Ndɛ tre blu nin kun
‘An dun mmua fa amun wun man Ɲanmiɛn maan ɔ sie amun’
1. (a) ?Ngue ti yɛ Zezi jrannin su kpa seli i ndɛ tiefuɛ’m be kɛ be dun mmua fa be wun man Ɲanmiɛn maan ɔ sie be ɔ? (b) ?Kosan benin yɛ ɔ fata kɛ e fa usa e wun ɔn?
I NUN mɔ Zezi kán ndɛ klé sran mun Galile lɔ i afuɛ 1.900 tra su yɛ’n, ɔ seli be kɛ: ‘An dun mmua fa amun wun man Ɲanmiɛn maan ɔ sie amun, yɛ an yo i klun sa’n.’ ?Sanngɛ, ngue ti yɛ i sɔ yolɛ’n ti cinnjin ɔn? ?Nán Klist yɛ e ɲrun lɔ’n, bé wá síe i famiɛn’n niɔn? I ɔ. Sanngɛ Mɛsi’n i Sielɛ’n yɛ Zoova ɔ́ wá fá yí i nglo weiin kɛ i yɛ ɔ le atin sie nglo nin asiɛ’n niɔn. Kpɛkun, Sielɛ sɔ’n yɛ ɔ́ wá yía ninnge ɲɛnmɛn nga Ɲanmiɛn waan ɔ́ yó be asiɛ’n su’n be nuan ɔn. Sran kwlaa ng’ɔ wun i wlɛ kɛ i sɔ liɛ’n ti cinnjin kpa’n, i mɛn dilɛ nun’n, ɔ́ fá Ɲanmiɛn Sielɛ’n síe i like kwlaa ɲrun. Sɛ Klistfuɛ klikli’m be blɛ su ɔ yoli be cinnjin’n, yɛ siɛn mɔ b’a sie Klist Famiɛn’n, i liɛ li be kanman! Ɔ maan ɔ fata kɛ e fa kosan nga e usa e wun: ?Min mɛn dilɛ wafa’n kle kɛ n dun mmua fa min wun man Ɲanmiɛn maan ɔ sie min?—Matie 6:33.
2. ?Ninnge benin mun yɛ be kunndɛlɛ’n lo sran mun ɔn?
2 Andɛ’n, mɛn wunmuan nun’n sran akpinngbin kpanngban be dun mmua fa be wun man Ɲanmiɛn maan ɔ sie be. Be kle kɛ be jran Ɲanmiɛn Sielɛ’n i sin afin be fali be wun mannin Zoova yɛ be mɛn dilɛ’n nun’n, be yo i klun sa’n. Sanngɛ, mɛn’n nun ninnge’m be kunndɛlɛ’n, yɛ ɔ lo sran’m be sunman lika ɔ. Sran’m be fa be ɲin sie i sika kunndɛlɛ nin aɲanbeun ninnge’m be kunndɛlɛ’n, ɔ nin fɛ dilɛ mɔ sika’n maan be kwla di’n be su. Annzɛ be kplin be ɲin naan be junman su lɔ’n, b’a ɲan sasu. Like ng’ɔ lo be’n, yɛ be mɛn dilɛ wafa’n kle ɔ. Yɛle be bɔbɔ be wun akunndan bulɛ’n ɔ nin aɲanbeun ninnge mun’n, ɔ nin fɛ dilɛ’n. Ɲanmiɛn i ndɛ’n timan be cinnjin sɔ liɛ. I li sɛ be lafi i su bɔbɔ nn b’a yo wie.—Matie 6:31, 32.
3. (a) ?Ninnge kpa benin mun yɛ Zezi seli i sɔnnzɔnfuɛ mun kɛ be kunndɛ ɔ? ?Yɛ ngue ti ɔ? (b) ?Ngue ti yɛ ɔ fataman kɛ e koko aliɛ nin tralɛ ɔ nin lawlɛ’n be su ngboko ɔ?
