Maan e fa ngwlɛlɛ ajalɛ

“Nán lafi ɔ bɔbɔ wɔ akunndan liɛ’n su. Anannganman i su yɛ lafi-ɔ.”​—NYA. 3:5.

?AMÚN TƐ́ SU SƐ?

?Ngue yɛ é yó naan y’a kle kɛ akunndan nga Zoova bu’n i wie yɛ e bu ɔ?

?Ngue yɛ ɔ fata kɛ e yo naan y’a fa ajalɛ kpa ɔ?

?Sɛ e fua kɛ é yó like kun’n, ngue yɛ ɔ fata kɛ e yo naan w’a yo ye ɔ?

1, 2. ?Amun klo ajalɛ falɛ? ?Ajalɛ nga amun fali be’n, be bo guali sɛ?

E NGBA e fa ajalɛ cɛn kwlakwla. Sran wie’m be klo ajalɛ falɛ kpa. Be kloman kɛ sran uflɛ kle be ajalɛ ng’ɔ fata kɛ be fa’n. Be liɛ nga be si i’n yɛ be yo ɔ. Wie mun kusu’n, be sro ajalɛ falɛ. Ajalɛ nga bé fá’n, be kunndɛ kɛ sran uflɛ yɛ ɔ kle be ɔ. Wie mun ekun be usa ngwlɛlɛ afɛ annzɛ be nian fluwa’m be nun. Be fa sika kpanngban be kpɛ ngwlɛlɛ’n i wun atin naan b’a fa ajalɛ ng’ɔ ti kpa’n.

² E nun sunman e si kɛ ajalɛ wie o lɛ’n, e lɛman atin e faman. Sanngɛ, wie o lɛ mɔ e kwla fa ɔ. (Gal. 6:5) Kɛ e fa kusu’n, nán be ngba yɛ be bo gua kpa ɔ.

3. ?E mɔ e ti Ɲanmiɛn i sufuɛ’n, ngue ti yɛ e kwla fa ajalɛ kpa ɔ? ?Ngue ti yɛ sa wie nun’n, ajalɛ falɛ’n yo kekle man e ɔ?

³ E mɔ e ti Zoova i sufuɛ’n, e liɛ su ti ye, afin Zoova kle e like kpanngban. I sɔ’n ti’n, e si like nga é yó naan y’a fa ajalɛ cinnjin wie mun’n. E si kɛ sɛ e fa like nga Zoova kle e’n su’n, é fá ajalɛ ng’ɔ ti kpa’n. Ɔ maan i klun jɔ́ e wun, kpɛkun e liɛ yó ye. Sanngɛ nán sa ngba su yɛ Biblu’n kle e ajalɛ trele ng’ɔ fata kɛ e fa’n niɔn. ?Sɛ i sɔ sa to e’n, ngue yɛ é yó ɔ? Maan e fa awie wualɛ’n i sunnzun ase. E si kɛ Biblu’n se kɛ nán e wua. (Efɛ. 4:28) Sanngɛ sran wie’m be waan sɛ sran kun i sa mian naan ɔ fa sran wie i like’n, annzɛ like ng’ɔ fali’n timan nanndoliɛ’n, be flɛmɛn i sɔ’n kɛ awie. ?Sɛ sa kɛ ngalɛ sa’n nun be se e kɛ mmla fi nunman lɛ m’ɔ kle like trele kun m’ɔ fata kɛ be yo’n, ngue yɛ é yó ɔ? ?Like kun o lɛ m’ɔ kwla uka e ɔ?

NÁN E KPLI E FA AJALƐ

4. ?Kɛ e se kɛ é wá fá ajalɛ cinnjin kpa’n, wie liɛ’n, afɔtuɛ benin yɛ be man e ɔ?

