Nanti sein, nán fɔn
‘Min liɛ’n, ń nánti sein, ń fɔnman.’—JUE MUN 26:11.
1, 2. (a) ?Ngue ti yɛ klɔ sran’m be nantilɛ sein’n ɔ ti Ɲanmiɛn i ninnge kwlaa be sielɛ’n i su akplowa nga Satan sili’n, i nun kpɔlɛ cinnjin kun ɔn? (b) ?Wafa sɛ yɛ klɔ sran mun nin aolia nun sran’m be kwla kle kɛ be jran Zoova i ninnge kwlaa be sielɛ’n i sin ɔn?
SATAN i ɲin kekle yolɛ’n nun Edɛni fie’n nun lɔ’n, ɔ sili Ɲanmiɛn i ninnge kwlaa be sielɛ’n i su akplowa. I sin’n, ɔ seli ekun kɛ sran’m be bɔbɔ be like liɛ’n ng’ɔ lo be’n, i ti yɛ be su Ɲanmiɛn ɔn (Zɔb 1:9-11; 2:4). Ɔ maan sran’m be nantilɛ sein’n, ɔ ti Zoova i ninnge kwlaa be sielɛ’n i su akplowa nga Satan sili’n, i nun kpɔlɛ cinnjin kun.
2 Kannzɛ Ɲanmiɛn i ninnge kwlaa be sielɛ’n ɔ finman klɔ sran mun nin aolia nun sran’m be nantilɛ sein’n, sanngɛ ɔ fata kɛ be kle sran nga be jrɛn i sin’n. ?Wafa sɛ? Yɛle kɛ, ɔ fata kɛ be kle kɛ be nanti sein, annzɛ be nantiman sein. I sɔ’n ti’n, klɔ sran’m be nantilɛ sein’n i su yɛ be kwla jran be di be jɔlɛ ɔ.
3. (a) ?Ngue yɛ Zɔbu nin Davidi be kunndɛli kɛ Zoova fɛ i ɲin sie su be lika ɔ? (b) ?Kosan mennin mun yɛ nantilɛ sein man be su ɔ?
3 Zɔbu m’ɔ si i bɔbɔ i klun lɔ’n, ɔ kwla seli kɛ: ‘Maan Zoova fa toe nga ɔ ti sɛsɛ’n, ɔ fa sunnzun min. I bɔbɔ ɔ́ wá sí kɛ n ti sein.’ (Zɔb 31:6). Kɛ Davidi m’ɔ ti laa Izraɛli Famiɛn’n ɔ́ srɛ́ Zoova’n, ɔ seli Zoova kɛ ɔ fɛ i ɲin sie i nantilɛ sein m’ɔ fa nanti’n su. Ɔ seli kɛ: ‘Anannganman, di min jɔlɛ mun klanman man min. Afin n nantili sein, m’an fɔnman. N fa min wla’n n gua ɔ su. Srɛ kunman min, min wun usuman min.’ (Jue Mun 26:1). Nanwlɛ, ɔ ti cinnjin kpa wie kɛ e nanti sein! ?Sanngɛ nantilɛ sein kpa’n, i bo’n yɛle mennin? ?Yɛ ngue yɛ ɔ́ úka e naan y’a nanti sein titi ɔ?
“N nantili sein, m’an fɔnman”
4. ?Nantilɛ sein i bo’n yɛle mennin?
4 Nantilɛ sein’n i bo yɛle kɛ be yo sa i nuan su, be ti sran kpa, yɛ be fɔnman. Sanngɛ kɛ be se kɛ be nanti sein, nɛ́n i ngba yɛle sa ng’ɔ ti kpa’n i ngunmin yolɛ sa ngbɛn. Nantilɛ sein i wie yɛle kɛ, sran’n ɔ fɛ i angunndan’n, annzɛ i awlɛn’n kwlaa su Ɲanmiɛn. Angunndan bɔbɔ ng’ɔ su Zɔbu bo m’ɔ yo sa mun’n, Satan sili su akplowa kɛ ɔ timan kpa. Afin, ɔ seli Ɲanmiɛn kɛ: “Ɔ li maan ɔ sa kɛn i wunnɛn’n bɔ kaan sa naan nian, sɛ w’a kanman wɔ ndɛ tɛtɛ cɛ’n, a ko fa ko se.” (Zɔb 2:5). Ɔ maan sɛ e waan é nánti sein’n, ɔ fata kɛ e yo sa nga ɔ ti kpa’n, kpɔkun e angunndan yo kpa titi wie ekun.