3 Sanngɛ afɔtuɛ nga Zezi fa mɛnnin i sɔnnzɔnfuɛ mun’n yɛ: ‘Nán an sie amun awlɛn su ninnge’m be wa,’ afin ninnge sɔ’m be wie fi cɛman. Zezi seli ekun kɛ: ‘Sanngɛ an sie amun awlɛn su ninnge mun ɲanmiɛn su lɔ.’ Zoova sulɛ’n yɛ ɔ́ yó maan Zezi i sɔnnzɔnfuɛ’m bé kwlá yó sɔ ɔ. Zezi seli i sɔnnzɔnfuɛ mun kɛ sɛ be wla be wun ase kpa be yo Ɲanmiɛn klun sa’n, be ɲinma’n ‘yó kpa.’ Kpɛkun ɔ seli be kɛ: ‘An kwlá yoman Ɲanmiɛn i sran naan amun kunngba’n amun a yo sika’n i klofuɛ.’ ?Yɛ aliɛ nin tralɛ, ɔ nin lawlɛ ndɛ’n be li? Zezi seli i sɔnnzɔnfuɛ mun kɛ: ‘Nán an koko.’ Ɔ fali be ɲin sieli anunman mɔ Ɲanmiɛn ta be’n be su. Zezi wlɛli i sɔnnzɔnfuɛ’m be fanngan kɛ be nian waka nɲrɛ mun naan be wun i wlɛ kɛ Ɲanmiɛn káta be wun. ?Zoova i sufuɛ ngwlɛlɛfuɛ’m be kpa traman ninnge sɔ’m be ngba’n lele? I sɔ’n ti’n, Zezi seli i sɔnnzɔnfuɛ mun kɛ: ‘An dun mmua fa amun wun man Ɲanmiɛn maan ɔ sie amun, yɛ an yo i klun sa’n, i sin ɔ́ wá fá ninnge sɔ’n [mɔ be ti cinnjin’n] kwlaa úka su mán amun.’ (Matie 6:19-34) ?E ayeliɛ’n kle kɛ e lafi i sɔ ndɛ’n su?
Nán like fi tra Ɲanmiɛn Sielɛ’n i su nanwlɛ ndɛ’n
4. ?Sɛ e fa e ɲin sie i aɲanbeun ninnge’m be su ngboko’n, i agualiɛ’n kwlá yó sɛ man e?
4 Sɛ e kunndɛ kɛ é ɲán e sa nuan like lɔun naan e nin e awbolofuɛ mun y’a ɲan aliɛ, tralɛ nin lawlɛ’n i sɔ’n ti su. Sanngɛ, ninnge sɔ’m be su ngokɔɛ’n, i bo’n kwla gua tɛ man e. Sɛ bɔbɔ e se kɛ e lafi Ɲanmiɛn Sielɛ’n su’n, naan e awlɛn’n nun lɔ e fa ninnge uflɛ mun sie i ɲrun’n, ninnge sɔ’m bé dún mmua Ɲanmiɛn Sielɛ’n i ɲrun. (Matie 13:18-22) I wie yɛle gbanflɛn aɲanbeunfuɛ kun liɛ’n. Cɛn kun ɔ usali Zezi kɛ: ‘?Ngue yɛ n yo naan m’an ɲan anannganman nguan’n niɔn?’ Ɔ fa Ɲanmiɛn mmla’n su, kpɛkun ɔ nin i wiengu mun nanti klanman. Sanngɛ, nanwlɛ, i aɲanbeun’n ti i cinnjin dan. Ɔ kwlá yacimɛn i aɲanbeun’n naan w’a kaci Klist i sɔnnzɔnfuɛ. Ɔ maan nanndoliɛ like kɛ ɔ nin Zezi be ɲanmiɛn su lɔ famiɛn dilɛ’n sa’n, ɔ to fuɛnnin i. I sɔ’n ti’n, blɛ sɔ nun Zezi seli kɛ: ‘Kɛ aɲanbeunfuɛ kun fɛ i wun man Ɲanmiɛn kɛ ɔ sie i’n, ɔ ti kekle!’—Mark 10:17-23.
5. (a) ?Ngue like yɛ Pɔlu seli Timote kɛ sɛ ɔ ɲan wie’n, maan ɔ ju i ɔ? ?Yɛ ngue ti ɔ? (b) ?Wafa sɛ yɛ Satan fa “sika klolɛ’n” sua sran’m be wun aya ɔ?
