?Mɛn nga e o nun yɛ’n ɔ́ núnnún?

?Ngue yɛ ɔ su nunnunman-ɔn?

KLƆ SRAN MUN

Ndɛ nga Biblu’n kan’n: Ɲanmiɛn ‘w’a yiman [asiɛ’n] i ngbɛn. Ɔ yili i kɛ be tran su.’—EZAI 45:18.

ASIƐ’N

Ndɛ nga Biblu’n kan’n: “Kɛ sran’m bé wú bé kɔ́’n, nn uflɛ’m bé káci be, kɛ ɔ́ yó sɔ tititi-ɔ. Sanngɛ asiɛ’n wo i osu’n nun titi.”—AKUNNDANFUƐ’N 1:4.

LIKE NGA NDƐ SƆ’N KLE E’N: Biblu’n kle kɛ asiɛ’n su nunnunman le. Afin Ɲanmiɛn yili i kɛ sran’m be tran su tititi. ?Sɛ ɔ ti sɔ niɔn, kɛ be se kɛ mɛn’n núnnún’n i bo’n yɛle benin?

BU NDƐ NGA I SIN NIAN: Biblu’n fali mɛn nga e o nun yɛ’n sunnzunnin Nowe i blɛ su mɛn liɛ’n. Nowe blɛ su’n, ‘sa tɛtɛ nga sran’m be yo’n yili asiɛ’n piɛ.’ (Bo Bolɛ 6:13) Sanngɛ Nowe liɛ’n ɔ ti sran kpa. I sɔ’n ti’n, kɛ Ɲanmiɛn fali anannganman su nzue’n nunnunnin sran tɛtɛ mun’n, ɔ deli Nowe nin i awlobofuɛ mun. Kɛ Biblu’n kán sa sɔ’n i ndɛ’n, ɔ seli kɛ: “Be nunnunnin blɛ sɔ’n nun mɛn liɛ’n. Afin nzue’n yili, kpɛkun ɔ katali mɛn sɔ’n su.” (2 Piɛli 3:6) ?Kɛ Biblu’n se kɛ Ɲanmiɛn nunnunnin mɛn’n, ngue like trele sa yɛ ɔ nunnunnin i-ɔ? W’a nunnunman asiɛ’n bɔbɔ ba’n. Sran tɛtɛ mun yɛ ɔ nunnunnin be-ɔ. Ɔ maan kɛ Biblu’n kan mɛn’n i nunnunlɛ ndɛ’n, nán asiɛ’n i nunnunlɛ ndɛ yɛ ɔ kan-ɔn. Sanngɛ sran tɛtɛ nga be o asiɛ’n su’n be ndɛ yɛ ɔ kan-ɔn.

?Ngue yɛ ɔ́ núnnún-ɔn?

MƐN’N NUN SA MUN NIN KLUNWIFUƐ MUN

Ndɛ nga Biblu’n kan’n: “Ɔ ka kaan sa, be su wunman klunwifuɛ’n kun. Sɛ a nian kan ɔ tran lɛ’n, a su wunman sran. Yalɛfuɛ mun yɛ mɛn’n ɔ́ wá yó be liɛ-ɔ. Be wun jɔ́ be kpa fɔuun!”—JUE MUN 37:10, 11.

LIKE NGA NDƐ SƆ’N KLE E’N: Nowe blɛ su’n, kɛ anannganman su nzue’n tɔli’n ɔ nunnunnin klunwifuɛ mun. Sanngɛ i sin’n, sran’m be wa sali be sin be yoli sa tɛtɛ mun ekun. Kɛ ɔ fɛ i lɛ lele m’ɔ́ fá jú andɛ’n, sran’m be te yo sa tɛ. I sɔ’n ti yɛ mɛn’n w’a yo tɛ kɛ nga sa’n niɔn. Sanngɛ ɔ ka kan’n, Ɲanmiɛn wá núnnún klunwifuɛ mun. Jue tofuɛ kun kɛnnin i sɔ liɛ’n i ndɛ seli kɛ: “Be su wunman klunwifuɛ’n kun.” Ɲanmiɛn i Famiɛn dilɛ blɛ’n nun yɛ ɔ́ wá yó sɔ-ɔ. Ɲanmiɛn tɛkɛli i Famiɛn diwlɛ’n ɲanmiɛn su lɔ. Yɛ ɔ́ wá síe sran kpa nga bé ká asiɛ’n su’n.

BU NDƐ NGA I SIN NIAN: ?Awa’m bé súan Ɲanmiɛn i Famiɛn dilɛ sɔ’n i bo? Biblu’n kle kɛ be su yoman sɔ kaan sa. I kpa bɔbɔ’n, bé tɛ́nndɛn i ɲrun. Nanwlɛ, i sɔ’n ti sinnzin ayeliɛ. (Jue Mun 2:2) ?Kɛ bé wá yó sɔ’n, wafa sɛ yɛ i bo’n gúa-ɔ? Ɲanmiɛn i Famiɛn diwlɛ’n wá núnnún be kpɛkun “i bɔbɔ ɔ́ ká lɛ tititi.” (Daniɛl 2:44) ?Sanngɛ ngue ti yɛ ɔ fata kɛ be nunnun awa mun-ɔn?

?Ngue ti yɛ ɔ fata kɛ be nunnun awa mun-ɔn?

Ndɛ nga Biblu’n kan’n: “Sran’n i nguan’n nunmɛn i sa nun. Ajalɛ ng’ɔ tu’n ɔ finmɛn i.”—ZEREMI 10:23.

LIKE NGA NDƐ SƆ’N KLE E’N: Ɲanmiɛn w’a yiman klɔ sran mun kɛ be sie be wiengu. I sɔ’n ti’n kɛ be sie be wiengu mun’n, be kle be ɲrɛnnɛn. Kpɛkun be kwlá siesieman be su sa mun.

BU NDƐ NGA I SIN NIAN: Fluwa kun seli kɛ mɛn siefuɛ’m be kwlá yoman naan “yalɛ’n nin awe’n nin tukpacɛ’n nin sanvuɛsa mun nin alɛ’n nin nzaje sa’m be wie.” Ɔ kan guali su kɛ: “Sran wie’m be bu i kɛ sɛ sran kunngba sie asiɛ’n wunmuan’n, yɛ sa sɔ’m bé wíe-ɔ.” Kannzɛ bɔbɔ mɛn siefuɛ’m be bo yo kun be kpa sran kun kɛ ɔ sie mɛn’n, ɔ su yoman ye. Afin fɔ o sran sɔ’n i nun. Ɲanmiɛn kunngba cɛ yɛ ɔ kwla yo maan mɛn’n nun sa’m be wie-ɔ.

Ɔ maan kɛ nga Biblu’n fa kan’n sa’n, ɔ fataman kɛ mɛn’n i nunnunlɛ’n ɔ kun sran kpa’m be srɛ. I kpa bɔbɔ’n ɔ fata kɛ ɔ yo be fɛ afin bé wá trán mɛn uflɛ mɔ Ɲanmiɛn bɔbɔ yɛ ɔ́ wá síe’n i nun.

?Blɛ benin nun yɛ Ɲanmiɛn wá núnnún mɛn’n niɔn? Ndɛ ng’ɔ́ bá lɛ’n ɔ́ wá fá e ɲin síe i wafa nga Biblu’n tɛ kosan sɔ’n su’n i su.