?Amun si sɔ laa?
?Ngue ti yɛ parfɛn mɔ Mali fa guali Zezi wun’n, i gua’n ti kekle sɔ ɔ?
Cɛn kun’n, Lazar i niaan bla Mali bali Zezi wun lɛ. Kɛ ɔ́ bá’n, ‘parfɛn mɔ i gua ti kekle kpa’n i alabatri sɛ kun wo i sa nun. Be fa nar ngo muɛn yɛ be yoli ɔ.’ Naan Mali w’a fa guɛ i Zezi wun. Kɛ ɔ́ yó sɔ nn Zezi i wie cɛn’n w’a mantan koko. (Mark 14:3-5; Matie 26:6, 7; Zan 12:3-5) Marki nin Zan be fluwa nga be klɛli nun’n, be waan parfɛn sɔ’n i gua’n ju denie ya nsan. Afuɛ nuan kun sika nga junman difuɛ kun ko ɲɛn i’n yɛ ɔ o lɛ ɔ.
?Nin yɛ be yili parfɛn sɔ’n niɔn? Nar mɔ i ngo yɛ be fa yoli parfɛn sɔ’n mɔ Biblu kɛn i ndɛ lɛ’n, ɔ ti waka. Azi mɛn nun lɔ’n, lika ng’ɔ ti okaoka mɔ be flɛ i Imalaya’n, lɔ yɛ be ɲan waka sɔ’n niɔn. Marki nin Zan be fluwa’n nun’n be waan ‘nar ngo muɛn yɛ be fa yoli’ parfɛn’n niɔn. Kɛ ɔ yo naan sran’m be yo i kpakpa’n i atɛ’n, be fa like uflɛ sanngan nun. Ɔ maan, atrɛkpa Indi nvle m’ɔ o mmuammua kpa’n, lɔ yɛ Mali i parfɛn liɛ’n fin ɔn.
Marki seli kɛ Mali ‘buli sɛ’n i ti.’ ?Ngue ti ɔ? Afin kɛ be yi alabatri sɛ’n, be yo i ti nun lɔ’n kaan naan ngo’n w’a guaman. Bian kun suan Alan Millard. I fluwa kun m’ɔ yili nun’n, ɔ kan Zezi blɛ su ninnge’m be ndɛ. I waan: “Atrɛkpa Mali i wun blibli i ti maan ɔ buli sɛ sɔ’n i ti. Naan parfɛn kwlaa ng’ɔ o nun’n w’a gua kpɛ kunngba.” Ɔ maan, “parfɛn sɔ’n i fannin’n deli sua’n.” (Zan 12:3) ?Sanngɛ ngue ti yɛ bla’n fali parfɛn gua kekle sɔ’n guali Zezi wun ɔn? Yɛle kɛ cɛnlɛ mɔ Zezi cɛnnin i niaan bian Lazar m’ɔ klo i kpa’n, Mali i wla w’a fiman su. Ye m’ɔ sili Zezi’n ti yɛ ɔ yoli sɔ ɔ.—Zan 11:32-45.
?Klɔ kunngba yɛ ɔ suan Zeriko annzɛ klɔ nɲɔn yɛ be flɛ be sɔ ɔ?
Matie nin Marki ɔ nin Liki be fluwa nun’n, be kannin abonuan sa kun mɔ Zezi yoli i lika wie m’ɔ mantan Zeriko klɔ’n i nun. (Matie 20:29-34; Mark 10:46-52; Lik 18:35-43) Matie nin Marki be waan kɛ Zezi juli Zeriko ‘m’ɔ fin lɛ kɔ́’n’ yɛ ɔ yoli abonuan sa sɔ’n niɔn. Sanngɛ Liki waan kɛ Zezi juli Zeriko “tiwa lɛ’n” yɛ sa sɔ’n yoli ɔ.
?Ɔ maan, blɛ sɔ nun’n, klɔ kunngba yɛ ɔ suan Zeriko annzɛ klɔ nɲɔn ɔn? Fluwa kun waan: “Zezi blɛ su’n, be kplannin Zeriko klɔ kun ekun. Klɔ sɔ’n o kunfuɛ’n i ngua lɛ. Be afiɛn’n ti nun kilo 1 nin sin. Lɔ yɛ famiɛn Erɔdu m’ɔ ti sran dan’n, ɔ kplɛnnin i sua naan kɛ ayrɛ fɔɔ o nun’n w’a tran ɔn.” Fluwa kun ekun waan: “Zezi blɛ su’n, klɔ nɲɔn yɛ be flɛ be Zeriko ɔ. Klikli’n ti Zuifu’m be liɛ yɛ kasiɛn’n ti Rɔmufuɛ’m be liɛ. Be afiɛn’n ti nun kilo 1 nin sin.”
Ɔ maan, atrɛkpa kɛ Zezi fín Zeriko klɔ m’ɔ ti Zuifu’m be liɛ’n m’ɔ́ jú Rɔmufuɛ’m be klɔ Zeriko i tiwa lɛ’n yɛ ɔ yoli abonuan sa sɔ’n niɔn. Annzɛ kusu ɔ dun mmua ɔli Rɔmufuɛ be klɔ liɛ’n su naan w’a ɔ Zuifu’m be klɔ liɛ’n su. Ɔ maan, kɛ nga y’a yiyi ndɛ’n nun lɛ’n, akplowa nunman lɛ kun.
[Foto, bue 10]
Parfɛn i alabatri sɛ kun yɛ ɔ o yɛ
[Foto cifuɛ mun, bue 10]
© Réunion des Musées Nationaux/Art Resource, NY