Be wunman Zoova i dan m’ɔ ti’n i sin
‘Anannganman ti dan, ɔ nin manmanlɛ fata lele tra su. Be wunmɛn i dan m’ɔ ti’n i sin.’—JUE MUN 145:3.
1, 2. ?Sran wafa mennin yɛle Davidi? ?Yɛ, kɛ ɔ buli Ɲanmiɛn i angunndan’n, ɔ buli i bɔbɔ i wun sɛ?
SRAN nga mɔ Ɲanmiɛn maan ɔ klɛli Jue Mun 145, ɔ ti laa sran kun mɔ i dunman’n fuli ɔ. I bakan nun’n, ɔ nin safuɲrɛn jajraja kun be kunnin naan w’a kun i sɔfuɛ’n. Kpɔkun kɛ jue tofuɛ sɔ’n wa yoli famiɛn m’ɔ kwla’n, ɔ kwlɛli i kpɔfuɛ kpanngban. Sran sɔ’n yɛle Davidi, ɔ yoli laa Izraɛli’n i famiɛn’n i nɲɔn su. Kannzɛ bɔɔ wie’n kunnin i’n, sanngɛ andɛ nin andɛ be te kɛn i ndɛ, ɔ maan sran kpanngban be si i su ndɛ.
2 Kannzɛ bɔɔ Davidi yoli sa dandan mun’n, sanngɛ w’a tumɛn i wun le. Kɛ ɔ́ tó jue mánmán Zoova’n, ɔ seli kɛ: ‘Kɛ n nian nglo lɔ ninnge mɔ a yili be’n, kɛ n nian anglo nin nzraama mɔ a sieli be lɔ’n, n usa min wun kɛ: “?Wan yɛle sran mɔ maan ɔ wla ko kpɛn i su ɔ? ?Wan yɛle klɔ sran mɔ maan i ndɛ ko lo wɔ sɔ ɔ?”’ (Jue Mun 8:4, 5). Davidi w’a bumɛn i wun sran dan, sanngɛ ɔ seli kɛ Zoova yɛ ɔ deli i i kpɔfuɛ’m be sa nun ɔn. Ɔ maan, ɔ seli kɛ: ‘Anannganman, a ti kɛ ɲrɛn sa, a sasa min, yɛ a de min. Ɔ klun ufue’n ti maan min dunman’n fu.’ (2 Samuel 22:1, 2, 36). Wafa nga Zoova fa si sa tɛ yofuɛ’m be aunnvuɛ’n, ɔ yi i klun ufue’n i nglo. Ɔ maan Davidi si Ɲanmiɛn i aunnvuɛ silɛ i su ye.
‘Min Ɲanmiɛn, min Famiɛn, ń yí wɔ ayɛ’
3. (a) ?Davidi ɲrun’n, wan yɛ ɔ ti Izraɛli nvle’n i famiɛn’n niɔn? (b) ?Davidi kunndɛli kɛ ɔ́ lá Zoova ase lele blɛ mennin?
3 Kannzɛ bɔɔ Ɲanmiɛn sieli Davidi famiɛn’n, sanngɛ Davidi wunnin i wlɛ kɛ Zoova bɔbɔ yɛ ɔ sie Izraɛli nvle’n sakpa ɔ. Ɔ seli kɛ: “Anannganman wɔ yɛ a ti famiɛn’n niɔn. A o ninnge’n kwlaa ti su.” (1 Be Nyoliɛ 29:11). Nanwlɛ, Davidi i ɲin yili Ɲanmiɛn i famiɛn dilɛ’n i dan kpa! Ɔ seli kɛ: ‘Min Ɲanmiɛn, min Famiɛn, ń yí wɔ ayɛ. N yaciman wɔ ase lalɛ le naan kɛ ɔ́ yó ɔ w’a yo. Ń lá wɔ ase cɛn kwlakwla. N su yaciman ɔ dunman kpa bolɛ le naan kɛ ɔ yo ɔ w’a yo.’ (Jue Mun 145:1, 2). Davidi kunndɛli kɛ ɔ́ lá Zoova i ase aliɛ ba kwlaa nun, naan ɔ́ yó i sɔ tititi.
4. ?Ndɛ mennin mun yɛ Jue Mun 145 yi be nglo kɛ be ti ato ɔ?