5 Kɛ ɔ cɛli kan’n, akoto Pɔlu klɛli Timote i fluwa. I sɔ nun nn Timote o Efɛzi m’ɔ ti aboje klɔ’n i su lɔ. Pɔlu kpɛnnin i wla kɛ: ‘Kɛ bé wú e’n, e nin like fi a baman, ɔ maan kɛ é kɔ́’n, e kwlá faman like fi kɔman. I sɔ’n ti’n, sɛ e ɲan like e di’n, yɛ sɛ e ɲan tannin kla’n, maan ɔ ju e.’ Sɛ e di junman naan e nin e awlobofuɛ mun ‘e ɲan like e di’n, yɛ sɛ e ɲan tannin kla’n,’ i sɔ liɛ’n ti kpa. Sanngɛ Pɔlu wla e su nun kɛ: ‘Be nga be klo kɛ bé ɲán be wun’n, lakafuɛ’n láka be. Ninnge ngbɛnngbɛn mɔ be konvi sɔ be’n nin be ɲin m’ɔ blo ninnge tɛtɛ kpanngban m’ɔ saci sran mɔ maan be agualiɛ’n ɔ guaman be kpa be wu’n, bé káci kɛ aya sa, bé tɔ́ nun ɔ́ trá be.’ Satan ti gblɛfuɛ. I bo bolɛ nun’n, ɔ laka sran’n i konvi kan. Kpɛkun i sin’n, atrɛkpa ɔ mianmian sran’n kplɔlɔlɔ. Wie liɛ’n, e kwla ɲan sasu e junman su lɔ annzɛ kusu e kwla ɲan junman kpa mɔ i akatua’n cɛnnin tra laa liɛ’n niɔn. Sanngɛ sran ng’ɔ́ dí junman sɔ’n, saan ɔ́ fá blɛ nga laa ɔ fa yo Ɲanmiɛn ninnge mun’n yɛ ɔ́ dí i junman’n niɔn. Yɛ sɛ y’a nianman e wun’n, “sika klolɛ’n” ɔ́ trá Ɲanmiɛn Sielɛ’n i ninnge mɔ be ti cinnjin tra like kwlaa’n. Pɔlu waan: ‘Sran wie’m be fa be ɲin bloli nun lele be lafiman Ɲanmiɛn su kun, ɔ maan awlabɔɛ’n w’a kun be kpo.’—1 Timote 6:7-10.
6. (a) ?Kɛ ɔ ko yo naan aɲanbeun ninnge’m b’a lakaman e’n, ngue like yɛ ɔ fata kɛ e yo ɔ? (b) ?Kannzɛ bɔbɔ e ɲin kpaman lika mɔ w’a yo kekle yɛ’n su’n, sanngɛ ngue like yɛ e kwla lafi su ɔ?
6 Kɛ mɔ Pɔlu klo i niaan Timote kpa’n ti’n, ɔ seli i kɛ: ‘Nán fa ɔ wun wlɛ i ninnge sɔ’m be yolɛ nun,’ kpɛkun ‘mian ɔ ɲin maan sran’m be lafi Ɲanmiɛn su kpa.’ (1 Timote 6:11, 12) Ɔ fata kɛ e kplin e ɲin kpa naan mɛn nunfuɛ’m be mɛn dilɛ wafa m’ɔ taka aɲanbeun ninnge’m be su’n, w’a saman e wie. Ɔ maan, sɛ e jran kekle naan e lafi Zoova su’n, ɔ su yiman e ase le. Kannzɛ bɔɔ ninnge’m be gua’n uka su titi’n naan sran kpanngban kpa be ɲanman junman’n, sanngɛ ɔ́ yó maan é ɲán ninnge nga be mian e sa sakpa’n. Pɔlu klɛli i kɛ: ‘Like nga amún yó’n, nán an yo i sika klolɛ’n ti. Maan amun ɲin yi like nga an le i’n, afin Ɲanmiɛn bɔbɔ seli kɛ: “N su yaciman wɔ, n su kpɔciman wɔ mlɔnmlɔn.” I sɔ’n ti, e tra e awlɛn e kan ndɛ nga be klɛli i kɛ: ‘E Min Ɲanmiɛn’n yɛ ɔ ti n ukafuɛ ɔ, srɛ kunman min. ?Nzu yɛ sran kwla yo min ɔn?’’ (Ebre Mun 13:5, 6) Yɛ Famiɛn Davidi seli kɛ: ‘Kɛ ɔ fɛ i min bakan nun lele mɔ m’an fa yo oke yɛ’n, n nin a wunman kɛ Ɲanmiɛn w’a yi i sran kpa’n i ase le. N nin a wunman kɛ i mma mun annzɛ i anunman’m be su srɛsrɛ aliɛ be sin le.’—Jue Mun 37:25.
