun lɔ’n be su ndɛ nga Zoova kannin’n su-ɔ? (2) ?Kosan benin mun yɛ é wá tɛ́ be su like suanlɛ nga nun-ɔn?

² ?E kwla lafi su kɛ e ɲrun lɔ sa’m be su ndɛ nga Zoova kannin’n bé kpɛ́n su wie? Kɛ Ezai wuli m’ɔ dili afuɛ kɔe 800, akoto Pɔlu kannin like nga ti yɛ e kwla lafi ndɛ nga Ɲanmiɛn kan’n su’n i ndɛ. Ɔ seli kɛ: “Ɲanmiɛn kwlá buaman ato.” (Ebr. 6:18) Nzue ti kun i nun nzue’n kwlá yoman flɔlɔ naan i kunngba’n w’a yo klakla. I wafa kunngba’n, Zoova kwlá yoman nanwlɛfuɛ naan i kunngba’n w’a yo ato buafuɛ. I sɔ’n ti’n, e kwla lafi ndɛ kwlaa nga Zoova kan’n su. I wie yɛle kɛ e kwla lafi e ɲrun lɔ sa’m be su ndɛ nga Zoova kannin’n su. Like suanlɛ nga nun’n, é wá tɛ́ kosan nga’m be su: ?Ngue yɛ Zoova seli kɛ ɔ́ yó mán e-ɔ? ?Ngue yɛ ɔ kle kɛ ɔ́ yó like sɔ’n sakpasakpa-ɔ?

?NGUE YƐ ZOOVA SELI KƐ Ɔ́ YÓ MÁN E-Ɔ?

3. (1) ?Nda benin yɛ Ɲanmiɛn tali m’ɔ yo i sufuɛ’m be fɛ kpa-ɔ? (Sa Nglo Yilɛ 21:​3, 4) (2) ?Kɛ e kan nda sɔ’n i ndɛ e kle sran mun’n, wafa sɛ yɛ be wun yo be-ɔ?

³ Like nga Zoova waan ɔ́ yó mɔ é wá kɛ́n i ndɛ like suanlɛ nga nun’n, ɔ ti Ɲanmiɛn i sufuɛ mɔ be o mɛn wunmuan’n nun’n be cinnjin kpa. (An kanngan Sa Nglo Yilɛ 21:​3, 4 nun.) Zoova seli kɛ blɛ kun nun’n “wie’n su tranman lɛ kun, be su yoman sɛ kun, be su sunman kun, be su wunman ɲrɛnnɛn kun.” Kɛ é bó jasin fɛ’n é klé sran mun’n, e nun sunman e kanngan ndɛ mma sɔ’n nun e fa kan mɛn klanman’n i ndɛ. ?Wafa sɛ yɛ sran sunman be bu ndɛ sɔ’n niɔn? Ɔ ju wie’n, be bu i lafilɛ nun ndɛ.

4. (1) ?Kɛ Zoova kán mɛn klanman’n i ndɛ’n, ngue sa yɛ ɔ si kɛ ɔ́ wá jú e blɛ su-ɔ? (2) ?Kɛ Zoova tali mɛn klanman’n i su nda’n, ngue yɛ ɔ yoli i ekun-ɔn?

⁴ Kɛ Zoova kán mɛn klanman’n i su ndɛ klé Zan’n, ɔ si kɛ cɛn wie lele’n, kɛ i sufuɛ’m bé wá bó jasin fɛ’n bé kán ndɛ sɔ’n bé klé sran mun. Asa ekun’n, ɔ si kɛ ndɛ sɔ’n i su lafilɛ’n yó kekle mán sran kpanngban. (Eza. 42:9; 60:2; 2 Kor. 4:​3, 4) ?Wafa sɛ yɛ e kwla uka sran mun naan b’a lafi su kɛ ndɛ ng’ɔ o Sa Nglo Yilɛ 21:​3, 4 nun’n, ɔ́ kpɛ́n su sakpa-ɔ? ?Yɛ ngue yɛ ɔ kwla uka e naan y’a lafi ndɛ sɔ’n su kpa-ɔ? Zoova kannin ndɛ wie mɔ be kle kɛ e kwla lafi ndɛ sɔ’n su-ɔ. ?Ndɛ benin yɛ ɔ kannin-ɔn?

