-
A kwla kaci Zoova i janvuɛA kwla di aklunjɔɛ tititi!—Biblu’n nun like suanlɛ
-
-
LIKE SUANLƐ 08
A kwla kaci Zoova i janvuɛ
Zoova kunndɛ kɛ a si i kpa. ?Ngue ti-ɔ? Ɔ si kɛ sɛ a si sran wafa ng’ɔ ti’n nin i mmla mun, ɔ nin like ng’ɔ sunnzunnin kɛ ɔ́ yó man e’n, á kúnndɛ kɛ á káci i janvuɛ. ?A kwla kaci Ɲanmiɛn i janvuɛ sakpa? (Kanngan Jue Mun 25:14 nun.) ?Á yó sɛ naan w’a yo Ɲanmiɛn i janvuɛ? Biblu’n tɛ kosan sɔ’m be su, yɛ like nga ti yɛ e kwla se kɛ Zoova yɛ ɔ ti janvuɛ kpafuɛ nga e kwla ɲɛn i’n, ɔ kɛn i ndɛ wie.
1. ?Ngue yɛ Zoova kunndɛ kɛ a yo-ɔ?
“An fa amun wun mantan Ɲanmiɛn, yɛ ɔ́ fɛ́ i wun mántan amun.” (Zaki 4:8) ?Ndɛ sɔ’n i bo’n yɛle benin? Yɛle kɛ Zoova klo kɛ a kaci i janvuɛ. Sran wie’m be waan be kwlá kaciman sran kun mɔ be kwlá wunmɛn i’n i janvuɛ. Ɔ maan be lafiman su kɛ be kwla kaci Ɲanmiɛn i janvuɛ. Biblu’n nun’n, Zoova kle e i su like kwlaa ng’ɔ fata kɛ e si i naan y’a kwla fa e wun y’a mɛntɛn i’n. Kannzɛ e nin-a wunman Zoova le’n, sanngɛ sɛ e kanngan Biblu’n nun’n, e nin i e kwla kaci janvuɛ kpa.
2. ?Ngue ti yɛ Zoova yɛ ɔ ti janvuɛ kpafuɛ nga e kwla ɲɛn i’n niɔn?
Sran fi kloman wɔ kɛ nga Zoova fa klo wɔ’n sa. Ɔ kunndɛ kɛ a di aklunjɔɛ naan blɛ kwlaa nga ɔ sa mian’n a kunndɛ ukalɛ i sa nun. A kwla ‘fa ɔ su sa’n kwlaa wlɛ i Ɲanmiɛn sa nun, afin ɔ ndɛ lo i.’ (1 Piɛli 5:7) Zoova suɛn i janvuɛ’m be bo, ɔ fɔnvɔ be, yɛ ɔ sie i su tie be ndɛ’n blɛ kwlaa nun.—Kanngan Jue Mun 94:18, 19 nun.
3. ?Ngue yɛ Zoova kunndɛ kɛ i janvuɛ’m be yo-ɔ?
Zoova klo sran kwlakwla. Sanngɛ “ɔ tra sran ng’ɔ nanti ndɛnman su’n i janvuɛ.” (Ɲanndra Mun 3:32) Zoova kunndɛ kɛ i janvuɛ’m be yo like ng’ɔ bu i like kpa’n naan be kpalo like ng’ɔ bu i like tɛ’n. Sran wie’m be waan be su kwlá nantiman Zoova i mmla’m be kwlaa be su. Sanngɛ Zoova i like yolɛ yoman ya. Be kwlaa nga be klo i sakpa’n mɔ be mian be ɲin naan i klun jɔ be wun’n, ɔ sɔ be nun klanman.—Jue Mun 147:11; Sa Nga Be Yoli’n 10:34, 35.
SI NDƐ’N NUN KPA EKUN
Maan e nian ninnge wie mɔ a kwla yo naan w’a kaci Zoova i janvuɛ’n. I sin’n, é wá kán sa nga ti yɛ e kwla se kɛ Zoova yɛ ɔ ti janvuɛ kpafuɛ nga a kwla ɲɛn i’n i ndɛ.
4. Abraamun yoli Zoova i janvuɛ
Abraamun i su ndɛ nga Biblu’n kan’n ɔ uka e naan y’a si like nga be flɛ i Ɲanmiɛn i janvuɛ tralɛ’n. An kanngan Abraamun i su ndɛ ng’ɔ o Bo Bolɛ 12:1-4 nun’n. I sin’n an koko kosan yɛ’m be su yalɛ:
?Ngue yɛ Zoova seli Abraamun kɛ ɔ yo-ɔ?
?Ngue yɛ Zoova seli kɛ ɔ́ yó mɛ́n i-ɔ?
?Kɛ Zoova kannin ndɛ kleli Abraamun’n, ngue yɛ Abraamun yoli-ɔ?
5. Like nga Zoova klo kɛ i janvuɛ’m be yo’n
Blɛ sunman’n e klo kɛ e janvuɛ’m be yo ninnge wie mun.
?Ninnge benin mun yɛ a klo kɛ ɔ janvuɛ’m be yo be man wɔ-ɔ?
An kanngan 1 Zan 5:3 nun, i sin’n an koko kosan yɛ’n i su yalɛ:
?Ngue yɛ Zoova klo kɛ i janvuɛ’m be yo-ɔ?
Kɛ ɔ ko yo naan y’a nanti Zoova i ndɛ’n su’n, ɔ ju wie’n ɔ fata kɛ e kaci e ayeliɛ’n. An kanngan Ezai 48:17, 18 nun, i sin’n an koko kosan yɛ’n i su yalɛ:
?Ngue ti yɛ Zoova se i janvuɛ’m be kɛ be kaci be sa ninnge wie’m be yolɛ nun-ɔn?