Klistfuɛ klikli’m be kle e ajalɛ
7. ?Ngue like yɛ Zezi seli i sɔnnzɔnfuɛ mun kɛ be yo i jasin fɛ’n bolɛ’n nun ɔn? ?Yɛ ngue ti yɛ i sɔ liɛ’n nin i fata ɔ?
7 Zezi kleli i akoto mun junman’n i dilɛ kpa, kpɛkun i sin’n, ɔ sunmannin be Izraɛli nvle’n nun naan be ko bo jasin fɛ’n. I waan be se kɛ: ‘Ɲanmiɛn i sielɛ blɛ’n w’a mantan.’ Nanwlɛ, jasin sɔ’n yo fɛ dan! Zezi Klist m’ɔ ti Mɛsi’n nin Famiɛn’n, ɔ o be afiɛn. Kɛ mɔ Zezi i akoto’m be kplinnin be ɲin kpa be dili Ɲanmiɛn i junman’n ti’n, Zezi seli be kɛ be lafi su kɛ Ɲanmiɛn nían be lika. Ɔ maan, ɔ seli be kɛ ‘nán maan be fa like fi tra nun, kpɔnman o, trɔ o, like diwa o, sika o, yɛ nán maan be fa tralɛ nɲɔnnɲɔn. I waan awlo kwlaa nga be wlu nun’n, be tran lɛ lele saan be kɔlɛ a ju.’ (Matie 10:5-10; Lik 9:1-6) Zoova yó maan be niaan Izraɛlifuɛ’m bé mán be ninnge nga be di be yalɛ’n, afin aofuɛ’m be nun sɔlɛ’n ti Izraɛlifuɛ’m be nzuɛn.
8. (a) ?Ka naan Zezi w’a wu’n, jasin fɛ’n bolɛ’n i su ndɛ benin yɛ ɔ kan kleli i sɔnnzɔnfuɛ mun ɔn? (b) ?Sanngɛ, ngue like yɛ ɔ fata kɛ Zezi i sɔnnzɔnfuɛ’m be mɛn dilɛ nun’n, be fa sie like kwlaa ɲrun ɔn?
8 Sanngɛ i sin’n, kɛ Zezi i wulɛ’n mantannin koko’n, ɔ seli i sɔnnzɔnfuɛ mun kɛ, kɛ ɔ́ kɔ́ i ɲrun’n lika’n wá káci. Kɛ mɔ ngbɛnngbɛn’m be klun su jɔman junman nga be di’n i su’n ti’n, sran’m be su sɔman be nun klanman Izraɛli lɔ kun. Asa ekun’n, ɔ cɛ kaan bé wá kán Ɲanmiɛn Sielɛ’n i ndɛ klé nvlenvle’m be nunfuɛ mun. Siɛn’n, ɔ fata kɛ be fa “pata” nin “trɔ.” Sanngɛ, ɔ fata kɛ be dun mmua fa be wun man Zoova maan ɔ sie be, yɛ be yo i klun sa’n. Kpɛkun ɔ fata kɛ be lafi su kɛ Ɲanmiɛn rá be ɲin mɔ be mian naan b’a ɲan be nuan nun aliɛ nin be wun tralɛ’n i su.—Lik 22:35-37.
9. ?Kannzɛ bɔɔ Pɔlu kunndɛli i sa nuan like’n, sanngɛ wafa sɛ yɛ ɔ dun mmua fɛli i wun mannin Ɲanmiɛn maan ɔ sie i ɔ? ?Yɛ ajalɛ sɔ’n i su afɔtuɛ benin yɛ ɔ mannin ɔn?