ZOOVA KLELI KƐ NDA NG’Ɔ TALI’N KPƐ́N SU

5. ?Ngue yɛ ɔ kle kɛ e kwla lafi mɛn klanman’n i su nda nga Zoova tali’n su-ɔ?

⁵ Kɛ Zoova kannin ndɛ ng’ɔ o Sa Nglo Yilɛ 21:4 nun’n, i sin’n ɔ kannin ndɛ kun m’ɔ kle kɛ ndɛ sɔ’n kpɛ́n su sakpa-ɔ. Biblu’n se kɛ: “Sran ng’ɔ ti famiɛn bia’n su’n seli kɛ: ‘Nian! N su yo like kwlaa uflɛ.’ Ɔ seli ekun kɛ: ‘Klɛ ndɛ sɔ mun, afin be ti nanwlɛ, yɛ be kwla lafi su.’ Kpɛkun ɔ seli min kɛ: ‘Ndɛ sɔ’m b’a kpɛn su! N ti Alfa nin Omega, n ti bo bolɛ nin awieliɛ.’”—Ngl. 21:​5, 6a.

6. ?Ngue ti yɛ ndɛ ng’ɔ o Sa Nglo Yilɛ 21:​5, 6 nun’n wla e fanngan-ɔn?

⁶ ?Wafa sɛ yɛ ndɛ mma sɔ’m be uka e naan y’a lafi nda nga Ɲanmiɛn tali’n su kpa-ɔ? E fluwa’m be nun kun seli kɛ: “Wafa nga Zoova kannin ndɛ’n ndɛ mma sɔ’m be nun’n, ɔ ti kɛ sran kun m’ɔ fɛ i sa ti nzɔliɛ sie i fluwa kun su naan ɔ́ fá klé kɛ be kwla lafi fluwa sɔ’n i nun ndɛ’n su’n sa.”b Nda nga Ɲanmiɛn tali’n ɔ o Sa Nglo Yilɛ 21:​3, 4 nun. Kpɛkun i mma 5 nin 6 nun’n, ɔ kannin ndɛ kun m’ɔ kle kɛ ɔ́ yía nda ng’ɔ tali’n i nuan-ɔn. Sɛ é kwlá sé’n, ɔ ti kɛ w’a fɛ i sa ti nzɔliɛ w’a sie i ndɛ sɔ’n su sa. Siɛn’n, maan e fa e ɲin e sie i wafa nga Zoova kleli kɛ nda ng’ɔ tali’n kpɛ́n su’n i su.

7. (1) ?Wan yɛ ɔ boli ijɔlɛ bo Sa Nglo Yilɛ 21:5 nun-ɔn? (2) ?Ngue ti yɛ ndɛ ng’ɔ kannin’n ti cinnjin-ɔn?

⁷ Sa Nglo Yilɛ fluwa’n nun’n, Zoova ijɔli kpɛ nsan. Be nun kun yɛle ndɛ ng’ɔ o Sa Nglo Yilɛ 21:5 nun’n. Ndɛ mma sɔ’n bo i bo kɛ: “Sran ng’ɔ ti famiɛn bia’n su’n seli kɛ.” I sɔ’n kle kɛ nán anzi kun annzɛ Zezi mɔ Ɲanmiɛn cɛnnin i’n yɛ ɔ su wa ijɔ-ɔ, sanngɛ Zoova bɔbɔ-ɔ. Ɔ maan e kwla fa e wla’n kwlaa e guɛ i ndɛ ng’ɔ su wa kan’n su. Afin Zoova “kwlá buaman ato.” (Tit. 1:2) Ɔ maan ndɛ ng’ɔ o Sa Nglo Yilɛ 21:​5, 6 nun’n, ɔ́ kpɛ́n su sakpa.

“NIAN! N SU YO LIKE KWLAA UFLƐ”

8. ?Ndɛ benin yɛ Zoova kannin m’ɔ kle kɛ nda ng’ɔ tali’n kpɛ́n su-ɔ? (Ezai 46:10)

⁸ Sa Nglo Yilɛ 21:5 nun’n be seli kɛ: “Nian!” Glɛki nun ndɛ mma nga be kacili i Wawle nun kɛ “nian!” be fa kannin ndɛ kpɛ sunman Sa Nglo Yilɛ fluwa’n nun. Fluwa kun seli kɛ kɛ be se sran kun sɔ’n, i sɔ’n kle kɛ be kunndɛ kɛ ɔ fɛ i ɲin sie i ndɛ nga be su wa kan’n su kpa. ?I sin’n, ndɛ benin yɛ Ɲanmiɛn kannin-ɔn? Ɔ seli kɛ: “N su yo like kwlaa uflɛ.” I yo, Zoova nin-a yoman ninnge sɔ mun. Sanngɛ wafa ng’ɔ fa kannin ndɛ’n, ɔ ti kɛ nn w’a dun mmua w’a yo ninnge sɔ mun sa.—An kanngan Ezai 46:10 nun.

