?Wan fanngan nun yɛ Zezi yoli abonuan sa mun-ɔn?

Kɛ Zezi kannin sa yaci cɛlɛ’n i ndɛ Farizifuɛ kun m’ɔ suan Simɔn i awlo lɔ’n, i sin’n ɔ wlan sinnin Galile mɛn’n nun ɔ boli jasin fɛ’n. Kɛ ɔ boli jasin fɛ’n i bolɛ bo’n, i afuɛ nɲɔn yɛ. Yɛ i kpɛ nɲɔn su m’ɔ́ wlán sín Galile mɛn’n nun’n yɛ ɔ o lɛ-ɔ. Sanngɛ nɛ́n i kunngba yɛ ɔ ɔli-ɔ. Ɔ nin i akoto blu-nin-nɲɔn (12) mun yɛ be ɔli-ɔ. “Bla wie m’ɔ fuannin mmusu nga be o be nun’n, m’ɔ yoli be juejue’n, be ɔli wie.” (Liki 8:2) Be nun wie mun yɛle Mari mɔ be flɛ i Magdala’n nin Sizanin, ɔ nin Zanin mɔ i wun’n ti Famiɛn Erɔdu Antipasi i junman difuɛ’n.

Sran’m be tili Zezi i su ndɛ. Sanngɛ junman ng’ɔ di’n i su akunndan nga be bu’n ti fanunfanun. I wie yɛle kɛ cɛn kun’n, sran wie’m be fali bian kun mɔ mmusu kun kle i yalɛ’n, be blɛli i. Bian sɔ’n ti aɲinsifuɛ, kpɛkun ɔ ti bobo. Zezi yoli bian’n i juejue. Ɔ maan mmusu’n ɔli, yɛ bian’n kwla ijɔli kpɛkun ɔ wunnin ase. I sɔ’n boli sran’m be nuan naan b’a se kɛ: “?Nán Davidi i Wa’n yɛ ɔ o lɛ-ɔ?”​​—Matie 12:23.

Sran kpanngban kpa be bo sin yiali sua nga Zezi sikeli nun’n. I sɔ’n ti’n, Zezi nin i sɔnnzɔnfuɛ mun be kwlá diman like bɔbɔ. Sanngɛ be kwlaa be bumɛn i kɛ Zezi yɛle ‘Davidi i Wa’ mɔ Ɲanmiɛn waan ɔ́ wá bá’n. I wie yɛle mmla klɛfuɛ nin Farizifuɛ nga be fin lelee Zerizalɛmun lɔ be bali lɛ’n. Nán Zezi ndɛ’n i tielɛ nin i bo suanlɛ ti yɛ be bali-ɔ. Be seli sran mun kɛ “Bɛlzebubu wo i su” naan ɔ nin “Mmusu’m be su kpɛn’n” yɛ be o nun-ɔn. (Marki 3:22) Asa ekun’n, Zezi i osufuɛ’m be tili i kɛ Zezi ti’n lika’n su keje yekee kpa. I sɔ’n ti’n, be bali kɛ bé wá fɛ́ i bé kɔ́. ?Ngue ti yɛ be waan bé fɛ́ i bé kɔ́-ɔ?

Blɛ sɔ’n nun’n, Zezi i niaan’m be lafiman su kɛ i yɛ ɔ ti Ɲanmiɛn i Wa’n niɔn. (Zan 7:5) Be waan Zezi nga i ti yɛ lika’n su keje yekee sɔ’n, nɛ́n i yɛle Zezi nga be nin i ɲinnin Nazarɛti lɔ’n niɔn. I sɔ’n ti’n, be seli kɛ: “I ti w’a saci.”​​—Marki 3:21.

