Like ng’ɔ fata kɛ sran ng’ɔ ti Zezi i sɔnnzɔnfuɛ’n yo’n

Kɛ Zezi wieli like kle Farizifuɛ’m be su kpɛn ng’ɔ yiɛli i’n i awlo lɔ’n, ɔ fali Zerizalɛmun atin’n ekun. Sran kpanngban kpa be suli i su. ?Ngue ti-ɔ? ?Be kunndɛ kɛ kannzɛ ɔ yo sɛ ɔ yo sɛ’n, bé káci i sɔnnzɔnfuɛ wie ti-ɔ?

Atin’n su’n, Zezi kannin ndɛ kun. Atrɛkpa’n, ndɛ sɔ’n sanngannin be nun wie’m be akunndan. Ɔ seli kɛ: “Sɛ sran kun ba min sin naan ɔ kpɔmɛn i si nin i nin, nin i yi, nin i mma mun, nin i niaan mun’n, nanwlɛ, sɛ ɔ kpɔmɛn i bɔbɔ wun’n, ɔ kwlá yoman min sɔnnzɔnfuɛ.” (Liki 14:26) ?Ndɛ nga Zezi kannin’n i bo’n yɛle benin?

Zezi i ndɛ’n kleman kɛ be nga be kaci i sɔnnzɔnfuɛ’n, ɔ fata kɛ be kpɔ be osufuɛ mun sakpasakpa. Sanngɛ i bo’n yɛle kɛ ɔ fataman kɛ be klo be osufuɛ mun trɛ i bɔbɔ Zezi. Bian nga Zezi kɛnnin i ndɛ ɲanndra kun nun’n i liɛ’n, kɛ famiɛn kun yiɛli’n, w’a ɔman. Afin i waan ɔ jali bla ɔ nin-a cɛman. Ɔ fataman kɛ sran nga i waan ɔ́ káci Zezi i sɔnnzɔnfuɛ’n yo kɛ bian sɔ’n sa. (Liki 14:20) Ɲanmiɛn Ndɛ’n se kɛ Zakɔbu m’ɔ ti Zuifu’m be nannan’n, ɔ kloli Rasɛli, sanngɛ w’a “klo-man” Lea. Ndɛ sɔ’n kleman kɛ ɔ kpɔli Lea. Sanngɛ ɔ kloli Rasɛli i kpa trɛli i.​—Bo Bolɛ 29:31.

Zezi seli ekun kɛ ɔ fata kɛ sran nga i waan ɔ́ káci i sɔnnzɔnfuɛ’n, ɔ ‘kpɔ i bɔbɔ wun.’ Ndɛ sɔ’n i bo’n yɛle kɛ ɔ fata kɛ ɔ klo Zezi trɛ i bɔbɔ. Ɔ maan sɛ Zezi i klolɛ’n ti’n, ɔ fata kɛ ɔ fɛ i nguan’n sie i wie nuan bɔbɔ’n, maan ɔ yo sɔ. I sɔ’n kle weiin kɛ sɛ sran kun waan ɔ́ káci Zezi i sɔnnzɔnfuɛ’n, ɔ fata kɛ ɔ bu i sin kpa. Nán maan ɔ tɔ su yo.

Zezi kleli ekun kɛ sɛ sran kun kaci i sɔnnzɔnfuɛ’n, ɲrɛnnɛn kwla tɔ i su. I waan: “Sran nga w’a suɛmɛn i ɲrɛnnɛn waka’n naan w’a suman min su’n, ɔ kwlá yoman min sɔnnzɔnfuɛ.” (Liki 14:27) I sɔ’n kle kɛ ɔ fata kɛ sran ng’ɔ kaci Zezi i sɔnnzɔnfuɛ’n, ɔ wun i wlɛ kɛ ɔ́ wá fɛ́ kɛ Zezi bɔbɔ fɛli’n sa. I kpa bɔbɔ’n, Zezi waan i kpɔfuɛ’m bé kún i bɔbɔ Zezi.

Ɔ maan sɛ be nga be su su Zezi su be kɔ Zerizalɛmun’n, be waan bé káci i sɔnnzɔnfuɛ’n, ɔ fata kɛ be bu i sin kpa. Zezi fali sunnzun ase kun kɛnnin i sɔ liɛ’n i ndɛ. I waan: “?Amun nun onin yɛ sɛ i waan ɔ́ kplán sua fleiin kun’n, ɔ tranman ase bumɛn i sika’n i akunndan ka-ɔ? ?Sɛ i sika’n ju sua’n i kplanlɛ naan ɔ kwla wie i kplan’n, ɔ su wunmɛn i wlɛ? Sɛ w’a yoman sɔ’n, ɔ́ wlá sua’n i bo ase, sanngɛ ɔ su wiemɛn i kplan.” (Liki 14:28, 29) Ndɛ sɔ’n i bo’n yɛle kɛ sɛ sran kun kaci Zezi i sɔnnzɔnfuɛ’n, ɔ fata kɛ ɔ su i su guɛ i ti nin i bo. Zezi fali sunnzun ase kun ekun yiyili ndɛ sɔ’n nun kpa.