5. ?Ngue yɛ ɔ kle kɛ, kɛ be se kɛ be nanti sein’n, b’a seman kɛ be yo sran mɔ fɔ nunmɛn i nun’n niɔn?
5 Sanngɛ, kɛ be se kɛ be nanti sein’n, b’a seman kɛ be yo sran mɔ fɔ’n nunmɛn i nun’n. Afin fɔ’n o Famiɛn Davidi nun, yɛ i mɛn dilɛ nun’n, ɔ yoli sa tɛ kpa wie mun. Sanngɛ, Biblu’n kɛn i ndɛ kɛ ɔ ‘nantili sein.’ (1 Famiɛn Mun 9:4). ?Ngue ti ɔ? Ɔ kloli Zoova ti ɔ. Ɔ tuli i klun suli Ɲanmiɛn. Ɔ dili i fɔnlɛ’m be nanwlɛ, ɔ sɔli fɔ nga be tuli i’n be nun, kpɔkun ɔ kacili i nzuɛn’n. Davidi i nantilɛ sein i ɲin fite i klun m’ɔ tuli fa suli i Ɲanmiɛn Zoova’n, ɔ nin klolɛ m’ɔ fa klo i’n, i nun.—Mmla’n 6:5, 6.
6, 7. ?Ngue yɛ ɔ fata kɛ e yo i ekun naan y’a kle kɛ e nanti sein ɔn?
6 Nán Ɲanmiɛn sulɛ’n i nun ngunmin yɛ ɔ fata kɛ klɔ sran’m be nanti sein ɔn. Nantilɛ sein kan e mɛn dilɛ’n. Davidi “nantili” sein. Fluwa kun waan: “Ndɛ mma ‘nantilɛ’n,’ i bo’n yɛle ‘wafa nga be di mɛn’n.’” (The New Interpreter’s Bible). Kɛ jue tofuɛ’n kán be nga “be nanti sein’n” be ndɛ’n, ɔ seli kɛ: ‘Be nga be nian sa nga [Ɲanmiɛn] fa sie be ɲrun’n su be yo’n, mɔ be tu be klun be kunndɛ i’n, be liɛ su ti ye! Be yoman sa ng’ɔ fataman’n, Anannganman i atin’n su seiin yɛ be fa ɔ.’ (Jue Mun 119:1-3). Sɛ e waan é nánti sein’n, ɔ fata kɛ e kunndɛ e yo Ɲanmiɛn i klun sa mun, naan e fɛ i atin’n su titi.
7 Nantilɛ sein i wie ekun yɛle kɛ, sɛ bɔbɔ lika’n yo kekle kpa e su sɛ’n, e su yaciman Ɲanmiɛn sulɛ le. Kɛ e jran kekle ɲrɛnnɛn’n, annzɛ yalɛ klelɛ’n i ɲrun’n, annzɛ kusu kɛ e jran kekle sa tɛ yolɛ’n i ɲrun’n, yɛ e nantilɛ sein’n i ɲin fite ɔ. E nantilɛ sein ‘yo maan Zoova i klun jɔ,’ afin i sɔ’n ti’n, ɔ kwla tɛ sran m’ɔ kɛn i wun ndɛ tɛ’n i su (Nyanndra Mun 27:11). Ɔ maan e kwla ta nda e yo kɛ Zɔbu sa. I waan: “N su seman kɛ amun ndɛ yo fɛ le. N su yaciman kɛ: ‘M’an yoman sa’n’ i selɛ le naan m’an fa wu.” (Zɔb 27:5). Jue Mun 26 kle like ng’ɔ kwla uka e naan y’a nanti sein.
‘Niannian min klun angunndan mun nin sa ng’ɔ o min klun lɔ’n’
8. ?Kɛ Davidi srɛli Zoova’n, ngue yɛ ɔ kunndɛli kɛ Zoova yo ɔ?