4 Kɛ Satan se kɛ Ɲanmiɛn ti famiɛn kun mɔ i sufuɛ’m be kwlá diman alaje’n, Jue Mun 145 kle weiin kɛ i sɔ’n ti ato (Bo Bolɛ 3:1-5). Jue sɔ’n yi Satan i ato ndɛ uflɛ kun ekun nglo. Ato ndɛ sɔ’n yɛle kɛ, nán kɛ sran’m be klo Ɲanmiɛn ti yɛ be ɲin yi i ɔ. Sanngɛ be bɔbɔ be like liɛ nga ɔ lo be’n ti ɔ (Zɔb 1:9-11; 2:4, 5). Kɛ Davidi sa’n, andɛ Klistfuɛ kpa’m be kusu be kle kɛ Bae Satan i suɛn nga ɔ tɔnnin be’n, ɔ ti ato. Anannganman nguan mɔ be lafi su kɛ bé ɲɛ́n i Ɲanmiɛn i Famiɛn Diwlɛ nun’n, ɔ ti be cenjele like. Afin be kunndɛ kɛ bé mánmán Zoova tititi. Sran ko ju miliɔn kpanngban be lafi Zezi i wun kpɔlɛ tɛ’n su, kpɔkun klolɛ nin aɲinyiɛ su be klɛnnin be wun mannin Zoova kɛ bé yó be batɛmu naan bé sú i. I sɔ mɔ b’a dun mmua b’a yo’n, ɔ kle kɛ b’a bo Zoova manmanlɛ’n i bo.—Rɔmfuɛ Mun 5:8; 1 Zan 5:3.
5, 6. ?Zoova manmanlɛ nin i ayɛ yilɛ’n i wun atin mennin yɛ e le i ɔ?
5 E mɔ e ti Zoova i sufuɛ’n, i ayɛ yilɛ nin i manmanlɛ’n i wun atin kpanngban nga e le i’n, amun e bu i angunndan e nian. Kɛ e kanngan ndɛ mma wie Biblu’n nun’n, mɔ i sɔ’n kan e awlɛn’n, e srɛlɛ’n nun e kwla yi i ayɛ e mɛnmɛn i. Kpɔkun, kɛ e wun wafa nga Ɲanmiɛn nin i nvle’n be trannin’n, annzɛ wafa nga ninnge nga ɔ yili be mɔ be yo ɲɛnmɛn’n be nun wie kan e awlɛn’n, e kwla srɛ Zoova e lɛ i ase e kle kɛ e si ye. Asa ekun’n, kɛ e nin e niaan Klistfuɛ mun e koko ninnge nga Ɲanmiɛn seli kɛ ɔ́ yó be’n be su yalɛ e asɔnun aɲia’m be bo’n, annzɛ e nin be e yalɛ kokolɛ nun’n, e manman Ɲanmiɛn Zoova. I li bɔɔ, ‘ɲoliɛ kpa’ kwlaa nga e yo be Ɲanmiɛn Sielɛ Blɛ’n ti’n, be manman Zoova.—Matie 5:16.
6 Ɲoliɛ kpa sɔ’m be nun wie yɛle kɛ koko nga nun’n, Zoova i nvle nunfuɛ’m be kplannin Ɲanmiɛn suwlɛ lika kpanngban nvle nga be sa mian sika wun’n, be nun. Sɛ lika kpanngban sɔ’m be kplanlɛ’n kwla yoli ye’n, ɔ fin sika nga be niaan nga be o nvle uflɛ’m be nun’n be mannin’n, ɔ nin Klistfuɛ nga be ko suannin Ɲanmiɛn Sielɛ Blɛ Sua sɔ’m be kplanlɛ’n i bo be klunklo su’n. Kpɔkun ɲoliɛ kpa’m be kwlaa be nun cinnjin kpafuɛ’n yɛle Zoova i Sielɛ Blɛ’n i jasin fɛ’n mɔ e bo fa mɛnmɛn i’n (Matie 24:14). Kɛ nga Jue Mun 145 i ndɛ mma kasiɛn’m be fa kan’n sa’n, Davidi sili Ɲanmiɛn Sielɛ Blɛ’n i su ye. Kpɔkun ɔ wunnin Ɲanmiɛn i dan m’ɔ ti’n i wlɛ, yɛ ɔ boli i Sielɛ Blɛ’n i ɲrun m’ɔ le i’n su (Jue Mun 145:11, 12). ?Wafa nga Ɲanmiɛn sie sran mun klolɛ su’n i su ye nga Davidi sili’n, i kunngba’n yɛ amun kusu amun si i ɔ? ?Yɛ amun kɛn i Sielɛ Blɛ’n i ndɛ kle amun wiengu mun titi?