9. (1) ?Kɛ Zoova seli kɛ ‘ɔ su yo like kwlaa uflɛ’n’ ndɛ sɔ’n i bo’n yɛle benin? (2) ?Ngue sa yɛ ɔ́ jú “Ɲanmiɛn su laa liɛ’n nin asiɛ laa liɛ’n” be su-ɔ?

⁹ ?Kɛ Zoova se kɛ ‘n su yo like kwlaa uflɛ’n,’ ndɛ sɔ’n i bo’n yɛle benin? I sɔ’n kle kɛ Zoova wá yó like nɲɔn. Like klikli’n yɛle kɛ ɔ́ wá núnnún mɛn tɛ nga, yɛ i nɲɔn su’n yɛle kɛ ɔ́ wá yó maan asiɛ’n káci lika klanman. Sa Nglo Yilɛ 21:1 se kɛ: ‘Ɲanmiɛn su laa liɛ’n nin asiɛ laa liɛ’n be nunman lɛ kun.’ “Ɲanmiɛn su laa’n” yɛle mɛn’n nun awa mɔ Satan nin i mmusu’m be sa o be su’n. (Mat. 4:​8, 9; 1 Zan 5:19) Wie liɛ’n, kɛ Biblu’n kán “asiɛ’n” i ndɛ’n, klɔ sran mɔ be o asiɛ’n su’n be ndɛ yɛ ɔ kan-ɔn. (Bob. 11:1; Jue. 96:1) Ɔ maan “asiɛ laa’n” yɛle klɔ sran nga be ti klunwifuɛ’n. Biblu’n seman ngbɛn kɛ Ɲanmiɛn wá síesíe ‘ɲanmiɛn su’n’ nin ‘asiɛ’n’ be ye, sanngɛ ɔ se kɛ ɔ́ wá núnnún be. Kpɛkun ɔ́ fá “ɲanmiɛn su uflɛuflɛ kun, ɔ nin asiɛ uflɛuflɛ kun” ɔ́ síe be osu. Yɛle kɛ ɔ́ wá táka awa uflɛ kun m’ɔ́ wá síe sran kpa mun-ɔn.

10. ?Ngue yɛ Zoova wá yó i uflɛ-ɔ?

¹⁰ Sa Nglo Yilɛ 21:5 nun’n, Zoova seli ekun kɛ: “N su yo like kwlaa uflɛ.” Kɛ e fa e ɲin e sie i ndɛ sɔ’n su kpa’n, e wun i kɛ Zoova w’a seman kɛ: “N su yi ninnge uflɛ mun.” Sanngɛ ɔ seli kɛ: “N su yo like kwlaa uflɛ.” I sɔ’n kle kɛ Zoova wá yó maan sɛ é kwlá sé’n asiɛ’n nin klɔ sran’m bé yó uflɛ. Yɛle kɛ ɔ́ síesíe asiɛ’n i ye yɛ ɔ́ yó maan fɔ su tranman sran’m be nun kun. Kɛ nga Ezai fa kannin sa’n, Zoova wá yó maan asiɛ’n wunmuan’n káci lika klanman kɛ Edɛnin lɔ fie’n sa. Asa’n, ɔ́ yó maan tukpacɛ kwlaa ng’ɔ o sran’m be su’n bé wíe. Blɛ sɔ’n nun’n, be nga be ja’n timan kpa’n bé tú kpɛ́n, aɲinsifuɛ’m bé wún ase, sutrefuɛ’m bé tí sa, yɛ be nga be wuli’n bé cɛ́n nguan.—Eza. 25:8; 35:​1-7.

“KLƐ NDƐ SƆ MUN, AFIN BE TI NANWLƐ, YƐ BE KWLA LAFI SU. […] NDƐ SƆ’M B’A KPƐN SU!”