Janvuɛ kpa’n ɔ kle e like ng’ɔ kwla yo e ye’n. Zoova yo i kunngba’n i janvuɛ’m be lika.
6. Like nga Zoova yo mɛn i janvuɛ mun’n
Zoova ukɛ i janvuɛ mun naan b’a kwla jran sa’m be ɲrun kekle. An bo VIDEO’N, i sin’n an koko kosan yɛ’n i su yalɛ.
?Video’n nun’n, wafa sɛ yɛ Zoova ukali bla’n naan i wla w’a bomɛn i wun kun-ɔn?
An kanngan Ezai 41:10, 13 nun, i sin’n an koko kosan yɛ’m be su yalɛ:
?Ngue yɛ Zoova waan ɔ́ yó mɛ́n i janvuɛ’m be kwlaa-ɔ?
?A bu i kɛ Zoova kwla yo janvuɛ kpa? ?Ngue ti-ɔ?
Kɛ ɔ sa mian’n ɔ janvuɛ kpa’m be uka ɔ. Zoova kusu ɔ́ úka ɔ wie.
7. Sɛ e waan é káci Zoova i janvuɛ’n ɔ fata kɛ e nin i e koko yalɛ
Kɛ janvuɛ nɲɔn be koko yalɛ titi’n, be janvuɛ’n tra kpa. An kanngan Jue Mun 86:6, 11 nun, i sin’n an koko kosan yɛ’m be su yalɛ:
?Wafa sɛ yɛ e kwla kan ndɛ e kle Zoova-ɔ?
?Wafa sɛ yɛ Zoova kan ndɛ kle e-ɔ?
E kan ndɛ kle Zoova srɛlɛ nun. Yɛ i kusu sin Biblu’n i lika kan ndɛ kle e.
SRAN WIE’M BE WAAN: “E nin Ɲanmiɛn e kwlá traman janvuɛ.”
?Biblu’n nun ndɛ benin yɛ a kwla fa kle kɛ e kwla tra Zoova i janvuɛ-ɔ?
NDƐ’N I KPƆLƐ BOLƐ
Zoova kunndɛ kɛ ɔ́ káci ɔ janvuɛ, yɛ ɔ́ úka ɔ naan w’a fa ɔ wun w’a mɛntɛn i.
Ndɛ’n i nun flanlɛ
?Wafa sɛ yɛ Zoova ukɛ i janvuɛ mun-ɔn?
?Ngue ti yɛ Zoova se i janvuɛ’m be kɛ be kaci be sa ninnge wie’m be yolɛ nun-ɔn?
?A bu i kɛ like nga Zoova se i janvuɛ’m be kɛ be yo’n ɔ ti kekle dan? ?Ngue ti-ɔ?
NDƐ WIE MUN EKUN
?Ɲanmiɛn i janvuɛ tralɛ’n i su ye benin yɛ a kwla ɲɛn i-ɔ?
Wafa nga a nin Ɲanmiɛn be kwla tra janvuɛ’n.
Zoova i janvuɛ tralɛ’n i su ye nga bla kun ɲɛnnin i’n.
Zoova i su ndɛ nga gbanflɛn nin talua wie’m be kannin’n.
?Kɛ be se kɛ sran kun ti Ɲanmiɛn i janvuɛ’n i bo’n yɛle benin? (1:46)
-
-
Batɛmun yolɛ’n ti kpa dan!A kwla di aklunjɔɛ tititi!—Biblu’n nun like suanlɛ
-
-
6. Kɛ be ko yo sran kun i batɛmun’n ɔ kaci Zoova i Lalofuɛ
Kɛ be yo e batɛmun’n e nin Zoova i Lalofuɛ nga be o mɛn wunmuan’n nun’n e kaci kɛ awlobo kunngba nunfuɛ sa. Kannzɛ e ti sran fanunfanun naan e nunman lika kunngba’n nun’n, sanngɛ like nga e lafi su’n nin mmla nga e nanti su’n be ti kun. An kanngan Jue Mun 25:14 nin 1 Piɛli 2:17 nun, i sin’n amun koko kosan yɛ’m be su yalɛ:
?Kɛ be ko yo sran kun i batɛmun’n ɔ nin Zoova be afiɛn ti sɛ? ?Yɛ ɔ nin be nga be su Zoova’n be afiɛn ti sɛ wie?
-
-
?Ngue yɛ Zoova kunndɛ kɛ ɔ́ yó mán e-ɔ?A kwla di aklunjɔɛ tititi!—Biblu’n nun like suanlɛ
-
-
2. ?Wafa sɛ yɛ dɔ nga su bɔbɔ’n e kwla di aklunjɔɛ?
Wafa nga Zoova yili e’n ti’n e miɛn i wun. I sɔ’n ti yɛ e kunndɛ kɛ é sí i naan e su i’n niɔn. (Kanngan Matie 5:3-6 nun.) Zoova kunndɛ kɛ e nin i e afiɛn mantan kpa, ‘e fɛ i atin’m be kwlaa be su, naan e klo i.’ Asa’n, ɔ kunndɛ kɛ e fa e “awlɛn’n kwlaa” e su i. (Mmla’n 10:12; Jue Mun 25:14) Kɛ e mian e ɲin e yo sɔ’n kannzɛ sa’m be o e su’n, sanngɛ e kwla di aklunjɔɛ. Kɛ e su Zoova mɔ e yo i klun sa’n yɛ e di aklunjɔɛ-ɔ.
-