3. ?Ngue yɛ Zoova kunndɛ kɛ i janvuɛ’m be yo-ɔ?

Zoova klo sran kwlakwla. Sanngɛ “ɔ tra sran ng’ɔ nanti ndɛnman su’n i janvuɛ.” (Ɲanndra Mun 3:32) Zoova kunndɛ kɛ i janvuɛ’m be yo like ng’ɔ bu i like kpa’n naan be kpalo like ng’ɔ bu i like tɛ’n. Sran wie’m be waan be su kwlá nantiman Zoova i mmla’m be kwlaa be su. Sanngɛ Zoova i like yolɛ yoman ya. Be kwlaa nga be klo i sakpa’n mɔ be mian be ɲin naan i klun jɔ be wun’n, ɔ sɔ be nun klanman.—Jue Mun 147:11; Sa Nga Be Yoli’n 10:34, 35.

Sran kwlaa kunndɛ kɛ ɔ́ trá sran ng’ɔ ti nanwlɛfuɛ’n i janvuɛ. Zoova kunndɛ kɛ i janvuɛ’m be yo nanwlɛfuɛ wie. Sanngɛ kɛ mɔ sran’m be dan lika be diman nanwlɛ’n ti’n, i sɔ yolɛ’n timan pɔpɔ. ?Sɛ sa kwlaa nun e yo nanwlɛfuɛ’n, i su ye benin yɛ é ɲɛ́n i-ɔ?

1. ?Ngue ti yɛ ɔ ti cinnjin kɛ e yo nanwlɛfuɛ-ɔ?

Kɛ e ti nanwlɛfuɛ’n e kle Zoova kɛ e klo i naan e ɲin yi i. Zoova si akunndan kwlaa nga e bu’n, ɔ nin like kwlaa nga e yo’n. (Ebre Mun 4:13) Kɛ ɔ wun kɛ e di nanwlɛ’n i sɔ’n yo i fɛ. Biblu mɔ ti i nuan ndɛ’n se kɛ: “Zoova i ɲin ci sran ng’ɔ fa gblɛ nanti’n, sanngɛ ɔ tra sran ng’ɔ nanti ndɛnman su’n i janvuɛ.”—Ɲanndra Mun 3:32.

2. ?Wafa sɛ yɛ e kwla kle kɛ e ti nanwlɛfuɛ-ɔ?

Zoova kunndɛ kɛ ‘e kan ndɛ nanwlɛ e kle e wiengu.’ (Zakari 8:16, 17) ?Wafa sɛ yɛ e nanti ndɛ sɔ’n su-ɔ? Sɛ ɔ wie e awlo lɔ-o, annzɛ e junman su lɔ-o, annzɛ e nin e niaan Klisifuɛ mun e afiɛn-o, annzɛ awa i janunfuɛ’m be ɲrun-o, e su buaman ato. Sran ng’ɔ ti nanwlɛfuɛ’n ɔ wuɛmɛn i wiengu mun, annzɛ ɔ buman be lufle. (Kanngan Ɲanndra Mun 24:28 nin Efɛzifuɛ Mun 4:28 nun.) Asa’n, ɔ tua lapo kwlaa ng’ɔ fata kɛ ɔ tua’n. (Rɔmunfuɛ Mun 13:5-7) Nanwlɛ “e klo kɛ é yó nanwlɛfuɛ sa kwlaa nun.”—Ebre Mun 13:18.

3. ?Kɛ e ti nanwlɛfuɛ’n i su ye benin yɛ e ɲɛn i-ɔ?

Sɛ e wiengu’m be sie i nzɔliɛ kɛ e ti nanwlɛfuɛ’n bé láfi e su. Asa’n, kɛ e yo sɔ’n asɔnun nunfuɛ’m be lafi be wiengu su, yɛ be yo kɛ awlobo kun nunfuɛ mun sa. Yɛ e akunndan’n buman e fɔ. Asa’n, kɛ e ti nanwlɛfuɛ’n, sran’m be wun kɛ “e Defuɛ Ɲanmiɛn i ndɛ ng’ɔ kle’n, ɔ yo ɲɛnmɛn.”—Titi 2:10.

SI NDƐ’N NUN KPA EKUN

4. Zoova klo be nga be ti nanwlɛfuɛ’n

An kanngan Jue Mun 44:21 nin Malasi 3:16 nun. I sin’n, an koko kosan yɛ’m be su yalɛ:

• ?Ngue ti yɛ a bu i kɛ sɛ e bua ato’n i sɔ’n timan ngwlɛlɛ ayeliɛ-ɔ?