9 Zezi i afɔtuɛ’m be su falɛ’n nun’n, akoto Pɔlu kleli ajalɛ kpa. Pɔlu i mɛn dilɛ’n takali jasin fɛ’n bolɛ’n su. (Sa Nga Be Yoli’n 20:24, 25) Kɛ Pɔlu kɔ́ lika kun kó bó jasin fɛ’n, ɔ wu tannin sua yɛ ɔ fa niɛn i bɔbɔ i wun lika ɔ. W’a minndɛman kɛ sran uflɛ niɛn i lika. (Sa Nga Be Yoli’n 18:1-4; 1 Tɛsalonikfuɛ Mun 2:9) Sanngɛ, sɛ klolɛ mɔ i wiengu’m be klo i’n ti be sɔ i nun klanman naan be cɛ i like’n, ɔ kplin i sɔ liɛ’n su. (Sa Nga Be Yoli’n 16:15, 34; Filipfuɛ Mun 4:15-17) Pɔlu wlali Klistfuɛ’m be fanngan kɛ nán maan jasin fɛ’n bolɛ’n ti’n, be ɲin kpa be awlobo junman dilɛ’n su. Sanngɛ, maan be di be junman fanunfanun mun ngwlɛlɛ su. Ɔ wlali be fanngan kɛ be di junman, be klo be awlobofuɛ mun naan be cɛ be wiengu’m be like. (Efɛzfuɛ Mun 4:28; 2 Tɛsalonikfuɛ Mun 3:7-12) Ɔ wlali be fanngan kɛ be fa be wla’n guɛ i Ɲanmiɛn su, naan nán be lafi aɲanbeun ninnge’m be su. Kpɛkun, ɔ wlali be fanngan naan be mɛn dilɛ wafa’n kle kɛ be wun ninnge nga be ti nanndoliɛ kpa’n be wlɛ. Kɛ nga Zezi kleli’n sa’n, ɔ fata kɛ be dun mmua fa be wun man Ɲanmiɛn maan ɔ sie be yɛ be yo i klun sa’n.—Filipfuɛ Mun 1:9-11.
Maan e dun mmua fa e wun man Ɲanmiɛn maan ɔ sie e titi
10. ?Kɛ be se kɛ be dun mmua fa be wun man Ɲanmiɛn maan ɔ sie be’n, i bo’n yɛle benin?
10 ?Wafa sɛ yɛ e bo Ɲanmiɛn Sielɛ’n i jasin fɛ’n e kle e wiengu mun ɔn? Kɛ e sa kwla ju lɛ’n, ɔ nin wafa nga e fa si ye ju lɛ’n, i su yɛ e nian e bo jasin fɛ’n niɔn. Nán maan e wla fi su kɛ Zezi a seman kɛ: ‘Sɛ amun leman like fi yoman’n yɛ amun fa amun wun man Ɲanmiɛn maan ɔ sie amun ɔn.’ Kɛ m’ɔ si kɛ Ɲanmiɛn Sielɛ’n ti cinnjin kpa’n ti’n, ɔ kɛnnin i Si’n i klun ndɛ’n seli kɛ: ‘An dun mmua fa amun wun man Ɲanmiɛn, maan ɔ sie amun’ titi. (Lik 12:31) Kannzɛ bɔbɔ ɔ fata kɛ e di junman naan y’a nian e bɔbɔ nin e awlobofuɛ’m be lika’n, sanngɛ sɛ e lafi Ɲanmiɛn su’n, e mɛn dilɛ’n táka Sielɛ’n i jasin fɛ’n junman nga Ɲanmiɛn mannin e’n su. Kpɛkun blɛ kunngba’n nun’n, é dí e awlo nun junman mun.—1 Timote 5:8.
11. (a) ?Wafa sɛ yɛ Zezi kleli kɛ é Ɲanmiɛn Sielɛ jasin fɛ’n bolɛ nun’n, e ngba e junman nga é dí’n, ɔ su yoman kun ɔn? (b) ?Sran kun i junman ng’ɔ kwla di’n, ɔ fin ngue?