Ninnge wafawafa nga be kle Ɲanmiɛn i dan m’ɔ ti’n
7. Amun kle like cinnjin kpa kun mɔ i ti yɛ ɔ fata kɛ be manman Zoova’n.
7 Jue Mun 145:3 kle like cinnjin kpa kun mɔ i ti yɛ ɔ fata kɛ be manman Zoova’n. Davidi seli kɛ: ‘Anannganman ti dan, ɔ nin manmanlɛ fata lele tra su. Be wunmɛn i dan m’ɔ ti’n i sin.’ Zoova i dan m’ɔ ti’n, ɔ leman awieliɛ. Annzɛ kusu i dan m’ɔ ti’n i tɛnndɛn nun nin i tɛtrɛ nun’n, sran’m be kwlá wunmɛn i wlɛ mlɔnmlɔn. Sanngɛ ninnge nga be yi Zoova i dan m’ɔ ti’n i nglo’n be su angunndan bulɛ’n, ɔ kwla yo maan e ɲan su mmlusuɛ dɔ nga su.
8. ?Ngue yɛ ɲanmiɛn m’ɔ la nglo lɔ plaii’n, ɔ kle e Zoova i dan m’ɔ ti’n, ɔ nin i tinmin’n be su ɔ?
8 Maan amun wla kpɛn kɔnguɛ kun mɔ amun niannin ɲanmiɛn ble’n su lɔ’n, i su. ?Kɛ amun wunnin nzraama kpanngban mun’n, i sɔ’n w’a boman amun nuan? ?Yɛ ɲanmiɛn su lɔ ninnge sroesroe kwlaa nga Zoova yili be sɔ’n b’a wlaman amun fanngan kɛ amun mɛnmɛn i, i dan m’ɔ ti’n ti? Sanngɛ nzraama nga be sin yia asiɛ’n be kwle’n, i nun bue kaan kpa kun yɛle nzraama nga amun wunnin be lɛ’n. I nga ɔ o su ekun’n, yɛle kɛ nzraama kwlekwle’m be tra miliali ya. Kpɔkun, sɛ b’a faman mannzin nga be fa nian ɲanmiɛn su lɔ ninnge mun’n, nzraama kwlekwle’m be nun nsan cɛ yɛ be kwla fa be ɲinma ngbɛn sa be wun be ɔ. Nanwlɛ, nzraama nin nzraama kwle nga be siman be nuan’n, mɔ be o ɲanmiɛn m’ɔ la nglo lɔ plaii’n su’n, be yi Zoova i tinmin dan m’ɔ fa yili ninnge sɔ mun’n, i nglo. Kpɔkun be kle kɛ be kwlá wunman Zoova i dan m’ɔ ti’n i sin.—Ezai 40:26.
9, 10. (a) ?Wafa sɛ yɛ Zoova yili i dan m’ɔ ti’n i nglo Zezi i lika ɔ? (b) ?Wafa sɛ yɛ ɔ fata kɛ Zezi i cɛnlɛ’n ɔ ɲan ta e Ɲanmiɛn sulafilɛ’n su ɔ?
9 Amun e bu Zoova i dan m’ɔ ti’n i wafa uflɛ wie mun ekun’n be su angunndan e nian. I wafa uflɛ sɔ’m be kan Zezi Klist. Kɛ Ɲanmiɛn yili i Wa’n, mɔ ba sɔ’n cɛli i Si wun lɔ’n, mɔ i ‘sa o junman’n su ti’n,’ i sɔ’n yili Ɲanmiɛn i dan m’ɔ ti’n i nglo (Nyanndra Mun 8:22-31). Kɛ Zoova fɛli i awlɛn su Ba’n kpɔli sran’m be ti’n, i sɔ’n yili i sran klolɛ dan’n i nglo (Matie 20:28; Zan 3:16; 1 Zan 2:1, 2). Kpɔkun like nga ɔ tratra sran angunndan su’n, yɛle aolia nun sran wunnɛn nga ɔ saciman le’n, mɔ kɛ Zoova cɛnnin Zezi ɔ fa mɛnnin i’n.—1 Piɛr 3:18.