11. (1) ?Ngue yɛ Zoova seli Zan kɛ ɔ yo-ɔ? (2) ?Yɛ ngue ti-ɔ?

¹¹ ?Ndɛ uflɛ benin yɛ Ɲanmiɛn kannin m’ɔ kwla uka e naan y’a lafi i su-ɔ? Zoova seli Zan kɛ: “Klɛ ndɛ sɔ mun, afin be ti nanwlɛ, yɛ be kwla lafi su.” (Ngl. 21:5) Zoova w’a seman Zan i ngbɛn kɛ ɔ “klɛ” ndɛ’n, sanngɛ ɔ kannin sa nga ti yɛ ɔ fata kɛ ɔ yo sɔ’n i ndɛ wie. Ɔ seli kɛ ‘ndɛ sɔ’m be ti nanwlɛ, yɛ be kwla lafi su.’ I sɔ’n kle kɛ be kwla lafi Ɲanmiɛn Ndɛ’n su. Kɛ Zan yoli like nga Zoova seli i kɛ ɔ yo m’ɔ klɛli ndɛ sɔ mun’n, i sɔ’n yo e fɛ kpa. Afin i sɔ’n ti’n, e kwla si mɛn klanman’n i su ndɛ nga Ɲanmiɛn kannin’n yɛ e kwla bu ninnge kpakpa nga é wá ɲán be’n be su akunndan.

12. ?Ngue ti yɛ Zoova seli kɛ ‘ndɛ sɔ’m b’a kpɛn su-ɔ!’?

¹² ?Ngue ndɛ yɛ Ɲanmiɛn kɛnnin i ekun-ɔn? Ɔ seli kɛ: “Ndɛ sɔ’m b’a kpɛn su!” (Ngl. 21:6) Siɛn’n, Zoova kan ndɛ’n kɛ mɛn klanman’n i su ndɛ kwlaa ng’ɔ kannin be’n b’a dun mmua b’a kpɛn su sa. Ɔ kannin sɔ afin like fi kwlá yoman naan w’a yomɛn i klun sa’n. I sin’n, Zoova kannin ndɛ uflɛ ekun m’ɔ kwla uka e naan y’a lafi nda ng’ɔ tali’n su’n. ?Ndɛ sɔ’n yɛle benin?

“N TI ALFA NIN OMEGA”

13. ?Ngue ti yɛ Zoova se kɛ ɔ ‘ti Alfa nin Omega-ɔ’?

¹³ Kɛ nga e fa wunnin i sa’n, aolia nun ninnge nga Zan wunnin be’n be nun’n, Zoova bɔbɔ ijɔli kpɛ nsan. (Ngl. 1:8; 21:​5, 6; 22:13) Blɛ kwlaa sɔ’n nun’n, ɔ seli kɛ: “N ti Alfa nin Omega.” Glɛki nun’n, fluwa mma klikli’n yɛle Alfa yɛ kasiɛn’n yɛle Omega. Ɔ maan kɛ Zoova se kɛ ‘ɔ ti Alfa nin Omega’n,’ i sɔ’n kle kɛ kɛ ɔ bo like kun bo’n, ɔ guɛ i bo.

14. (1) ?Blɛ benin nun yɛ Zoova seli kɛ ‘Alfa-ɔ,’ yɛ blɛ benin nun yɛ ɔ́ wá sé kɛ ‘Omega-ɔ’? (2) ?Ngue yɛ ndɛ ng’ɔ o Bo Bolɛ 2:​1-3 nun’n kle e-ɔ?