8 Davidi srɛli Ɲanmiɛn kɛ: ‘Anannganman, nian min awlɛn’n nun lɔ, sa min nian. Niannian min klun angunndan mun nin sa ng’ɔ o min klun lɔ’n.’ (Jue Mun 26:2). Ebre aniɛn’n nun ndɛ nga be kaci i kɛ ‘klun angunndan mun’ Biblu’n nun ndɛ mma nga nun’n, yɛle wafa nga sran’n i klun lɔ’n fa ti’n. Kpɔkun ndɛ mma nga be kacili i kɛ ‘sa nga ɔ o min klun lɔ’n,’ yɛle sran’n i bɔbɔ ba’n, annzɛ i wafa ng’ɔ ti’n. Yɛle kɛ, angunndan ng’ɔ su i bo m’ɔ yo ninnge mun’n, ɔ nin wafa nga sa’m be yo i’n, ɔ nin i sa ng’ɔ si be mun’n. Nianlɛ nga Davidi srɛli Zoova kɛ ɔ niɛn i’n, yɛle kɛ maan Zoova niɛnniɛn i klun lɔ angunndan’n.
9. ?Wafa sɛ yɛ Zoova yo maan e klun angunndan mun nin sa ng’ɔ o e klun lɔ’n be yo kpa ɔ?
9 Davidi kunndɛli kɛ Ɲanmiɛn yo naan i klun angunndan mun nin sa ng’ɔ o i klun lɔ’n be yo kpa. ?Sanngɛ, wafa sɛ yɛ Zoova yo maan sa ng’ɔ o be klun lɔ’n yo kpa ɔ? Davidi seli kɛ: ‘Ń lá Anannganman ase, afin ɔ ti min afɔtuɛ manfuɛ. Kɔnguɛ bɔbɔ’n, n wun i sɔ min angunndan’n nun.’ (Jue Mun 16:7). ?Ndɛ sɔ’n i bo’n yɛle kɛ mennin sa? I bo’n yɛle kɛ afɔtuɛ nga Ɲanmiɛn man’n, be wluwlu Davidi wun, be kɛn i awlɛn’n, kpɔkun be kaci i angunndan’n. I sɔ kunngba’n, sɛ e klun jɔ afɔtuɛ nga Ɲanmiɛn Ndɛ’n, ɔ nin i sran mun, ɔ nin i anuannzɛ’n, be man e’n be su naan e fa be su e nanti’n, bé kwlá káci e angunndan’n sɔ wie. Sɛ titi e srɛ Zoova kɛ ɔ yo naan e klun angunndan’n yo kpa’n, saan ɔ́ úka e naan y’a nanti sein.
“N wla fiman ye nga a yo min’n su”
10. ?Ngue yɛ ɔ wlali Davidi fanngan Ɲanmiɛn i nanwlɛ atin’n su nantilɛ’n su ɔ?
10 Davidi seli ekun kɛ: “N wla fiman ye nga a yoli min’n su. A ti nanwlɛfuɛ, i ti n sɔnnzɔn wɔ.” (Jue Mun 26:3). Davidi i wla w’a fiman ye nga Ɲanmiɛn yoli i’n be su. Ɔ toli jue kɛ: “Ń lá Anannganman i ase, n wla su fiman like ng’ɔ yo mannin min’n i wie fi su.” Kpɔkun kɛ i wla kpɛnnin sa kun mɔ Ɲanmiɛn “yoli’n” su’n, ɔ seli kɛ: ‘Ɔ jran sran’m be sin di be jɔlɛ mun. Ɔ nian be mɔ be mianmian be’n be ndɛ’m be nun di be kpa. Ɔ fɛli i atin’n kleli Moizi, ɔ fɛli i sa dandan ng’ɔ yo be’n kleli Izraɛlifuɛ mun.’ (Jue Mun 103:2, 6, 7). Atrɛkpa’n, Izraɛlifuɛ’m be delɛ nga Moizi blɛ su Zoova deli be Eziptifuɛ’m be sa nun’n, yɛ Davidi i wla kpɛn su ɔ. Sɛ i sakpa’n, nn e kwla se kɛ, kɛ Davidi buli wafa nga Zoova seli kɛ ɔ́ dé Izraɛlifuɛ mun m’ɔ kɛnnin i ndɛ kleli Moizi’n, i sɔ ndɛ liɛ’n kɛnnin i awlɛn’n, kpɔkun ɔ wlɛli i fanngan kɛ ɔ nanti Ɲanmiɛn i nanwlɛ atin’n su.
11. ?Ngue yɛ ɔ kwla uka e naan y’a nanti sein ɔn?