10 Zoova i dan mɔ be wunmɛn i sin’n, i wafa wie m’ɔ yo ɲɛnmɛn’n yɛle Zezi i cɛnlɛ m’ɔ cɛnnin i’n. Nanwlɛ, Ɲanmiɛn yoli maan ninnge nga be wun be’n nin nga be wunman be’n, Zezi i wla kpɛnnin be yilɛ’n su (Kolɔsfuɛ Mun 1:15, 16). Ninnge sɔ’m be nun wie yɛle aolia nun sran mun, ɔ nin lika m’ɔ la nglo lɔ plaii’n, ɔ nin asiɛ’n, ɔ nin i su ninnge kwlaa nga be lo wunmiɛn’n. Ɲanmiɛn su lɔ nin asiɛ’n su wa ninnge’m be su like nga i Wa’n dun mmua sili be’n, kwlaa naan w’a ba asiɛ’n su’n, Zoova yoli maan i wla kpɛnnin be su. Kpɔkun ɔ fali sa nga Zezi wunnin be asiɛ’n su wa’n, ɔ fa ukali su ekun. Nanwlɛ, Zezi i cɛnlɛ’n, ɔ yi Zoova i dan m’ɔ ti’n, mɔ be wunmɛn i sin’n i nglo. I li bɔɔ, sa dan sɔ’n kle kɛ sran nga be wuli’n be cɛnlɛ’n kwla yo ye wie. Kpɔkun, ɔ fata kɛ i sɔ’n wla e fanngan naan e lafi Ɲanmiɛn su kɛ ɔ kwla yo maan sran miliɔn kpanngban nga be wuli’n mɔ i wla kwlá fiman be su’n, bé sá be sin nguan nun asiɛ’n su wa ekun.—Zan 5:28, 29; Sa Nga Be Yoli’n 17:31.
Abonuan sa nin sa dandan mun
11. ?Afuɛ 33 nun E. B. N. Pantkɔti nun’n abonuan sa mennin yɛ Zoova boli i yolɛ bo ɔ?
11 Kɛ ɔ fɛ i Zezi i cɛnlɛ’n su lele m’ɔ́ fá jú andɛ’n, Zoova yoli sa dandan nin abonuan sa kpanngban mun (Jue Mun 40:6). Afuɛ 33 nun e blɛ liɛ’n nun (E. B. N.) Pantkɔti nun’n, Zoova takali nvle uflɛ. Nvle sɔ’n yɛle ‘Izraɛlifuɛ nga be ti Ɲanmiɛn liɛ sakpa’n.’ Kpɔkun Zezi i sɔnnzɔnfuɛ nga be kpali be sieli be ngunmin’n, yɛ be ti nvle sɔ’n i nunfuɛ ɔ (Galasifuɛ Mun 6:16). Ɲanmiɛn ninnge’m be nun nvle sɔ’n trɛ juli asiɛ’n i lika nga be si be blɛ sɔ nun’n, be su. Trɛlɛ sɔ’n yoli abonuan. Kɛ Zezi i akoto’m be wuli’n, kannzɛ bɔɔ sran’m be yacili Ɲanmiɛn sulɛ kpafuɛ’n naan asɔnun tɛtɛ’m be truli’n, sanngɛ Zoova w’a yaciman abonuan sa’m be yolɛ naan w’a kle kɛ ninnge nga ɔ seli kɛ ɔ́ yó be’n bé kpɛ́n su.
12. ?Kɛ mɔ be kwla kanngan Biblu’n nun aniɛn nga asiɛ’n sufuɛ’m be sunman lika be kan be’n be nun’n ti’n, i sɔ’n kle sɛ?
12 Amun e fa sunnzun ase kun e nian. Biblu’n i nun fluwa’m be nun wie fi w’a mlinman. Kpɔkun be kacili Biblu’n aniɛn nga sran sunman be kan be asiɛ’n su’n, be nun. Ɲrɛnnɛn nin akluntitiɛ nun yɛ sran’m be kacili Biblu’n aniɛn’m be nun ɔn. Afin Satan i sran’m be kunndɛli kɛ bé kún be nga be kacili Biblu’n. Nanwlɛ, Ɲanmiɛn Zoova mɔ be wunmɛn i dan m’ɔ ti’n i sin’n, sɛ ɔ timɛn i ti’n, nn Biblu’n i kacilɛ aniɛn kɔe akpi nɲɔn (2.000) nun’n w’a yoman ye!
13. ?Kɛ ɔ fɛ i afuɛ 1914 nun’n, wafa sɛ yɛ Zoova i dan m’ɔ ti’n i ɲin’n fiteli ninnge nga i Sielɛ Blɛ’n wá yó be’n, be lika ɔ?