Sanngɛ ninnge nga Zezi yo be’n, be kleman kɛ i ti w’a saci. Ɔ yoli bian kun mɔ mmusu kun kleli i yalɛ’n i juejue. Siɛn’n bian sɔ’n wun ase yɛ ɔ kwla ijɔ. Sran’m be wunnin sa sɔ’n nun. Ɔ maan sran fi kwlá seman kɛ ɔ ti ato. Sanngɛ mmla klɛfuɛ nin Farizifuɛ’m be liɛ’n, be tɔnnin Zezi i suɛn be seli kɛ: “Bian nga, saan Bɛlzebubu m’ɔ ti mmusu’m be su kpɛn’n i fanngan nun cɛ yɛ ɔ fuan mmusu mun-ɔn.”​​—Matie 12:24.

Zezi si akunndan nga mmla klɛfuɛ nin Farizifuɛ’m be bu’n. I ti’n, ɔ seli be kɛ: “Famiɛn diwlɛ kwlaa nga i nunfuɛ’m be bubu be wun nun’n, ɔ kaman lɛ, yɛ klɔ kwlaa annzɛ awlo kwlaa nga i nunfuɛ’m be bubu be wun nun’n, ɔ bo. I wafa kunngba’n, sɛ Satan fuan Satan’n, nn w’a bubu i bɔbɔ i wun nun. ?Ɔ maan ɔ́ yó sɛ bɔɔ cɛ naan i famiɛn diwlɛ’n w’a ka lɛ?”​​—Matie 12:25, 26.

Fiɛn kaan sa nunman Zezi i ndɛ sɔ’n i sin! Farizifuɛ’m be si kɛ Zuifu wie’m be fuan mmusu mun. (Sa Nga Be Yoli’n 19:13) Ɔ maan Zezi usali be kɛ: “?Sɛ Bɛlzebubu fanngan nun yɛ n fuan mmusu mun’n, nn wan fanngan nun yɛ amun mma’m be fuan be-ɔ?” Zezi su se be kɛ sɛ be tɔn i suɛn’n, nn be su tɔn be bɔbɔ be mma’m be suɛn wie. Ɔ seli ekun kɛ: “Sanngɛ sɛ Ɲanmiɛn wawɛ’n i fanngan nun yɛ n fuan mmusu mun’n, nn Ɲanmiɛn i Famiɛn dilɛ’n w’a fu amun nun.”​​—Matie 12:27, 28.

Zezi fali sunnzun ase kun yili i nglo kɛ ɔ kwla mmusu mun ti yɛ ɔ kwla fuan be-ɔ. I waan: “?Kusu sɛ sran kun waan ɔ́ wlú sran m’ɔ le wunmiɛn kpa’n i sua’n nun kó fɛ́n i bo ninnge mun’n, sɛ w’a cimɛn i ka’n, ɔ́ fɛ́n i bo ninnge mun sɛ naan w’a yo ye? Saan ɔ́ cí i ka naan w’a kwla fɛn i sua’n nun ninnge mun. Ɔ maan sran ng’ɔ nin min nunman nun’n, ɔ kpɔ min. Yɛ sran ng’ɔ nin min tianman like nuan’n, ɔ trutru nun.” (Matie 12:29, 30) Mmla klɛfuɛ mun nin Farizifuɛ’m be nin Zezi be nunman nun. I sɔ’n kle weiin kɛ be ti Satan liɛ. Afin be yo maan sran’m be wanndi Ɲanmiɛn i Wa’n. Kusu nn i yɛ Ɲanmiɛn sunmɛnnin i-ɔ.

Zezi seli ɲrun tanndanfuɛ sɔ’m be kɛ: “Sa kwlaa nga sran’m be yo’n, bé yáci cɛ́ be. Maan ɔ yo sa tɛtɛ nga be yo’n, annzɛ ndɛ tɛtɛ nga be kan’n, bé yáci i kwlaa cɛ́ be. Sanngɛ sran ng’ɔ kan Ɲanmiɛn wawɛ’n i wun ndɛ tɛ’n, be su yaci cɛmɛn i le. I sa tɛ’n, ɔ́ kɛ́ i su titi.” (Marki 3:28, 29) ?Kɛ a niɛn i sa’n, be nga be wun i weiin kɛ Ɲanmiɛn i wawɛ’n su di junman mɔ be se kɛ Satan yɛ ɔ su di junman’n, sa benin yɛ ɔ́ tɔ́ be su-ɔ?