11 Ɲanmiɛn Ndɛ’n i nun like suanlɛ titi’n, ɔ nin i su angunndan bulɛ’n, ɔ kwla uka e wie ekun naan y’a nanti sein. I wie yɛle kɛ, kɛ Ezipti famiɛn’n i mantanfuɛ’n i yi’n ɔ kunndɛli kɛ ɔ nin Zozɛfu bé lá’n, Zozɛfu wanndili i. Kɛ e wla kpɛn Zozɛfu i wanndilɛ sɔ’n su’n, ɔ wla e fanngan kpa. Ɔ maan sɛ sa kunngba’n fite e ɲrun e junman diwlɛ lɔ’n, annzɛ suklu lɔ’n, annzɛ lika uflɛ wie ekun nun’n, e wla kpɛ́n su maan é wánndi wie (Bo Bolɛ 39:7-12). ?Yɛ sɛ aɲanbeunfuɛ, annzɛ mɛn’n nun sran dan yolɛ’n i wun atin tike e ɲrun’n, ngue yɛ é yó ɔ? I lɛ nun’n, Moizi m’ɔ kpaloli Ezipti lɔ sran dan yolɛ’n, ɔ man e ajalɛ kpa (Ebre Mun 11:24-26). Sɛ e angunndan tran Zɔbu i kekle jranlɛ’n su titi’n, saan i sɔ’n úka e maan tukpaciɛ nin sa nga be tɔ e su’n be nun’n, e su yaciman Zoova sulɛ (Zak 5:11). ?Yɛ sɛ be kle e yalɛ’n nin? I lɛ nun’n, sɛ e wla kpɛn Daniɛli mɔ be yili i asɔmɔli’m be kunman nun’n i su’n, saan é yó yakpafuɛ!—Daniɛl 6:16-22.
“E nin finfinfuɛ mun e tranman”
12, 13. ?Sran wafa mennin yɛ ɔ fataman kɛ e nin be e san nun ɔn?
12 Kɛ Davidi kán sa kun ekun mɔ i ti yɛ ɔ kwla nanti sein’n i ndɛ’n, ɔ seli kɛ: ‘E nin finfinfuɛ mun e tranman, e nin gblɛfuɛ mun e sanman nun. Min ɲin ci sran nga be cici be yo sa tɛ’n. N faman min wun mantanman be nga be buman wɔ like fi’n mɔ be buman wɔ nuan ndɛ’n i like fi’n.’ (Jue Mun 26:4, 5). Davidi i ndɛ’n ti weiin. Ɔ nin be nga be cici be yo sa tɛ’n be tranman. Ɔ fɛmɛn i wun mantanman be.
13 ?Yɛ e li? ?E nin televiziɔn nun, annzɛ video nun flimu mun, annzɛ ɛntɛnɛti nun’n, annzɛ ninnge uflɛ wie’m be nun sran finfinfuɛ mun e tran? ?E cuɛn e wun be nga be ti gblɛfuɛ’n be wun mmua? Suklu lɔ’n, annzɛ junman diwlɛ lɔ’n, kɛ gblɛfuɛ wie’m be ko yo naan b’a ɲan e’n ti’n, be kwla yo be wun kɛ be ti e janvuɛ sa. ?Be nga be nantiman nanwlɛ nun’n yɛ e kunndɛ kɛ e nin be é sán nun ɔn? Kɛ be nga be kaci be sin be sili Zoova’n be ko yo naan y’a yaci Zoova sulɛ’n ti’n, be kwla fia be angunndan tɛ’n. ?Yɛ sɛ asɔnun’n nun Klistfuɛ wie’m be mɛn dilɛ’n ti nɲɔnnɲɔn’n nin? I sɔfuɛ’m be kusu be ti gblɛfuɛ wie. Jayson mɔ kɛ é sé yɛ’n, ɔ ti asɔnunfuɛ’m be lika nianfuɛ’n, ɔ trɛli i sɔ janvuɛ i gbaflɛn’n nun. Kɛ ɔ́ kɛ́n i janvuɛ sɔ’m be ndɛ’n, i waan: “Cɛn kun’n, be nun kun seli min kɛ: ‘Like kwlaa nga e yo be andɛ yɛ’n be ti e wun yalɛ klelɛ ngbɛn. Afin lele naan be se kɛ mɛn klanman’n w’a ju’n, nn y’a wie wu. Yɛ e su wunman nun kɛ like kun w’a sin e sin.’ Kɛ n tili ndɛ sɔ’n, ɔ yoli min kɛ n su lafi yɛ b’a tinnge min sa. Afin n kunndɛman kɛ n wu naan mɛn klanman’n w’a ju.” Jayson sili ngwlɛlɛ, afin ɔ nin sran sɔ’m be yacili nantilɛ. Pɔlu seli kɛ: ‘Nán an laka amun wun, sɛ sran kpa nin sran tɛ be san nun’n, i nzuɛn tɛ’n sɛ i.’ (1 Korɛntfuɛ Mun 15:33). Nanwlɛ, ɔ ti cinnjin kpa kɛ nán e nin sran tɛ mun e san nun!