13 Zoova i dan m’ɔ ti’n, i ɲin’n fite Ɲanmiɛn Sielɛ Blɛ’n i ninnge nga ɔ sunnzun kɛ ɔ́ yó be’n, be nun. Amun e fa sunnzun ase kun e nian. Afuɛ 1914 nun’n, ɔ fɛli i Wa Zezi sieli i Famiɛn ɲanmiɛn su lɔ. I osu w’a cɛman, yɛ Zezi kannin Satan nin i mmusu’m be bo ɲanmiɛn su lɔ guali be asiɛ’n i wun koko wa ɔ. Siɛn’n, be su minndɛ kɛ be fa be sie kunman dan mɔ be simɛn i bo’n i nun (Sa Nglo Yilɛ 12:9-12; 20:1-3). Kɛ ɔ fin lɛ’n, Zezi i sɔnnzɔnfuɛ nga be kpali be sieli be ngunmin’n be yalɛ klelɛ’n yoli dan ɔli i ɲrun. Sanngɛ Zoova suannin be bo Zezi i balɛ blɛ mɔ sran’m b’a wunman nun’n, i nun.—Matie 24:3; Sa Nglo Yilɛ 12:17.
14. ?Afuɛ 1919 nun’n, abonuan sa mennin yɛ Zoova yoli ɔ? ?Yɛ i sɔ’n yoli maan ndɛ mennin yɛ ɔ kpɛnnin su ɔ?
14 Afuɛ 1919 nun’n, Zoova yoli abonuan sa kun ekun m’ɔ yili i dan m’ɔ ti’n i nglo ɔ. Zezi i sɔnnzɔnfuɛ nga be kpali be sieli be ngunmin’n mɔ laa be yacili Ɲanmiɛn ninnge’m be nun junman dilɛ’n, be wa boli junman dilɛ’n bo ekun (Sa Nglo Yilɛ 11:3-11). Kɛ ɔ fin lɛ’n, be nga be kpali be sieli be ngunmin’n be boli Ɲanmiɛn Sielɛ Blɛ m’ɔ takali ɲanmiɛn su lɔ’n i jasin fɛ’n. Be yiali be nga be kpali be sieli be ngunmin’n be nun wie mun ekun naan be nuan w’a ju sran akpiakpi ya sran akpiakpi ablanan nin nnan (144.000) (Sa Nglo Yilɛ 14:1-3). Zoova fali Klist i sɔnnzɔnfuɛ nga be kpali be sieli be ngunmin’n naan w’a wla “asiɛ uflɛ kun” mɔ i nun yɛ sran ndɛnmanfuɛ’m bé trán’n, i bo ase (Sa Nglo Yilɛ 21:1). ?Sanngɛ, kɛ mɔ be nga be kpali be sieli be ngunmin’n be kwlaa bé kɔ́ ɲanmiɛn su lɔ’n, wafa sɛ yɛ ‘asiɛ uflɛ’n,’ ɔ́ kwlá ká lɛ titi ɔ?
15. ?Junman mennin yɛ Klistfuɛ nga be kpali be sieli be ngunmin’n be fɛli i nun cinnjinmuɛn’n niɔn? ?Yɛ i agualiɛ’n yoli sɛ?
15 Afuɛ 1935 nun’n, fluwa Sasafuɛ Tranwlɛ’n (fr.) Novamblu 1 nin i 15 su liɛ’n, be nun akpasua cinnjin wie’m be kannin “sran kpanngban kpa” mɔ Sa Nglo Yilɛ ndɛ tre 7 bo be jɔ’n, be ndɛ. Klistfuɛ nga be kpali be sieli be ngunmin’n be boli be niaan sɔ mɔ ‘be fin mɛnmɛn’n kwlaa nin nvlenvle’n kwlaa nun, mɔ sran wafawafa’n kwlaa o be nun, mɔ be ijɔ aniɛn wafawafa’n kwlaa’n,’ be yialɛ bo juejue su. “Sran kpanngban kpa” sɔ mun’n, ‘bé fín afɛ dan’n nun’ fíte, kpɔkun bé ɲán anannganman nguan asiɛ m’ɔ́ wá káci mɛn klanman’n i nun. Ɔ maan bé yó ‘asiɛ uflɛ’n,’ i nunfuɛ tititi (Sa Nglo Yilɛ 7:9-14). Klistfuɛ nga be kpali be sieli be ngunmin’n be fali Ɲanmiɛn Sielɛ Blɛ jasin fɛ’n bolɛ nin sran’m be ukalɛ junman m’ɔ yo maan be kaci Zezi i sɔnnzɔnfuɛ’n i nun cinnjinmuɛn. I sɔ ti’n, sran mɔ be tra miliɔn nsiɛn be lafi su kɛ bé ɲán anannganman nguan asiɛ m’ɔ́ wá káci mɛn klanman’n i su. Kannzɛ bɔɔ Satan nin i mɛn tɛ’n be kleli Klistfuɛ sɔ’m be yalɛ’n, sanngɛ be trɛli. ?I sɔ’n ti’n, wan yɛ maan ninnge sɔ’m be yoli ye ɔ, mɔ i ti yɛ ɔ nin manmanlɛ fata ɔ (Ezai 60:22; 1 Zan 5:19)? Zoova kunngba cɛ yɛ ɔ kwla fɛ i wawɛ’n yo ninnge kwlaa sɔ mun ɔn.—Zakari 4:6.
