Wafa nga Zezi i ndɛ’n man aklunjuɛ’n
“[Jésus] fuli oka kun su. [...] I sɔnnzɔnfuɛ’m be bɛli i wun lɛ, yɛ ɔ boli be like klelɛ’n bo-ɔ.”—MATIE 5:1, 2.
1, 2. (a) ?Ngue yɛ Zezi dun mmua yoli kwlaa naan w’a ijɔ oka su’n lɔ ɔ? (b) ?Ndɛ benin yɛ Zezi fa boli i ijɔlɛ’n i bo ɔ?
E O AFUƐ nga be flɛ i 33 nun. Zezi w’a jran jasin fɛ’n m’ɔ bo i Galile lɔ’n kan naan w’a ɔ Zerizalɛmu delɛ cɛn’n i dilɛ. (Zan 5:1) Kɛ ɔ sɛli i sin Galile ekun’n, ɔ srɛli Ɲanmiɛn lele lika’n cɛnnin, naan w’a fɛ i sɔnnzɔnfuɛ’m be nun 12 kɛ be yo i akoto. I aliɛ m’ɔ́ cɛ́n ekun’n, sran kpanngban kpa be yiali naan w’a yo be juejue. I sɔnnzɔnfuɛ mun nin be kwlaa nga be bali’n, be trannin ase yɛ Zezi trannin oka’n su naan w’a bo be like klelɛ’n bo.—Matie 4:23–5:2; Lik 6:12-19.
2 Kɛ Zezi boli like klelɛ’n bo oka’n su lɔ’n, ɔ seli kɛ sran nga be liɛ su ti ye’n, yɛle be nga be nin Ɲanmiɛn be afiɛn’n sɛ’n. (An kanngan Matie 5:1-12 nun.) Kɛ be se kɛ sran kun i liɛ su ti ye’n yɛle kɛ like ng’ɔ yo’n, ɔ yo ye i sa nun ɔ maan ɔ di su aklunjuɛ. Kɛ Zezi bó like klelɛ bo oka’n su lɔ’n, ɔ kannin ninnge ngwlan mɔ be ti yɛ Klistfuɛ’m be liɛ su ti ye’n, be ndɛ. Ɔ maan, ninnge nga ti yɛ i afuɛ ko ju 2.000 yɛ, Zezi seli kɛ sran’m be liɛ su ti ye’n, sɛ e yo be’n, e liɛ yó ye wie. Siɛn’n, maan e fa e ɲin e sie i ndɛ sɔ mɔ Zezi kannin be’n, be su.
“Be nga be si kɛ be di Nyanmiɛn ninnge’m be yalɛ’n”
3. ?Kɛ be se kɛ sran kun si kɛ ɔ di Ɲanmiɛn ninnge’m be yalɛ’n, i bo’n yɛle benin?
3 “Be nga be si kɛ be di Nyanmiɛn ninnge’m be yalɛ’n, be liɛ su ti ye, afin Nyanmiɛn yɛ ɔ sie be sakpa-a!” (Matie 5:3) “Be nga be si kɛ be di Nyanmiɛn ninnge’m be yalɛ’n,” be wun i wlɛ kɛ Ɲanmiɛn yɛ ɔ fata kɛ ɔ kle be atin naan ɔ si be aunnvuɛ ɔ.
4, 5. (a) ?Ngue ti yɛ be nga be si kɛ be di Ɲanmiɛn ninnge’m be yalɛ’n be liɛ su ti ye ɔ? (b) ?Ngue yɛ e kwla yo naan e nin Ɲanmiɛn y’a nanti klanman ɔn?
4 Be nga be si kɛ be di Ɲanmiɛn ninnge’m be yalɛ’n be liɛ su ti ye, afin “Nyanmiɛn yɛ ɔ sie be sakpa-a!” Kɛ mɔ Zezi i sɔnnzɔnfuɛ klikli’m be kplinnin su kɛ Zezi yɛ ɔ ti Mɛsi ti’n, be nin i bé kwlá dí famiɛn ɲanmiɛn su lɔ. (Lik 22:28-30) Sɛ e nin Klist é kó dí famiɛn ɲanmiɛn su lɔ o, annzɛ kɛ Ɲanmiɛn wá síe asiɛ’n m’ɔ́ káci mɛn klanman’n i su yɛ é trán o, sɛ e si kɛ e di Ɲanmiɛn ninnge’m be yalɛ’n, é kwlá dí aklunjuɛ.