“Ń kán abonuan sa nga a yo be’n kwlaa i ndɛ”
14, 15. ?Wafa sɛ yɛ e kwla ‘bo sin yia Zoova i tɛ yiwlɛ’n’ niɔn?
14 Davidi seli kɛ: “Anannganman, ń wúnnzin min sa nun maan bé wún kɛ m’an yoman sa. Ń bó sín yía ɔ sɔwlɛ’n [tɛ yiwlɛ’n, NW].” ?Ngue ti ɔ? I waan: “Ń tíke min nuan’n, ń lá wɔ ase. Ń kán abonuan sa nga a yo be’n kwlaa i ndɛ ń sín.” (Jue Mun 26:6, 7). Davidi kunndɛli kɛ i nzuɛn’n yo kpa titi naan w’a kwla su Zoova naan w’a kɛn i ndɛ w’a sin.
15 Ninnge kwlaa nga be yoli Ɲanmiɛn sulɛ ninnge i tannin sua’n nun lɔ’n, annzɛ kusu Ɲanmiɛn i sulɛ sua’n nun lɔ’n, be ti ‘ɲanmiɛn su lɔ liɛ kpa’n i nzɔliɛ ɔ nin i wawɛ.’ (Ebre Mun 8:5; 9:23). Tɛ yiwlɛ’n yoli Zoova i klun sa’n mɔ yɛle tɛ nga Zezi Klist yili fa kpɔli sran’m be ti’n, i nun sɔlɛ klanman’n i nzɔliɛ (Ebre Mun 10:5-10). Kɛ e lafi Zezi i wun kpɔlɛ tɛ’n su’n, ɔ ti kɛ e wunnzin e sa nun maan be wun kɛ y’a yoman sa. Kpɔkun, ɔ ti kɛ ‘e bo sin yia Zoova i tɛ yiwlɛ’n’ sa.—Zan 3:16-18.
16. ?Kɛ e kan abonuan sa nga Ɲanmiɛn yo be’n be ndɛ e sin’n, mmlusuɛ mennin yɛ e ɲɛn i ɔ?
16 ?Kɛ e bu sa kwlaa nga Zezi i wun m’ɔ fa kpɔli sran’m be ti’n ɔ kwla yo’n i su angunndan’n, i sɔ’n wluwluman e wun yɛ ɔ suman e bo kɛ e si Zoova nin i Wa kunngba cɛ’n be ye? Maan e yo sɔ naan e kan abonuan sa nga Ɲanmiɛn yo be’n be ndɛ kle e wiengu mun. Abonuan sa sɔ mun yɛle ninnge kwlaa nga kɛ ɔ fɛ i sran’m be yilɛ’n su Edɛni fie’n nun lɔ lele m’ɔ́ fá jú ninnge kwlaa be yolɛ uflɛ mɛn klanman’n nun lɔ’n, Ɲanmiɛn yo be mun’n (Bo Bolɛ 2:7; Sa Nga Be Yoli’n 3:21). Nanwlɛ, Ɲanmiɛn Sielɛ Blɛ jasin fɛ’n bolɛ sɔ’n, ɔ nin sran’m be like klelɛ mɔ maan be kaci Zezi i sɔnnzɔnfuɛ’n, be sasa e kpa Ɲanmiɛn ninnge’m be nun (Matie 24:14; 28:19, 20)! Junman sɔ’n i dilɛ mlɔnmlɔn’n, ɔ uka e maan e wla tran like nga e wla o su kɛ é ɲɛ́n i’n su. Ɔ yo ekun maan e Ɲanmiɛn sulafilɛ’n taka kpa, kpɔkun e klo Zoova nin e wiengu tankaan kpa.