Zoova ti famiɛn m’ɔ le ɲrun’n, m’ɔ yo ɲɛnmɛn’n
16. ?Ngue ti yɛ klɔ sran’m be kwlá wunman be ɲinma jrɛiin su kɛ ‘Zoova ti famiɛn m’ɔ le ɲrun, m’ɔ yo ɲɛnmɛn’ ɔn?
16 I li bɔɔ maan Zoova i abonuan sa nin i sa dandan’m be yo wafa sɛ o, sanngɛ sran’m be wla su fiman be su le. Davidi seli kɛ: ‘Sa dandan nga a yo be’n, maan sran akpasua nga be wu be’n be kan naan akpasua uflɛ nga be jaso su’n be kusu be ti. A ti famiɛn, a le ɲrun, a yo ɲɛnmɛn, min waan ń kán wafa sɔ mɔ a ti’n i ndɛ. Ń kán abonuan sa mɔ a yo be’n be ndɛ wie. Maan be kan wɔ kpli mɔ a ti’n mɔ i ti yɛ a yo sro’n i ndɛ. N liɛ’n, ɔ sa dandan mɔ a yo be’n, ḿ bóbó be kunngunngun.’ (Jue Mun 145:4-6). ?Sanngɛ, kɛ mɔ ‘Ɲanmiɛn ti aolia nun sran’ mɔ klɔ sran’m be kwlá wunmɛn i’n ti’n, wafa sɛ yɛ Davidi kwla si kɛ Zoova ti famiɛn m’ɔ le ɲrun, m’ɔ yo ɲɛnmɛn ɔn?—Zan 1:18; 4:24.
17, 18. ?Wafa sɛ yɛ Davidi kwla wunnin i wlɛ kpa tra laa’n, kɛ ‘Zoova ti famiɛn m’ɔ le ɲrun, m’ɔ yo ɲɛnmɛn’ ɔn?
17 Kannzɛ bɔɔ Davidi kwlá wunman Ɲanmiɛn’n, sanngɛ ɔ le wafa nga Davidi kwlá sí Zoova i ɲrun m’ɔ le i’n i su ye kɔ́ i ɲrun ɔn. Amun e fa sunnzun ase kun e nian. Atrɛkpa Ɲanmiɛn i sa dandan nga be klɛli be Ɲanmiɛn Ndɛ’n nun’n kɛ ɲanmiɛn su lɔ nzue dan nga ɔ fa nunnunnin laa mɛn tɛ kun sa’n, ɔ kanngannin i su ndɛ’n nun. Nanwlɛ, i nun mɔ Ɲanmiɛn yoli maan Izraɛlifuɛ’m be fin kanga nun Ezipti lɔ be fiteli’n, wafa nga ɔ guali Ezipti lɔ amuɛn’m be ɲin ase’n, Davidi suɛnnin i su ndɛ. Sa sɔ’m be kle Zoova i ɲrun m’ɔ le i’n, ɔ nin i dan m’ɔ ti’n.