5 Nán sran ngba yɛ be si kɛ be di Ɲanmiɛn ninnge’m be yalɛ ɔ. Afin sran’m be ngba be lafiman Ɲanmiɛn su, yɛ be kloman Ɲanmiɛn ninnge mun. (2 Tɛsalonikfuɛ Mun 3:1, 2; Ebre Mun 12:16) Kɛ ɔ ko yo naan e nin Ɲanmiɛn y’a nanti klanman’n, ɔ fata kɛ e nian nun e suan Biblu’n nun like, yɛ e uka sran mun juejue su naan be kaci Zezi i sɔnnzɔnfuɛ. Asa ekun’n, ɔ fata kɛ e ɔ asɔnun aɲia’m be bo titi.—Matie 28:19, 20; Ebre Mun 10:23-25.
Be nga be wla w’a bo’n mɔ ‘be liɛ su ti ye’n’
6. ?Wan mun yɛ ‘be wla a bo’ ɔ? ?Yɛ ngue ti yɛ “be liɛ su ti ye” ɔ?
6 “Be nga be wla a bo’n, be liɛ su ti ye, afin Nyanmiɛn wá fɔ́nvɔ be!” (Matie 5:4) “Be nga be wla a bo’n,” be nin be nga “be si kɛ be di Nyanmiɛn ninnge’m be yalɛ’n,” be ti kun. Nán kɛ sa kwlaa ng’ɔ o be su’n be ti yɛ be wla w’a bo ɔ. Sanngɛ kɛ be wun kɛ be ti sa tɛ yofuɛ naan fɔ m’ɔ o klɔ sran’m be nun’n ti yɛ ɲrɛnnɛn’n o be su’n, i sɔ’n bo be wla. ?Yɛ ngue ti yɛ be mɔ be wla w’a bo be wun’n “be liɛ su ti ye” ɔ? Ɲanmiɛn nin Klist su mɔ be lafi’n ti ɔ. Kpɛkun kɛ be nin Zoova be afiɛn’n sɛ’n, ɔ fɔnvɔ be.—Zan 3:36.
7. ?Wafa sɛ yɛ ɔ fata kɛ e bu ninnge nga be o Satan i mɛn’n nun mun ɔn?
7 ?Sa tɛ yolɛ mɔ w’a tru Satan i mɛn’n nun’n ti’n, e wla bo e wun? ?Kɛ e wun ninnge nga be o mɛn’n nun’n, be yo e sɛ? Akoto Zan klɛli i kɛ: “Like nga be yo be mɛn’n nun’n i kwlaa’n: be nyin b’ɔ blo ninnge’m be su’n, nin akunndan nga be bu fa gua ninnge nga be wun be’n be su’n, ɔ nin be wun tulɛ’n, i kwlaa sɔ’n i wie fi finman e Si’n.” (1 Zan 2:16) “Akunndan nga sran’m be bu’n,” yɛ ɔ sie be nga be suman Ɲanmiɛn’n niɔn. ?Sɛ ɔ yo e kɛ akunndan sɔ’n ti’n e nin Ɲanmiɛn e afiɛn’n su saci blɛblɛblɛ’n, é yó i sɛ? Sɛ ɔ yo e sɔ’n, maan e srɛ Ɲanmiɛn tankaan kpa naan e suan Biblu’n nun like. Kpɛkun maan e se asɔnun kpɛnngbɛn mun naan be uka e. Kannzɛ sa ng’ɔ tɔ e su’n ti sɛ ti sɛ’n, sɛ e fa e wun e mantan Zoova’n, ɔ́ ‘fɔ́nvɔ’ e.—1 Korɛntfuɛ Mun 2:12; Jue Mun 119:52; Zak 5:14, 15.
Nanwlɛ “be nga be ti wɛtɛɛfuɛ’n, be liɛ su ti ye!”
