Maan e fa e wun e mantan Ɲanmiɛn

‘N ti kɛ bua sa, Zoova yɛ ɔ nian min su ɔ’

AMUN nian desɛn ng’ɔ o lɛ’n. ?Kɛ bua ba’n o bua sunianfuɛ’n i sa nun’n, wafa nga i wun usumɛn i kaan sa’n, amun kwla wun i wlɛ? Jue Mun 23 nun’n, Biblu’n fa bua sunianfuɛ’n nin i bua’m be su sunnzun ase fa kan wafa nga Zoova niɛn i sufuɛ’m be lika klolɛ su’n, i ndɛ. Ɔ kunndɛ kɛ nán srɛ kun e. Jue tofuɛ Davidi waan: “N ti kɛ bua sa, Anannganman yɛ ɔ nian min su ɔ.”a (Ndɛ mma 1) Be nga be bu Davidi i akunndan’n wie’n, Zoova kunndɛ kɛ e wun yo e kɛ be sa.

Davidi m’ɔ klɛli jue sɔ’n, ɔ yoli bua sunianfuɛ i kaan nun. Ɔ si ninnge nga bua’m be mian be wun’n ɔ nin junman ng’ɔ fata kɛ bua sunianfuɛ’n di’n. Davidi mɔ i mɛn dilɛ’n nun’n ɔ wunnin kɛ Ɲanmiɛn niɛnnin i lika’n, ɔ klɛli jue sɔ mɔ be wa flɛli i kɛ “be wla m’ɔ gua ase’n annzɛ Ɲanmiɛn su lafilɛ jue’n.” Kɛ Davidi klɛ́ jue sɔ’n, ɔ fali Zoova i dunman’n fitili su yɛ ɔ fa guɛli i bo. (Ndɛ mma 1, 6) Jue sɔ’n i onga’n kan wafa nsan nga Zoova niɛn i sufuɛ’m be lika kɛ bua sunianfuɛ’n sa’n i ndɛ.—Jue Mun 100:3.

Zoova kle i bua’m be atin. Titi’n, Bua nga be leman sunianfuɛ’n be mlin. I kunngba’n, ɔ fata kɛ be uka e naan e mɛn dilɛ’n nun’n y’a wun atin ng’ɔ ti kpa’n. (Zeremi 10:23) Davidi yiyi nun kɛ Zoova fɛ i sufuɛ mun kɔ lika mɔ “ijre nɔnman o lɛ’n” ɔ nin “nzue ba bɔ be nuan ti fɔun’n,” be nun. Ɔ fa be sin “atin kpa’n nun.” (Ndɛ mma 2, 3) Bua sunianfuɛ’n nin i bua’m be su sunnzun ase sɔ’n, ɔ gua e awlɛn su nzue kɛ e kwla fa e wla’n e gua Ɲanmiɛn su. Sɛ e nian atin nga Ɲanmiɛn kle e Biblu’n nun’n i su e nanti’n, é dí aklunjuɛ yɛ e wla gúa ase, kpɛkun e wun su usuman e kaan sa.

Zoova sasa i bua mun. Sɛ bua’m be sunianfuɛ’n nunman lɛ’n, srɛ kun be kpɛkun like wie kwla yo be. Zoova se i sufuɛ’m be kɛ nán maan srɛ kun be. I waan kannzɛ be “su sin kongo tuun kpa b’ɔ yo sro’n i nun’n,” yɛle kɛ blɛ nga kekle tɔ be su kpa bɔbɔ’n, nán maan srɛ kun be. (Ndɛ mma 4) Afin Zoova nian be su yɛ ɔ uka be blɛ kwlaa nun. Sɛ ɲrɛnnɛn’n tɔ i sufuɛ’m be su’n, ɔ kwla man be ngwlɛlɛ nin fanngan naan b’a kwla jran kekle.—Filipfuɛ Mun 4:13; Zak 1:2-5.

Zoova mɛn i bua’m be aliɛ. Sɛ bua sunianfuɛ’n w’a kunndɛman aliɛ w’a mɛnmɛn i bua mun’n, be su ɲanman aliɛ be diman. E di Ɲanmiɛn ninnge’m be yalɛ yɛ Ɲanmiɛn kunngba cɛ yɛ maan e kwla ɲan be ɔ. (Matie 5:3) Ɲanmiɛn sa, mɔ Zoova i sa timan tankan ɔn. Ɔ mɛn i sufuɛ’m be aliɛ kpanngban kpa. (Ndɛ mma 5) Biblu’n nin Biblu’n i akua kɛ nga amun su kanngan nun yɛ’n sa’n, be uka e naan y’a si Ɲanmiɛn. Be yo maan e si like nga e ɲin o i sin’n, yɛle kɛ e si sa nga ti yɛ e o asiɛ’n su’n, ɔ nin like nga Ɲanmiɛn waan ɔ́ yó’n.

Davidi i wun w’a usumɛn i kaan sa. Afin ɔ si kɛ sɛ ɔ nin Zoova m’ɔ ti i sunianfuɛ’n be afiɛn’n mantan titi’n, blɛ nga ‘i nyin tɛ o su’n,’ ɔ́ níɛn i lika klolɛ su. (Ndɛ mma 6) ?Amun kunndɛ kpa kɛ nán amun wun usu amun kaan sa? Sɛ ɔ ti sɔ’n, amun suan wafa nga amun kwla fa amun wun mantan Zoova’n. I liɛ’n, Bua Sunianfuɛ Dan’n m’ɔ kle be nga be nin i nanti klanman titi’n be atin’n, m’ɔ sasa be yɛ ɔ man be aliɛ’n, kɛ amun o i sa nun’n, srɛ su kunman amun kaan sa.—Ezai 40:11.

[Ja ngua lɛ ndɛ’n]