18 Nanwlɛ, nán Ɲanmiɛn Ndɛ’n i nun kannganlɛ’n ngunmin yɛ ɔ yoli maan Davidi wunnin Ɲanmiɛn i ɲrun m’ɔ le i’n i wlɛ ɔli i ɲrun ɔn. Sanngɛ ɔ buli Ɲanmiɛn Ndɛ’n i su angunndan wie. Amun e fa sunnzun ase kun e nian. I nun mɔ Zoova mannin Izraɛlifuɛ’m be Mmla’n, sa nga be juli blɛ sɔ nun’n, ɔ kwla buli i su angunndan. Ɲanmiɛn su’n kpannin kplannankplannan. Ɲanmiɛn’n kpali sin piapiapia. Be wunnin sin wunsre kpikplikpi Sinai oka’n su. Be tili awɛ kun tɛlɛ kekle kpa. Izraɛlifuɛ’m be ti yiali oka’n i bo lɛ. Kpɔkun kɛ Zoova fali anzi kun kannin ndɛ kleli be’n, be tili ‘Mmla Blu mun’ sin’n nin sin wunsre’n be afiɛn (Mmla’n 4:32-36; 5:22-24; 10:4; Lɔ Tulɛ 19:16-20; Sa Nga Be Yoli’n 7:38, 53). Nanwlɛ, sa sroesroe sɔ’m be yi Zoova i dan m’ɔ ti’n i nglo kpa! Sran kwlaa nga be klo Ɲanmiɛn Ndɛ’n mɔ be bu sa sɔ’m be su angunndan’n, be kwlá kaciman like fi. Sanngɛ, kɛ mɔ ‘Zoova ti famiɛn m’ɔ le ɲrun, m’ɔ yo ɲɛnmɛn’ ti’n, ɔ fata kɛ i sɔ’n kan be awlɛn. Andɛ’n, ɔ ti su kɛ e le Biblu’n i wunmuan’n. I nun aolia nun ninnge mɔ be yo ɲɛnmɛn’n, be kwla yo maan Zoova i dan m’ɔ ti’n, ɔ ɲan ta e su.—Ezekiɛl 1:26-28; Daniɛl 7:9, 10; Sa Nglo Yilɛ, ndɛ tre 4.
19. ?Ngue like yɛ e kwla yo naan y’a wun Zoova i ɲrun m’ɔ le i’n i wlɛ kpa tra laa ɔ?
19 Wafa nga Ɲanmiɛn i ɲrun m’ɔ le i’n ɔ kwla ɲannin ta ekun Davidi su’n, yɛle mmla nga Ɲanmiɛn fa mannin Izraɛlifuɛ mun’n i nun like suanlɛ’n (Mmla’n 17:18-20; Jue Mun 19:8-12). Zoova i mmla’n su falɛ’n yoli maan Izraɛlifuɛ’m be nvle’n ɲannin ɲrun, kpɔkun i sɔ’n yoli maan be nin nvle onga’m b’a sannganman (Mmla’n 4:6-8). Kɛ nga ɔ fa kpɛnnin su Davidi i lika’n sa’n, sɛ e kanngan Ɲanmiɛn Ndɛ’n nun titi naan e bu su angunndan kpa’n, naan e suan nun like nanwlɛ su’n, é wún Zoova i ɲrun m’ɔ le i’n i wlɛ kpa trá laa’n.
Ɲanmiɛn i nzuɛn ɲɛnmɛn’n ɔ yi i dan m’ɔ ti’n i nglo!
20, 21. (a) ?Kɛ Jue Mun 145:7-9 yi Zoova i dan m’ɔ ti’n i nglo’n, nzuɛn mennin yɛ ɔ kɛn i ndɛ ɔ? (b) ?Ta mennin yɛ Ɲanmiɛn i nzuɛn nga be kɛnnin i ndɛ’n ɔ le i sran kwlaa nga ɔ klo i’n i su ɔ?
20 Kɛ nga e fa wunnin i’n sa’n, Jue Mun 145 i ndɛ mma nsiɛn klikli’m be nun ndɛ’n wla e fanngan kpa naan ninnge nga be nin Zoova i dan m’ɔ ti’n mɔ be wunmɛn i sin’n be kɔ likawlɛ’n ti’n, e mɛnmɛn i. Ndɛ mma 7 lele 9 be kan Ɲanmiɛn i nzuɛn ɲɛnmɛn m’ɔ yi i dan m’ɔ ti i nglo’n i ndɛ. Davidi to jue se kɛ: ‘Klun ufue sa dandan nga a yo be’n, maan be kan be ndɛ. Nanwlɛ mɔ a di i titi’n, maan be wun kpaja be naan be kɛn i wun ndɛ’n be sin. Anannganman yaci sa cɛ, ɔ si aunnvuɛ, ɔ faman ya ndɛndɛ, i kpa liɛ’n, be flɛman. Anannganman ti kpa man sran’m be kwlakwla. Ɔ klo ninnge m’ɔ yili be’n be ngba.’
