LIKE SUANLƐ 03
?A kwla lafi Biblu’n nun ndɛ’n su?
Biblu’n kan sa nga bé wá ju e ɲrun lɔ’n be ndɛ, yɛ ɔ man e afɔtuɛ wie mun. Atrɛkpa’n a kunndɛ kɛ á sí Biblu’n nun ndɛ’n. Sanngɛ a kunndɛman kɛ be laka ɔ. ?A kwla fa ɔ wla gua lalafuɛ fluwa sɔ’n i nun ndɛ’n, ɔ nin i nun afɔtuɛ’m be su? ?Ndɛ nga Biblu’n kan’n ɔ kwla yo e ye andɛ? ?E kwla lafi e ɲrun lɔ sa’m be su ndɛ ng’ɔ kan’n su? Sran kpanngban be lafi su. ?Yɛ ɔ li, a lafi su wie?
1. ?Biblu’n nun ndɛ’n ti nanwlɛ?
Biblu’n bɔbɔ se kɛ ‘i nun ndɛ’n ti nanwlɛ.’ (Akunndanfuɛ’n 12:10) Sa ng’ɔ kan be ndɛ’n be juli sakpa. Yɛ sran ng’ɔ kan be ndɛ’n be trannin nguan nun sakpa. (Kanngan Liki 1:3; 3:1, 2 nun.) Be nga be suan laa sa’m be su like’n be nun kpanngban be seli kɛ sa nga Biblu’n kan be ndɛ’n be juli sakpa. Kpɛkun sran ng’ɔ kan be ndɛ’n be trannin nguan nun sakpa. Yɛ lika ng’ɔ kan be ndɛ’n be o lɛ laa sakpa.
2. ?Ngue ti yɛ e kwla se kɛ Biblu’n nun ndɛ’n ɔ timan ngua ndɛ-ɔ?
Biblu’n dun mmua kannin sa wie’m be ndɛ ka naan sran’m b’a si sa sɔ’n mun. I wie yɛle kɛ ɔ kannin ndɛ wie mɔ blɛ li yɛ siansifuɛ’m b’a wun be wlɛ-ɔ. Sa sɔ mɔ Biblu’n kan be ndɛ’n, blɛ mɔ bé klɛ́ Biblu’n nn sran’m be te si be su akplowa. Sanngɛ andɛ siansifuɛ’m be wunnin kɛ ndɛ nga Biblu’n kannin’n ti su. Ndɛ nga Biblu’n kan’n, “be kwla lafi be su blɛ kwlaa nun.”—Jue Mun 111:8.
3. ?Ngue ti yɛ e kwla lafi su kɛ sa nga bé wá jú mɔ Biblu’n kan be ndɛ’n bé kpɛ́n su-ɔ?
Biblu’n dun mmua kannin ‘sa nga bé wá jú’n’ be ndɛ. (Ezai 46:10) Ɔ dun mmua boli sa kpanngban su ka naan b’a ju, yɛ sa sɔ’m be juli sakpa. Asa ekun’n, sa nga be ju e blɛ liɛ nga nun’n, Biblu’n dun mmua kannin be ndɛ. Like suanlɛ nga nun’n, é wá fá e ɲin é síe i ndɛ wie mɔ Biblu’n kannin be’n, be su. Wafa nga ndɛ sɔ’m be kpɛnnin su’n ɔ ti abonuan.
SI NDƐ’N NUN KPA EKUN
Andɛ siansifuɛ’m be wunnin kɛ ndɛ nga Biblu’n kan’n ti su. Maan e fa e ɲin e sie i sa wie mɔ Biblu’n dun mmua kannin be ndɛ’n be su.
4. Siansifuɛ’m be ndɛ mɔ be nin Biblu’n nun ndɛ’n be kɔ likawlɛ’n
Laa’n, sran kpanngban be bu i kɛ asiɛ’n taka like kun su. An bo VIDEO’N.
Maan e nian ndɛ nga be kɛnnin i Zɔbu fluwa’n nun’n i afuɛ kɔe 3.500 yɛ’n. An kanngan Zɔbu 26:7 nun, i sin’n an koko kosan yɛ’n i su yalɛ:
?Kɛ Biblu’n se kɛ asiɛ’n sende lɛ sa ngbɛn’n, ngue ti yɛ ndɛ sɔ’n ti abonuan-ɔn?
Kɛ wia’n bo nzue ba’m be su’n, nzue’n kaci kpukpuwa kɔ nglo lɔ. I sin’n kpukpuwa sɔ’n sɛ i sin tɔ kɛ nzue sa ekun. Koko nun wa yɛ sran’m be wunnin i sɔ liɛ’n i wlɛ-ɔ. Sanngɛ nian ndɛ nga Biblu’n kannin i afuɛ akpi kpanngban yɛ’n. An kanngan Zɔbu 36:27, 28 nin Akunndanfuɛ’n 1:7 nun, i sin’n an koko kosan yɛ’m be su yalɛ:
?Ngue ti yɛ nzue’n i tɔlɛ’n i su ndɛ nga Biblu’n kan’n ɔ yo ɲɛnmɛn-ɔn?