⁴ Kɛ e se e niaan Klistfuɛ wie kɛ é wá fá ajalɛ cinnjin kpa kun’n, wie liɛ’n, ɔ se e kɛ e bu akunndan kpa. Sɛ ɔ se sɔ’n, w’a diman e tɛ. Afin i sɔ yɛ Biblu’n se kɛ e yo ɔ. Ɔ se kɛ: “Sran kusu b’ɔ kpli yo like’n, awe’n yɛ ɔ nin i bé yía nun-ɔn.” (Nya. 21:5) Nanwlɛ, ɔ ti kpa kɛ e bu akunndan kpa naan e wun sa’n i ngbɛsungbɛsu’n kwlaa naan y’a fa ajalɛ. Sanngɛ nɛ́n i sɔ ngunmin yɛ ɔ fata kɛ e yo naan y’a fa ajalɛ kpa ɔ.​—1 Piɛ. 4:7.

5. ?Ngue ti yɛ akunndan nga e bu’n, i bo guaman kpa cɛn ngba ɔ?

⁵ Sa tɛ’n nun yɛ be wuli e kwlakwla ɔ. I ti’n e yo sa tɛ, yɛ e tɔ tukpaciɛ. Kpɛkun, nán cɛn ngba yɛ akunndan nga e bu’n i bo gua kpa ɔ. (Jue. 51:7; Rɔm. 3:23) Asa ekun’n, Satan “sacili” e nun wie’m be akunndan’n. Ɔ maan laa’n, e siman Zoova ɔ nin i mmla mun. (2 Kor. 4:4; Tit 3:3) Sa nɲɔn ngalɛ’n ti’n, kannzɛ bɔbɔ e buli sa kun i ngbɛsungbɛsu kwlaa i akunndan’n, e kwla fa ajalɛ tɛ.​—Nya. 14:12.

6. ?Ngue yɛ ɔ kwla uka e naan y’a suan ngwlɛlɛ ɔ?

⁶ Zoova liɛ’n, fɔ kaan sa nunmɛn i nun. Ɔ yo like kwlaa ngwlɛlɛ su. (Mml. 32:4) Asa ekun’n, like ng’ɔ fata kɛ e ɲɛn i naan y’a buman akunndan kɛ laa’n sa naan y’a suan ngwlɛlɛ’n, ɔ fa mannin e. (An kanngan 2 Timote 1:7 nun.) E mɔ e ti Klistfuɛ’n, e kunndɛ kɛ é bú akunndan naan é fá ajalɛ ng’ɔ ti kpa’n. Kɛ ɔ ko yo naan w’a yo ye’n, ɔ fataman kɛ e kpli e fa ajalɛ. Sanngɛ maan e bu akunndan nga Zoova bu’n wie, yɛ e nian i ninnge yolɛ wafa’n su.

7, 8. Kannzɛ e ɲin blo’n, e kwla fa ajalɛ kpa. An fa sa kun yiyi nun.

⁷ Maan e fa sunnzun ase kun e kle kɛ kannzɛ e ɲin blo’n e kwla fa ajalɛ kpa’n. Sran wie’m be nin be yi’m be kɔ nvle uflɛ nun sika kunndɛlɛ. Sɛ be o lɔ naan be wu ba’n, be fa ba’n ko man be osufuɛ mun kɛ ɔ ko yo naan b’a ɲan be ti b’a di be junman’n ti.a I sɔ yɛ be wlawlali bla kun nin i wun mɔ be wuli ba yasua kun’n, kɛ be yo ɔ. Kɛ ɔ́ yó sɔ’n nn bla’n w’a bo Biblu’n nun like suanlɛ’n bo yɛ ɔ kɔ i ɲrun kpa. Be janvuɛ nin be osufuɛ’m be wlawlali be kɛ be fa ba’n ko man yasua’n i si nin i nin be klɔ lɔ. Kɛ mɔ bla’n suan Ɲanmiɛn ndɛ’n ti’n, ɔ wunnin i wlɛ kɛ siɛ nin niɛn mun yɛ ɔ fata kɛ be ta be mma mun ɔn. (Jue. 127:3; Efɛ. 6:4) ?Siɛn’n, ngue yɛ ɔ́ yó ɔ? ?Ɔ́ fá ndɛ nga be kan kleli i’n mɔ sran’m be kwlakwla be bu i kɛ ɔ ti kpa’n su? ?Annzɛ ɔ́ fá like ng’ɔ suɛnnin i Biblu’n nun’n su? Ɔ si kɛ sɛ ɔ yo sɔ’n, i sifuɛ’m bé yó i finfin. Asa ekun’n, i sa wá mían sika wun. ?Sɛ ɔ ti wɔ’n, ajalɛ benin yɛ á fá ɔ?