• ?Kannzɛ bɔbɔ nanwlɛ dilɛ’n timan pɔpɔ blɛ wie nun’n, kɛ e mian e ɲin e di nanwlɛ’n, wafa sɛ yɛ i sɔ’n yo Zoova-ɔ?

5. Maan e di nanwlɛ blɛ kwlaa nun

VIDEO: Ninnge nga be yo maan e di aklunjɔɛ’n: Maan e akunndan’n yo sanwun (2:32)

An kanngan Ebre Mun 13:18 nun. I sin’n, an koko kosan yɛ’n i su yalɛ. ?Wafa sɛ yɛ e kwla kle kɛ e ti nanwlɛfuɛ-ɔ?

• Awlo lɔ.

• Junman su lɔ annzɛ suklu lɔ.

• Sa uflɛ wie’m be nun.

6. Kɛ e ti nanwlɛfuɛ’n e ɲan su ye

Wie liɛ’n, kɛ e di nanwlɛ’n i sɔ’n kpɛ ndɛ man e. Sanngɛ kɛ ɔ́ kɔ́ i ɲrun’n e wun kɛ i sɔ yolɛ’n yɛ ɔ ti kpa-ɔ. An kanngan Jue Mun 34:12-16 nun. I sin’n, an koko kosan yɛ’n i su yalɛ:

• ?Sɛ a ti nanwlɛfuɛ’n i su ye benin yɛ á ɲɛ́n i-ɔ?

1. Yasua nin bla nga be ti nanwlɛfuɛ’n be aja’n taka kpa.

2. Junman difuɛ nga be ti nanwlɛfuɛ’n be junman su kpɛn’m be lafi be su.

3. Sran ng’ɔ ti nanwlɛfuɛ’n ɔ nin awa i janunfuɛ’m be kanman ndɛnngan.

NDƐ’N I KPƆLƐ BOLƐ

Zoova kunndɛ kɛ i janvuɛ’m be yo nanwlɛfuɛ ndɛ kwlaa nga be kan’n nun, ɔ nin like kwlaa nga be yo’n nun.

Ndɛ’n i nun flanlɛ

• ?Ninnge benin wie’m be nun yɛ a kwla kle kɛ a ti nanwlɛfuɛ-ɔ?

• ?Ngue ti yɛ sɛ e bua ato’n i sɔ’n timan ngwlɛlɛ ayeliɛ-ɔ?

• ?Ngue ti yɛ a kunndɛ kɛ á yó nanwlɛfuɛ blɛ kwlaa nun-ɔn?

NDƐ WIE MUN EKUN

?Wafa sɛ yɛ siɛ nin niɛn’m be kwla uka be mma mun naan b’a yo nanwlɛfuɛ-ɔ?

Nán bua ato (1:44)

?Kɛ e di ndɛ nga e kan’n su’n, i su ye benin yɛ e ɲɛn i-ɔ?

Sɛ e di ndɛ nga e kan’n su’n Zoova yrá e su (9:09)

?Kannzɛ bɔbɔ kɛ e tua lapo’n be fa yoman like kpa’n, sanngɛ ngue ti yɛ ɔ ti cinnjin kɛ e tua-ɔ?

“?Ɔ fata kɛ e tua lapo?” (Sasafuɛ Tranwlɛ’n nun ndɛ)

Like ng’ɔ ukali bian kun naan w’a yo nanwlɛfuɛ’n.

“N wunnin i wlɛ kɛ Zoova si aunnvɔɛ yɛ ɔ yaci sa cɛ” (Sasafuɛ Tranwlɛ’n nun ndɛ)

2. ?Janvuɛ nga e tra be’n ɔ ti Zoova i cinnjin?

Zoova nian nun kpa naan w’a tra sran kun i janvuɛ. Biblu’n se kɛ ‘sran ng’ɔ nanti ndɛnman su’n yɛ ɔ trɛ i janvuɛ-ɔ.’ (Ɲanndra Mun 3:32) ?Sɛ e tra be nga be kloman Zoova’n be janvuɛ’n, wafa sɛ yɛ i sɔ’n yó i-ɔ? I sɔ’n su yomɛn i fɛ kaan sa! (Kanngan Zaki 4:4 nun.) Sanngɛ sɛ e nin sran tɛ mun e sanman nun, naan e fa e wun e mantan Zoova ɔ nin be nga be klo i’n, i sɔ’n yó i fɛ kpa.—Jue Mun 15:1-4.