8, 9. ?Kɛ be se kɛ be yo wɛtɛɛfuɛ’n i bo’n yɛle benin? ?Yɛ ngue ti yɛ sran nga be ti wɛtɛɛfuɛ sɔ’n, be liɛ su ti ye ɔ?
8 “Be nga be ti wɛtɛɛfuɛ’n, be liɛ su ti ye, afin mɛn’n ɔ́ wá yó be liɛ!” (Matie 5:5) Kɛ be se kɛ be “yo wɛtɛɛfuɛ,” nɛ́n i yɛle kɛ be ti ambɛfuɛ annzɛ be yo be wun kɛ be ti kpa sa. (1 Timote 6:11) Sɛ e yo wɛtɛɛfuɛ’n, bé wún i sɔ liɛ’n e Zoova i klun sa yolɛ’n nun yɛ é kplín su kɛ ɔ kle e atin. Kusu’n, wafa nga e nin e wiengu Klistfuɛ mun yɛ sran uflɛ mun e tran nun’n, é yí i sɔ aeliɛ’n i nglo. Wɛtɛɛ yolɛ sɔ’n, ɔ nin afɔtuɛ nga akoto Pɔlu mannin’n, be kɔ likawlɛ.—An kanngan Rɔmfuɛ Mun 12:17-19 nun.
9 ?Ngue ti yɛ be nga be ti wɛtɛɛfuɛ’n, be liɛ su ti ye ɔ? Afin Zezi m’ɔ ti wɛtɛɛfuɛ’n seli kɛ “mɛn’n ɔ́ wá yó be liɛ.” Sanngɛ Zezi yɛ mɛn’n ti i liɛ bɔbɔ ɔ. (Jue Mun 2:8; Matie 11:29; Ebre Mun 2:8 9) Sran uflɛ mɔ be ti wɛtɛɛfuɛ wie’n, ‘like nga Nyanmiɛn se kɛ ɔ́ fá mán Krist’n, bé bó be dunman nun wie.’ Like sɔ’n yɛle asiɛ’n. (Rɔmfuɛ Mun 8:16, 17) Zezi i Sielɛ’n i bo’n, sran wɛtɛɛfuɛ kpanngban wie’m bé trán asiɛ’n su wa.—Jue Mun 37:10, 11.
10. ?Sɛ e timan wɛtɛɛfuɛ’n, wafa sɛ yɛ i sɔ’n kwla yo naan b’a manman e junman asɔnun’n nun ɔn? ?Yɛ wafa sɛ yɛ i sɔ’n kwla saci e nin e wiengu mun e afiɛn ɔn?
10 Ɔ nin i fata kɛ e yo wɛtɛɛfuɛ kɛ Zezi sa. ?Sanngɛ sɛ e ti ndɛnnganfuɛ’n, é yó i sɛ? I sɔ’n aeliɛ’n ti’n sran’m be wanndi e. Sɛ e ti Klistfuɛ yasua kun naan e kunndɛ kɛ é dí junman asɔnun’n nun’n, i sɔ aeliɛ’n ti maan ɔ su yoman ye. (1 Timote 3:1, 3) Pɔlu seli Titi kɛ ɔ kpɛn Klistfuɛ nga be o Krɛti lɔ’n be wla titi kɛ “nán maan be klo utre, maan be yaci sa cɛ, maan sran’n kwlaa be wun kɛ be ti wɛtɛfuɛ.” (Tit 3:1, 2) Nanwlɛ kɛ be yi i sɔ aeliɛ’n i nglo’n, ɔ ti kpa man be wiengu mun!
Be konvi sɔ “Nyanmiɛn klun sa yolɛ’n”
11-13. (a) ?Kɛ be se kɛ be konvi sɔ Ɲanmiɛn klun sa yolɛ’n kɛ awe nin nzue we kun sran sa’n, i bo’n yɛle benin? (b) ?Wafa sɛ yɛ be nga be konvi sɔ i sɔ yolɛ’n be “klun wá jɔ́” ɔ?