⁸ Bla’n i ɲin bloli kpa. Sanngɛ, ɔ srɛli Zoova kɛ ɔ kle i ajalɛ ng’ɔ fata kɛ ɔ fa’n. Asa ekun’n, ɔ kan kleli sran ng’ɔ kle i Biblu’n nun like’n, ɔ nin Zoova i sufuɛ wie mun ekun. Kɛ ɔ yoli sɔ’n, ɔ wunnin sa sɔ’n i su akunndan nga Zoova bu’n i wlɛ kpa. Ɔ wunnin i wlɛ kɛ sɛ ɔ ti i wa’n ko sie i klɔ lɔ’n, kɛ ba’n ɲín’n awlaboɛ kún i. Kɛ ɔ buli ndɛ nga Biblu’n kan’n i akunndan lele’n, ɔ fali ajalɛ kɛ ɔ fɛmɛn i wa’n ko siemɛn i be klɔ lɔ. Kɛ ɔ yoli sɔ’n, yasua’n wunnin kɛ be wa kan’n i ndɛ lo aniaan mun, kpɛkun be uka be be nian ba’n i lika. Asa kusu’n, ba’n i wun fɛ i feke. I kwlaa sɔ’n ti’n, yasua’n wa boli Biblu’n nun like suanlɛ bo. Siɛn’n, ɔ nin i yi’n be kɔ aɲia’m be bo.

9, 10. ?Ngue yɛ sran kun yó naan w’a kle kɛ akunndan nga Zoova bu’n i wie yɛ ɔ bu ɔ?

⁹ Yasua’n nin i yi’n be su ndɛ nga e kɛnnin i icra’n lɛ’n kle e like kun. Yɛle kɛ nán ajalɛ kwlaa nga e bɔbɔ e bu i kɛ ɔ ti kpa’n annzɛ sran’m be bu i kɛ ɔ ti kpa’n, yɛ ɔ fata kɛ e fa ɔ. Fɔ m’ɔ o e nun ti’n, e klun akunndan kwla yo kɛ mɔntri m’ɔ nanti ndɛndɛ annzɛ ɔ ka siɛn’n sa. Sɛ e fa e wla gua su’n, ɔ kwla laka e tɛ kpa. (Zer. 17:9) I sɔ’n ti’n, ɔ fata kɛ e lo e wun e man Ɲanmiɛn naan akunndan ng’ɔ bu’n i wie yɛ e bu e fa ajalɛ ɔ.​—An kanngan Ezai 55:8, 9 nun.

¹⁰ Biblu’n man e afɔtuɛ kpa kun. I waan: “Nán lafi ɔ bɔbɔ wɔ akunndan liɛ’n su. Anannganman i su yɛ lafi-ɔ. Sɛ á fín ase o á jáo o, Anannganman i dunman, yɛ bo-ɔ. Sɛ a bo i dunman’n, ɔ́ bó ɔ nyrun atin’n.” (Nya. 3:5, 6) ?Amun sieli i nzɔliɛ? I waan: “Nán lafi ɔ bɔbɔ wɔ akunndan liɛ’n su.” I sin’n, ɔ seli kɛ: “Anannganman i dunman, yɛ bo-ɔ.” ?Ngue ti ɔ? Afin Zoova yɛ ɔ yo like kwlakwla ngwlɛlɛ su ɔ. I sɔ’n ti’n, ajalɛ kwlaa nga é fá’n, maan e dun mmua nian ndɛ nga Biblu’n kan’n. I liɛ’n, akunndan nga Zoova bu’n i wie yɛ é bú ɔ. Kpɛkun é fá ajalɛ ng’ɔ ti kpa’n.

MAAN E SUAN SA NG’Ɔ TI KPA NIN TƐ’N BE NGBACIƐ’N I WLƐ WUNLƐ

11. ?Ngue yɛ ɔ fata kɛ sran kun yo naan w’a fa ajalɛ kpa ɔ?