11 Sran wie’m be kwla cɛ Ɲanmiɛn Sielɛ’n i jasin fɛ’n bolɛ nun tra be wiengu mun. Asiɛ wafawafa’m be su sunnzun ase nga Zezi fali’n nun, ɔ kleli kɛ be kwlaa nga be awlɛn’n ti kɛ asiɛ kpa’n sa’n, bé sú mma. ?Sanngɛ é sú mma jú nin? Ɔ le sran kun nin i su ndɛ. Yɛle kɛ ɔ le sran kun nin i afuɛ’n, ɔ le sran kun nin i aunkpinndiɛ nun ndɛ. Kpɛkun, ɔ le sran kun nin i awlo nun junman. Sanngɛ, sɛ Ɲanmiɛn Sielɛ’n i jasin fɛ bolɛ’n ti e nnana kpa’n, é kwlá yó ninnge kpanngban.—Matie 13:23.
12. ?Ngue like kpa yɛ Ɲanmiɛn sulɛ nun’n, be wla gbanflɛn nin talua’m be fanngan kɛ be fa sie be ɲrun kɛ bé yó ɔ?
12 Sɛ e kunndɛ kɛ e Ɲanmiɛn Sielɛ junman nga e di’n ɔ trɛ’n, ɔ nin i fata kɛ e fa ninnge wie’m be yolɛ’n e sie e ɲrun. Maan gbanflɛn nin talua’m be bu Timote m’ɔ ti Klistfuɛ gbanflɛn juejuefuɛ kun’n i ajalɛ klanman nga ɔ kleli’n, i su akunndan kpa. (Filipfuɛ Mun 2:19-22) Kɛ be ko di suklu ko wie’n, sɛ be fa be wun wlɛ i blɛ kwlaa nun Ɲanmiɛn junman dilɛ nun’n, ɔ ti kpa dan. ?Nɛ́n i ɔ? Sran kpɛnngbɛn’m be kusu, Ɲanmiɛn sulɛ nun’n, be kwla fa ninnge kpa wie mun sie be ɲrun kɛ bé yó.
13. (a) ?Wan yɛ ɔ kle like nga e kwla yo i Ɲanmiɛn Sielɛ junman dilɛ nun’n niɔn? (b) ?Sɛ sakpasakpa e dun mmua fa e wun man Ɲanmiɛn maan ɔ sie e’n, ngue like yɛ i sɔ’n kle ɔ?
13 Nán maan wafa nga aniaan wie’m be di Ɲanmiɛn i junman’n, e kɛn i ndɛ tɛtɛ. Sanngɛ ɔ flunman kɛ e bɔbɔ e lafi Ɲanmiɛn su naan e mian e ɲin e wɔ e ɲrun junman nga e di’n nun. I liɛ’n, like nga e sa kwla ju su’n yɛ é kplín e ɲin é yó ɔ. (Rɔmfuɛ Mun 14:10-12; Galasifuɛ Mun 6:4, 5) Sa ng’ɔ juli Zɔbu su’n kle kɛ Satan waan like ng’ɔ ti e cinnjin kpa’n yɛle aɲanbeun ninnge mun nin pɔɔ nun tranlɛ’n, ɔ nin ninnge nga be ti kpa man e’n. Nán e bɔbɔ e ngunmin e wun akunndan mɔ e bu’n i ti yɛ e su Ɲanmiɛn ɔn. Sanngɛ, sɛ sakpasakpa e dun mmua fa e wun man Ɲanmiɛn maan ɔ sie e’n, e kusu é klé kɛ Bae’n ti ato buafuɛ dan kpa sakpa. Kpɛkun, é klé weiin kɛ Ɲanmiɛn sulɛ’n, yɛ e fa sie like kwlaa ɲrun e mɛn dilɛ nun ɔn. Ɔ maan, e ijɔlɛ nin e ayeliɛ nun’n, é klé kɛ e klo Zoova dan kpa naan e suan i sielɛ’n i bo tankaan kpa. Asa ekun’n, é yí i nglo kɛ e klo e wiengu mun.—Zɔb 1:9-11; 2:4, 5; Nyanndra Mun 27:11.
