Ɲanmiɛn kunndɛ kɛ e fa e wun e mɛntɛn i

Ɲanmiɛn le i dunman liɛ

“Zoova e Ɲanmiɛn, sɛ be manman wɔ’n, yɛ sɛ be yi wɔ ayɛ’n, yɛ sɛ be se kɛ a le tinmin’n, i su-ɔ. Afin wɔ yɛ a yili like kwlaa-ɔ.”—​SA NGLO YILƐ 4:11.

Biblu’n kle kɛ Ɲanmiɛn Kpli i dunman’n yɛle Zoova. I yɛ ɔ yili like kwlaa-ɔ. Ɔ maan i kunngba cɛ yɛ ɔ fata kɛ e su i-ɔ.

Zoova klo sran

“Ɲanmiɛn ti klolɛ.”—​1 ZAN 4:8.

Biblu’n nin ninnge nga Ɲanmiɛn yili be’n, be kwla uka e naan y’a si Zoova i nzuɛn mun. I nzuɛn sɔ’m be nun cinnjin kpafuɛ’n yɛle sran klolɛ’n. Like kwlaa nga Ɲanmiɛn yo’n, ɔ yo i klolɛ su. Sɛ e suan Zoova i su like naan e si i kpa’n, é kló i kpa.

Zoova yaci sa cɛ

“A ti Nyanmiɛn kun bɔ a yaci sa tɛ’n cɛ.”—​NEEMI 9:17.

Zoova si kɛ fɔ o e nun. Ɔ maan kɛ e yo sa tɛ mɔ e kpɛtɛ i kpɛkun e mian e ɲin e kaci e sa’n, ‘ɔ yaci cɛ e.’ Asa’n, ɔ jranman sa nga e yoli be laa’n be su kanman ndɛ.—​Jue Mun 103:12, 13.

Zoova kunndɛ kɛ e srɛ i

“Be kwlaa nga be kpan flɛ Anannganman’n, ɔ mantan be. [...] Ɔ ti be nɛn’n yɛ ɔ de be.”—​JUE MUN 145:18, 19.

Zoova kunndɛman kɛ e koto waka sran annzɛ foto annzɛ like uflɛ wie bo naan y’a srɛ i. Asa ekun’n, sɛ e waan é srɛ́ i’n ɔ kunndɛman kɛ e dun mmua e yo ninnge tɛkɛtɛkɛ wie mun ka. Siɛ nin niɛn nga be klo be mma mun’n, kɛ be mma’m be kan ndɛ kle be’n, be sie be su tie. I wafa kunngba’n, Zoova sie i su tie e srɛlɛ mun.