Ɔ seli kɛ: “Sɛ famiɛn kun le sonja akpiakpi blu (10.000) naan ɔ nin famiɛn uflɛ m’ɔ le sonja akpiakpi ablaɔn (20.000) be su ko kun’n, ɔ dun mmua tran ase usa ngwlɛlɛ afɛ, sɛ ɔ kwla jran famiɛn ng’ɔ nin i su wa kun’n, i ɲrun-o. Nanwlɛ, sɛ ɔ wun kɛ ɔ su kwlá jrɛnmɛn i ɲrun’n, kɛ i wiengu famiɛn sɔ’n te o mmua lɔ’n, ɔ́ súnmɛn i janunfuɛ mun naan be ko siesie be afiɛn.” Kɛ ɔ ko yo naan sran’m b’a wun ndɛ nga Zezi su kan’n i wlɛ’n, ɔ guɛli i bo kɛ: “I kunngba’n, amun nun sran nga w’a kpɔciman ninnge kwlaa ng’ɔ le be’n, ɔ kwlá kaciman min sɔnnzɔnfuɛ.”​—Liki 14:31-33.

Sanngɛ Zezi i ndɛ sɔ’n timan be nga be su su i su be kɔ Zerizalɛmun’n be ngunmin be liɛ. Ɔ ti be kwlaa nga be kunndɛ kɛ bé káci Zezi i sɔnnzɔnfuɛ’n be liɛ wie. Ɔ fata kɛ be tu be klun be fa ndɛ ng’ɔ kɛnnin i icra lɛ’n su. Ɔ maan ɔ fataman kɛ be sisi be bo naan b’a kpɔci ninnge wie mun. Ɔ kwla yo be bo ninnge mun annzɛ be nguan’n bɔbɔ. Sran nga i waan ɔ́ káci Zezi i sɔnnzɔnfuɛ’n, maan ɔ bu i sin kpa, kpɛkun ɔ srɛ Ɲanmiɛn naan ɔ ukɛ i.

I sin’n, Zezi flannin ndɛ kun m’ɔ kɛnnin i oka’n su lɔ’n nun. Ɔ seli kɛ i sɔnnzɔnfuɛ’m be ti kɛ ‘njin sa asiɛ’n su.’ (Matie 5:13) Kɛ be fa njin be guɛ i like kun su’n, like sɔ’n cɛ, ɔ saciman. Ɔ maan kɛ Zezi seli kɛ i sɔnnzɔnfuɛ’m be ti kɛ njin sa’n, i bo’n yɛle kɛ ukalɛ mɔ bé úka sran mun ti’n, sran’m be nzuɛn’n kpa’n su saciman, yɛ be nin Zoova be afiɛn su saciman wie. Ɔ ka kaan Zezi wá gúa junman ng’ɔ fata kɛ ɔ di i asiɛ’n su wa’n, i bo. I sɔ’n ti’n, ɔ seli kɛ: “Nanwlɛ, njin ti like kpa. ?Sanngɛ sɛ i ta’n kpɔ’n, ngue yɛ bé yó naan w’a yo klakla ekun-ɔn?” (Liki 14:34) Be nga be o lɛ’n be si njin’n. Be si kɛ njin wie o lɛ’n, fa o nun. Ɔ maan be kwlá fa yoman like fi.

Ndɛ nga Zezi kɛnnin i lɛ’n i bo’n yɛle kɛ ɔ fataman kɛ be nga be kacili i sɔnnzɔnfuɛ i osu w’a cɛ’n, be sa sin bubu be. Sɛ be sa sin bubu be’n, be su kwlá yoman like kpa kun. Ɔ maan bé yó kɛ njin mɔ i ta’n w’a kpɔ’n sa. Kpɛkun sran’m bé srí be. Ng’ɔ ti tɛ kpa bɔbɔ’n yɛle kɛ bé sáci Ɲanmiɛn dunman, yɛ i kusu i klun su jɔman be wun. Kɛ ɔ ko yo naan i sɔ sa liɛ’n w’a juman’n, Zezi seli kɛ: “Sran ng’ɔ si fa sie’n, maan ɔ fa sie.”​—Liki 14:35.