¹¹ Akunndan annzɛ ngwlɛlɛ ajalɛ’n, i falɛ’n leman ba. Be nga b’a yo be batɛmu uflɛuflɛ annzɛ be ɲin nin a timan kpa Ɲanmiɛn i sulɛ nun’n, be yɛ ɔ ti kekle kpa man be ɔ. Sran sɔ mun’n, Biblu’n fa be sunnzun bakanngan mun. Afin bakan ng’ɔ su suan nantilɛ’n, nán cɛn kunngba yɛ ɔ ka lɛ si nanti ɔ. Ɔ tutu i ja’n kunngun kunngun lele kpɛkun w’a si nanti. I kunngba yɛle be nga be ɲin nin a timan kpa Ɲanmiɛn i sulɛ nun’n. Ɔ fata kɛ be suan ajalɛ kpa’n i falɛ. Maan e wla kpɛn ndɛ nga Pɔlu kannin’n su. Ɔ seli kɛ be nga b’a yo sran’n, yɛle be nga ‘be kunndɛ sa ng’ɔ ti kpa’n nin tɛ’n be ngbaciɛ lele be si i kpa’n.’ Sran ng’ɔ kunndɛ kɛ ɔ́ yó i sɔfuɛ’n, ɔ fata kɛ ɔ miɛn i ɲin titi. I sɔ yɛ ɔ fata kɛ be nga be ɲin nin a timan kpa Ɲanmiɛn i sulɛ nun’n, be yo ɔ.​—An kanngan Ebre Mun 5:13, 14 nun.

12. An fa sa kun kle wafa nga be suan ajalɛ kpa’n i falɛ’n.

¹² Cɛn kwlaa e fa ajalɛ, i dan o, i kaan o. Sran wie’m be suannin wafa nga klɔ sran fa ajalɛ’n i su like. Be waan ajalɛ nga sran kun fɛ i sa’n, nɛ́n i ngba yɛ ɔ dun mmua bu i akunndan lele naan w’a fa ɔ. Afin ninnge ng’ɔ fa be su ajalɛ’n, ɔ yo be titi. I wie yɛle tralɛ mɔ e wla’n. Sran wie’m be bumɛn i kɛ i sɔ’n ti ajalɛ cinnjin kun. Sanngɛ e mɔ e ti Zoova i sufuɛ’n, e bu i ajalɛ cinnjin kpa. (2 Kor. 6:3, 4) ?Kɛ e kɔ tralɛ tolɛ’n, beninfuɛ’n yɛ e to ɔ? ?Ajulisufuɛ’m be tralɛ yɛ e to annzɛ tralɛ ng’ɔ kle kɛ e faman e wun kleman m’ɔ i gua w’a cɛnman’n yɛ e to ɔ? Sɛ like kaan sɔ’n nun e fa ajalɛ kpa’n, i sɔ’n klé kɛ y’a si sa kpa nin tɛ’n be ngbaciɛ. Ɔ maan cɛn nga e fite i dan su’n, é kwlá fá ajalɛ ng’ɔ ti kpa’n.​—Lik 16:10; 1 Kor. 10:31.

LIKE NG’Ɔ TI KPA MƆ E FUA KƐ É YO’N MAAN E JRAN SU KPA

13. ?Sɛ e fua kɛ é yó like kun’n, ngue yɛ ɔ fata kɛ e yo naan w’a yo ye ɔ?

¹³ E kwlakwla e fua kɛ é yó like ng’ɔ ti kpa’n. Sanngɛ wie liɛ’n, i yolɛ’n ti kekle. I wie yɛle siklɛti nɔnfuɛ’m be liɛ’n. Wie’m be fua kɛ bé yáci i nɔnlɛ, sanngɛ be kwlá yaciman. ?Ngue ti ɔ? Afin be jranman be fualɛ’n su kpa. I lɛ’n kle kɛ like nga sran kun fua kɛ ɔ́ yó’n, ɔ fata kɛ ɔ jran su kpa. ?Ɔ́ yó sɛ naan i sɔ’n w’a yo ye? Saan ɔ́ fá wlá Zoova sa nun kɛ ɔ ukɛ i.​—An kanngan Filipfuɛ Mun 2:13 nun.