‘Ɔ sua’n, i nun tranlɛ yo min fɛ’
17, 18. ?Wafa sɛ yɛ ɔ fata kɛ e bu e Klistfuɛ aɲia mun ɔn?
17 Zoova i sua’n, ɔ nin i tɛ yiwlɛ’n, be ti Izraɛli lɔ Zoova sulɛ’n i nun like cinnjin kpa. Kɛ Davidi klé kɛ lika sɔ’m be ti i awlɛn su like’n, ɔ seli kɛ: ‘Anannganman, ɔ sua’n mɔ a yi ɔ wun nglo nun ɲanɲanɲan’n, i nun tranlɛ yo min fɛ.’—Jue Mun 26:8.
18 ?E kusu e klo lika nga e yia e suan Zoova i su like’n i nun tranlɛ? Ɲanmiɛn Sielɛ Blɛ Sua kwlaa nun lɔ mɔ titi e ɲan Ɲanmiɛn ninnge’m be nun afɔtuɛ’n, be ti Ɲanmiɛn i sulɛ kpa’n i takawlɛ. Asa ekun’n, afuɛ kwlaa nun e le nvle kun aɲia, ɔ nin akpasua kun aɲia, yɛ cɛn ngunmin kun aɲia. Zoova fa sa mun ‘sie e ɲrun’ aɲia sɔ’m be bo. Sɛ e ‘klo be kpa’n,’ ɔ́ yó e fɛ kɛ e wɔ aɲia’m be bo kpɔkun, é síe e su be bo (Jue Mun 119:167). Nanwlɛ, kɛ e nin e wiengu Klistfuɛ mun mɔ e ndɛ lo be’n, mɔ be kunndɛ kɛ bé úka e naan y’a kwla nanti sein titi’n e yia’n, i sɔ’n jɔ e klun kpɔkun ɔ fɔnvɔ e dan kpa!—Ebre Mun 10:24, 25.
“Nán yi min nguan’n min nun”
19. ?Sran mennin mun yɛ Davidi kunndɛman kɛ Ɲanmiɛn fɛ i wla be nun wie ɔ?
19 Be ɲrun nga be wun i kɛ be to fuan Ɲanmiɛn atin’n mɔ Davidi si i ti’n, ɔ srɛli Ɲanmiɛn kɛ: “Sa nga a fa yo sa tɛ yofuɛ mun’n, nán fɛ i kunngba’n yo min wie! Nán yi min nguan’n min nun kɛ sran kunfuɛ’m be liɛ’n sa. B’a fa be sa’n b’a yo sa tɛ kpanngban kpa. Adi ninnge’m b’a sɔnman ngowa be sa nun.” (Jue Mun 26:9, 10). Davidi kunndɛman kɛ be fɛ i wla sran kunfuɛ mun, annzɛ sran mɔ be fa adi ninnge’m be nun wie.
20, 21. ?Ngue yɛ ɔ kwla yo maan e nanti sran tɛ’m be atin’n su ɔ?
20 Andɛ mɛn’n i nun ti sa tɛ yolɛ’n ngunmin. Televiziɔn nin fluwa mun, ɔ nin flimu’m be nun’n, ‘bla nin bian kunndɛlɛ, sa tɛtɛ yolɛ, wlaka bolɛ’n,’ yɛ be kan be ndɛ ɔ (Galasifuɛ Mun 5:19). Sran wie’n be kaci bian nin bla nna nga be fa fite nzra nun’n i nianlɛ’n i kanga. Gbaflɛn nin talua mun yɛ be tɔ i sɔ liɛ’n nun ndɛndɛ kpa’n niɔn. Mɛn wie’m be nun’n, ndalie tralɛ’n ti sran’m be nzuɛn, kpɔkun be wla talua nin gbaflɛn kanngan’m be fanngan kɛ be yo sɔ. Ɔ maan kannzɛ be nin a juman bian nin bla jalɛ’n, gbaflɛn nin talua sunman be tra ndalie. Kɛ be ko yo sɔ’n kpɔkun, be wun mɔ yrayra be’n ti’n, be yo sa wie mun mɔ be timan Ɲanmiɛn liɛ’n su’n. Wie liɛ bɔbɔ’n, be tɔ bian nin bla mɔ b’a jaman be wun’n i kunndɛlɛ’n nun.