¹⁴ Kɛ Zoova yili Adan nin Ɛvu’n, ɔ kannin like nga i waan ɔ́ yó mán klɔ sran mun’n nin like nga i waan ɔ́ yó i asiɛ’n su’n be ndɛ. Biblu’n se kɛ: “Ɲanmiɛn yrali be su, ɔ seli be kɛ: ‘Amun wu ba kpanngban, amun sɔn kpa, amun yi asiɛ’n yɛ amun sie i. Amun sie jenvie’n nun jue mun nin ninnge kwlaa nga be tu sin nglo’n ɔ nin nnɛn nga be o asiɛ’n su’n be kwlaa.’” (Bob. 1:28) Blɛ sɔ’n nun’n, sɛ é kwlá sé’n Zoova seli kɛ “Alfa.” Like ng’ɔ kunndɛ kɛ ɔ́ yó’n ɔ kɛnnin i ndɛ weiin. Yɛle kɛ ɔ kunndɛ kɛ Adan nin Ɛvu be mma mɔ fɔ nunman be nun’n be yi asiɛ’n yɛ be yo naan ɔ kaci lika klanman. Kɛ ndɛ sɔ’n wá kpɛ́n su’n, sɛ é kwlá sé’n, Zoova wá sé kɛ “Omega.” Kɛ Zoova yili “nglo nin asiɛ’n nin be su ninnge kwlaa’n,” ɔ kannin ndɛ kun m’ɔ kle kɛ i klun sa’n kpɛ́n su-ɔ. Ndɛ sɔ’n wo Bo Bolɛ 2:​1-3 nun. (An kanngan nun.) Zoova yrali cɛn nso su’n su, yɛ ɔ sieli i ngunmin. I sɔ m’ɔ yoli’n kle kɛ like nga i waan ɔ́ yó mán klɔ sran mun’n nin like nga i waan ɔ́ yó i asiɛ’n su’n saan bé kpɛ́n su. Ɔ maan kɛ cɛn ba nso sɔ’n fá wíe’n, nn i klun sa’n w’a kpɛn su.

15. ?Kɛ Adan nin Ɛvu be yoli sa tɛ’n, ngue ti yɛ ɔ kwla yo Satan kɛ Zoova i klun sa’n su kpɛnman su kun-ɔn?

¹⁵ Kɛ Adan nin Ɛvu be yoli sa tɛ’n, fɔ’n wluli be nun yɛ be dunman nun’n fɔ’n wluli be mma’m be kwlaa be nun wie. (Rɔm. 5:12) Kɛ ɔ yoli sɔ’n, ɔ kwla yo kɛ Satan ti’n Ɲanmiɛn i klun sa’n su kpɛnmɛn su kun sa. Ɔ maan sɛ é kwlá sé’n, Zoova su kwlá seman kɛ “Omega.” Blɛ sɔ’n nun’n, Satan kwla bu i kɛ Zoova su kwlá yoman naan i klun sa’n w’a kpɛn su. Afin sɛ Zoova kun Adan nin Ɛvu naan ɔ yi sran uflɛ mɔ fɔ nunman be nun’n, Satan sé kɛ ɔ ti ato buafuɛ. ?Ngue ti-ɔ? Afin Bo Bolɛ 1:28 nun’n, Zoova seli Adan nin Ɛvu be kɛ be bɔbɔ be mma mun yɛ bé trán asiɛ’n su-ɔ.

16. ?Ngue ti yɛ Satan kwla bu i kɛ Zoova su kwlá yoman naan i klun sa’n w’a kpɛn su-ɔ?

¹⁶ ?Ajalɛ uflɛ benin yɛ atrɛkpa’n Satan buli i kɛ Zoova fá-ɔ? Satan kwla bu i kɛ Zoova wá yáci Adan nin Ɛvu be lɛ naan be wu ba mun, sanngɛ fɔ trán be nun titi. (Aku. 7:20; Rɔm. 3:23) Sɛ Zoova yo sɔ kusu’n, Satan kwla se kɛ Zoova w’a kwlá yoman naan i klun sa’n w’a kpɛn su. ?Ngue ti-ɔ? Afin Zoova kunndɛ kɛ Adan nin Ɛvu be mma mɔ fɔ nunman be nun’n yɛ be tran asiɛ’n su-ɔ.

17. (1) ?Kɛ Satan nin Adan nin Ɛvu be yoli ɲin kekle’n, ajalɛ benin yɛ Zoova fali-ɔ? (2) ?Ajalɛ sɔ’n i bo’n gúa sɛ?