14. ?Ɔ yo sɛ yɛ Pɔlu kwla ɲannin wunmiɛn yoli like ng’ɔ fuali kɛ ɔ́ yó’n niɔn?

¹⁴ Pɔlu wunnin i wlɛ wie kɛ like nga sran kun fua kɛ ɔ́ yó’n, ɔ ju wie’n, i yolɛ’n ti kekle. Cɛn kun ɔ seli kɛ: “Sa kpa yolɛ’n wo min anwlɛn’n nun, sanngɛ n kwlɛ-mɛn i yo. [...] Nyanmiɛn mmla’n i sufalɛ’n yo n fɛ min anwlɛn’n nun, sanngɛ n wun kɛ sa uflɛ o lɛ. Min nzuɛn b’ɔ maan n yo sa tɛ’n, ɔ nin akunndan nga b’ɔ maan n klo kɛ ń yó sa kpa’n, be ti kɛ sran nnyɔn bɔ be si akplowa sa, lele n fa tɛfuɛ’n su, ɔ maan n kaci sa tɛ yofuɛ mlɔnmlɔn.” ?Kɛ m’ɔ ti sɔ’n niɔn, Pɔlu i liɛ w’a wie mlɔnmlɔn? Cɛcɛ, afin ɔ seli kɛ: “Nyanmiɛn kwla o! Afin i yɛ maan e Min Jésus-Krist deli ye-ɔ.” (Rɔm. 7:18, 22-25) Ɔ seli ekun kɛ: “Nyanmiɛn b’ɔ kwla like kwlaa yo’n yɛ ɔ yo sa-a.”​—2 Kor. 4:7.

15. ?Ngue ti yɛ ɔ fata kɛ like kpa nga e sunnzun kɛ é yó’n, e jran su kpa ɔ?

¹⁵ Sɛ e waan Ɲanmiɛn klun jɔ e wun’n, ɔ fata kɛ like kpa nga e sunnzun kɛ é yó’n, e jran su kpa e yo. I sɔ yɛ Eli seli Baal sɔfuɛ nin Izraɛlifuɛ nga be kacili be sin sili Zoova’n, kɛ be yo ɔ. Ɔ seli be Karmɛli oka’n su lɔ kɛ: “?Naan kɛ amún fá atin nnyɔn su tititi sa? Sɛ Anannganman yɛ ɔ ti Nyanmiɛn’n, amun su i e! Sɛ kusu Baal yɛ ɔ ti Nyanmiɛn’n, amun su i e!” (1 Fam. 18:21) Izraɛlifuɛ’m be si ajalɛ ng’ɔ fata kɛ be fa’n. Sanngɛ be o lɛ bé “fá atin nnyɔn su.” Zozie w’a yoman sɔ wie. Ka naan Izraɛlifuɛ’m b’a ju Eli blɛ su’n, ɔ seli kɛ: “Sɛ kusu i sɔ’n jɔ-man amun klun’n, ndɛkɛn amun kle like nga amun klo kɛ amún sú i’n [...]! Sanngɛ n liɛ’n, e nin min osufuɛ mun, é sú Anannganman.” (Zoz. 24:15) ?Kɛ Zozie yoli sɔ’n, i bo guali sɛ? I bo guali kpa, afin i bɔbɔ nin be nga be fali atin ng’ɔ fali’n wie’n, be trannin mɛn nga Zoova waan ɔ́ fá mán Izraɛlifuɛ mun’n, i nun wie. Mɛn sɔ’n, ɔ ti “mɛn fɛfɛ” kpa.​—Zoz. 5:6.

SƐ E FA NGWLƐLƐ AJALƐ’N ƝANMIƐN YRÁ E SU

16, 17. ?Kɛ e yo like ng’ɔ ti Zoova klun su’n, i bo gua sɛ? An fa sa kun yiyi nun.