21 Sa tɛ yolɛ’n sa sran kpɛnngbɛn mun wie bɔbɔ. Aata nun ndrunmun dilɛ’n, ɔ nin be bɔbɔ be klunklo ajalɛ’m be falɛ’n, be kle kɛ be nantiman sein. Mɛn’n nunfuɛ’m be atin’m be su falɛ’n kwla yo maan e nin Zoova e afiɛn ti nun. I sɔ’n ti’n, nán maan e ‘fa sa tɛ yolɛ’n e sie e awlɛn’n nun mlɔnmlɔn. Maan klun ufue [sa kpa, NW] yolɛ’n yɛ ɔ tran e awlɛn’n nun ɔn,’ naan e nanti sein titi nán maan e fɔn.—Amɔs 5:15.
“Si min aunnvuɛ, yɛ de min”
22-24. (a) ?Fanngan wlalɛ ndɛ mennin yɛ Jue Mun 26 i nun ndɛ kasiɛn’n mannin amun ɔn? (b) ?Like mennin yɛ ɔ ti aya mɔ like suanlɛ ng’ɔ́ bá lɛ nun’n, é wá kókó su yalɛ ɔ?
22 Davidi guɛ i Ɲanmiɛn srɛlɛ’n bo kɛ: ‘Min liɛ’n, n nantili sein, m’an fɔnman. Si min aunnvuɛ yɛ, de min. Atin nanwlɛ’n yɛ n fa ɔ, n to fuɛnmɛn i. Aɲia’m be nun’n, ń lá Anannganman i ase.’ (Jue Mun 26:11, 12). Davidi fali srɛlɛ’n suannin nantilɛ sein m’ɔ klo kɛ ɔ́ nánti’n, i bo. Nanwlɛ, i sɔ’n wla fanngan kpa! Fɔ’n o e nun sɔ. Sanngɛ, sɛ e ta nda kɛ é nánti sein naan e fɔnman’n, Zoova úka e.
23 Maan e mɛn dilɛ cɛn kwlaa’n, ɔ kle kɛ Ɲanmiɛn i kwlalɛ’n ti e ɲrun like cinnjin. E tinuntinun’n, e kwla srɛ Zoova kɛ ɔ niannian e angunndan mun nin sa ng’ɔ o e klun lɔ’n. E kwla fa ndɛ nanwlɛ’n e sie e angunndan nun titi. Yɛle kɛ maan e suan Ɲanmiɛn Ndɛ’n nun like. I kwlaa nun’n, nán e nin sran tɛ mun e san nun. Sanngɛ, maan e tike e nuan’n e la Zoova i ase aɲia’m be nun. Maan e di Ɲanmiɛn Sielɛ Blɛ jasin fɛ’n bolɛ junman’n, ɔ nin sran’m be like klelɛ mɔ maan be kaci Zezi i sɔnnzɔnfuɛ’n i juejue su. Nán maan e yaci mɛn’n nun like kun lɛ naan ɔ saci e nin Ɲanmiɛn e afiɛn m’ɔ ti e cenjele like’n. Sɛ e nanti sein naan e fɔnman’n, e kwla lafi su kɛ Zoova klun jɔ́ e wun.
24 Kɛ mɔ nantilɛ sein ɔ kan e mɛn dilɛ wunmuan’n ti’n, ɔ fata kɛ e nian e wun su aya tɛ kpa kun lika. Aya sɔ’n yɛle nzan nɔnlɛ ngboko’n. Like suanlɛ ng’ɔ́ bá lɛ nun’n, é wá kókó i sɔ liɛ’n su yalɛ.
?Amun wla kwla kpɛn su?
• ?Ngue ti yɛ ɔ ti su kɛ ninnge nga Ɲanmiɛn yili be mɔ be si ngwlɛlɛ’n be nantilɛ sein i su yɛ be kwla nian be di be jɔlɛ’n niɔn?
• ?Kɛ be se kɛ be nanti sein i bo’n yɛle mennin? ?Yɛ ninnge mennin wie mun yɛ ɔ fata kɛ e yo naan y’a kle kɛ e nanti sein ɔn?
• ?Ngue yɛ ɔ kwla uka e naan y’a nanti sein ɔn?
• ?Sɛ e waan é nánti seiin, aya mennin yɛ ɔ fata kɛ e nian e wun su i lika naan e kpalo i ɔ?