11 “Be nga be konvi sɔ Nyanmiɛn klun sa yolɛ’n kɛ awe nin nzue we kun sran sa’n, be liɛ su ti ye, afin be klun wá jɔ́!” (Matie 5:6) “Nyanmiɛn klun sa yolɛ’n” nga Zezi kɛn i ndɛ’n yɛle kɛ e yo like ng’ɔ ti seiin’n m’ɔ nin Ɲanmiɛn mmla’n be kɔ likawlɛ’n. Jue tofuɛ’n seli kɛ ndɛ kpakpa nga Ɲanmiɛn kannin be’n, i “konvi sɔ be tititi.” (Jue Mun 119:20) ?Sa kpa yolɛ’n ti e cinnjin kpa kɛ awe nin nzue we fa kun sran’n sa?
12 Zezi seli kɛ be nga be konvi sɔ sa kpa yolɛ’n kɛ awe nin nzue we kun sran sa’n, be “klun wá jɔ́.” Kɛ afuɛ nga be flɛ i 33 i pantekɔtu’n sinnin’n, mɔ Zoova i wawɛ’n fali ‘sa kpa’n kleli mɛn nunfuɛ mun weiin’n,’ yɛ be boli aklunjuɛ dilɛ’n bo ɔ. (Zan 16:8) Ɲanmiɛn fɛli i wawɛ’n yoli maan sran’m be klɛli Biblu’n i bue kun Glɛki aniɛn’n nun. Be kwla fa ndɛ sɔ’n “be fa kle be sa nga be yo-ɔ ɔ ti kpa’n.” (2 Timote 3:16) Ɲanmiɛn wawɛ’n kusu uka e maan e ‘fa nzuɛn uflɛ b’ɔ fa Nyanmiɛn liɛ’n b’ɔ maan é yó kpa’n.’ (Efɛzfuɛ Mun 4:24) E ti kpɔlɛ tɛ nga Zezi yili’n ti’n, be nga be yaci sa tɛ yolɛ’n be kunndɛ kɛ Ɲanmiɛn yaci be sa tɛ’n cɛ be. Kpɛkun ɔ bu be sran kpa ekun. ?Kɛ e si sɔ’n, ɔ fɔnvɔman e?—An kanngan Rɔmfuɛ Mun 3:23, 24 nun.
13 Sɛ e lafi su kɛ é trán asiɛ’n su naan e konvi sɔ sa kpa yolɛ kɛ awe nin nzue we kun sran’n sa’n, kɛ é wá ɲán anannganman nguan mɛn klanman’n nun’n, e klun jɔ́. Lele naan i sɔ’n w’a ju’n, maan e ta nda kɛ é nánti Zoova i mmla’m be su. Zezi seli kɛ: “An dun mmua fa amun wun man Nyanmiɛn maan ɔ sie amun, yɛ an yo i klun sa’n.” (Matie 6:33) I sɔ yolɛ’n maan é dí junman kpanngban é mán Ɲanmiɛn yɛ i sɔ’n ti’n, e klun jɔ́.—1 Korɛntfuɛ Mun 15:58.
Like nga ti yɛ ‘be nga be si aunnvuɛ’n, be liɛ su ti ye’n’
14, 15. ?Wafa sɛ yɛ e kwla si aunnvuɛ ɔ? ?Yɛ ngue ti yɛ “be nga be si aunnvuɛ’n” be liɛ su ti ye ɔ?
14 “Be nga be si aunnvuɛ’n, be liɛ su ti ye, afin Nyanmiɛn wá sí be aunnvuɛ!” (Matie 5:7) Be nga be si aunnvuɛ’n, sɛ ɲrɛnnɛn o sran su’n, sran sɔ’n yo be annvɔ. Aunnvuɛ mɔ Zezi sili sran mun’n ti’n, ɔ yoli be nun kpanngban be juejue. (Matie 14:14) Kɛ sran’m be yo e sa mɔ be kaci’n, sɛ e yaci e cɛ be kɛ nga Zoova yaci cɛ be’n sa’n, ɔ ti aunnvuɛ silɛ wie. (Ezipt Lɔ Tulɛ 34:6, 7; Jue Mun 103:10) Kpɛkun aunnvuɛ silɛ’n i wie ekun yɛle kɛ e kan ndɛ kpakpa mun yɛ e yo ninnge mun e fa uka be nga be leman wie’n. Asa ekun’n, e kan Biblu’n nun nanwlɛ ndɛ’n e kle e wiengu mun. Zezi sili sran kpanngban’m be aunnvuɛ. I sɔ’n ti yɛ “ɔ boli be like klelɛ’n bo ɔ, ɔ kleli be like kpanngban.”—Mark 6:34.