14. (a) ?Ngue ti yɛ jasin fɛ’n bolɛ’n i jajalɛ’n ti kpa man e ɔ? (b) ?Wafa sɛ yɛ Zoova i Lalofuɛ kpanngban be bo jasin fɛ’n niɔn?
14 Sɛ e jaja ninnge nga e yo be’n, i sɔ’n úka e maan é kwlá dí junman dan trá ninnge mɔ e sunnzun kɛ é yó be’n. Zoova bɔbɔ ɔ “kleli blɛ” m’ɔ fa yo ninnge nga i waan ɔ́ yó be’n. (Ezipt Lɔ Tulɛ 9:5; Mark 1:15) Sɛ e kwlɛ i yo’n, ɔ ti kpa kɛ le mɔcuɛ kwlaa nun e sie blɛ kun kɛ é fá bó jasin fɛ’n. Ɔ kwla yo kpɛ kun annzɛ kpɛ sunman le mɔcuɛ kwlaa nun. Mɛn wunmuan’n nun’n, Zoova i Lalofuɛ akpiakpi ya tra su be di Cɛn kunngun atin bofuɛ junman. Cɛn kwlakwla be fa dɔ kɔe nɲɔn be bo jasin fɛ’n. Zoova i Lalofuɛ akpiakpi ya tra su ekun be di titi atin bofuɛ junman. Cɛn kwlakwla be fa dɔ kɔe nɲɔn nin sin be bo Ɲanmiɛn Sielɛ Blɛ’n i jasin fɛ’n. Ngunmin atin bofuɛ mun nin Ngaliɛ difuɛ’m be di dɔ kpanngban kpa Ɲanmiɛn Sielɛ junman’n nun tra be onga mun. Asa ekun’n, blɛ nga asɔnun’n w’a siesieman jasin fɛ’n bolɛ’n i nun’n, e kwla siesie e wun naan y’a bo jasin fɛ’n y’a kle be nga be sie be su’n. (Zan 4:7-15) Kɛ nga e sa kwla ju lɛ’n, ɔ fata kɛ e tu e klun kpa e bo jasin fɛ’n e ju lɛ wie. Afin Zezi seli kɛ: ‘Bé wá kán Ɲanmiɛn sielɛ’n i jasin fɛ nga mɛn wunmuan’n nun naan sran’n kwlaa be ti Ɲanmiɛn ndɛ’n. I sin yɛ mɛn i awieliɛ’n ɔ́ jú ɔ.’—Matie 24:14; Efɛzfuɛ Mun 5:15-17.
15. ?Ngue ti yɛ e bu i kɛ ndɛ ng’ɔ o 1 Korɛntfuɛ Mun 15:58 nun’n, ɔ ti su ɔ?
15 Asiɛ’n i lika kwlaa nun’n, Zoova i Lalofuɛ’m be bo yo kun be di junman sɔ’n. Be fa Biblu’n nun ndɛ nga su: ‘An jran kekle, nán amun wun usu amun, an di e Min’n i junman’n kpa wɔ amun ɲrun tititi. Maan an si kpa kɛ like nga e yo man e Min’n, ɔ su kaman ngbɛn.’—1 Korɛntfuɛ Mun 15:58.
I nun flanlɛ
• ?Kɛ Zezi seli kɛ ‘e dun mmua fa e wun man Ɲanmiɛn, maan ɔ sie e’ titi’n, ngue like yɛ ɔ seli kɛ e fa sie i siɛn ɔn?
• ?E bɔbɔ nin e awlobofuɛ mun e aliɛ nin e tralɛ ɔ nin e lawlɛ kunndɛlɛ’n nun’n, akunndan benin yɛ ɔ fata kɛ e bu ɔ? ?Wafa sɛ yɛ Ɲanmiɛn úka e ɔ?
• ?Ɲanmiɛn Sielɛ’n i junman benin yɛ e kwla di ɔ?
[Foto i su ndɛ, bue 107]
Andɛ’n, ka naan mɛn’n i awieliɛ’n w’a ju’n, Zoova i Lalofuɛ’m be bo jasin fɛ’n nvle kwlaa nun.