?Kɛ a bu ndɛ sɔ’n i su akunndan’n, wafa sɛ yɛ a bu Biblu’n i nun ndɛ’n niɔn?
5. Biblu’n kannin sa cinnjin wie’m be ndɛ ka naan b’a ju
An kanngan Ezai 44:27–45:2 nun, i sin’n an koko kosan yɛ’n i su yalɛ:
?Babilɔnin klɔ’n i sacilɛ’n i su ndɛ benin yɛ Biblu’n kannin m’ɔ dili afuɛ 200 ka naan w’a kpɛn su-ɔ?
Be nga be suan laa sa’m be su like’n, be wunnin kɛ Sirisi m’ɔ ti Pɛɛsi famiɛn’n, ɔ nin i sonja’m be fali Babilɔnin klɔ’n afuɛ 539 ka naan Klisifuɛ’m be blɛ’n w’a ju. Be yoli maan nzue ng’ɔ sasa klɔ’n sinnin lika uflɛ. Kɛ bé wlú klɔ’n nun’n nn i anuan’m be ti tikewa, ɔ maan b’a kunman alɛ naan b’a fa klɔ’n. Andɛ nin andɛ’n Babilɔnin klɔ’n ti klɔ nvuɛn. Ɔ ti sɔ i afuɛ 2.500 yɛ. Nian ndɛ nga Biblu’n kannin’n.
An kanngan Ezai 13:19, 20 nun, i sin’n an koko kosan yɛ’n i su yalɛ:
?Wafa sɛ yɛ Biblu’n nun ndɛ sɔ’n kpɛnnin su-ɔ?
Babilɔnin klɔ nvuɛn’n. Ɔ o Iraki nvle’n nun lɔ.
6. Sa nga be ju andɛ’n Biblu’n dun mmua kannin be ndɛ
Biblu’n flɛ blɛ nga e o nun yɛ’n kɛ “mɛn’n i awieliɛ blɛ.” (2 Timote 3:1) Nian blɛ sɔ’n i su ndɛ nga Biblu’n kan’n:
An kanngan Matie 24:6, 7 nun, i sin’n an koko kosan yɛ’n i su yalɛ:
?Sa benin mun yɛ bé wá jú mɛn’n i awieliɛ blɛ’n nun mɔ Biblu’n kan be ndɛ-ɔ?
An kanngan 2 Timote 3:1-5 nun, i sin’n an koko kosan yɛ’m be su yalɛ:
?Biblu’n waan mɛn’n i awieliɛ blɛ nun’n sran’m be ayeliɛ’n yó sɛ?
?Sran’m be ayeliɛ nga be kannin be ndɛ’n, benin yɛ ɔ bɔbɔ a sieli i nzɔliɛ-ɔ?
SRAN WIE’M BE WAAN: “Biblu’n nun ndɛ’n ti ngua.”
?Kɛ a niɛn i sa’n, ngue yɛ ɔ kle kɛ be kwla lafi Biblu’n nun ndɛ’n su-ɔ?
NDƐ’N I KPƆLƐ BOLƐ
Be nga be suan laa sa’m be su like’n, ɔ nin siansifuɛ mun, ɔ nin Ɲanmiɛn nuan ijɔfuɛ’m be kwlaa be ndɛ’n kle kɛ a kwla lafi Biblu’n nun ndɛ’n su.
Ndɛ’n i nun flanlɛ
?Sa nga Biblu’n kannin be ndɛ’n be juli sakpa?
?Ndɛ benin yɛ Biblu’n kannin m’ɔ nin siansifuɛ’m be ndɛ’n kɔ likawlɛ-ɔ?
?A lafi su kɛ Biblu’n kwla kan sa nga bé wá jú e ɲrun lɔ’n be ndɛ? ?Ngue ti-ɔ?
NDƐ WIE MUN EKUN
?Biblu’n nun ndɛ’n nin ndɛ nga siansifuɛ’m be kan’n, be sansan be wun?
“?Siansifuɛ’m be ndɛ’n ɔ nin Biblu’n nun ndɛ’n be kɔ likawlɛ?” (jw.org su ndɛ)
?Mɛn’n i awieliɛ blɛ nun’n sa benin mun yɛ bé jú-ɔ?
“Biblu’n nun ndɛ nsiɛn mɔ be su kpɛn su dɔ nga su’n” (Sasafuɛ Tranwlɛ’n nun ndɛ)
Glɛki’m be famiɛn diwlɛ’n i su ndɛ nga Biblu’n kannin’n ɔ kpɛnnin su.
“Ndɛ nga Ɲanmiɛn nuan ijɔfuɛ’m be kannin’n” ɔ wla fanngan (5:22)
Biblu’n nun ndɛ wie mɔ be kpɛnnin su’n ɔ ukali bian kun naan w’a kaci i akunndan’n.
“Laa’n n lafiman su kɛ Ɲanmiɛn o lɛ” (Sasafuɛ Tranwlɛ’n, afuɛ 2017, No. 5)