15 Sɛ e kplin ndɛ nga Zezi kannin’n su’n, ɔ ti su. Ɔ seli kɛ: “Be nga be si aunnvuɛ’n, be liɛ su ti ye, afin Nyanmiɛn wá sí be aunnvuɛ.” Sɛ e si sran’m be aunnvuɛ’n bé sí e annvuɛ wie. Kɛ Ɲanmiɛn dí e jɔlɛ’n, aunnvuɛ nga e sili e wiengu mun ti’n, wie liɛ’n ɔ su buman e fɔ. (Zak 2:13) Saan be nga be si aunnvuɛ’n yɛ Ɲanmiɛn yáci be sa tɛ mun cɛ́ be ɔ. Yɛ bé ɲán anannganman nguan.—Matie 6:15.
Like nga ti yɛ “be nga sa tɛ fi nunman be anwlɛn’n nun’n” be liɛ su ti ye’n
16. ?Kɛ be se kɛ “sa tɛ fi nunman be anwlɛn’n nun’n” i bo’n yɛle benin? ?Yɛ wafa sɛ yɛ be nga be awlɛn’n ti sɔ’n, bé “wún Ɲanmiɛn” ɔn?
16 “Be nga sa tɛ fi nunman be anwlɛn’n nun’n, be liɛ su ti ye, afin bé wá wún Nyanmiɛn!” (Matie 5:8) Sɛ ‘sa tɛ fi nunman e awlɛn’n nun’n,’ fiɛn kaan sa su tranman e nin sran mun e nantilɛ’n nun. Yɛ i sɔ’n i ɲin fíte ninnge nga é yó be’n nin sa nga ti yɛ e yo be’n be nun wie. ‘Klolɛ b’ɔ fin sran bɔ sa tɛ kaan sa nunmɛn i anwlɛn’n nun’n’ yɛ é yí i nglo ɔ. (1 Timote 1:5) Sɛ fiɛn kaan sa nunman e klun lɔ’n, é “wún Nyanmiɛn.” Sanngɛ ndɛ sɔ’n kleman kɛ san fii é wún Ɲanmiɛn sa jrɛiin. Afin “sɛ klɔ sran kun sa wun [Nyanmiɛn] nyrun’n, ɔ su kwlá tranman nguan nun kun.” (Ezipt Lɔ Tulɛ 33:20) Kɛ mɔ Zezi yili Ɲanmiɛn i sran wafa ng’ɔ ti’n i nglo’n ti’n, ɔ kwla seli kɛ: “Sran ng’ɔ wun min’n, wuun w’a wun e Si’n.” (Zan 14:7-9) E mɔ e ti Zoova i sufuɛ asiɛ’n su wa’n, e kwla “wun Ɲanmiɛn” ninnge ng’ɔ yo be man e’n be nun. (Zɔb 42:5) Klistfuɛ nga be kpali be sieli be ngunmin’n be liɛ’n, kɛ be ko cɛn be’n kɛ aolia nun sran sa’n mɔ be ko wɔ ɲanmiɛn su’n, yɛ bé wún be Si Ɲanmiɛn i kpa sa ɔ.—1 Zan 3:2.
17. ?Sɛ sa tɛ fi nunman e awlɛn’n nun’n, e aeliɛ’n nin e akunndan’n be yo sɛ?
17 Sran nga sa tɛ fi nunman i awlɛn’n nun’n i aeliɛ’n ti sanwun, kpɛkun ɔ miɛn i ɲin naan ɔ nin Zoova b’a nanti klanman. I sɔ ti’n, ɔ fɛmɛn i ɲin siemɛn i ninnge nga be ti fiɛn Zoova ɲrun’n be su. (1 Be Nyoliɛ 28:9; Ezai 52:11) Sɛ sa tɛ fi nunman e awlɛn’n nun’n, ndɛ nga é kán’n ɔ nin ninnge nga é yó be’n, fiɛn kaan sa su tranman be nun. Kpɛkun e su suman Zoova gblɛ nun.