¹⁶ Aniaan kun mɔ be yoli i batɛmu uflɛuflɛ’n, ɔ le bla nin ba kanngan nsan. Junman ng’ɔ di’n, be tuɛmɛn i kalɛ dan. Sanngɛ w’a tuman junman’n nun. Afin Fue nin Mɔnnɛn cɛn’n, ɔ ɲɛn i ti naan ɔ nin i yi nin i mma’m b’a bo jasin fɛ’n naan b’a wɔ aɲia’m be bo. Cɛn kun’n, i wiengu junman difuɛ kun seli i kɛ be tu be junman’n nun be ko di junman lika uflɛ. Afin lɔ liɛ’n, bé nían be lika kpa. E niaan bian’n buli ndɛ’n i sin kpa yɛ ɔ fa wlali Zoova sa nun. Ɔ wunnin i wlɛ kɛ sɛ ɔ kplin junman uflɛ’n su’n, ɔ su ɲɛnmɛn i ti naan ɔ nin i yi nin i mma’m b’a su Ɲanmiɛn likawlɛ kɛ laa’n sa. ?Sɛ ɔ ti wɔ’n, ngue yɛ á yó ɔ?

¹⁷ Aniaan bian’n w’a kplinman junman uflɛ’n su. Afin junman sɔ’n ti’n, i bɔbɔ nin i awlobo’n be nin Zoova be afiɛn kwla saci. Ajalɛ ng’ɔ fali’n, w’a yomɛn i nzisɔ. Afin ɔ buli i kɛ sɛ ɔ nin i awlobo’n be nin Zoova be afiɛn mantan’n, ɔ ti kpa tra sika kpanngban ɲanlɛ’n. Cɛn kun m’ɔ nin i yi be o lɛ’n, be wa bla ng’ɔ le afuɛ blu’n seli be kɛ ɔ klo be naan ɔ klo Zoova nin i niaan Klistfuɛ mun kpa wie. I sɔ mɔ be tili’n, ɔ yoli be fɛ dan. Bakan’n seli be ekun kɛ ɔ kunndɛ kɛ ɔ́ fɛ́ i wun mán Zoova naan be yo i batɛmu. Nanwlɛ, kɛ siɛ’n dun mmua fɛli i wun mannin Zoova kɛ ɔ sie i’n, i su yɛ ba’n niannin ɔn.

18. ?Ngue ti yɛ ɔ fata kɛ cɛn kwlakwla e fa ngwlɛlɛ ajalɛ ɔ?

¹⁸ Laa’n, Moizi fali Izraɛlifuɛ mun sinnin aawlɛ flɛnnɛn nun. Andɛ kusu’n, Zezi Klist fa e sin Satan i mɛn tɛ’n nga nun i afuɛ kpanngban yɛ. Laa’n, Zozie fali Izraɛlifuɛ mun wluli mɛn nga Zoova waan ɔ́ fá mán be’n nun. Andɛ kusu’n, ɔ kaan sa’n, Zezi wá núnnún mɛn tɛ nga kpɛkun ɔ́ fá e wlú mɛn ng’ɔ ti sran kpa’m be liɛ’n i nun. (2 Piɛ. 3:13) I sɔ’n ti’n, maan e kaci e akunndan’n naan e kaci mlɔnmlɔn. Kpɛkun maan e wun Ɲanmiɛn i klun sa nga i waan e yo’n i wlɛ, naan e yo sa ng’ɔ ti kpa’n. (Rɔm. 12:2; 2 Kor. 13:5) Maan cɛn kwlakwla e fa ngwlɛlɛ ajalɛ naan e yo sran kpa. I liɛ’n, Zoova yrá e su tititi.​—An kanngan Ebre Mun 10:38, 39 nun.

[Ja ngua lɛ ndɛ’n]

[Foto, bue 22]

[Foto, bue 24]

Sɛ cɛn kwlakwla e fa ajalɛ kpa ninnge nga e yo’n be nun’n, i sɔ’n klé kɛ y’a si sa kpa nin tɛ’n be ngbaciɛ. (An nian ndɛ kpɔlɛ 11 nun.)

[Foto, bue 26]

Maan e fa ngwlɛlɛ ajalɛ naan e nin e niaan Klistfuɛ mun e di aklunjuɛ. (An nian ndɛ kpɔlɛ 18 nun.)