21 Davidi dun mmua fa e ɲin sie i Zoova i klun ufue’n nin nanwlɛ m’ɔ di’n be su. Nzuɛn kpa sɔ mun yɛ Bae Satan si be su akplowa’n niɔn. ?Ta mennin yɛ ɔ fata kɛ nzuɛn kpa sɔ’n ɔ ɲɛn i sran kwlaa nga ɔ klo Ɲanmiɛn m’ɔ fɛ i wun mɛn i kɛ ɔ sie i’n, i su ɔ? Afin, Zoova i klun ufue nin i famiɛn dilɛ nanwlɛ su’n be mɛn i sufuɛ’m be aklunjuɛ dan maan be kwlá yacimɛn i ndɛ kanlɛ naan b’a fa mɛnmɛn i! I li bɔɔ, Zoova i klun ufue’n kan “sran’m be kwlakwla.” E lafi su kɛ i sɔ liɛ’n ɔ́ wá úka sran kpanngban kpa naan b’a yaci sa tɛ yolɛ, naan b’a kaci Ɲanmiɛn Kpli i sufuɛ kwlaa naan i sɔ yolɛ blɛ w’a sin.—Sa Nga Be Yoli’n 14:15-17.
22. ?Wafa sɛ yɛ Zoova nin i sufuɛ’m be tran ɔn?
22 Davidi fɛli i ɲin sieli wafa nga Ɲanmiɛn bɔbɔ kleli be’n su, i nun nga Ɲanmiɛn ‘sinnin Moizi ɲrun lɛ, m’ɔ seli ekun kɛ: “N ti Anannganman. N ti Ɲanmiɛn aklunyefuɛ, nin aunnvuɛ sifuɛ, n faman ya ndɛndɛ. Min aklunye’n ti dan, yɛ sa nga n kan kɛ ń yó be’n, n yo be.”’ (Lɔ Tulɛ 34:6). I sɔ ti’n, Davidi kwla seli kɛ: “Anannganman yaci sa cɛ, ɔ si aunnvuɛ, ɔ faman ya ndɛndɛ, i kpa liɛ’n, be flɛman.” Kannzɛ bɔɔ be kwlá wunman Zoova i dan m’ɔ ti’n i sin’n, sanngɛ ɔ yo maan i sufuɛ’m be ɲan ɲrun, afin ɔ si be aunnvuɛ. I aunnvuɛ silɛ’n kusu ti dan wie. Zezi i wun kpɔlɛ tɛ’n ti’n, sran kwlaa nga ɔ koko i sa tɛ naan ɔ yaci i yolɛ’n, Ɲanmiɛn yaci cɛ i. Kpɔkun Zoova faman ya ndɛndɛ, afin kɛ ɔ ko yo naan i sufuɛ’m b’a kwla wlu mɛn uflɛ mɔ sran ndɛnmanfuɛ’m bé trán nun’n i nun’n ti’n, ɔ yaci be lɛ naan b’a kwla tu tra ninnge kwlaa nga be kle be yalɛ i sulɛ’n nun’n.—2 Piɛr 3:9, 13, 14.
23. ?Like suanlɛ nga ɔ́ bá lɔ’n nun’n, nzuɛn cinnjin kpa mennin yɛ é wá yíyí nun ɔn?
23 Davidi kannin Ɲanmiɛn i klun ufue’n annzɛ i sran klolɛ nanwlɛ su’n, i ndɛ. I li bɔɔ, Jue Mun 145 i ndɛ mma kasiɛn’m be kle wafa nga Zoova yi nzuɛn sɔ’n i nglo, ɔ nin wafa nga i klun ufue’n ɔ ɲan ta i sufuɛ nanwlɛfuɛ’m be su’n. Like suanlɛ nga ɔ́ bá lɔ’n, ɔ́ wá yíyí i sɔ’n nun.
?Wafa sɛ yɛ amún tɛ́ kosan’m be su ɔ?
• ?Atin mennin yɛ e le i e manman Zoova “cɛn kwlakwla” ɔ?
• ?Ninnge wafawafa mennin mun yɛ be kle kɛ e kwlá wunman Zoova i dan m’ɔ ti’n i sin ɔn?
• ?Wafa sɛ yɛ e kwla wun Zoova i ɲrun m’ɔ le i’n i wlɛ kpa tra laa’n niɔn?