“Be nga be ti ndɛ siesiefuɛ’n” bé yó Ɲanmiɛn i mma mun
18, 19. ?Ngue yɛ be nga be ti “ndɛ siesiefuɛ’n” be yo ɔ?
18 “Be nga be ti ndɛ siesiefuɛ’n, be liɛ su ti ye, afin Nyanmiɛn wá flɛ́ be i mma mun!” (Matie 5:9) Sɛ ndɛ tɔ’n, like nga “be nga be ti ndɛ siesiefuɛ’n” bé yó annzɛ be su yoman’n yɛ bé fá wún be wlɛ ɔ. Sɛ e ti sran wafa nga Zezi kannin be ndɛ be nun kun’n, nn e ti ndɛ siesiefuɛ. Yɛ ‘sɛ sran yo e tɛ’n e yomɛn i wie.’ Sanngɛ ‘kpa nga e fa yo e wiengu’n nin sran’m be kwlaa’n ɔ́ káci e nzuɛn.’—1 Tɛsalonikfuɛ Mun 5:15.
19 Sɛ e kunndɛ kɛ é trán ndɛ siesiefuɛ’m be nun wie’n, maan e mian e ɲin naan e nin sran y’a kanman ndɛ. Sran ng’ɔ ti ndɛ siesiefuɛ’n, ‘ɔ saciman janvuɛ nin janvuɛ be afiɛn.’ (Nyanndra Mun 16:28) Kɛ mɔ e ti ndɛ siesiefuɛ’n ti’n, e fa ajalɛ kpakpa. Ɔ maan ‘e nin sran’m be kwlaa e nuan sɛ e wun.’—Ebre Mun 12:14.
20. ?Wan mun yɛ be ti Ɲanmiɛn i “mma mun” dɔ nga su ɔ? ?Yɛ wan mun ekun yɛ bé kwlá káci Ɲanmiɛn wa ɔ?
20 Be nga be ti ndɛ siesiefuɛ’n be liɛ su ti ye afin “Nyanmiɛn wá flɛ́ be i mma mun!” Zoova fali Klistfuɛ nga be kpali be sieli be ngunmin’n yoli i “mma mun.” Be nin Zoova be afiɛn’n mantan kpa kɛ siɛ kun nin i mma mun sa. Afin be lafi Klist su yɛ be tu be klun be su “Nyanmiɛn b’ɔ klo sran’n b’ɔ maan e di alaje’n.” (2 Korɛntfuɛ Mun 13:11; Zan 1:12) ?Yɛ Zezi i “bua’m be wie” mɔ be ti ndɛ siesiefuɛ’n be li? Kɛ Zezi wá dí famiɛn afuɛ akpi’n, ɔ yó be ‘Si b’ɔ o lɛ titi’n.’ Sanngɛ kɛ blɛ sɔ’n ko wie’n, Zezi bɔbɔ ɔ́ fɛ́ i wun mán Zoova kɛ ɔ sie i. Kpɛkun ɔ nin bua’m be wie sɔ mun be káci Ɲanmiɛn wa mlɔnmlɔnmlɔn.—Zan 10:16; Ezai 9:5; Rɔmfuɛ Mun 8:21; 1 Korɛntfuɛ Mun 15:27, 28.
21. ?Sɛ e yo like nga “Nyanmiɛn wawɛ’n kle ye kɛ e yo’n,” e aeliɛ’n yó sɛ?
21 Sɛ e yo like nga “Nyanmiɛn wawɛ’n kle ye kɛ e yo’n” ndɛ siesielɛ’n yó e nzuɛn. Yɛ sran’m bé wún i sɔ’n e aeliɛ’n nun. I sɔ’n ti’n, e su ‘yoman sa b’ɔ kun e wiengu ya’n.’ (Galasifuɛ Mun 5:22-26) Sanngɛ é mían e ɲin naan e nin ‘sran y’a kanman ndɛ.’—Rɔmfuɛ Mun 12:18.