¹⁷ Nanwlɛ, kɛ Satan nin Adan nin Ɛvu be yoli ɲin kekle’n like nga Zoova yoli’n, e kwla se kɛ ɔ boli Satan i nuan dan. (Jue. 92:5) Zoova yacili Adan nin Ɛvu be lɛ maan be wuli ba mun. I lɛ nun’n, ɔ kleli kɛ ɔ timan ato buafuɛ naan ndɛ ng’ɔ kan’n ɔ kpɛn su. Zoova kleli kɛ like kwlaa ng’ɔ se kɛ ɔ́ yó’n, ɔ yo. Ɔ fali ajalɛ kun naan i klun sa’n w’a kpɛn su. Yɛle kɛ i waan ɔ́ wá yo maan sran kun wá dé Adan nin Ɛvu be mma mun. (Bob. 3:15; 22:18) Sran sɔ’n wá fɛ́ i nguan’n fá kpɔ́ sran’m be ti. Nanwlɛ, Satan w’a bumɛn i sɔ’n i akunndan le! Afin ajalɛ sɔ mɔ Zoova fali’n kle kɛ ɔ klo sran mun dan. (Mat. 20:28; Zan 3:16) Satan liɛ’n ɔ kloman sran yɛ ɔ bu i ngunmin i wun akunndan. ?Ajalɛ sɔ mɔ Zoova fali’n i bo’n gúa sɛ? Kɛ Klisi i afuɛ akpi famiɛn dilɛ blɛ’n ko wie’n, fɔ su tranman Adan nin Ɛvu be mma’m be nun kun, yɛ bé trán mɛn klanman nun asiɛ’n su kɛ nga Zoova fa sunnzunnin’n sa. Blɛ sɔ’n nun’n, sɛ é kwlá sé’n Zoova wá sé kɛ “Omega.”

?NGUE YƐ É YÓ NAAN Y’A LAFI SU KPA KƐ ZOOVA YÍA NDA NG’Ɔ TALI’N I NUAN-ƆN?

18. ?Ndɛ nsan benin yɛ Ɲanmiɛn kannin-ɔ? (An nian kuku nga be flɛ i kɛ “Ndɛ nsan mɔ be kle kɛ Ɲanmiɛn i klun sa’n kpɛ́n su’n” nun wie.)

¹⁸ Like suanlɛ nga nun’n, e kannin ninnge nga be kle weiin kɛ Ɲanmiɛn wá yó naan asiɛ’n kaci lika klanman’n be ndɛ. ?Ngue ndɛ yɛ e kwla kan kle sran mun naan b’a lafi su kɛ Ɲanmiɛn yía nda sɔ’n i nuan sakpa-ɔ? Like klikli’n yɛle kɛ Zoova bɔbɔ yɛ ɔ tali nda sɔ’n niɔn. Sa Nglo Yilɛ fluwa’n se kɛ: “Sran ng’ɔ ti famiɛn bia’n su’n seli kɛ: ‘Nian! N su yo like kwlaa uflɛ.’” Zoova si ngwlɛlɛ dan, ɔ le tinmin yɛ ɔ kunndɛ kpa kɛ ɔ́ yía nda ng’ɔ tali’n i nuan. Like’n i nɲɔn su’n yɛle kɛ Zoova si kɛ kɛ ɔ kan ndɛ kun’n, saan ɔ́ kpɛ́n su. I sɔ’n ti’n, ɔ seli kɛ: “Klɛ ndɛ sɔ mun, afin be ti nanwlɛ, yɛ be kwla lafi su. […] Ndɛ sɔ’m b’a kpɛn su!” Like’n i nsan su’n yɛle kɛ kɛ Zoova bo like kun i yolɛ bo’n, saan ɔ́ gúɛ i bo. I sɔ’n i ɲin fite ndɛ yɛ’n nun: “N ti Alfa nin Omega.” Ɔ maan Zoova wá klé kɛ Satan ti ato buafuɛ naan ɔ kwlá yoman naan i klun sa’n w’a kpɛnman su.

19. ?Sɛ sran’m be bu i kɛ mɛn klanman i su ndɛ’n ti lafilɛ nun ndɛ’n, ngue yɛ e kwla yo-ɔ?

¹⁹ Blɛ kwlaa nga e kan ninnge nga ti yɛ e lafi su kɛ Zoova yía nda ng’ɔ tali’n i nuan’n be ndɛ e kle sran mun’n, e bɔbɔ e lafi Zoova su kpa tra laa’n. ?Ɔ maan siɛn’n, sɛ e kanngan mɛn klanman’n i su ndɛ ng’ɔ o Sa Nglo Yilɛ 21:4 nun e kle sran kun naan ɔ bu i lafilɛ nun ndɛ’n, ngue yɛ e kwla yo-ɔ? E kwla kanngan ndɛ mma 5 nin 6 be nun kpɛkun e yiyi nun e kle i. Maan e yiyi wafa nga Zoova kleli kɛ ndɛ sɔ’n kpɛ́n su’n i nun e kle sran’n.—Eza. 65:16.