Kannzɛ be kle be yalɛ’n, sanngɛ be liɛ su ti ye!
22-24. (a) ?Ngue ti yɛ be nga be kle be yalɛ sa kpa mɔ be yo’n ti’n, be di aklunjuɛ ɔ? (b) ?Ngue yɛ é wá wún i like suanlɛ nɲɔn nga bé bá lɛ’n be nun ɔn?
22 “Be nga be kle be yalɛ Nyanmiɛn klun sa yolɛ’n ti’n, be liɛ su ti ye, afin Nyanmiɛn yɛ ɔ́ síe be sakpa-a!” (Matie 5:10) Kɛ Zezi wieli ndɛ sɔ’n kan’n, ɔ kan guali su kɛ:“Kɛ bé kpɛ́ amun nzowa, bɔ bé klé amun yalɛ, bɔ bé tɔ́n amun suɛn tɛtɛ’n kwlaa n dunman nun’n, amun liɛ su ti ye, yɛlɛ kɛ amun mo’n ɔ́ wá yó dan nyanmiɛn su lɔ. I sɔ’n ti, maan amun klun jɔ, maan amun wun blibli amun. Afin laa kɛ be kleli Nyanmiɛn nuan ijɔfuɛ’m be yalɛ sɔ-ɔ, i sin naan b’a wu amun.”—Matie 5:11, 12.
23 Kɛ nga be fa yoli Ɲanmiɛn nuan ijɔfuɛ mun laa’n sa’n, Klistfuɛ’m be lafi su kɛ bé kpɛ́ be nzowa, bé klé be yalɛ yɛ bé tɔ́n be suɛn. “Sa kpa yolɛ’n” ti yɛ bé yó be ninnge sɔ’n kwlaa ɔ. Sanngɛ sɛ ɲrɛnnɛn kwlaa sɔ’n sɔn e nun’n, é dí aklunjuɛ. Afin kɛ e yo sɔ’n ɔ jɔ Zoova klun yɛ e aeliɛ’n mɛnmɛn i. (1 Piɛr 2:19-21) Aklunjuɛ nga e di andɛ nin nga é dí i ainman Zoova i sulɛ’n nun’n, ɲrɛnnɛn nga e wun i’n kwlá yoman naan w’a kpɛ su. Asa ekun’n, be nga be nin Klist bé kó dí famiɛn ɲanmiɛn su lɔ o annzɛ be nga bé ɲán anannganman nguan asiɛ’n su wa o, i sɔ’n kpɛman be aklunjuɛ’n su. I sɔ aklunjuɛ’n kle kɛ Ɲanmiɛn klun jɔ e wun naan ɔ ti aklunyefuɛ.
24 E kwla suan Ɲanmiɛn ndɛ nga Zezi kɛnnin i oka’n su lɔ’n i su like kpanngban kpa. Like suanlɛ nɲɔn nga bé bá lɛ’n, bé mán e afɔtuɛ wie mun ekun. Ndɛ sɔ mɔ Zezi Klist kannin be’n, maan e nian wafa nga e kwla fa be su’n.
?Amún tɛ́ su sɛ?
• ?Ngue ti yɛ “be nga be si kɛ be di Nyanmiɛn ninnge’m be yalɛ’n” be liɛ su ti ye ɔ?
• ?Ngue ti yɛ “be nga be ti wɛtɛɛfuɛ’n, be liɛ su ti ye” ɔ?
• ?Kannzɛ be kle Klistfuɛ’m be yalɛ’n ngue ti yɛ be di aklunjuɛ ɔ?
• ?Ninnge nga be ti yɛ Zezi waan Klistfuɛ’m be liɛ su ti ye’n, beninfuɛ’n yɛ ɔ yo e fɛ ɔ?
[Foto, bue 5]
Ninnge ngwlan mɔ be ti yɛ laa Klistfuɛ’m be liɛ yoli ye’n, mɔ Zezi kannin be ndɛ’n be kwla yo maan e liɛ yo ye wie andɛ.
[Foto, bue 7]
Like kpa nga e kwla yo naan y’a kle kɛ e si aunnvuɛ’n, yɛle kɛ e bo jasin fɛ’n e kle e wiengu mun.